Jɔ̃́ɔ́ 3

Jízɛ̀ kè Nìkòdímà jè

1Gàa ɖò ɓɛ́ ɔ mɔ̀ ma Fáɖòsíì-nyɔ̀ ɓěɔ̀ ɖò kɛɛ nì ma ɓó. Ɔ mɔ̀ ma Júù-nyɔ̀ ɓěɔ̀ nàìn-nyɔ̀ ɓěɔ̀ ɖò. Ké ɔ nyɛ́nɛ́ mɔ̀ ma Nìkòdímà. 2Ɓó máaún-kà ɖòɛɛ, gàa nìà kɛ mu ma Jízɛ̀ gbo, ké ɔ cɛ̃ɛ ma ɔ gbo, ké ɔ ɖá, “Wáɖábà, à dyuòɛ̀ kà m̀ mɔ̀ nyɔ-ɖɛ-tɛ̀mɛ̀ìn-nyɔ̀, ké m̀ sɔ̀ ɖé Gèɖèpɔ́ɔ̀ gbo kɛ. Nyɔ ɖò se zɛ̃̀ìn-ɖɛ̀ ɓě ɓɛ́ m̀ nyuà kɛɛ ɖò nyuɛ ɓɛ́ìn, Gèɖèpɔ́ɔ̀ nì dyɛ ɓó ɔ gbo hwɛ̀.”

3Ké Jízɛ̀ zà ma ɖé wuɖu, ké ɔ ɖá, “Ḿ cɛ̃ m̀ jǎà gbo, nyɔ ɖò se ɖé Gèɖèpɔ́ɔ̀ kã́á-ɓòɖòɔ̀ kɔ̃ muɛ ɓɛ́ìn, ɔ sèìn ɔ wóɖó dyɛ ɖe ɖie hwɛ̀.”

4Púɛɛ, Nìkòdímà diè ma ɔ dyi, ké ɔ ɖá, “Xwɛ̌ nyɔ ɓɛ́ ɔ ɖǎ gàa hwɛ̀ kɛɛ ɓɛ́ìn wóɖóɛ nyuɛ ɖe ɖie kɛ́? Ɔ ɓɛ́ìn ɖé ɔ ɖe xwíníín paa ɖe, ɓɛ́ ɔ ké wóɖó ɖeè?”

5Ké Jízɛ̀ zà ma ɖé wuɖu, ké ɔ ɖá, “Ḿ cɛ̃ m̀ jǎà gbo, nyɔ ɖò se ɖé Gèɖèpɔ́ɔ̀ kã́á-ɓòɖòɔ̀ kɔ̃ muɛ ɓɛ́ìn, ɔ sèìn ɔ wóɖó dyɛ ɖe ɖie dyììn ɖé ní kè ɖé Zùùɔ̀ mú hwɛ̀. 6Ɖɛ ɓɛ́ fɔ́ wóɖóìn nyɛɛ, ɔ mɔ̀ fɔ́, ké ɖɛ ɓɛ́ Zùùɔ̀ wóɖóìn nyɛɛ, ɔ mɔ̀ zùù. 7Mɔ̀ǔn ɖá ɓɛ́ m̀ ké dyi giniìn, sepóɛɖé ḿ cɛ̃ɛ m̀ gbo kà m̀ ɓéɖé ɓɛ́ m̀ ké wóɖó ɖe ɖie kɛ. 8Dɛ̀ pìɔ̌ɔ̀ mɔ́ ɓɛ́ ɔ ké mùìn nyɛɛ, ɖéɛ̀ ɔ mùìn. M̀ wɔ̃́ ɔ dyi-wùɖù, kɛɛ m̀ se dɛ̀ ɔ ké sɔ̀ìn mɔɔ dɛ̀ ɔ ké muɛɛ dyuò. Kà dyúáɖòɔ̀ kǎà nyɔ ɓě ɓɛ́ Zùùɔ̀ wóɖóìn nyɛɛ jè nì.”

9Ké Nìkòdímà diè ma ɔ dyi, ké ɔ ɖá, “Xwɛ̌ ɖɛa ɓɛ́ìn ná nìɛ̀ nyuɛ kɛ́?”

10Hwɛ̀ ké Jízɛ̀ zà ma ɖé wuɖu, ké ɔ ɖá, “M̀ mɔ̀ Éézùɖùɛ̀-dyù ɓěɔ̀ ɖɛ-tɛ̀mɛ̀ìn-nyɔ̀ vɛ̀nɛ̀, ké m̀ se ɖɛ nìà kɛ dyí dyuòò? 11Ḿ cɛ̃ m̀ jǎà gbo, ɖɛ à dyuò dyíɛɛ jè à cɛ̃, ké ɖɛ à ɖǎ dyéɛɛ, ɔ kɔ̃̀ jè à nyu zàse. Kɛɛ ɓě se ɖɛ à cɛ̃à kɛɛ dyi kpɔ̃. 12Ḿ cɛ̃ ɖɛ ɓě ɓá ɓóɖó-kpàà jè dyíɛɛ ɓě gbo, ké ɓě se ní wuɖu ɓěɔ̀ jǎà po. Ɔ dyi ná nìǐn, ḿ dyi ɖɛ ɓě ɓá dyɔún jè dyíɛɛ ɓě gbo cɛ̃ín, xwɛ̌ ɓě ɓɛ́ìn ní wuɖuɔ̀ jǎà poɛ nyuɛ kɛ́? 13Nyɔ ɖò séè ɖé dyɔún mu ɖò, ɔ sèìn mɔ̄ mɔ̀à Nyɔǔn-dyùɛ̀ Dyú-gàà, ɓɛ́ ḿ sɔ̀ ma kà ɖé dyɔún, ké ḿ dyi ma kà ɓíɖíiɛɛ ɖòùn.

14“Kà Mózè po zɔ̃̌ɔ̀ kà sɛɔ̀ cuɔ̀ dyéɖéín, ké ɔ ɖúɛ ma kà dyií ɖé gbǎùn-fúɖúáɔ̀ kɔ̃ɛɛ, kǎà wa ɓéɖé ɓɛ́ wa ké mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ dyií ɖú, 15ɓɛ́ nyɔǔn séín ɓɛ́ wa mu ḿ hwìɖǐǐ taɓaùn wɛ̃ɛ ké sè-ná-sèɛ̀ fɛ̀ɛ̀ ɓéɖé. 16Sepóɛɖé Gèɖèpɔ́ɔ̀ zi ɓóɖó-kpàà mú ɖɛ̀ɓɛ̀ǐn mìɔ jè, ɔ tò ma ɔ Dyú-gàà dyúáɖòɔ̀, ɓɛ́ nyɔǔn séín mu ɔ hwìɖǐǐ taɓaùn wɛ̃ɛ ké se mɛ́, kɛɛ wa ké sè-ná-sèɛ̀ fɛ̀ɛ̀ ɓéɖé. 17Sepóɛɖé Gèɖèpɔ́ɔ̀ se ma ɔ Dyú-gààɔ̀ ɓóɖó-kpàà kɔ̃ tò, ɓɛ́ ɔ Dyú-gààɔ̀ ké ma ɓóɖó-kpàà nyɔ ɓě zaa kpɔ̃̀ìn, kɛɛ ɔ tò ma ɔ, ɓɛ́ ɓóɖó-kpàà nyɔ ɓě ké ma pó dyììn ɖé ɔ Dyú-gààɔ̀ mú.

18“Gèɖèpɔ́ɔ̀ ní kpɔ̃̀ìn nyɔ ɓě ɓɛ́ wa taɓa ɔ Dyú-gààɔ̀ hwìɖǐǐɛɛ zaa. Nyɔ ɓě ɓɛ́ wa se ɔ hwìɖǐǐ taɓa kɛɛ, zaa ɖǎ wa kpɔ̃ nɔ̀ɔ̀, sepóɛɖé wa se Gèɖèpɔ́ɔ̀ Dyú-gàà dyúáɖòɔ̀ hwìɖǐǐ taɓa. 19Kà zaa nyu nyɔǔn kpɔ̃ɔ kɛɛ kɛà kɛ̀. Ceɔ̀ ɖǎ ɓóɖó-kpàà kɔ̃ dyi, kɛɛ nyɔǔn ɖɛ̀ɓɛ̀ tíe-kpòɔ̀ mú mìɔ, ké ɔ zi ceɔ̀ dyí, sepóɛɖé wa nyu ɖɛ gbà ɓě. 20Ké nyɔǔn séín ɓě ɓɛ́ wa nyu ɖɛ gbà kɛɛ nyɛ́ ceɔ̀ mú, ké wa se ceɔ̀ dyí dyiɛ ɓɛ́ìn, sepóɛɖé wa se mɔ́ ɓɛ́ nyɔǔn ké waà ɖɛ gbà ɓěɔ̀ dyéɖéi hwɔ̀ìn. 21Kɛɛ nyɔ mɔ̀ nyɔ ɓɛ́ ɔ nyu ɖɛ mɔ̀ jǎà kɛɛ dyi ceɔ̀ dyí, ɓɛ́ ɔ kéɛ nyu ɓɛ́ nyɔǔn kéɛ dyé kà ɓɛ́ ɖɛ ɓě ɓɛ́ ɔ nyuà kɛɛ, Gèɖèpɔ́ɔ̀ mɔ̀ nyɔ cɛ̃ɛ ɔ gbo, ké ɔ nyuɛ kɛ.”

Jízɛ̀ kè Jɔ̃́ɔ́ jè

22Ti ɖɛ nìà kɛ ɖǎ ma dyi ziɛɛ, Jízɛ̀ kè ɔ ɖeín-nà-nyɔ̀ ɓěɔ̀ mu ma ɖé Júɖìà-ɓòɖòɔ̀ kɔ̃. Ɔ kè wa nyu ma ɖé ti goun, ké ɔ nì ma nyɔ ɓě níɔ poɛń. 23Ɓó tia ɓaɖaa, Jɔ̃́ɔ́ mɔ̀ùn nì ma nyɔǔn níɔ poɛń ɖé Íínɔ̀-hwɔ̀ɖɔ̀ ɓɛ́ ɔ xwɛ̃́ìn ma ɖé Séɖèìn-hwɔ̀ɖɔ̀ɔ̀ mú dyiɛɛ mú, sepóɛɖé ní pàɖǎ nì ma ɖé. Nyɔǔn ɓě mu ma ɖé, ké ɔ po ma wa níɔ. 24Wa séè ma Jɔ̃́ɔ́ kpɔɖɔ ɖeín po ke.

25Ɓó tia ɓaɖaa, Jɔ̃́ɔ́ɛ̀ ɖeín-nà-nyɔ̀ ɓěɔ̀ ɖíɛ́ ɓě kè Júù-nyɔ̀ ɓěɔ̀ ɖò ɖú ma dòǐn zà kpàǐ ɓó bũ̌in dèɖè jè. 26Ké wa mu ma Jɔ̃́ɔ́ gbo, ké wa cɛ̃ɛ ma ɔ gbo, ké wa ɖá, “Nyɔ-ɖɛ-tɛ̀mɛ̀ìn-nyɔ̀, gàa ɓɛ́ m̀ kèɔ̀ kè nì ma kà ɖé Jɔ́nì-nìɔ̀ ɖeín, ɓɛ́ ɔ mɔ̀ nyɔ kɔ̃̀ jè m̀ cɛ̃ ma kà kɛɛ, ɔ nì nyɔǔn níɔ poɛń kàǔn, ké nyɔǔn séín nì ɖé ɔ gbo muɛńo.”

27Ké Jɔ̃́ɔ́ zà ma ɖé wuɖu, ké ɔ ɖá, “Nyɔ ɖò se ɖɛ ɖò ɓéɖéɛ ɓɛ́ìn, ɔ sèìn Gèɖèpɔ́ɔ̀ nyíɛ dyɛ ɔ hwɛ̀. 28Ɓě mìɔùn mɔ̀ ní zàse kà ɓɛ́ ḿ cɛ̃ɛ ma, ɓɛ́ ḿ dyi níiń, ‘Ḿ se Kɛ́ɖɛ́ìɔ̀, kɛɛ ḿ mɔ̀ ɔ dyúa-nyɔ̀ pūo’ kɛ. 29Nyɔ́nɔ́-ɓǎɔ̀ mɔ̀ nyɔ kɔ̃̀ nyɔ́nɔ́ɔ̀. Nyɔ́nɔ́-ɓǎɔ̀ ɓǎtoɔ̀ nyànà ɓó dyi, ké ɔ tò ɖùǔ. Ké ɔ dyi nyɔ́nɔ́-ɓǎɔ̀ wuɖu wɔ̃́ ní, nìí, ɔ kpá múàǔn. Kǎà ní múàɔ̀ nyu kàa gbɔ hwɛ̀ɛ̀. 30Ɔ jè ɓéɖé ɓɛ́ ɔ ké ɖɛ kpa mìɔ, kɛɛ ní jè se ɓéɖé ɓɛ́ ɔ ké ɖɛ kpa.

Nyɔ sɔ̀ ɖé dyɔún wɛ̃

31“Nyɔ ɓɛ́ ɔ sɔ̀à ɖé dyɔún wɛ̃ɛ kpa ɖɛ, ké ɔ zi nyɔǔn séín dyí. Nyɔ ɓɛ́ ɔ sɔ̀à ɓóɖó-kpàà kɔ̃ɛɛ mɔ̀ ɓóɖó-kpàà nyɔ, ké ɔ cɛ̃ ɖɛ ɓá ɓóɖó-kpàà dyíɛɛ jè. Nyɔ ɓɛ́ ɔ sɔ̀à ɖé dyɔún wɛ̃ɛ nì nyɔǔn séín kɔ̃in. 32Ɔ cɛ̃ ɖɛ ɔ ɖǎ dyéɛ kè ɖɛ ɔ ɖǎ wɔ̃́ɛɛ jè, kɛɛ nyɔ ɖò se ɖɛ ɓɛ́ ɔ cɛ̃à kɛɛ dyi kpɔ̃. 33Nyɔ ɓɛ́ ɔ kpɔ̃ ɖɛ ɓɛ́ ɔ cɛ̃ kɛɛ dyiɛɛ tɛ̀mɛ̀ìn nyɔǔn dyí ɖé ɖɛ nìà kɛ mú kà Gèɖèpɔ́ɔ̀ mɔ̀ jǎà-nyɔ̀ kɛ. 34Nyɔ ɓɛ́ Gèɖèpɔ́ɔ̀ ɖoɓoà kɛɛ cɛ̃ ɖɛ ɓɛ́ Gèɖèpɔ́ɔ̀ cɛ̃ kɛ, sepóɛɖé Gèɖèpɔ́ɔ̀ nyí ɔ Zùùɔ̀ gàná cá. 35Ɓǎɔ̀ ɖɛ̀ɓɛ̀ ɔ Dyúɔ̀ mú, ké ɔ ɖǎ ɔ ɖɛ séín xwa nyí. 36Nyɔ mɔ̀ nyɔ ɓɛ́ ɔ taɓa Dyú-gààɔ̀ hwìɖǐǐɛɛ ɓéɖé sè-ná-sèɛ̀ fɛ̀ɛ̀. Nyɔ mɔ̀ nyɔ ɓɛ́ ɔ se Dyú-gààɔ̀ wuɖu nyuɛɛ se fɛ̀ɛ̀ ɓéɖéɛ mu fɔɔ, kɛɛ Gèɖèpɔ́ɔ̀ dyoɖo mu ɔ kɔ̃ nììn kánáá pū.”

Currently Selected:

Jɔ̃́ɔ́ 3: ƁB02

Highlight

Copy