Ɛ́séɖɔ̀ 2

Mózèɛ̀ wóɖó jè

1Ɓó tia ɓaɖaa, Ɖíìváà-gàà ɖò kpɔ̃ ma Ɖíìváà-màà ɖò dyi. 2Màaɔ̀ nì ma zùù kɔ̃, ké ɔ wóɖóìn ma gàa-dyù ɖò. Ti ɓɛ́ màaɔ̀ dyéɛ ma kà dyúɔ̀ nɔ̀mɔ̀ ma dyíin mìɔ kɛɛ, púɛɛ, ɔ vǐè ma dyúɔ̀ ɓó dɛ̀nɛ̀ tã xwíníín. 3Kɛɛ ti ɓɛ́ ɔ se ma dyúɔ̀ vǐèɛ̀ ɓɛ́ìn ɖeɛɛ, ɔ ɖú ma tìě-ɓò ɖò ɓɛ́ wa ɖàɓàìn séɛɛ dyí, ké ɔ poɛ ma kóò-táà bũ̌in. Ké ɔ pɛ̃́ìn ma dyúɔ̀ ɖéɛ múin, ké ɔ dèɛ̀ ma ɓóɛ Náà-nìɔ̀ kpóó-gbìǐ dyi ɖé tòǒ-gbǎ ɖò mú. 4Ké dyú-pɛ̀ɖɛ̀ɔ̀ ɖíí-màà nyànà ma ɖé nya dyi, ɓɛ́ ɔ ké ɖɛ mu ɔ ɖííɔ̀ gbo kpáùn wɛ̃ɛ dyé.

5Púɛɛ, Féwòɖòɛ̀ dyú-màà ɖò dyi ma ɖé níɔ̀ wĩín, ɓɛ́ ɔ ké níɔ kpá. Ké ɔ gbo-nì-màà ɓěɔ̀ nì ma níɔ̀ wĩin nàǔn. Ti wa nì ma ɖé níɔ̀ wĩín nyɛɛ, Féwòɖòɛ̀ dyú-mààɔ̀ dyé ma tìě-ɓòɔ̀ ɖé tòǒ-gbǎɔ̀ mú. Ké ɔ ɖoɓo ma ɔ gbo-nì-màà ɓěɔ̀ ɖò, ké ɔ dyà ma tìě-ɓòɔ̀ ɔ gbo. 6Ti ɔ kaà ma tìě-ɓòɔ̀ dyíɛɛ, ɔ dyé ma ɖé dyú-pɛ̀ɖɛ̀ɔ̀. Ɓó tia ɓaɖaa, dyú-pɛ̀ɖɛ̀ɔ̀ nì ma kpé poɛń, ké wìì nyu ma Féwòɖòɛ̀ dyú-mààɔ̀ ɓó dyúɔ̀ jè. Ɔ ɖá, “Dyú nìà kɛ mɔ̀ Híìbúɖúù-màà ɓěɔ̀ ɖòɛ̀ dyú.”

7Ké dyú-pɛ̀ɖɛ̀ɔ̀ ɖíí-mààɔ̀ dyi, ké ɔ diè ma Féwòɖòɛ̀ dyú-mààɔ̀ dyi, ké ɔ ɖá, “Ḿ mɛ mu, ɓɛ́ ḿ ké Híìbúɖúù-màà ɓěɔ̀ ɖò dyà, ɓɛ́ ɔ ké nì dyúɔ̀ gmɛ̀ìne?”

8Hwɛ̀ ké Féwòɖòɛ̀ dyú-mààɔ̀ jǔ ma ɔ gɔ̃̌, ké ɔ ɖá, “Ǹdye, mu ɓɛ́ m̀ ké nyɔ ɖò dyà.” Púɛɛ, màa-dyùɔ̀ mu, ké ɔ dyà ma dyúɔ̀ mìɔùn nììn xwíníín-zà-ɖè. 9Ké Féwòɖòɛ̀ dyú-mààɔ̀ cɛ̃ɛ ma ɔ gbo, ké ɔ ɖá, “Ɖú dyú-pɛ̀ɖɛ̀ nìà kɛ dyí, ɓɛ́ m̀ ké ɔ gmɛ̀ìn ɓó ḿ bìì, ké ní mu m̀ pɛ́ɛ̀ìn.” Ɔ jèɛɛ, màaɔ̀ ɖú ma dyú-pɛ̀ɖɛ̀ɔ̀ dyí, ké ɔ gmɛ̀ìn ma ɔ. 10Ti ɓɛ́ dyúɔ̀ ɖǎ ma mú tɔɛɛ, màaɔ̀ ɖú ma ɔ dyí, ké ɔ kpa ma ɔ Féwòɖòɛ̀ dyú-mààɔ̀ gbo ɖe, ké ɔ zɛ̃̀ìn ma Féwòɖòɛ̀ dyú-mààɔ̀ dyú mú. Ké Féwòɖòɛ̀ dyú-mààɔ̀ jǔìn ma dyúɔ̀ Mózè-nyɛ̀nɛ̀,#2:10 Mózè-nyɛ̀nɛ̀ɔ̀ kè ɖɛ ɖò dà ɖò zà-zà nyɛ́nɛ́ hwɔìn ní ɖé Híìbúɖúù-wùɖùɔ̀ mú. sepóɛɖé ɔ ɖá, “Ḿ zà ɔ níɔ.”

Mózè kpá xwáɖáún ké ɔ mu ɖé Míɖìàùn-ɓòɖòɔ̀ kɔ̃

11Ti ɓɛ́ Mózè ɖǎ ma nyɔ vɛ̀nɛ̀ jǔɛɛ, wé ɖòɛ̀ ɓaɖaa, ɔ mu ma ɖé dɛ̀ ɔ mìɔùn nììn nyɔ ɓěɔ̀ nì ma kà kɛ, ké ɔ dyé ma wa gana-kũ̀à nyuɛ. Ɔ dyéɛ ké Íjè-nyɔ̀ ɓěɔ̀ ɖò nì ma Híìbúɖúù-nyɔ̀ ɓě mɔ̀à ɔ mìɔùn nììn nyɔ ɓěɔ̀ kɛɛ ɖò ɓaɖauń. 12Ti ɔ ɖǎa ma dyéɛɛ, ɔ gmɔìn ma dyi. Ti ɓɛ́ ɔ se ma nyɔ kà kò ɖò dyéɛɛ, púɛɛ, ɔ ɖáɓá ma Íjè-nyɔ̀ɔ̀, ké ɔ vǐè ma ɔ xwɛ́ɔ̀ ɖé pĩ́ɔɔ̀ mú. 13Wéɔ̀ nyɔ kɔ ma ɓó dyíɛɛ, ɔ mu ma ɖé Híìbúɖúù-nyɔ̀ ɓěɔ̀ gbo ɖe, ké ɔ dyɛ̀ìn wa nyɔ sɔ̃́ vɔ̃ɔ dyi. Ké ɔ diè ma nyɔ mɔ́ ma kà je kɛɛ dyi, ké ɔ ɖá, “Ɖɛ́ kɔ̃̀ jè m̀ nìà m̀ ɖíí Híìbúɖúù-nyɔ̀ɔ̀ gbo vɔ̃uń wɛ̃́?”

14Ké gàaɔ̀ ɖá, “Nyɛ́ nyu m̀ wuɖuí-kɔ̃̀-nyɔ̀ kè tɔ̀ɔ̀ mú ɓó à kɔ̃in nyɛ́? Nì mɔ́ mɔ́ún ɖáɓáa dyi ɖekè kà m̀ ɖáɓá ma kà Íjè-gààɔ̀ kɛɛ̀?” Púɛɛ, Mózè fɛ̃̀ìn ma ní mìɔ, ké ɔ cɛ̃ɛ ma ɖé ɔ hwòɖǒ bũ̌, ké ɔ ɖá, “Ɖɛ ḿ nyu ma kà kɛɛ bɔ̃̌ ɖǎ dyi ɓeìn wà.” 15Ti ɓɛ́ Féwòɖò wɔ̃́ ma ɖɛ nìà kɛ jèɛɛ, ɔ mɔ́ ma Mózè ɖáɓáa dyi. Kɛɛ Mózè kpá ma xwáɖáún, ké ɔ mu, ké ɔ cĩ́ ma ɖé Míɖìàùn-ɓòɖòɔ̀ kɔ̃.

Wé ɖòɛ̀ ɓaɖaa, ɔ kò ma ɓó ní-ɓì ɖò wĩín dyi. 16Ti ɓɛ́ ɔ nì ma ɓó ní-ɓìɔ̀ wĩín nyɛɛ, màa-dyù mɛ̀nɛ̌ìn-sɔ̃́ ɓě mɔ̀ ma gàa ɖò mɔ̀ Jɛ́tòɖòɛ̀ɛ dyú-màà ɓěɛɛ dyi ma ní píníìn, ɓɛ́ wa kéɛ nyúà-ɖɛ̀ níín-náìn-ɖɛ̀ɔ̀ mú dyíìn, ɓɛ́ wa ɓǎà ɓáɖáá kè wiɖi ɓěɔ̀ ké ní ná. Jɛ́tòɖò mɔ̀ ma Míɖìàùn-ɓòɖòɔ̀ sáa-zà-nyɔ̀. 17Kɛɛ ɓáɖáá-dyí-gmɔ̀-nyɔ̀ ɖíɛ́ ɓě dyi, ké wa kúmú ɓó màa-dyù ɓěɔ̀ dyi. Púɛɛ, Mózè sɔ̀ ma dyí, ké ɔ kpá ma wa gbo, ké ɔ nyí ma waà nyúà-ɖɛ̀ ɓěɔ̀ ní. 18Ti ɓɛ́ màa-dyù ɓěɔ̀ dyi ma wa ɓǎ kɔ̃̀ nyɛ́nɛ́ ɖò mɔ̀ Wɛ̀ɖɛ̀dyúò kɛɛ gbo ɖeɛɛ, ɔ diè ma wa dyi, ké ɔ ɖá, “Ɖɛ́ kɔ̃̀ jè ɓě fṹà kà dyiɛń ɓó zɛ̃̌ɛ̀ kɛ́?”

19Ké wa jǔ ma ɔ gɔ̃̌, ké wa ɖá, “Íjè-gàà ɖò kpá à gbo ɓó zɛ̃̌ɛ̀. Ɔ póìn à sɔ̀ìn ɖé ɓáɖáá-dyí-gmɔ̀-nyɔ̀ ɓěɔ̀ xwaún. Ké ɔ píní ní ɓó à nyúà-ɖɛ̀ ɓěɔ̀ bìì ɖekè.”

20Ké ɔ diè ma ɔ dyú-màà ɓěɔ̀ dyi ɖe, ké ɔ ɖá, “Dɛ̌ gàaɔ̀ nìɛ́? Ɖɛ́ kɔ̃̀ jè ɓě sè ɔ ɖá kɛ́? Ɓě ɖá ɔ, ɓɛ́ à kèɔ̀ ké ɖɛ ɖi.”

21Ti ɓɛ́ ti wè ɖǎ ma ziɛɛ, púɛɛ, Mózè hwòɖǒ dèìn ma ɓó Jɛ́tòɖò gbo dyi, ké ɔ cĩ́ ma ɓó. Ké Jɛ́tòɖò nyí ma Mózè ɔ dyú-màà kɔ̃̀ nyɛ́nɛ́ mɔ̀ Zìpówàɖà kɛ, ɓɛ́ ɔ ké ɔ gmàà jǔ. 22Ké wa wóɖóìn ma gàa-dyù ɖò, ké Mózè jǔìn ma ɔ Gésɔ̃̀-nyɛ̀nɛ̀,#2:22 Gésɔ̃̀-nyɛ̀nɛ̀ɔ̀ kè wuɖu mɔ̀à ɖéèɛɛ hwɔìn ní ɖé Híìbúɖúù-wùɖùɔ̀ mú. sepóɛɖé ɔ ɖá, “Ḿ mɔ̀ ɖéè nɔ̄ ɓóɖó ɖìàǔn.”

23Ti ɓɛ́ zɔ̃ pàɖǎ ɖǎ ma ziɛɛ, púɛɛ, Íjè-ɓòɖòɔ̀ kã́áɔ̀ mɛ́ ma ní. Ɓó tia ɓaɖaa, Éézùɖùɛ̀-nyɔ̀ ɓěɔ̀ nì ma kpòɛ̌n ɖé wa gǐì-gbɛ̌ɔ̀ xwíɖíi. Ké wa pòìn ma Gèɖèpɔ́ɔ̀ kpé dyi, ɓɛ́ ɔ ké wa gbo kpá. Ké waà kpé-po-wùɖùɔ̀ dyɛ̀ìn ma Gèɖèpɔ́ɔ̀. 24Ti ɓɛ́ Gèɖèpɔ́ɔ̀ wɔ̃́ ma waà kpé-po-wùɖùɔ̀ kɛɛ, púɛɛ, ɔ poìn dèè-wùɖù ɓɛ́ ɔ nì ma kà ɓó ɔ kè Ééɓòɖòhɛ̃́ɛ̀ kè Áázè ɔ kè Jékɔ̀ pṹa kɛɛ jè hwìɖǐi. 25Ké Gèɖèpɔ́ɔ̀ gmɔ̀ ma Éézùɖùɛ̀-nyɔ̀ ɓěɔ̀ kɔ̃, ké ɔ poìn wa jè hwìɖǐi.

Currently Selected:

Ɛ́séɖɔ̀ 2: ƁB02

Highlight

Copy