LÚU 18

Faanɛ́ɛ́ngi kɔwɔ́ato ponyah̃ái wa ɛ́ɣɛ masangí

1Kɛ Jísu i faanɛ́ɛ́ngi sí héinga volú yélaitii ma ngáá í ngakɛ́ ngáá ti ye ngáá ti ɣɛ́ táa Ngala fɛ́li táiŋ fíli má tálaa nduwúh̃ugula wa. 2I ɣɛi ti w̃a, “Masa ngílaa tɔ́ í ɣɛ́i na taa tá h̃u, ɛ́i belé lúwa Ngalá kelé tɔ mba, kɛlaa kpɛndɛ ɔ́ɔ́ ɣɛ nuu fíli su. 3Ponyah̃á yílaa pá i ɣɛ tái ná h̃u hɔ́wɔ fíli ɔ́ɔ́ lí masangí sí yéle áá maanɛ́ɛ́nɛ, áá ɣɛ́ ma, ‘Ní háá lɔɔỹaí hé ngéya ni lówah̃u naa ní mbála bɔɔlɔ́ w̃ɔ́i.’ 4Kɛ́ suu í ɣɛ́i gooh̃á ká ka masangí aa kɛní. Kɛ́ í ɣɛi ngáá hɔ́wɔ ta kɛ masangí sí i ɣɛa bɔwɔ́ w̃a, ‘Kíya bɛ́lɛ ngɛ́i lúwa Ngalá mba kɛlaa kpɛ́ndɛ ɔ́ɔ́ ɣɛ́ nuu fíli su, 5kɛ́ sífaa ponyah̃ái sí i bɔlungá ndá ngwala, nyá lɔ́ɔ ngi háá lɔɔỹaí sí hé ngeyá kɛinɔɔ́ ɔ́ɔ́ va ndíí w̃áá ɣɛ tíɣihi ngáá vaalái ngéle hɔ́wɔ fíli.’ ”

6Ndemɔí Jísu i ndiní ngú ma ngáá yɛpɛndáá, i ɣɛ ti w̃a, “A ngoí sí lɔ́ lɛ́ɛ kahá w̃ásangi sí í ndéni. 7Ná vólu, a gisíya lɛ́ɛ́ ngáá Ngalá, wáá kɔlɔ́ ngáá aa ngi vóngai sítii taá fɛ́li kpɔkɔ́ni ngaa ngelendá ti háá lɔɔỹaí hé ti yaá tí lówah̃u taá sítii taá faa bá nda ngi vóngai nátii ma? Baa kɛ aa ngumbú lɛ́i? 8Ngí ndé wú w̃a, aa ti háá lɔɔỹaí he ti yaá ngáá maahulángɔ. Kɛ́ ná nuí síí w̃ɔ́i taa ɣɛ́ ma Nuu Búsa Goo H̃ú Loí áá va, aa nungáá lɔ́ ngeleí sí wu ti langɔ́ ngáá Ngalá?”

Faanɛ́ɛ́ngi kɔwɔ́ato Falósi w̃ɔí wa ɛ́ɣɛ pava gula mɔ́i

9Nungái sítii ti ɣɛ́i laí ngáá bɔwɔ́, í ɣɛ́i ti gí ma ngáá kɛ tiyá lɔ́ ngáá telembo mbélaa, ná vólu, ti yaah̃ú vílingɔ í ɣɛ́i la nungáá vékaitii maah̃u, tiyá lɔ́ Jísu í faanɛ́ɛ́ngi sí héini ti yɛ. 10I ɣɛi ti w̃a, “Siỹɛndópo félengɔ lɔ́ wɔ́lɔ ti ɣɛ́i na, kɛ tí liingá Hɛ́ɛ́ma Yála Pɛ́lɛi góvii h̃u Ngala fɛ́lima. Ngiláángi i ɣɛi ngáá Júsuai sítiini taa ɣɛ́ ti w̃a Falósiai ti tá, pekaí va i ɣɛi ngáá pava gula mɔ́ɔ. 11Falósi w̃ɔ́i i liiní, í lo ỹanda véka gba, í Ngala fɛ́li. I ɣɛi ta, ‘Ngí sɛ́ɣɛɛ gula í w̃á Ngala, ngáá kɛ́ kíli aa ngáá nungáá vékai nátii kpɛ́lɛɛ ti ɣɛ kíli tiyɛ́i ti ngáá ŋuỹá yélaa ɛ́ɣɛ faa ỹɔ́u ɣɛ́ mbélaa ɛ́ɣɛ taá hítɛ nungáá ỹáh̃aitii pólu. Ngí sɛ́ɣɛɛ gula í w̃a kɛ́ kíli aa ngáá kíya pava gula mɔ́i sí ɣɛ kíli í na. 12Ngáá súngi hóu féle ndɔwɔ́i laa lówah̃u, ná vólu, sɔ́lɔ wɔlíngaitii kpɛ́lɛɛ ngáá puu kélei he í yáa.’

13Kɛ́ pava gula mɔ́i laá i liiní, í lo p̃óuma kulo, aa wɔlɛní p̃ɛ́ɛ́ ngeleya, kɛ́ i gilísuu léveni nɔ́ɔ, i ɣɛ ta, ‘Ngalá, mááw̃aanu hóu kái, nyá lɔ́ ngáá faa ỹɔ́u w̃ɔ́ɔ.’ ”

14Jísu i ɣɛi ti w̃a, “Ngí ndé wú w̃a, pava gula mɔ́i i liiní ngi vɛ́lɛ la ngáá ndiilɛí Ngalá ngaah̃ú, kɛ́ Falósi w̃ɔ́i aa ɣɛi h̃íí na, bɔw̃álale nuí fíli áá bɔwɔ́ haa lɛ́nga Ngalá ngáá ngu nganjéi, kɛ́ núi áá bɔwɔ́ wu nganjéi Ngalá ngáá ngu mbúyoɣe.”

Jísuni ngaa ndopóaitii

(Máfiyu 19:13-15; Máa 10:13-16)

15I ɣɛi ngáá hɔ́wɔ ta, nungáitii ti ɣɛ́i taa vá ngáá ndoulálaitii Jísu yelé ngáá í loko vɛ́lɛ ti w̃a, í hɛ́ɛ́ ti yɛ. Kɛ́ ná polú yélaitii ti sí ŋál̃a lɔní, kɛ tí ndéa nungáitii ma ngáá ti bé ná wa. 16Kɛ́ Jísu i ti lolíni yéle, i ɣɛ ta, “A bé ndopóaitii mba ti vá ngéle, a waá ti h̃úúhou, sífaa Ngalángi w̃ásandai lɔ nungáá w̃ááh̃u ti ɣɛ kíli í ngáá ndopoá ɣɛ kíli. 17Ngí tɔ́ɔ́ỹai le wú w̃a, nuí fíli ɛ́i ɣɛ́ lókoheini Ngalángi w̃ásandai wú ngáá ndopo gúlo ɣɛ kíli, Ngalángi w̃ásandai ɛi ɣɛ maa w̃ɔ́i w̃ááh̃u.”

Jísu galambongí kɔwɔ́ato kpatɛ w̃áálii wa ɛ́ɣɛ Ngalángi w̃ásandai

(Máfiyu 19:16-30; Máa 10:17-31)

18Júsuai ti wutúwɔɔ w̃ɔ́ɔ́ yiláá tɔ́ í lííni Jísu yelé, í mɔ́ɔ́ni, i ɣɛ ma, “Kaamɔ́ɔ́ vándai, ndeé lɔ kule í má ngí kɛ ngɔ́ɔ́ ɣɛ́a kúnafɔ lɛ́ɛ́h̃ui w̃aahɔ́lɔ?”

19Kɛ Jísu ngoo yápotenga, i ɣɛ ma, “Ndeénii le yíwaa tóli ngáá nuu vánda? Nuu fíli aa ngáá nuu vánda kɛ léi Ngalá ngilaá kpé í ngáá nuu vánda. 20Yí Ngala saváitii kɔ́lɔ sɔ́ sí í ɣɛ́ngɔ ta, ‘Yaá kɔlɔsiyá mbo, yaá nuu váa, yaá ŋuỹá wó, yaá kahá heele woo le, wufe í njééni ma taa i kɛ́ɛ́ɣɛ.’ ”

21Kɛ siỹɛndópoi i Jísu woo yápotenga, i ɣɛ ma, “Ngí híyanga ngáá savái nátii kpɛ́lɛɛ í séi ní lópo gulo hɔwɔ w̃a.”

22Ná Jísu í fái sí ỹɛ́nini, i ɣɛi ma, “Faa yílaa tɔ́ ná nɛ́nɛ yáá nɛ́ɛ́ kɛní. Yaá wɔ́lingai kpɛ́lɛɛ mááɣɛ, yí maa náholoi he nyaani yélaitii ngeyá. Ná yáá ná ɣɛ, kpatɛ́ yándɔɔlɔngɔ aa ɣɛ lá náa í hááw̃a ngelegóóh̃u. Ná vólu, vá, yí ɣɛ́ ngáá pólu w̃ɔ́ɔ.” 23Ná siỹɛndópoi í ngói sí ỹɛ́nini, maaw̃áánungɔ i ɣɛi lá ngwala bɔw̃álale i ɣɛi ngáá siỹɛ́ kpatɛngɔ́ ngwála.

24Kɛ Jísu i kpelénga, i ɣɛ ta, “Naa bangɔ́ɔ́ lé ngwala ngáá kpatɛ yélaitii ti ɣɛ Ngalángi w̃ásandai wu! 25Naa bangɔ́ɔ́ lé kpatɛ w̃ɔ́i í ɣɛ Ngalángi w̃ásandai wu í lɔ́ve sí wa nyɔ́ɔ́mai áá wála sɛɛgulángi wolí h̃u.”

26Nungáitii tí ngói sí ỹɛ́nini, tí mɔ́ɔ́ningi wóni, ti ɣɛ́ ta, “Kɛ ele lɔ náa hɔ́ɔ áá ngumaawóngi w̃aahɔ́lɔ?”

27Kɛ Jísu i ti woo yápotenga, i ɣɛ ti w̃a, “Sí ɛ́i hólowo nuu búsa yáa, aa holowo Ngalá ngeya.”

28Kɛ Pítɛ í ɣɛ́a Jísu w̃a, “Tɔ lɛ́ɛ, ní bénga yaá haa kpɛ́lɛɛ mbá, ni hítɛ í vólu!”

29Kɛ Jísu i ɣɛa ta, “Ngí tɔ́ɔ́ỹai le wú w̃a, nuí fíli áá vólu yáfe ngi vɛ́lɛ wa, ɔɔ ngi ỹáh̃a wa taá ngi ndéɣe ɔɔ ngi ndíyani, ɔɔ ngi vóngaitii taá ngi léngaitii Ngalángi w̃ásandai hááw̃a, 30maa w̃ɔ́i aa kɛɣɛ́laa w̃ááhɔlɔ bih̃í ká ka ngeleí sí wu. Ná vólu, ná áá ha, aa kúnafɔ lɛ́ɛ́h̃ui w̃aahɔ́lɔ.”

Jísu yɛpɛí hawa kélei í púni kɔwɔ́ato haalái wa

(Máfiyu 20:17-19; Máa 10:32-34)

31Jísu i volú yélaa púúngɔ maah̃úú félengɔitii tolíni naa gooɣaká w̃á, í yɛ́pɛ ti yelé tiyá léé léé, i ɣɛ ti w̃a, “A muỹá lɔɔ lí Jɛlúsɛl̃ɛ taa h̃u, aáva sí kínɛi Ngalá ndaa háá lé mbélaitii tí pɔ́nɛni kɔwɔ́ato nuí síí w̃ɔ́i w̃a taa ɣɛ ma Nuu Búsa Goo H̃ú Loí naa lɔ áá vá hitɛmá ngá na. 32Tiyá lɔ́ɔ Nuu Búsa Goo H̃ú Loí lokolevé sítii ma taa ngáá Júsua, nátii pa taá ngɛlɛ́ gúla su, tí ngɛɛlí, tí laayɛ́ vú ma, 33tí ngamɔ́ kíli ỹɔ́u wo, ná vólu, tí paa. Kɛ́ ná foló félengɔ áá gúla su, sawa kélei w̃a, aa yooɣé sái h̃u, í vá ndɛɛh̃úi h̃ú vólu.”

34Kɛ́ Jísu volú yélaitii taá fái sí ta fíli ngátɔni mba. Maa hái volú yakpíndingɔ i ɣɛi lá ti yaá taá ɣɛ́i kɔlɔ́ sí í ɣɛ́i áá yɛ́pɛ kɔwɔ́ato mba.

Jísu i mbole w̃ɔɔ́ yílaa mbáloni

(Máfiyu 20:29-34; Máa 10:46-52)

35Ná Jísu í ɣɛ́i áá bɛ́ɛ taí sí wa taá náá lolí ngáá Jɛlóko, siỹɛndópo yiláá mbolengɔ́ í ɣɛ́i la, i ɣɛi héini peleí béla, íwaa nungái fɛ́li fɛlí. 36Ná í faŋaí woo ỹɛ́nini táá lɔve, i mɔɔni mbóni ngáá ndeé lɔ́ áá ɣɛ.

37Nátii tí ngoo yápoteni, ti ɣɛ́ ma, “Jísu í ngáá Násɔlɛ taí h̃úu w̃ɔ́i, aá lɔ íwaa lɔ́ve.”

38Kɛ mbole w̃ɔ́i ná i tolíngi wónga ngeleya, i ɣɛ ta, “Jísu, yɛ́i taa í lóli ngáá Deevé Láála Lói, mááw̃aanu hóu kái!”

39Nungái sítii ti ɣɛ́i veleí la, ti bándɛni la ngáá í w̃áá ɣɛ́ ló. Kɛ́ siỹɛndópoi i ɣɛi áá woo gúla naa ɣéla múl̃ɔ ngwala, áá ɣɛ́ ta, “Yɛ́i taa í lóli ngáá Deevé Láála Loí, mááw̃aanu hóu kái!”

40Kɛ Jísu i longá, í nde nungáitii ma ngáá ti vá ngáá mbole h̃íỹɛndopoi ngelé. Ná mbole h̃íỹɛndopoi ná í bɛ́ɛ́ni Jísu wa, Jísu i mɔɔniní, i ɣɛ ma, 41“Ndeé lɔ í lóngɔ ngí kɛ í yɛ?”

Ná i ngoo yápoteni, i ɣɛ ma, “Kawálai, ndóngɔɔ lé ngí ɣɛ́ ngáá ỹandá lɔ.”

42Kɛ Jísu i ɣɛa ma, “Kɛ ỹánda lɔ, í lángi í í h̃u, í í wálonga.”

43Ngamá nɔ́ɔ, kɛ siỹɛndópoi yaah̃úi w̃aa i wónga, í hítɛ Jísu volú áá Ngalá tɛ. Ná aáva nungáitii kpɛ́lɛɛ ti sí ŋál̃aa lɔní, tiyá bɛ́lɛ tí Ngalá tɛ́ni.

Currently Selected:

LÚU 18: KNNT

Highlight

Copy