MÁFIYU 7
7
Jísu galambongí kɔwɔ́ato nungáá vékaa waalévendai wa
(Lúu 6:37-38,41-42)
1Jísu i mɔɔ ɣɛi ti w̃a, “A waá nungáá vékaa waaléve ngáá kɛ taa vélei. Ná lɔ́ áá kɛ́ Ngalá bɛ́lɛ nɔ ɛ́i wú wááleve ngáá kɛ wáá vélei. 2Sífaa, Ngalá ngáá wú wááleve kíya nɔ́ɔ jɔ́ wáá nungáá vékaitii mbaaléve. Laáva sí wáá gitó mba wáá nungáá vékaitii mbaaléve, kɛɣɛ́lai lɔ nɔ́ɔ jɔ́ Ngalá ngáá gitó mba laá bɛ́lɛ nɔ í wú wááleve. 3Ndeénii le yáá kaa kúlo kw̃ɛ́ɛ́ngi lɔ í mbálai yaah̃ú kɛ yɛ́i wolíɣɛ ngulú búsa wálai w̃a áá ɣɛ́ lááni í ndá yááh̃ui w̃a? 4Yáá ɣéle ɣɛ́ náa í mbálai w̃a, ‘Yí vélei kái bɛlɛ́ ngí kaa kúlo kw̃ɛ́ɛ́ngi gúla í yááh̃u,’ ná ngulú búsa wálai áá ɣɛ́ lááni í ndá yááh̃ui w̃a? 5Yá ɣéle ngulu búsa wálai gúla lɛ́ɛ í ndá yááh̃ui w̃a hése, ná lɔ́ áá kɛ yí ỹándai lɔ kpál̃au ngáá yí kaa kúlo kw̃ɛ́ɛ́ngi gúla náa í mbálai yaah̃ú, yɛ́i yí ngáá faa lá mɔ́ɔ yaah̃ú kɛ́ ɛí ɣɛ í líí h̃u.
6Sí fíli í ná Ngalá fááw̃a, waá fé kékeaitii mbɛ, sífaa taá vóte nɔ́ɔ tí laa lɛ́ wú wú. Ŋani h̃ɔ́w̃ɔ bangɔ́ fíli kulangɔ́ ngáá góóli, waá píli búbuaitii mbɛ, sífaa taá gɔwɔ́ lóo loó nɔ́ɔ ma.”
Ngalá ngáá ŋani vandá hé sítii ngeyá taá mɔɔní fááw̃a
(Lúu 11:9-13)
7Jísu i ɣɛ ti w̃a, “A Ngalá mɔɔní ŋani haáw̃a, aa fe wú yáa. A yakpá wú ŋani wɔlí Ngalá ngeyá, aa fe wú yáa. A Ngalángi góngi laa lúba, aa ndaawó wú yɛ́. 8Sífaa, nuí fíli áá Ngalá mɔ́ɔ́ni ŋani haáw̃a, maa w̃ɔ́i aa maahɔ́lɔ. Nuí fíli pá áá ŋani wɔlí Ngalá ngeyá, aa fe maa w̃ɔ́i yaá. Nuí vá áá Ngalángi góngi laa lúba, aa ndaa wó maa w̃ɔ́i yɛ. 9Wɛ́i wú ngáá ndoú kɛ́ɛ́ɣɛaitii, wú ta fíli wáá kɔtuí he wú lói yaá ná áá wú w̃ɔ́ɔ́ni bilé háaw̃a? 10Baa wáá nyakugáálii he ngeyá ná áá wú hɛ́li nyɛɛ hááw̃a? 11Kɛ kíya bɛ́lɛ wú ngáá nuu ỹɔ́u ỹɔ́ungaa, kɛ́ wú náá wɔlɔ́ kíya wáá ŋani vandá hé wú léngaitii ngeyá, kɛlaa maa wú Kɛ́ɛ́ɣɛ Ngalá í ngelegóóh̃u, laa ɣéle p̃ɛ́ɛ́ aa ŋani vanda hé bih̃í sítiini ngeyá taá mɔɔní faaw̃a!
12Faalɔ, a wú mbála nuu búsaitii suuhóu kɛ kíya wáá ɣɛ́ lói ti wú h̃úúhou. Bɔw̃álale savaí Ngala ngí féni Muusé yaá ɛ́ɣɛ kalambongí Ngalá ndaa háá lé mbélaitii tí mbóni, ti h̃úúgulamai w̃úl̃ɔ.”
Geéti laa bɛ́ɛ́ngɔi
(Lúu 13:24)
13Jísu i mɔ́ɔ́ ɣɛ ti w̃a, “A wala geéti laa bɛ́ɛ́ngɔi la, bɔw̃álale, geétii sí í njahááma vélei, ndaa wɔ́ɔ́lɔngɔɔ lé. Peleí vá í lííngɔ í ló njahááma wá, suuhíyalai aa baní, laáva nuu bíh̃iw̃aa lɔɔ híya ngáá peleí ná. 14Kɛ́ geétii í peleí sí h̃u áá lí tɔɔỹaá lɛɛh̃úi ŋál̃a, ndaa bɛ́ɛ́ngɔɔ lé, aáva maa vélei h̃uu híyalai bangɔ́ɔ́ lé. Nungáitii pá taa pélei sí lɔ, taá bíh̃i.”
Wáá ɣɛ́ nungáitii kɔ́lɔ ti gɛɛhɔ́ngi wa
(Lúu 6:43-44; 13:25-27)
15Kɛ Jísu í mɔ́ɔ ɣɛa ta, “A w̃ááh̃u béle ngáá sítii taá nde ngáá tiyá lɔ́ ngáá Ngalá ndaa háá lé mbélaa kɛ́ ɛi ɣɛ ngáá tɔɔỹaá. Sífaa ná taa ɣɛ́a vá wu yelé, taá ɣɛ ngáá mbaala ɣɛ kíli ti luwúi w̃a, kɛ́ ti h̃úú vélei ti ɣɛ kíli aa ɣɛ ngáá fula húwa ỹɔu ỹɔungaa. 16Wáá ɣɛ́ ti wɔlɔ́ ti gɛɛhɔ́ngi wa. Tɔɔỹáa hááw̃a, Gilépi ɛi wa ngali ngáli ngulu ya kɛlaa maa féki ɔ́ɔ́ wa ngali ngáli ngulu ya. 17Ngimɔ́ɔ́ í na, ngulúi fíli faa ɛ́i ɣɛ́ mba, ngi wángi áá héi nga aa ɣɛ vaní, kɛ́ ngulúi fíli faa áá ɣɛ́ mba, ngi wángi áá héi nga ɛi ɣɛ vaní. 18Kɛ́ ngulúi fíli faa ɛ́i ɣɛ́ mba, ngi wá nyɔ́u ỹɔ́u ngɛi héi nga. Ngulúi sí va faa áá ɣɛ́ mba, ngi wá pánda ɛi heí nga. 19Aáva ngulúi fíli ngí wá pánda ɛ́i ɣɛ́ héini nga, taá téve, tí pilí ngɔmbuí ya. 20Ná lɔ́ í kɛ́ngɔ ngáá nde wú w̃á ngáá wáá ɣɛ́ ti wɔlɔ́ ti gɛɛhɔ́ngi wa.
21Nuí kpɛ́lɛɛ táa le taa tóli ngáá ‘Kawálai, Kawálai’ tɔɔ ɣɛ́ taá vá ɣɛ́ma Ngalángi w̃ásandai wu, kɛ nɔ́ɔ léi sítii taa sítii kɛ ní Kɛ́ɛ́ɣɛ lóngɔ la lɛ́i í ngelegóóh̃u. 22Ná fóloi áá fóloma Ngalá ngáá vá nungái kpɛ́lɛɛ kɔsɔ́ma, ti bih̃íw̃aa taá ɣɛ́ má, ‘Kawálai, Kawálai, kɛ́mbɛ ni ɣɛ́i naá Ngala ngói le í lááheingi h̃u? Kɛ́mbɛ ni ɣɛ́i naá ỹína nyɔítii téve nungáitii polú í lááheingi h̃u ɛ́ɣɛ ni ɣɛ́i naá káámaa haa bih̃íw̃aa ɣɛ í lááheingi h̃u?’ 23Kɛ́ nyáá vá ngáá ɣɛ́ ti w̃a, ‘Nápa ngáá ɣɛ́i wú wɔ́lɔ. A hiɣe ngááh̃u wɛ́i wú ngáá nyaama yélaitiini!’ ”
Faanɛ́ɛ́ngi kɔwɔ́ato pɛlɛ́ ló mbélaa félengɔitii mba
(Lúu 6:47-49)
24Jísu í mɔ́ɔ́ ɣɛ ta, “Náá hááw̃a, nuí fíli áá ndáá wói sítii mɛni í híya ngáá ti ye, aa ɣɛ gulaí ngáá siỹɛndópoi ki máángɔ í ɣɛ́i lá, í ngi vɛ́lɛi lóni kɔtuí w̃a. 25Ná njɛí i wái ká ka, njɛítii tí he, ná vólu, fɛfɛ suubangɔ́ i vaí í héi pɛlɛ́i ná wa, kɛ́ aa wolói bɔw̃álale tongɔ́ ɣɛi lá kɔtuí w̃a.
26Kɛ́ nuí fíli áá ndáá wói sítii mɛni aáva ɛi híya ngáá ti ye, aa ɣɛ gulaí ngáá tamál̃a síỹɛndopoi sí í ngi vɛ́lɛi lóni kahaí h̃u, 27aáva ná njɛí í wáni ká ká, maa yɛ́hengi, ɛ́ɣɛ fɛfɛ suubangɔ́i í vaí í maa vɛ́lɛi ná wolói, kpɛ́lɛɛ í váhai fáhai!”
Jísu i kalambongí wói ngáá kpɔwɔ́ bɔ́wɔ yákpangi
28Ná Jísu í vílani faí sítiini ndemá, faŋaí gíndaa vílingɔ i ɣɛi lá ngáá kíya í kalambongí wóni ngáá ti ye, 29bɔw̃álale ngi gálambongi ɣɛ́ kíli aa ɣɛi ngáá kíya kaamɔítiini Ngala sávai hááw̃a ti ndái ɣɛ kíli. Kɛ́ laá ɣéle, i kalambongí wóni ngáá wumaa yákpa.
Currently Selected:
MÁFIYU 7: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000