MÁFIYU 22

Faanɛ́ɛ́ngi kɔwɔ́ato nyah̃á wɔ́li kúú wuyandái wa

(Lúu 14:15-24)

1Jísu i yɛpɛní mɔ́ɔ́ ti yelé faanɛ́ɛ́ngaitii su, i ɣɛ ta, 2“Ngalángi w̃ásandai gúlangɔɔ lé nɔ́ɔ ngáá faanɛ́ɛ́ngi sí ɣɛ́ kíli. Masa ngílaa tɔ́ wɔ́lɔ í ɣɛ́i na, i w̃aahéi wóni ngi h̃íỹɛndou loí ỹáh̃a wɔlí kuu wuya fái w̃a. 3Nungái sítiini í ɣɛ́i ti lolíni nyah̃á wɔ́li kúi náa hááw̃a, i ngi bɔ́ilopoaitii tɔveí ngáá tí ndé ti w̃a ti vá, kɛ́ táa kɛ́ni tɔɔ vá. 4Kɛ i mɔɔ bɔ́ilopoa vekaítii tɔvengá ngáá keela woí sí, i ɣɛ ti w̃a, ‘A nde sítii ma ngí tí lolíngɔ nyah̃á wɔ́li kúi w̃a ngáá, ní lói ỹáh̃a wɔlí kúi i folónga ma. Nika hinái ɛ́ɣɛ nika yivói sí mbɔɔlɔngɔ́ saɣa haɣángɔɔ lé náa, aáva kpɛ́lɛɛ kpátɛngɔ lé náa. A nde ti w̃a ti vá nyah̃á wɔ́li kúi w̃a!’ 5Kɛ́ sítii í tí lolíni, taá béɣe pílini su, kɛ́ tí liiní waa háá w̃a. Ngiláángi i liiní ngi báálai h̃u, pekaí í lí ngi yáawo ɣɛmái. 6Pekaítii pá tí bɔ́ilopoaitii suuhóu kíli ỹɔ́u wóni, tí tí váa. 7Masangí liiỹáw̃al̃angɔ i ɣɛi lá ngwala. Faalɔ, i ngi hóyaitii tɔvení tí lí, tí nuu váa mbélai nátii paa, tí tí láá walaí w̃ɔ. 8Kɛ i ngi bɔ́ilopo vekaítii tolínga, i ɣɛ ti w̃a, ‘Ní lói ỹáh̃a wɔlí kúi i folónga náa ma, kɛ́ nungái sítii ngí tí lolíngɔ taá kúlaɣɛi ngáá nungáá vaa hááw̃a. 9Faalɔ, a lí pele walái w̃a, nungái sítii fíli wáá tí lɔ, wú tí lolí kuí háaw̃a.’ 10Aáva, bɔ́ilopoaitii tí liiní pele waláitii ma tí nungáitii kpɛ́lɛɛ ngátɛ mba tɔ́ɔ́ ti lɔ, nungái sítii ti ɣɛ́i ngáá tuva velé ỹɔ́u yelaa, ɛ́ɣɛ tuva velé vánda yelaa, tí lí ngáá ti ye, kɛ nyah̃á wɔ́li kotái wuu laá í hénga kpé ngáá sítii tí tí lolíni.

11Kɛ́ ná masangí í lɛ́ɛ́ni na ngáá sítii í ti loliní í laalí ti w̃a, kɛ i siỹɛ́ ngílaa tɔ́a maayílingɔ aa ɣɛi lá ngáá nyah̃á wɔ́li máá gula. 12Kɛ masangí i ɣɛa ma, ‘Mu mbálai, yí ɣéle lɛɛngɔ́ mbéinda nyah̃á wɔ́li máá gula áá í w̃a?’ Kɛ́ ngoo áá ɣɛ́i maa h̃íỹɛndopoi la. 13Kɛ masangí i ɣɛa ngi bɔ́ilopoaitii ma, ‘A tokoini ngaa kɔwɔ́i h̃uu yíli, wú píli ngitíí ya kpindíí h̃u. Naa lɔ áá ɣɛ́ na, áá wɔ́lɔ, áá laangɔ́lu yámɛ.’ ”

14Jísu i faanɛ́ɛ́ngi sí volúi ɣɛí, i ɣɛ ta, “Nuu bíh̃iw̃aa lólingɔɔ lé, kɛ́ sítii ti yeɣéngɔ ti h̃u, taá bíh̃i.”

Mɔɔningí kɔwɔ́ato pava hendái wa

(Máa 12:13-17; Lúu 20:20-26)

15Kɛ Júsuai sítii taa ɣɛ́ ti w̃a Falósiai ti lɛ́ingaa tí lía tí suubátɛ ngáá ti Jísu w̃ɔɔní kɛinɔɔ́ tí sóu ndaa wóó wa. 16Kɛ tí tí híya polu yeláitii tɛingáá lɔ́vea ɛ́ɣɛ Masangí Hɛ́lɔdi guuwu h̃uu yélai tɛingáá Jísu yelé. Kɛ nátii ti ɣɛ́a Jísu w̃a, “Kaamɔ́ɔ́, ní kɔ́lɔ ngáá yá lɔ́ ngáá tɔɔỹáa w̃ɔ́ɔ́. Yáá kalambongí wó ngáá tɔɔỹaá Ngalángi vélei w̃a nuu búsai hááw̃a, sífaa yáá beɣéi ngáá sí nungáitii taá gisíya la, bɔw̃álale yáá beɣéi nuu yéɣe fááw̃a kɛ kíli h̃u. 17Faalɔ, nde ná ni w̃a, bɛɛ́ lɔ í ngáá í gísiyai? Aá lɔ pele w̃a Ngala sávai h̃u ngáá ní pávai he Lóómi Lɔwɔlɔ́ W̃ása Ngwalaí yáa baa aa pele w̃a?”

18Kɛ́ sífaa Jísu í ɣɛ́i ti gísiyai ỹɔí wɔ́lɔ, i ɣɛi ti w̃a, “Wá lɔ́ ngáá Ngala fáá la mbélaa yaah̃ú kɛ́ aa wú líí h̃u! Ndeénii le wáa ɣɛ́ wú sóu ndáá woo wá? 19A kápangi ɣɛ́ lɛ́ɛ ngáá ngé wáá pavaí hé la.”

Kɛ tí vaá ngáá kápangi ngelé. 20Kɛ i ti w̃ɔ́ɔ́ninga, i ɣɛ ti w̃a, “Ele hootó lɔ́, ná vólu, ele laahéi tɔ́ í kápangi sí w̃a?”

21Kɛ tí ngoo yápotenga, ti ɣɛ́ ma, “Lóómi Lɔwɔlɔ́ W̃ása Ngwalaí.”

Kɛ Jísu i ɣɛa ti w̃a, “Sí hɔ́ɔ́ í Lóómi Lɔwɔlɔ́ W̃asa Ngwalaí hááw̃a, a fe Lóómi Lɔwɔlɔ́ W̃asa Ngwalaí yáa. Sí va í na Ngalá fááw̃a, wú fé Ngalá ngeyá.”

22Ná tí sí ỹɛ́nini, ti gindáá vílingɔ i ɣɛi la ngwala, tiyá va tí ndó na, tí li.

Mɔɔningí kɔwɔ́ato mbuyoɣe saa h̃úú hái wa

(Máa 12:18-27; Lúu 20:27-40)

23Foló ná ná nɔ́ɔ, Júsuai sítii taa ɣɛ́ ti w̃a Sájusiaitii, tiyɛ́i taa ɣɛ́i laní ngáá mbuyoɣe saa h̃úi, tí lɛ́ingaa tí liiní Jísu yelé ngáá tí mɔ́ɔ́ni. 24Ti ɣɛ́i ma, “Kaamɔ́ɔ́, Muusé í ndéngɔ ni w̃a ngáá ná siỹɛ́ ngɛ́i ɣɛ ndóu léni í ló su í há, kɛ ngi ndéɣei ɔɔ ngi ndíyai í ponyah̃ái ná yéɣe kɛinɔɔ́ tí ndengáá le siỹɛ́ngi ná yɛ áá ɣɛ́ náa haaní. 25Ná ná áá ɣɛ, njee koo h̃u ngɔ́felangɔ lɔ wɔ́lɔ ti ɣɛ́i na, ti ngáá siỹɛngáá. Kɛ ti ndíya wálai i nyah̃ái héinga, kɛ́ sífaa taa ɣɛ́i ndoú léni í ló su siỹɛ́ngi í ha, nyáh̃ai ná i walaní ngi ndéɣe yaá. 26Kɛ́ ná bɛ́lɛ nɔ, taá ndóu léi taá nyáh̃ai ná í ló su í ha, nyáh̃ai ná í mɔ́ɔ́ wala ná bélaa gélei yáa, kɛ́ ná bɛ́lɛ nɔ, taá ndoú léi taá nyáh̃ai ná í ló su í ha. Kɛ ngimɔ́ɔ́ ti kpɛ́lɛɛ í ɣɛ́i ngáá ti ye ngáá nyah̃á yiláángi na í ló su ti ngɔ́felangɔ kpɛ́lɛɛ tí ha. 27Ngapúmai náa, nyah̃ái bɛ́lɛ nɔ í ha. 28Kɛ ná ná áá ɣɛ, ná Ngala ngáá saa yeláitii mbuyóɣe sái h̃u, ele lɔ ngi ỹáh̃a áá ɣɛ́ la ti ngɔ́felangɔ h̃u, sífaa, i walaí ti kpɛ́lɛɛ ngeyá?”

29Kɛ Jísu i ti woo yápotenga, i ɣɛ ti w̃a, “Wá lɔɔ lí ngáá ka ka péle, bɔw̃álale wáá Ngalá Kɔ́lɔi yatɔ́ma mba kɛlaa wɔ́ɔ́ ɣɛ́ faa fíli kɔ́lɔ kɔwɔ́ato ngi yákpangi wa. 30Ná Ngala ngáá saa yelái mbuyóɣe sái h̃u, siỹɛ́ kpɔ́ngɔ nyah̃á wá, siỹɛ́ ngɛ́i nyah̃a héi kɛlaa nyah̃á ɔ́ɔ́ wála kɛmbɛ h̃u, kɛ́ ti lúva veléi aa ɣɛ nɔ́ɔ ngáá Ngalángi w̃álekaitii ti ndái ɣɛ kíli tiyɛ́i tɛi ná tá ɣɛ. 31Bɛlɛ́ ná ngí yɛ́pɛ wú yéle kɔwɔ́ato mbuyoɣe saa h̃úi wa. Kɛ́mbɛ wú sí galánga Ngalá ngí ndéi wú w̃a, í ɣɛ́ngɔ ta, 32‘Nyá lɔ ngí ngáá Lébilah̃au ɛ́ɣɛ Áiseni ngaa Jékɔ ti Yálangi’? Aa ngáá Ngalá sítiini faaw̃a ti háángɔ, kɛ́ laá lɔ́ ngáá Ngalá sítiini faaw̃a tí ndɛɛh̃ú h̃ú.”

33Ná faŋaí í sí ỹɛ́nini, ti gindáa vílingɔ i ɣɛi lá kɔwɔ́ato kalambongí wa Jísu í mboní.

Savaí bíkpingi

(Máa 12:28-34; Lúu 10:25-28)

34Ná Júsuai sítii taa ɣɛ́ ti w̃a Falósiai tí mɛniní ngáá kɛ Jísu i kɛ́a ngáá háwu Júsuai sítii taa ɣɛ́ ti w̃a Sájusiai tí bé mɔɔní mbóndai wa, ti lɛ́ingaa tí w̃aakpɔ́i mba, tí lí Jísu yelé. 35Ti tá yiláá i ɣɛi na, i ɣɛi ngáá kaamɔí tá Ngala sávai hááw̃a í féni Muusé yaá, i Jísu w̃ɔɔnií kɛinɔɔ́ í sóu ndaa wóó wa. 36Faalɔ, i ɣɛi Jísu w̃a, “Kaamɔ́ɔ́, bɛɛ́ lɔ́ í ngáá Ngala sávai ngi bíkpingi Ngalá ngí féni Muusé yaá?”

37Jísu i ngoo yápotei, i ɣɛ ma, “ ‘Ló ngáá Ndemɔí í Yálangi ngáá í líi kpɛ́lɛɛ ɛ́ɣɛ í lɛ́ɛ́h̃ui kpɛ́lɛɛ ɛ́ɣɛ gí mái kpɛ́lɛɛ.’ 38Ná lɔ́ í ngáá savaí ngi bíkpingi, laá vá tɔ í ngáá hésendaa havaí. 39Savaí ngi bíkpingi hele kélei gulangɔ́ɔ́ lé nɔ́ɔ ngáá hésendaa geleí. Aáva tɔ ngáá sí, ‘Ló ngáá í mbála nuú búsaitii kíya í lóngɔ ngáá bɔwɔ́.’ 40Savaí kínɛi Ngalá ngí féni Muusé yáa ɛ́ɣɛ Ngalá ndaa háá lé mbélaitiini ti gálambongi, kpɛ́lɛɛ i hɛlɛ́ngɔ sava félengɔi sítii mba.”

Mɔɔningí kɔwɔ́ato Ngalángi Lókolo Mbá W̃ɔ́i wa

(Máa 12:35-37; Lúu 20:41-44)

41Ná Júsuai sítii taa ɣɛ́ ti w̃a Falósiai tí yatɛ́ngɔ í ɣɛ́i lá mba, Jísu i ti w̃ɔ́ɔ́nii, i ɣɛ ti w̃a, 42“Bɛɛ́ lɔ í wú gí ma kɔwɔ́ato Ngalángi Lókolo Mbá W̃ɔ́i wa?”

Tí ngoo yápoteni, ti ɣɛ́ ma, “Masangí Deevé láála loí le.”

43I ɣɛ ti w̃a, “Ndeénii le hɔ́ɔ́ Hɛ́ɛ́ma Ỹínangi yákpangi h̃u, Deevé í Ngalángi Lókolo Mbá W̃ɔ́i lolíi ngáá Ndémɔi? Sífaa i ɣɛi ta,

44‘Ndemɔí Ngalá i ndení Ndémɔi w̃a, i ɣɛ ma,

Hei ngufema ỹándai kpéla ní w̃ásandai h̃u

í ló su kpóloo ngí í wááhilima yélaitii pu í gɔ́wɔ wú.’ ”

45Kɛ Jísu i ɣɛa ta, “Kɛ́ ná Deevé bútei áá Ngalángi Lókolo Mbá W̃ɔ́i lóli ngáá Ndémɔi, kɛ aa ɣele ɣɛ naa ngáá Deevé láála lóu?”

46Nuu yílaa bɛ́lɛ aa hombói ɔ́ɔ́ Jísu w̃ɔɔningí yapóte, laáva, í séi náá folói ná w̃a í lí naa wutúwɔɔ, nuu fíli aa mɔɔ kɔvɔ́i ɔ́ɔ́ Jísu w̃ɔɔní ngáá faa fíli.

Currently Selected:

MÁFIYU 22: KNNT

Highlight

Copy