Jɛ́nɛ́sì 42

Jòséɛ̀ ɖíí-gàà ɓěɔ̀ mu Íjè-ɓòɖòɔ̀ kɔ̃ ɖii-ɖɛ̀ dɔ̃ùn

1Ti ɓɛ́ Jékɔ̀ wɔ̃́ɔ ma kà ɖii-ɖɛ̀ nì ma ɖé Íjè-ɓòɖòɔ̀ kɔ̃ɛɛ, púɛɛ, ɔ cɛ̃ɛ ma ɔ dyú-gàà ɓěɔ̀ gbo, ké ɔ ɖá, “Ɖɛ́ kɔ̃̀ jè ɓěà kò dà dyi, ɓɛ́ ɓěà dyià dyéɖéín gmɔǐn nì kɛ́? 2Ɓě tò ḿ ɖùǔ gbo, ḿ wɔ̃́ɔ kà ɖii-ɖɛ̀ nì ɖé Íjè-ɓòɖòɔ̀ kɔ̃ɛ. Ɓě mu ɖé, ɓɛ́ ɓě ké à bìì ɖii-ɖɛ̀ dɔ̃, ɓɛ́ ɓěà ní kɔ̃̀ ɖà mɛ́.” 3Hwɛ̀ ké Jòséɛ̀ ɖíí-gàà ɓěɔ̀ ɓaɖa-bùè mu ma ɖé Íjè-ɓòɖòɔ̀ kɔ̃, ɓɛ́ wa ké ɖii-ɖɛ̀ dɔ̃. 4Kɛɛ Jékɔ̀ se ma Bɛ̃́címà mɔ̀à Jòséɛ̀ ɖíí-gàà dyùwèɔ̀ kɛɛ ɖoɓo, sepóɛɖé ɔ fɛ̃̀ìn ma ɓɛ́ ɖɛ gbà ɖò ní kɔ̃̀ ɖà Bɛ̃́címà gbo kpá.

5Ti ɓɛ́ Jékɔ̀ mɔ̀à Éézùɖùɛ̀ kɛɛ dyú ɓěɔ̀ mu ma ɖii-ɖɛ̀ dɔ̃ùn wɛ̃ɛ, wa kè nyɔ ɖíɛ́ ɓě mu ma, sepóɛɖé mɔ́ɔ̀ nì ma ɖé Kénà-ɓòɖò gànáɔ̀ kɔ̃ ɖekè. 6Ɓó tia ɓaɖaa, Jòsé mɔ̀ ma Íjè-ɓòɖòɔ̀ gɔ̌mànà. Ɔ mɔ̀ nyɔ mɔ̀ ma nyɔ séín ɓěɔ̀ ɖii-ɖɛ̀-gbo-pèɖèìn-nyɔ̀. Ɔ jèɛɛ, ti ɓɛ́ ɔ ɖíí-gàà ɓěɔ̀ nyini ma ɓó ɔ gboɛɛ, wa taɓa ma dú hwuɖu ɓó ɔ dyúa. 7Ti ɓɛ́ ɔ dyé ma ɔ ɖíí-gàà ɓěɔ̀ nyɛ̀nɛ̀ɛ̀ kɛɛ, ɔ dyuò ma wa dyí cá. Kɛɛ ɔ nyuɛ ɓɛ́ ɔ ké nì pū kà ɔ seɔ́ kà wa dyí dyuòɛ, ké ɔ wùɖù ma wa gbo gana-kà. Ɔ diè ma wa dyi, ké ɔ ɖá, “Dɛ̌ ɓě sɔ̀ kɛ́?”

Ké wa ɖá, “À sɔ̀ ɖé Kénà-ɓòɖòɔ̀ kɔ̃, ké à dyi ɖii-ɖɛ̀ dɔ̃ùn we.”

8Jòsé dyuò ma ɔ ɖíí-gàà ɓěɔ̀ dyí, kɛɛ wa mɔ̀ùn se ma ɔ dyí dyuò. 9Púɛɛ, ɖɛ ɔ dyaó zɔ̃̌ɔ̀ kà ɓá wa jè dyíɛɛ dyi ɔ hwìɖǐi. Ké ɔ cɛ̃ɛ ma wa gbo, ké ɔ ɖá, “Ɓě mɔ̀ dyéɖé-dyi-kpaìn-nyɔ̀ ɓě. Ɓě ɖǎ dyi, ɓɛ́ ɓě ké à ɓóɖóɛ̀ dɛ̀ se dyí-gmɔ̀ìn-ɖɛ̀ ɓéɖéɛɛ dyé.”

10Wa jǔ ma ɔ gɔ̃̌, ké wa ɖá, “Gbào, ɓɔ̌ɔ̀. À mɔ̀à nì gbo-nì-nyɔ̀ ɓěɛ̀ kɛɛ dyi nɔ̄, ɓɛ́ à ké ɖii-ɖɛ̀ dɔ̃ pūo. 11À séín mɔ̀ gàa dyúáɖòɛ̀ dyú. À mɔ̀ jǎà-nyɔ̀ ɓě, kɛɛ à se dyéɖé-dyi-kpaìn-nyɔ̀ ɓěo.”

12Kɛɛ ɔ cɛ̃ɛ wa gbo, ké ɔ ɖá, “Ḿ cɛ̃ ɓě jǎà gbo. Ɓě ɖǎ dyi, ɓɛ́ ɓě ké à ɓóɖóɛ̀ dɛ̀ se dyí-gmɔ̀ìn-ɖɛ̀ ɓéɖéɛɛ dyé.”

13Kɛɛ wa jǔ ma ɔ gɔ̃̌ ɖe, ké wa ɖá, “À mɔ̀à nì gbo-nì-nyɔ̀ ɓěɛ̀ kɛɛ mɔ̀ ma ɖíí-gàà wóɖó-wóɖó ɓaɖa-bùè sè sɔ̃́, ké à mɔ̀ gàa dyúáɖòɛ̀ dyú ɖé Kénà-ɓòɖòɔ̀ kɔ̃. À ɖíí-gàà dyùwèɔ̀ nì ɖé à ɓǎ gbo ɓó kàǔn, kɛɛ dyúáɖò se nì ɖe.”

14Kɛɛ ɔ ɖá, “Ḿ nì ɓě jǎà gbo cɛ̃iń. Ɓě mɔ̀ dyéɖé-dyi-kpaìn-nyɔ̀ ɓě. 15Kà ní mu ɓě jè múin wɔ̃́ɔ nyuùn wɛ̃ɛ, ɔ kɛà kɛ̀. Ḿ gboò Féwòɖò dyí. Ɓě se dà pá nìà kɛ mú sɔ̀ɔ̌ mu, ké ɓěɛ̀ ɖíí-gàà dyùwèɔ̀ dyi hwɛ̀. 16Ɓě mɛ ɖoɓo nyɔ dyúáɖò, ɓɛ́ ɔ ké ɓěɛ̀ ɖíí-gààɔ̀ dyà, ké ɓěɛ̀ nyɔ ɓě sèà ɓíɖíiɛɛ mu kpɔɖɔ ɖeín sèìn, ɓɛ́ ḿ kéɛ dyé kɛbì ɖɛ ɓě cɛ̃à kɛɛ mɔ̀ jǎà ní. Ɔ jǔ ké ɔ se ná nìǐn, nìí, ní muɛ dyuòùn kà ɓě mɔ̀ dyéɖé-dyi-kpaìn-nyɔ̀ ɓě jǎà kɛ.” 17Púɛɛ, ɔ po ma wa séín kpɔɖɔ ɖeín, ké wa nyu ma ɖé wé tã.

18Kɛɛ ɓó wéɔ̀ tã nììnɔ̀ ɓaɖaa, Jòsé cɛ̃ɛ ma ɔ ɖíí-gàà ɓěɔ̀ gbo, ké ɔ ɖá, “Ɔ jǔ ké ɓě dyi ɖɛ nìà kɛ nyu ní, ɓě se mɛ́ɛ mu, sepóɛɖé ḿ fɛ̃̀ìn Gèɖèpɔ́ɔ̀. 19Ɖɛɔ̀ mɔ̀, ɓěɛ̀ ɖíí-gàà ɓěɔ̀ ɖò mɛ sè kpɔɖɔ ɖeín, ɓɛ́ ɓě nyɔ ɓě sèà ɓóɛɛ ké ɖii-ɖɛ̀ ɖé ɓěɛ̀ gbǒ-xwíníín-nyɔ̀ ɓě ɓɛ́ mɔ́ nìà nyuɛń nyɛɛ gbo ɖe kpa, 20kɛɛ ɓě ɓéɖé ɓɛ́ ɓě ké ɓěɛ̀ ɖíí-gàà dyùwèɔ̀ ḿ gbo dyà. Dyììn ɖéɛ múɛɛ, nìí, ní mu ɓěɛ̀ wuɖuɔ̀ jǎà poùn, ké ɓě se mɛ́ɛ mu.” Ké wa wɔ̃́ ɓɛ́ wa kéɛ ma náa nyu.

21Púɛɛ, wa cɛ̃ìn cɛ̃̀ìn ma gbo, ké wa ɖá, “Ǹdye, Gèɖèpɔ́ɔ̀ nì à gǎ kɔ̃ tòɛ̌n ɓó ɖɛ gbà à nyuó zɔ̃̌ɔ̀ kà à ɖíí-gààɔ̀ bũ̌ɛɛ jè. À dyé kà wìì nì ma ɔ mú mìɔ, ti ɓɛ́ ɔ nì ma à ɓaàǔn ɓó ɔ fɛ̀ɛ̀ɔ̀ jèɛ, kɛɛ à se ma ɔ wuɖuɔ̀ ɖùǔ gbo tò. Ɔ jèɛɛ, ɖɛ gbà nìà kɛ dyià à kɔ̃ɛ̀.”

22Hwɛ̀ ké Wuɖuɓíín zà ma ɖé wuɖu, ké ɔ ɖá, “Má, ḿ cɛ̃ɛ ma ɓě gbo kà ɓě mɛ ɓɔ́ ma gàa-dyùɔ̀ ɖɛ gbàɔ̀ bũ̌ nyuɛ kɛe? Kɛɛ ɓě se ma ní wuɖuɔ̀ ɖùǔ gbo tò. Ɔ jèɛɛ, ɓó kàǔn wɛ̃ɛ, à ɓéɖé ɓɛ́ à kéá ɔ nyɔmɔɔ̀ kpa dyí ɖú.” 23Ɓó tia ɓaɖaa, wa seɛ ma dyuò kà Jòsé wɔ̃́ ɖɛ ɓɛ́ wa nì ma kà cɛ̃iń nyɛɛ múin nyɛ, sepóɛɖé ɔ mɔ̀ùn wùɖù ma wa gbo dyììn ɖé wuɖuún-zà-nyɔ̀ ɖò mú. 24Púɛɛ, ɔ sɔ̀ ma ɓó wa gbo, ké ɔ vĩ̌ ma. Hwɛ̀ ké ɔ dyi, ké ɔ ɖú ma wa gbo wùɖù kpàǐ ɖe. Hwɛ̀ ké ɔ kpɔ̃ ma Símìɔ̀, ké ɔ sã ma ɔ ɓó wa dyéɖé waí.

Jòséɛ̀ ɖíí-gàà ɓěɔ̀ mu Kénà-ɓòɖòɔ̀ kɔ̃ ɖe

25Hwɛ̀ ké ɔ tò ma wuɖu, ɓɛ́ ɔ gbo-nì-nyɔ̀ ɓěɔ̀ ké ma ɔ ɖíí-gàà ɓěɔ̀ ɓɔ̀ɔ̌ ɓěɔ̀ ɖii-ɖɛ̀ mú dyi dyíìn, ɓɛ́ wa ké wa wíɖíɔ̀ ɖé waà ɓɔ̀ɔ̌ ɓěɔ̀ mú po ɖe, ɓɛ́ wa ké wa hwìè-kɔ̃-ɖìì-ɖɛ̀ nyí ɓó kɔ̃in ɖe. Ké wa nyuɛ ma náa. 26Hwɛ̀ ké ɔ ɖíí-gàà ɓěɔ̀ po ma wa gbɛ̌ ɓěɔ̀ waà jǎkasì ɓěɔ̀ kɔ̃ún, ké wa kpá ma hwìè xwíníín. 27Ti ɓɛ́ wa nyini ma pá ɖò mú, ɓɛ́ wa ké ma ɓó pɛ̃́ɛ, waà nyɔ dyúáɖò kaà ma ɔ ɓɔ̀ɔ̌ɔ̀ dyí, ɓɛ́ ɔ ké ɔ jǎkasìɔ̀ ɖii-ɖɛ̀ nyí. Púɛɛ, ɔ dyé ma ɔ wíɖíɔ̀ ɓó ɔ ɓɔ̀ɔ̌ɔ̀ wĩín. 28Ké ɔ cɛ̃ɛ ma ɔ ɖíí-gàà ɓěɔ̀ gbo, ké ɔ ɖá, “Wa tò ní wíɖíɔ̀ ɖe wà! Ɓě gmɔ̀ nɔ̄, kà ɔ nì ní ɓɔ̀ɔ̌ɔ̀ múɛ.” Púɛɛ, fã̀à nyu ma wa, ké wa nì ma tɛɖɛiń. Ké wa gmɔìn gmɔ̀ìn ma dya, ké wa ɖá, “Ɖɛ́ mɔ̀ ɖɛ Gèɖèpɔ́ɔ̀ nyuà à bũ̌ɛɛ xwíníín nyɛ́?”

29Ti wa nyini ma ɖé wa ɓǎ Jékɔ̀ gbo ɖé Kénà-ɓòɖòɔ̀ kɔ̃ɛɛ, wa cɛ̃ ma ɔ ɖɛ séín ɖǎ ma wa gbo kpá kɛɛ gbo, ké wa ɖá, 30“Gàa mɔ̀à ɓóɖóɔ̀ wuɖuí-kɔ̃̀-nyɔ̀ɔ̀ kɛɛ wùɖù à gbo gana-kà, ké à hwɔìn dyéɖé-dyi-kpaìn-nyɔ̀ ɖé ɔ dyéɖéín. 31Kɛɛ à cɛ̃ɛ ɔ gbo, ké à ɖá, ‘À mɔ̀ jǎà-nyɔ̀ ɓě, kɛɛ à se dyéɖé-dyi-kpaìn-nyɔ̀ ɓě. 32À mɔ̀ ma ɖíí-gàà wóɖó-wóɖó ɓaɖa-bùè sè sɔ̃́, ké à mɔ̀ gàa dyúáɖòɛ̀ dyú. Kɛɛ à dyúáɖò se nì ɖe, ké nyɔ dyùwèɔ̀ nì ɖé à ɓǎ gbo ɖé Kénà-ɓòɖòɔ̀ kɔ̃ ɓó kàǔn.’ 33Púɛɛ, gàa mɔ̀à ɓóɖóɔ̀ wuɖuí-kɔ̃̀-nyɔ̀ɔ̀ kɛɛ cɛ̃ɛ à gbo, ké ɔ ɖá, ‘Kà ḿ kéɛ dyí dyuò jɛ́ɛ́ kà ɓě mɔ̀ jǎà-nyɔ̀ɛɛ, ɔ kɛà kɛ̀. Ɓě ɓéɖé ɓɛ́ ɓě ké ɓěɛ̀ ɖíí-gàà ɓěɔ̀ ɖò ɓíɖíi sè, ɓɛ́ ɓě nyɔ tɔ̀ɔ̀ ɓěɔ̀ ké ɖii-ɖɛ̀ ɖé ɓěɛ̀ gbǒ-xwíníín-nyɔ̀ ɓě ɓɛ́ mɔ́ nìà nyuɛń nyɛɛ gbo ɖe kpa. 34Kɛɛ ɓě ɓéɖé ɓɛ́ ɓě ké ɓěɛ̀ ɖíí-gàà dyùwèɔ̀ ḿ gbo dyà, hwɛ̀ ɓɛ́ ḿ kéɛ dyí dyuò kà ɓɛ́ ɓě mɔ̀ jǎà-nyɔ̀, ké ɓě se dyéɖé-dyi-kpaìn-nyɔ̀ ɓě kɛ. Ɔ dyi ná nìǐn, nìí, ní mu ɓěɛ̀ ɖíí-gààɔ̀ ɖe tòùn, ké ní mu ɓě dyi táàùn, ɓɛ́ ɓě ké ɖɛ dɔ̃ nɔ̄ ɓóɖóɛ̀ mú.’ ”

35Ti wa nì ma waà ɓɔ̀ɔ̌ ɓěɔ̀ púèɛ̌n nyɛɛ, púɛɛ, wa dyé ma wa wíɖí-ɓɔ̀ɔ̌ ɓěɔ̀ ɖé waà ɓɔ̀ɔ̌ séín ɓěɔ̀ mú ɖe. Ti ɓɛ́ wa kè wa ɓǎ dyé ma wíɖí-ɓɔ̀ɔ̌ ɓěɔ̀ kɛɛ, púɛɛ, fã̀à nyu ma wa ní mìɔ. 36Hwɛ̀ ké wa ɓǎ Jékɔ̀ cɛ̃ɛ ma wa gbo, ké ɔ ɖá, “Ɓě ɖǎ ní dyú ɓěɔ̀ ḿ xwai zàà hwɔ. Jòsé se nì ɖe, ké Símìɔ̀ se nì ɖe. Ké ɓó kàǔn wɛ̃ɛ, ɓě mɔ́á Bɛ̃́címà kpaa dyi. Ɖɛ́ kɔ̃̀ ɖɛ gbà jĩ̀ kà ḿ nìà dyí dyéɛń nyɛ́?”

37Hwɛ̀ ké Wuɖuɓíín ɖììn ma ɔ ɓǎ wuɖu dyúa, ké ɔ ɖá, “Ɔ jǔ ké ḿ se Bɛ̃́címà m̀ gbo ɖe dyà ní, nìí, m̀ mɛ ɖáɓá ní dyú-gàà sɔ̃́ ɓěɛ̀. Dèìn ɔ ḿ xwa. Ní mu ɔ m̀ gbo ɖe dyàùn.”

38Kɛɛ ɔ ɖá, “Ní dyúɔ̀ kè ɓě se ɖé muɛ́ mu. Ɔ ɖíí-gààɔ̀ ɖǎ mɛ́, ké ɔ ɖòùn sèǎ. Ɔ jǔ ké ɖɛ gbà ɖò dyi ɔ gbo kpá ɖé dà ɓě nìà ɔ kpauń wɛ̃ɛ ní, nìí, ɓě muɛ nyuùn ɓɛ́ wìì ké mɔ̄ dyùì ɖǎà dúún kpá kĩ́ín nyɛɛ ɖáɓá.”

Currently Selected:

Jɛ́nɛ́sì 42: ƁB02

Highlight

Copy