LÚU 21

Ponyah̃ái Yála kɔngí

(Máa 12:41-44)

1Ná Jísu í ɣɛ́i áá nungáitii ngasɔ́bɛ, i tɔí kpatɛ yélaitii táá tí Yála kɔngí víli Hɛ́ɛ́ma Yála Pɛ́lɛi góvii h̃u Yála kɔ pu nyáákai h̃u. 2Ná vólu, i ponyah̃á bɛ́lɛ tɔ́ni nyaaningɔ́ í ɣɛ́i la í kápa kulo gulo félengɔ víli su. 3Kɛ Jísu i ɣɛa ta, “Ngí tɔ́ɔ́ỹai le wú w̃a, ponyah̃á ỹááningɔi sí, i Ngala kɔ́ngi hénga bih̃í í lɔ́ve nuu vékaitii kpɛ́lɛɛ mbá. 4Sífaa nungái sítii kpɛ́lɛɛ tí tí bátɛitii ta yeɣé ngéɣengɔ nɔ́ɔ maah̃u, tí fé ngáá Ngalá kɔ́ngi, kɛ́ ponyah̃ái sí láa nyaani gílii w̃a, ngeyá wɔ́lingi kpɛ́lɛɛ mil̃a í púnga su ngáá ɔ́ɔ́ ɣɛ́ ɣɛi loí ngeyá ndaa ỹɛɛní hááw̃a.”

Jísu i yɛpɛní kɔwɔ́ato Hɛ́ɛ́ma Yála Pɛ́lɛi wolóndai wa

(Máfiyu 24:1-2; Máa 13:1-2)

5Jísu volú yelái tɛingáá ti ɣɛ́i taa yɛ́pɛ Hɛ́ɛ́ma Yála Pɛ́lɛi wa kɔwɔ́ato pa kíli wa, sífaa tongɔ́ i ɣɛi lá ngáá kɔtu vandá vándaitii ɛ́ɣɛ ŋani vandá vándaitii nungáitii tí féni Ngala mbɛ ngáá ti wúfe lá ma. Kɛ́ Jísu i ɣɛi ti w̃a, 6“Kɔtuí sítiini wúwaa ti lɔ, táingi lɔɔ vá vaamá ngáá ngilá kéle tɔ ɛi lo lááni ngi mbála w̃aah̃u. Kpɛ́lɛɛ aa woló, í vú.”

Faa bɔ́lundai ɛ́ɣɛ faa bámai

(Máfiyu 24:3-14; Máa 13:3-13)

7Jísu volú yélaitii ti mɔ́ɔ́nini, ti ɣɛ́ ma, “Kaamɔ́ɔ́, bele hɔwɔ́ lɔ́ faí sítiini táa vá ɣɛmá yí yɛ́pɛngɔ kɔwɔ́ato ti wa? Ná vólu, bɛɛ́ lɔ́ áá ngakɛ́ kpál̃au ngáá kɛ faí sítii tiyá lɔ́ɔ vá náá ɣɛ́ma?”

8Jísu i ti woo yápoteni, i ɣɛ ti w̃a, “A w̃aah̃ú béle nuu fíli álaa wú yákpolowa. Sífaa nuu bíh̃iw̃aa lɔɔ vá vaamá tíwaa ndááheingi vɛ́lɛ wa, tí yilá ngila fíli taa ɣɛ́ taa ɣɛ ta, ‘Nyá lɔ́ ngí ngáá Ngalángi Lókolo Mbá W̃ɔ́i.’ Ná vólu, ‘Ngetéyangi yákɛɛlɛmai i bɛɛngá náa mba,’ kɛ́ a waa hítɛ ti volú. 9Ná vólu, ná wáá mɛni ngáá kɔɔní tí gúlaa, ná vólu, nungáá taa toow̃aá lápi wɔ, a waa lúwa. Sífaa kɛ fái sítiini tí ɣɛ, kɛ́ ti bɔ́ɔ́ ɣɛ, ngetéyangi yákɛɛlɛmai ɛi va nɔ́ɔ́ ngamá.”

10Jísu i ndiní ngú ma ngáá yɛpɛndáá, i ɣɛ ta, “Híitii taa ɣɛ́ taa lápi ngáá ỹɔw̃ɔ́ ỹɔ́w̃ɔ. Ndɔwɔlɔ́ wú ngiláángi aa ɣɛ áá lápi ngáá ndɔwɔlɔ́ vékai. 11Ɛ́ɣɛ múl̃ɔ ndɔwɔlɔ́i aa ɣɛ áá bɛ́li, íwaa vú su ỹandá kpɛ́lɛɛ kpɛ́lɛɛ. Ná vólu, ndɔlɛí aa hiya hiyá su hááli hááli, ɛ́ɣɛ múl̃ɔ seebɛ́ ỹɔú ỹɔ́ungaitii taá ɣɛ́ taa vɛ́lɛ nungáitii mba ỹandá bih̃íw̃aa. Ná vólu, faa w̃áá luwángɔ wala aa ɣɛ ɛ́ɣɛ múl̃ɔ káámaa haítii taá ɣɛ taa ɣɛ́ ngeleí ya. 12Kɛ́ faí sítiini kpɛ́lɛɛ tɔɔ ɣɛ́ p̃ɛ́ɛ́ ti ɣɛ, nungáitii taa wú hóu, tí faa báma la wú w̃a. Taá lí ngáá wú ye Ngala fɛ́li máákpɔ wotaítii mbuu wútuwɔaitii ngelé wú gɔ́sɔ fááw̃a aáva taa wú víli kpindi vɛlɛ́i wu. Ná vólu, taá lí ngáá wú ye masa ngwálai walaítii ngelé ɛ́ɣɛ masa kúlo gulóaitii. Sí kpɛ́lɛɛ pá taa ɣɛ́ sífaa wú ngáá pólu yélaa. 13Sí va aa kɛ ngáá háwu sí wú kɔlɔ́ kɔwɔ́ato mbá wú súúɣɛ. 14Kɛ́ wálaa liihɛ́lɛ ngáá kɛ kíya wáá vá bɔwɔ́ w̃aahaaléma naa hɔwɔ́i ná w̃a. 15Sífaa nyá bútei ngáá hómbo ngí njɛpɛítii pu wú la, ná vólu, ngí wú gí máá gúla. Wú waahílima yélaitii kéle tɔ tɛ́i hómbo tɔɔ́ ló wú láá wú kɛlaa tɔɔ́ wú w̃ááɣaali. 16Wú lé mbélaitii ɛ́ɣɛ wú ndéɣeni ɛ́ɣɛ wú ndíyangai ɛ́ɣɛ wú wólondaitii ɛ́ɣɛ wú mbálangai taa ndɛɛ háá vɛ́lɛ wú wa kóótiitii su tí ỹaaní wú w̃a aáva taa wú lɛ́ingaa váa. 17Nungáá kpɛ́lɛɛ taá híli ngáá wú ye sífaa nɔ́ɔ wú ngáá pólu yélaa. 18Kɛ́ wú wú mbaa wúndeɣai ta yílaa kéle tɔ ɛi ló su. 19Wú lángi í wú h̃u, a ndi ngu ma lá ngáá hɛmbɛ́ fíli ná ná va ngáá ɣɛ́, wáá kúnafɔ lɛ́ɛ́h̃ui w̃aahɔ́lɔ.”

Jísu i yɛpɛní kɔwɔ́ato Jɛlúsɛl̃ɛ wolondái wa

(Máfiyu 24:15-21; Máa 13:14-19)

20Jísu i mɔɔ ɣɛi volú yélaitii ma, “Ná wáá tɔ Jɛlúsɛl̃ɛ w̃ááyele mbélengɔ ngáá wú wááhilima hóyaitii wáá ɣɛ́ náa kɔlɔ́ ngáá kɛ naa wolóndai i bɛɛngá mba. 21Taíngi ná h̃uu vá, nungái sítiini taa ɣɛ́ Judíya lataí h̃u, kɛ tí w̃aavéla, tí lí ngihéitii su. Nungái sítii pá taa ɣɛ́ Jɛlúsɛl̃ɛ taa h̃u, kɛ tí w̃aavéla. Sítiini pa taa ɣɛ́ kpaalaítii su ɛ́ɣɛ kokóitii nga, tálaa lɛ́ taa h̃u. 22Bɔw̃álale táingi aa ɣɛ ngáá ná faa bámai áá lá Ísulɔ yélaitii ma, kɛinɔɔ́ sí kínɛi pɔnɛngɔ́i Ngala Kɔ́lɔi h̃u, í hítɛ nga. 23Maa hóloitii suu ỹɔ́ungɔ aa ɣɛ la koo ỹah̃áitiini faaw̃a ɛ́ɣɛ koímaitiini. Sífaa Ngalá ngáá faa bá ndá ngeleí sí wuu yélaitii ma ti háá ỹɔítii fááw̃a, í ɣɛ́ ngáá maanɔw̃ɔ́ wála ti w̃a. 24Nungáitii ti lɛ́ingaa taá ló mbowá yá, ti lɛ́ingaa va tí ɣɛ́ ngáá pelesína ndɔwɔlɔ́i kpɛ́lɛɛ kpɛ́lɛɛ su. Nungái sítii pa taa ngáá Júsua taá ló Jɛlúsɛl̃ɛ w̃aah̃u kpóloo í ló su kuí Ngalá ngí tevénga mba í víla.”

Nuu Búsa Goo H̃ú Loí váálai volú

(Máfiyu 24:29-31; Máa 13:24-27)

25Jísu í mɔ́ɔ ɣɛ ta, “Káámaa haa aa ɣɛ ngáá folói, ngalúngi, ɛ́ɣɛ temúleɣaitii. Ngeleí sí wuu yélaitii pa, ti lií áá hówa tí ɣɛ́ ndiihɛ́lɛ ngwala h̃u. Tɛí ɣɛ́ kɔlɔ́ sí taá kɛ́ kɔwɔ́ato fundɛí wá yívoi áá ɣɛ́a mbo ɛ́ɣɛ suungí áá ɣɛ́a gúla. 26Nungáitii taá vúw̃a ngáá nduwái ɛ́ɣɛ ndiihɛlɛ́ngi kɔwɔ́ato sí wá áá vá láma ngeleí sí wúu wa, sífaa ngeleya kɔ́lingaitii kpɛ́lɛɛ taá ɣɛ́ taa lííka lííka. 27Ná h̃úu vá, nungáitii taá nuí síí w̃ɔ́i taa ɣɛ́ ma Nuu Búsa Goo H̃ú Loí lɔ íwaa vá, i njɛ bilíi h̃u, ngakpa i ngeyá, ná vólu, áá hólo míl̃a mil̃a. 28Ná fái sítiini taá pɛ́lɛ naa ɣɛmá, wú yááh̃u í ɣɛ́ péle h̃u bɔw̃álale wú wúmaawo sɔ́wɔi wul̃á áá ɣɛ́ áá bɛ́ɛ́ mba.”

Faa volú hái kɔwɔ́ato féki wúlui wa

(Máfiyu 24:32-35; Máa 13:28-31)

29Jísu i mɔɔ faanɛ́ɛ́ngi sí héini, i ɣɛ ta, “A féki wúlui lɔ́ lɛ́ɛ ɛ́ɣɛ ngulúitii kpɛ́lɛɛ. 30Ná taa ɣɛ́ taa nɛ́ku, wá bútei wáá ɣɛ́ kɔlɔ́ bɔwɔ́ yɛ́ ngáá saw̃aí i bɛɛngá náá mba kílii. 31Aáva ngimɔ́ɔ́ nɔ́ɔ jɔ́ ná wáá fái sítiini tɔ tíwaa ɣɛ́, wáá ɣɛ́ nɔ́ɔ kɔlɔ́ ngáá kɛ Ngalángi w̃ásandai i bɛɛngá mba.

32Ngí tɔɔỹái le wú w̃á, sí h̃uu yéteyangi h̃uú yélai tɛí há í ló su fái sítiini kpɛ́lɛɛ tí ɣɛ. 33Ngeleíni ngaa ndɔwɔlɔ́i taá vááma ɣɛ́ma na kúnafɔ, kɛ́ ndáá wói lɔ ɣɛ́ na kúnafɔ.”

Maah̃u beléngi háwui

34Jísu í mɔ́ɔ ɣɛ volú yélaitii ma, “A w̃aah̃ú belé kɛ́ ná láá le, wú gí máa háitii taá ɣɛ́ ngáá ndiivo kɛɛ́ ɛ́ɣɛ ngeleí sí wu w̃ɔ́ni mɔni fáitii. Aáva folói ná aa gɔɔla wú wá 35kíya nɔ́ɔ ndɛndɛí áá suwaí hóu. Folói ná vá aa ngɔɔlá nuí kpɛ́lɛɛ mbá tí ngeleí sí wu. 36A w̃aah̃ú belé hɔ́wɔ fíli aáva wú Ngala fɛ́li ngáá wú hómbo wú híya fái sítii su táá vá ɣɛ́ma, kɛinɔɔ́ wú hómbo wú ló nuí síí w̃ɔ́i taa ɣɛ́ ma Nuu Búsa Goo H̃ú Loí gakála.”

37Jísu ɔ́ɔ́ lí í kalambongí wo Hɛ́ɛ́ma Yála Pɛ́lɛi góvii h̃u foló fíli má, aáva kpindí fíli ɔ́ɔ́ lí í ỹíi Ɔ́levi Wuluí Yíhei wa. 38Nungáitii pa tɔ́ɔ lí ngelendáá lɛtɛngí, tí wolílo ma Hɛ́ɛ́ma Yála Pɛ́lɛi góvii h̃u.

Currently Selected:

LÚU 21: KNNT

Highlight

Copy