Jɛ́nɛ́sì 50

1Púɛɛ, Jòsé ɓùɖùìn ma ɓó ɔ ɓǎ xwɛ́ɔ̀ kɔ̃, ké ɔ vĩ̌ìn ma ɓó ɔ kɔ̃, ké ɔ nyá ma xwɛ́ɔ̀ wɔ̃. 2Hwɛ̀ ké Jòsé zà ma ɔ gbo-nì-nyɔ̀ ɓěɔ̀ nyɔ ɓě mɔ̀ ma kɛ̃̀ǐn-dyɔɔ̀ ɓěɛɛ wuɖu kɔ̃, ɓɛ́ wa ké ma ɔ ɓǎ Éézùɖùɛ̀ xwɛ́ɔ̀ ɖoɓo nyu. Ɔ jèɛɛ, kɛ̃̀ǐn-dyɔɔ̀ ɓěɔ̀ nyu ma ɔ xwɛ́ɔ̀ ɖoɓo. 3Ɔ ɖú ma wé kpáɖá-nyɔ sɔ̃́ dyí, sepóɛɖé ɔ mɔ̀ ti jĩ̀ kà wa nììn xwɛ́-ɖoɓo-nyu-nyu ɖú dyí kɛ. Ké Íjè-nyɔ̀ ɓěɔ̀ vĩ̌ìn ma wé kpáɖá-nyɔ tã ɓaɖa-bùè ɓó ɔ jè.

4Ti ɓɛ́ vĩ̌-tìɔ̀ ɖǎ ma ɖé hwɛ̀ kɛɛ, Jòsé cɛ̃ɛ ma Féwòɖòɛ̀ gɔ̌mànà-nyɔ̀ vɛ̀nɛ̀ ɓěɔ̀ gbo, ké ɔ ɖá, “Ní ɓaà ɓě ní, ɓě wùɖù Féwòɖò gbo ɓó ḿ bìì ɓá ɖɛ nìà kɛ dyí. 5Ɖɛɔ̀ mɔ̀, ti ɓɛ́ ḿ ɓǎ nì ma toɖo kɔ̃ɛɛ, ɔ nyuɛ ɓɛ́ ḿ ké ma wuɖu ɖi ɓó ɔ dyúa. Ɔ ɖá, ‘Ḿ nìǎ mɛ́iń muɛń. Kɛɛ m̀ mɛ zà ḿ dyóɖóún ɖé xwɛ́-ɓì ɓɛ́ ḿ ɖǎ ma ɓúɖú ɓó ḿ mìɔùn bìì ɖé Kénà-ɓòɖòɔ̀ kɔ̃ɛɛ mú.’#50:5 Gmɔ̀ ɖé Jɛ́nɛ́sì 23:6 mú. Ɔ jèɛɛ, wɔ̃́ ɓɛ́ ḿ ké ḿ ɓǎ dyóɖóún zàǎ mu, ɓɛ́ ḿ ké ɖe dyi.”

6Ti wa cɛ̃ ma ɖɛ nìà kɛ Féwòɖò gboɛɛ, ɔ ɖá Jòsé mɛ mu, ɓɛ́ ɔ ké ɔ ɓǎɔ̀ dyóɖóún zà kà ɔ nyu ma kà wuɖuɔ̀ ɖiɛ kɛ.

7Ɔ jèɛɛ, Jòsé sɔ̀ dyí, ké ɔ mu ma ɔ ɓǎ dyóɖóún zàùn. Ké ɔ kè Féwòɖòɛ̀ gɔ̌mànà-nyɔ̀ vɛ̀nɛ̀ séín ɓě nì ma ɖé kã́á-gbòɔ̀ dyaa kè Íjè-ɓòɖòɔ̀ nyɔ vɛ̀nɛ̀ séín ɓěɔ̀ mu ma. 8Ké Jòséɛ̀ gbǒ-xwíníín-nyɔ̀ séín ɓěɔ̀ kè ɔ ɖíí-gàà ɓěɔ̀ ɔ kè ɔ ɓǎ ɓíɖí-taún-nyɔ̀ séín ɓěɔ̀ mu ma ɖekè. Waà dyú mɛ́nɛ́ɛ́ ɓěɔ̀ kè waà nyúà-ɖɛ̀ ɓěɔ̀ ɖòùn sè ma ɓíɖíi ɖé Gósɛ̃̀ìn-pàɔ̀ mú. 9Wa kpa ma hwíì-sǒ vɛ̀nɛ̀ ɓě kè sójà ɓě ɓɛ́ wa kpá sǒ kɔ̃ún wɛ̃. Wa mɔ̀ ma nyɔ kúɖúú cá.

10Ti ɓɛ́ wa nyini ma ɓó Átàà mɔɔ́-dyí-síìn-naín nìà ɓó Jɔ́nì-nìɔ̀ wĩín nyɛɛ, púɛɛ, wa vĩ̌ ma ɖé wìì-wùɖù zoo mú. Ké ɓóɛ̀ Jòsé nyuɛ ké wa vĩ̌ ma ɓó wé mɛ̀nɛ̌ìn-sɔ̃́ mú ɓó ɔ ɓǎɔ̀ jè. 11Ti ɓɛ́ Kénà-nyɔ̀ ɓě cĩ́ ma ɓó páɔ̀ múɛɛ dyé ma wa vĩ̌ɛ ɓó Átàà mɔɔ́-dyí-síìn-naínɔ̀ kɛɛ, wa ɖá, “Kē, Íjè-nyɔ̀ ɓěɔ̀ nì vĩ̌ɛń mìɔ cá wà!” Ɔ jèɛɛ, wa jǔìn pá nìà ɓó Jɔ́nì-nìɔ̀ wĩín nyɛɛ Éɓò-Mìzánáì-nyɛ̀nɛ̀ kɔ̃̀ xwíníín mɔ̀à Íjè-nyɔ̀ ɓěɔ̀ vĩ̌ìn-naín nyɛ.

12Hwɛ̀ ké Jékɔ̀ɛ̀ dyú-gàà ɓěɔ̀ nyu ma ɖɛ ɔ cɛ̃ ma kà wa gboɛ. 13Wa kpa ma Jékɔ̀ɛ̀ xwɛ́ɔ̀ ɖé Kénà-ɓòɖòɔ̀ kɔ̃, ké wa zà ma ɔ dyóɖóún ɖé ɓí nìà ɖé Màpéɖà-pàɔ̀ múɛɛ mú, ɖé Máwèɖè ɓíɖí-hwɔ̀ɖɔ̀ɔ̀ wáún. Ɔ mɔ̀ ɓí kè pá ɓɛ́ Ééɓòɖòhɛ̃́ɛ̀ dɔ̃ ma kà Ɛ́fɔ̀nɔ̀ mɔ̀à Hítì-nyɔ̀ɔ̀ kɛɛ gbo, ɓɛ́ ɔ ké kú-toɖoún jǔɛ. 14Ti ɓɛ́ Jòsé ɖǎ ma ɔ ɓǎɔ̀ dyóɖóún zàà hwɔɛɛ, ɔ kè ɔ ɖíí-gàà ɓěɔ̀ kè nyɔ séín ɓě ɓɛ́ ɔ kè wa mu ma kà ɔ ɓǎ dyóɖóún zàùn wɛ̃ɛ mu ma ɖé Íjè-ɓòɖòɔ̀ kɔ̃ ɖe.

Jòsé kùìn ɔ ɖíí-gàà ɓěɔ̀ hwòɖǒǔn

15Ti ɓɛ́ Jékɔ̀ ɖǎ ma mɛ́ɛ, Jòsé ɖíí-gàà ɓěɔ̀ ɖá, “Ɔ jǔ ké à dyoɖo-hwòɖò dyi Jòsé xwíníín nì, ɓɛ́ ɔ ké à kpa kɔ̃in zàìn ɓó ɖɛ gbà séín à ɖǎà ɔ bũ̌ nyuɛɛ jè ní ɖé?” 16Ɔ jèɛɛ, wa ɖoɓo ma kíá ɖé Jòsé gbo, ké wa ɖá, “Hwɛ̀ ɓɛ́ à ɓǎ ké ma mɛ́ɛ, ɔ sè ma wuɖui, ké ɔ ɖá, 17‘Ɓě mɛ cɛ̃ɛ Jòsé gbo, ɓɛ́ ɓě ké níiń, “À ɓǎ ɖá m̀ mɛ zĩ̀ìn à kɔ̃in ɓó ɖɛ gbà jĩ̀ kà ɓɛ́ à ɖǎà m̀ bũ̌ nyuɛɛ jè.” ’ Ɔ jèɛɛ, à ɓaà m̀ ní, ɓɔ̌ɔ̀, m̀ mɛ zĩ̀ìn à mɔ̀à nì ɓǎà Gèɖèpɔ́ɔ̀ gbo-nì-nyɔ̀ ɓěɛɛ nàmàǔn ɓěɔ̀ kɔ̃in.” Ti ɓɛ́ ɔ wɔ̃́ ma wuɖu ɓɛ́ ɔ ɖíí-gàà ɓěɔ̀ tò ma kà ɔ gboɛɛ, púɛɛ, ɔ vĩ̌ ma cá.

18Hwɛ̀ ké ɔ ɖíí-gàà ɓěɔ̀ dyi, ké wa kpá ma ɓó ɔ dyúa dyi, ké wa ɖá, “À mɔ̀ nì gǐìo, ɓɔ̌ɔ̀.”

19Kɛɛ ɔ cɛ̃ɛ wa gbo, ké ɔ ɖá, “Ɓě ɓɔ́ fɛ̃̀ìn. Ḿ se Gèɖèpɔ́ɔ̀. 20Ɓě mɔ̀ùn kpàìn ma ɖɛ gbà hwòɖǒ ɓó ḿ bìì, kɛɛ Gèɖèpɔ́ɔ̀ mɔ̀ùn kpàìn ma ɖɛín-ɖɛ̀ hwòɖǒ, ɓɛ́ ɔ kéɛ nyu ɓɛ́ fɛ̀ɛ̀ ɓáún-ɓáún ké pó kà ɔ nyuà nìɛ̀ ɓó kàǔn wɛ̃. 21Ɔ jèɛɛ, ɓě mɛ ɓɔ́ fɛ̃̀ìn. Ní mu ɓě kè ɓěɛ̀ dyú mɛ́nɛ́ɛ́ ɓěɔ̀ gbo gmɔ̀ùn.” Ké ɔ cɛ̃ ma ɔ ɖíí-gàà ɓěɔ̀ wuɖu nɔ̀mɔ̀ kɔ̃in gbo, ké ɔ kùìn ma wa hwòɖǒǔn.

Jòséɛ̀ mɛ́ jè

22Ké Jòsé kè ɔ ɓǎà gbǒ-xwíníín-nyɔ̀ séín ɓěɔ̀ cĩ́ ma ɖé Íjè-ɓòɖòɔ̀ kɔ̃. Ɔ nyu ma zɔ̃ hɔ̃dɛ̀ɖɛ̀ ɖò kè ɓaɖa-bùè. 23Ɔ gã̀ ma toɖo kɔ̃ dyi, ké ɔ dyé ma Ífèɖèìn nììn nyúà-dyú. Ké Mákì mɔ̀à Mànásìɛ̀ dyú-gààɔ̀ kɛɛ nììn dyú-pɛ̀ɖɛ̀ ɓě pɛ̃́ ma Jòsé ɓo kɔ̃ dyi ɖekè. 24Hwɛ̀ ké ɔ cɛ̃ɛ ma ɔ ɖíí-gàà ɓěɔ̀ gbo, ké ɔ ɖá, “Ḿ nìǎ mɛ́iń muɛń, kɛɛ ti ɖò mu ɓó nyiniìn jǎà, ɓɛ́ Gèɖèpɔ́ɔ̀ ké ɓě gbo kpá, ɓɛ́ ɔ ké ɓě nɔ̄ ɓóɖó nìà kɛ kɔ̃ zà, ɓɛ́ ɔ ké ɓě ɓóɖó ɓɛ́ ɔ ɖáìn ma kà Ééɓòɖòhɛ̃́ɛ̀ kè Áázè ɔ kè Jékɔ̀ nyɛ́nɛ́ín nyɛɛ kɔ̃ ɖe kpa. 25Ti Gèɖèpɔ́ɔ̀ mu ɓě ɓóɖó nìà kɛ kɔ̃ zàùn wɛ̃ɛ, ɓě mɛ kpa ní kpáɔ̀.” Ké Jòsé nyuɛ ké Éézùɖùɛ̀-dyù ɓěɔ̀ ɖi ma wuɖu ɓó ɔ dyúa. 26Púɛɛ, Jòsé mɛ́ìn ma ɖé Íjè-ɓòɖòɔ̀ kɔ̃. Ɔ nyu ma zɔ̃ hɔ̃dɛ̀ɖɛ̀ ɖò kè ɓaɖa-bùè, hwɛ̀ ké ɔ mɛ́ ma. Ké wa nyu ma ɔ xwɛ́ɔ̀ ɖoɓo, ké wa poɛ ma gbɔ̀ɖɔ̀ǔn.

Currently Selected:

Jɛ́nɛ́sì 50: ƁB02

Highlight

Copy