Matéo 9

Jesús chiqueta jnani noñai uje que toque urugúringome

(Márcos 7:1-12; Lúcas 5:17-26)

1Jesús jnoji Gadára jogosórone uniri. Chacája cucórique enga chajna yote quedéjnai aja dedai Capernaúm. 2Uje e di enga jnanione ore di dojórique jnani údi iji Jesús. Enga ore chijnónguiji pitígo gai. Uje noñaque jnani uté nanique enga que dique. Jesús e chimo uje ore changureta ome ujopié. Enga jé u uje chojningame ejnarétai:

–Yabi á, a tijode cho jnángome ua jne uje a yĩro bate gajnaréngone jnese jne.–

3Moisés urusarane atatasórone uñane ore chojninga iji dajéode: "Jnacari uté pota ujetiga cháji Dupade charidi to. Mu que toque ujetiga jnanírique yico enga yirongo pisijnaringuérique." 4Jesús e chiraja ore áyipiedie quigode. Jecute chojningame ore:

–Gajnarénguei uacáyipiedie ome yu.–

5Enga chojningápome ore rĩ:

–Que cucha piraque gotique ujetiga yĩro uté isijnaringuéone. Jeoga yiqueta ejnarétigo, enga yojningame: "Ãriji enga ayague. Asa bamochápi enga bo."–

6Jesús jnopo darai údi rĩ enga chojningame ore:

–A qué yetingarape yu jne ome uaque, ujetiga arajáyo to uje Dupade utocaidi uyu yajnei tu ujetiga yĩro pisijnaringuéone iji erámi uné.–

Jesús chejna daruode udore guesi enga jé u uje chojningame jnani noñai:

–Ãriji, asa bamochápi enga bo údi aja baguíjnai.–

7Jecute jĩraque jnani noñai uté niji enga chisa damochápi picho enga chijnája daguíjnai. 8Enga chajuque ayorébui ore agutedie uje que ore chimo cuchárique uné gajnúrique nanique. Enga ore chicotápise Dupade ome Jesús átedatéi. Enga ore chojninga:

–Yicotágo Dupade uje chisi ome dajopié ome yocujoi ayoré uje yipáñangoji.–

Jesús dejéna Matéo aja daquigade

(Márcos 2:13-17; Lúcas 5:27-32)

9Jesús jnoji guiguíjnai uté enga chimo ore eduguéjna cuchábi iroi uje utaidé ore iplátadie ome eduguéjnane. Enga iroi uté chácariji mésa ejoi iji impuéstos jogadi uté uje urasade uñane ore chisi ome daplátadie ome. Jé u uje Jesús chimo enga chojningame:

–¿Ajína yu to jne a?–

Jnani uté i tu Matéo. Enga uté cha dasagode enga nóna Jesús to.

10Matéo uté jno Jesús údi aja daguíjnai enga pésu uraque dabose unérone. Matéo ujórigo jnacare, ore eduguéjnai iróquegatérigo, jé aja pisijnaringuéone ipesungóningo, ore chise ñane iji te. Enga Jesús, acadigode ore cháta rágaja ore iji ore posode gai. 11Uje fariséode chimo Jesús iji ore gari enga ore dojnóngaja. Enga ore chojningame Jesús acadigode:

–Uacacadisṍri Jesús e chimate dayoguei uje gajnareque yoqueduguéjnane iróquegatéode adode uje ore utaidei yoquiplátadie ome impuéstos, mu jé taguíji ore gari to, jé aja jnani sijnángone uñane to.–

12Jesús chudute ore uruode enga chojninga:

–Ayoré ejnaretade ore gajnei tu ujetiga piquetaque ore. Jé basa ga ayoré ijorone que áyipieraque déji dáringárique piquetaque. 13Beyoi enga ajichopise Dupade uru quigode to uje chojninga: "Yipotigádi tu ujetiga osṍcho ñane. Que gusu gu ujetiga ẽcho cuchisode ome yu."–

Enga Jesús chojningápome ore rĩ:

–Que yibaguiédode u uaque gotique uje uacacotáyo uágome Dupade. Yibaguiédode u ayoré ate gajnaréngone ujetiga ore chécãre dáyipiedie quitígo enga ore chabu date gajnaréngone to.–

Ore catecã́ri Jesús ome púringárique uyataque

(Márcos 2:18-22; Lúcas 5:33-39)

14Iji dire uñai ga jé u uje Juan acadigode ore sose Jesús yui enga ore chojningame:

–Yoco yocuyaque gatuaque to uje yicatecãcoi Dupade. Jé cho fariséode rĩ. Mu ¿gotique gu a uje bacadigode que ore cho dayaque gatuaque to?–

15Jesús chajnai udore ore uruode enga chojninga:

–Uje ayorérigo déji dajñamítedatérique enga que ore cho dayágome raque uje ore nína ráguiji ajñamítedaté ipesungónique gari gu. Isocai jé u ome yacadigode uyoque. Qué yugúsi ore gari, jecute que jnusiétac ore. Mu a chise dínique jne ujetiga ore chijna yu iji ore gari. Enga cachodi u jne ujetiga jnusiétac ore enga a ore cho dayágome raque jne.–

16Jesús chojninga:

–Que pisocai u go ujetiga gosi chuga borapeque ichai aja daguidé arime. Chamáña gu uje gosi a churúrasu enga jogadi u uje borapeque ichai caco aja ñane. Ga gosi iguidé dajuque ga edo casé chajnerame re enga e querújna.–

17Jesús chojningápo rĩ:

–Ga yacãra yacajnaquéode aja cucha otatique to, uje yipéco víno enga yirajágo uje a dajate jne. Jecute que yucuegoi cucha ao ijaroi ome. Socaseti dajuque gai gu enga yachígo jnese. Jecute yucuegoi cucha ao ichai ome yoquipesudi víno icha, ujetiga ca yachígo víno jnese.–

Jesús chiqueta Jáiro uro

(Márcos 5:21-43; Lúcas 8:40-56)

18Uje Jesús qué déji dacajnaquéode gai mu judíode eduguéjna cuchátique chachai to enga i tu Jáiro. Jnani uté chichaga dagataidie aja Jesús iquei enga chijócha ajei údi. Enga chojningame:

–Jesús á, qué yutṍri ua ujetiga ajinama yu aja yiguíjnai. Yuro e toi gu. Yiraja uje a acha bajmainie aja gai jne enga a ecápo jne rĩ.–

19Jesús e chague enga nóna dacadigode ore aja Jáiro iguíjnai yui. 20Mu chequé ejnaretéraque déji ore gari to. Uje sequeredie e gare iji yirídai uje pésu uaté iyosoringuéone. Ga ejnarei u uje iyode que cha tamutaque. Mu chequé uaté chaguitóna Jesús enga tṍraji quigade ome. Enga jé u uje chisa Jesús iguidé eruémami. 21Chequé ajéode u gu ujetiga chisarase Jesús iguidé eruémami marínga, úringai piqueta jogadi jé urásu. 22Enga Jesús tajia daquigade enga chojningame chequé uaté:

–Yabiá, jé tiógara uje yiqueta ua. Banguretigai u gu ome yu.–

Enga jĩraque chequé ejnarei jnoji uaté.

23Uje Jesús chise Jáiro iguíjnai enga chimo cuchade ubuchungórone uje dimane ore ujetiga ore nóna añerasórone aja eduguéjnai ape togué cachodi yui. Enga ayorébui ore chisa dabade iji uro ejode. 24Jé u uje Jesús chaquĩ́ra ore enga chojningame ore:

–Beyoi guesi. Uacamóño uje que gapua togué go. Qué mo.–

Mu ayorébui ore cana Jesús gai. Enga ore chotigase uruode. 25Mu Jesús chirógapo ore aja guesi rĩ. Ga jé u uje ore chejna rángaja guesi. Enga Jesús chacája ajei to. Jé u uje chisa gapua jmanai, enga uaté jĩraque chague. 26Enga jé u uje Jesús ujnomei chubu erámi jnese.

Jesús chiqueta jnani edoparique gáreode

27Uje Jesús doi guesi iji Jáiro iguíjnai enga jĩraque jnani edoparique gáreode ore tibite Jesús gai. Enga ore chojninga:

–¡Yoqueduguéjnai David ape disi ejo é! ¡Yoquijnati tu ua yé! ¡Be enga osõrape yóguiji ne gajneri yé!–

28Jé u uje Jesús chacája guiguíjnai enga edoparigode udore ore nóna aja ajei. Enga Jesús chojningame ore:

–¿Ja jé anguretáyo yu a ome uacáringai piquetacho?–

Enga ore chajnai Jesús enga ore chojninga:

–Yocangaráni á, cachi yanguretágo ua.–

29Enga jé u uje Jesús chisa ore edodie enga chojningame ore:

–A amóñopo uacajiritígo jne rĩ uje a yiqueta uaque jne gu uje yipáñapísiji uacanguretigai ome yu.–

30Enga jĩraque jnani gáreode ore chimo dajirigode. Mu Jesús chaquĩ́rapise ore enga chojningame ore:

–Jé ca atatayo jne uje yiqueta uaque.–

31Mu que ore jnomája uje ore chatata Jesús ipesudode ome ore. Enga jĩraque chubu erámi.

Jesús chiqueta ayorei uje que urúrique cuse

32Uje ore jnoji guiguíjnai uté enga ore chijna jnanírique aja Jesús iquei uje que urúrique cuse. Uje Satanás utocaidi juruque pijnani gu. 33Enga Jesús chijócãre Satanás utocaidi iji jnani uté. Enga jé u uje jnani uté nararápo rĩ. Ayorébui ore tijapísa Jesús ome ipesudode udore. Enga ore chojninga:

–Que israélgosode uyoque yimóngo cucha dacatique uné gajnúrique nanique, jé aja dirode unojo.–

34Mu fariséode ore chojninga:

–Cajicho jnani uté to uje chijócãre Satanás utocaidode iji píode. Mu a jé oidé tu ore eduguéjnai Satanás ujopié ome to.–

Jesús osõraquei déji ome ayorébui

35Jé u uje Jesús jno dáringai urugu údi iji ore idáyode jnese. Jé aja ore idáyode acorásedie rĩ. Enga chacate judíode iji ore aquiningaméone jnese iji ore idáyode udore. Enga chiqueta ore iji dequejnareque ponáyone, enga chacate ore aja dajesúode. Enga unere atatagode uje chacate ore uje Dupade a cho darása iji ore iji erámi uné. 36Uje Jesús chimo ayorébui enga chosõre ore uje ore cho caru iji dejode, ga ore chapu re. Enga ore gajnunie u áyasadie ome Jesús uje íjnoque ore irodisórone. 37Enga jé u uje Jesús chojningame dacadigode:

–Uacapesudode unojo cucha ome Dupade, gajnúone u cucha pĩrátique ujetiga sué uacabai. Garósi uágome gu. 38Enga jé jogadi u ujetiga qué abichoi Dupade ujetiga chṍrape uaque ome uacasai uné.–

Currently Selected:

Matéo 9: Ayore

Highlight

Copy