Matéo 8

Jesús chiqueta jnani uje lépra isai tu

(Márcos 1:40-45; Lúcas 5:12-16)

1Uje Jesús chejna dacajnaquéode guesi iji cucarani guidoboi enga e doi jnumi. Mu ayoré dipeséode ore cho júa Jesús quigade. 2Mu jnani ejnarétatique déji uje ejnarei i tu lépra. Enga jnani uté chimo Jesús enga chichaga dagataidie aja jnumi iji Jesús iquei. Enga chojninga:

–Yangaráni á, ujetiga bajéo enga aquetape yu. Yiraja uje bajopié déji ome cuchade udore ujetiga aqueta yu.–

3Enga jé u uje Jesús chicha dajmanai aja jnani ejnarétai gai enga chojningame: –Yipota arĩa ujetiga yiqueta ua.–

Uje Jesús urúo udore enga jé u uje jnani ejnarei jĩraque jnoji uté. 4Enga jé u uje Jesús chojningame jnani:

–Ca angoma báringai piquetágaja erámi jne. Mu bope bádi aja judíode yocangaránone sacerdote uñénguiji Dupade iguíjna cuchábi ajei. Enga bebi Moisés áyipie quigode ome báringai piquetaque enga ẽramája Dupade jne ome cuchisórique. Enga a imoi tu jne ujetiga ore cho ayoré ijõre iji ua.–

Jesús chiqueta eduguéjnai rómagosi iroi

(Lúcas 7:1-10)

5Jesús chise ore idai uje i tu Capernaúm enga rómagosi uje dacasuté chise Jesús enga chijócha ajei údi.

6Enga chojninga:

–Yangarádejná, yirógabi désiji damochápiabi iji yiguíjnai. Enga ejnarétaguipísape. Urugúode toi enga que tiógara dejnarei. Enga e ujñapié ajãpe.–

7Jesús chojningame:

–A yicai enga yiqueta barógabi jne.

8Mu ore asuté chojningame Jesús:

–Que yicási ujetiga acája yiguíjnai. Mu angacãre yiroi enga a ecape jne. 9Adi u uje eduguéjna yu to. Mu yoqueduguéjnapisi qué déji uje yiji áyipiedie. Isocai tu ome yajnéone soldácho uje yiroque ore. Enga ore doi yuruode. A yojningárasome uñeque: "Bo," enga uté gosi jno. Jeoga yojningame uñeque: "Boji te," enga gosi tibágui yu. Jé adi u to ome yiroi uje tangári yu to enga pésu yojningane cucha.–

10Uje Jesús chudute soldádode ore eduguéjnai uté uruode enga tijapísa quigode. Enga chojningame ayorébui uje ore déji gari:

–Urénga, que israélgose uté, mu jé cãraque re ome danguretígadatéi. Jé ũrepise yu uje que yimópise yurasade israélgose uñeque isocai uté to ujetiga uñeque changuretápise yu.–

11Jesús chojningame dacadigode:

–A uásejna purása unejángone iji erámi údode ujetiga ore chacásõra jnani bajade Abraham, Isaac, Jacob ore iji dáringane Dupade urása jne. Jé aja judíode uñéngo. 12Dupade áyipiedie u nanique ujetiga judíode jnese ore chise dáringáringo urása to. Mu que ore pota. Jecute a ducarãte ore aja guesi tiji ijnangununie jne. Enga a jogadi tu jne ujetiga ore po jóroguiji. Jogadi upo jne rĩ ujetiga ore chigase damatarane, uje ore chejnárengui jóroque re ome dajnéone pujuyaquéo.

13Jesús chojningame ore asuté uté:

–Bo enga ajníja baguíjnai. Uje a yiji bojningane cucha ome banguretigai te jne. Enga jĩraque íjnoque iroi ejnarei iji deréjnai uté.–

Jesús chiqueta Simón Pédro ejo

(Márcos 1:29-31; Lúcas 4:38-39)

14Jesús chacája Simón Pédro iguíjnai enga chise ejo iji mochápi uje ducosi tagu gu. 15Enga jé u uje Jesús chisa jmanai. Enga jĩraque ducosi jnoji, enga úringai ijõre jogadi jé u. Uaté niji iji damochápi enga jé u uje pésu ore posode, enga ore tagu.

Jesús chiqueta ejnarétaque dipeséode

(Márcos 1:32-34; Lúcas 4:40-41)

16Enga uje e dejaque enga ore chijna darása ejnaretade, jé aja Satanás utocaidode píode ayoréo aja Jesús ujetiga chiqueta ore. Enga uásejna ore. Gusu Jesús arecujátaque chojmára ome Satanás iroque sijnángone, mu jé chijócãre ore. Enga chiquetápo dequejnareque uñane isagode ore jnese to rĩ. 17Ga cuchade unojo pésu re gu ujetiga Dupade uruode atatasṍri Isaías urusarane tocade uje churúsãre nanique. Uje chojninga: "Yocagutíyamáni uté e chijna yoquejnaréngone iji yoque. Enga e chiqueta yoque to uje garósi yoquetotiguéode."

Jnaníringo chiese ore potárasa nóna Jesús, mu ore chãra ránguiji cuchade

(Lúcas 9:57-62)

18Uje Jesús chimo gague dipesei iji dejode enga chojningame dacadigode:

–Boyo, yico enga yicagóji yote quedéjnai uécha uñai.–

19Mu uje cáma ore jno to ome dajesui, enga Moisés urusarane atatasórone uñai sose Jesús yui. Diga catecã́ri Jesús enga chojningame:

–Yacadisṍri á, yipotigádi tu ujetiga yijína ua to aja baquitique erãpe.–

20Jesús e chajnai uté uruode enga chojninga:

–¿Ja jé ũré ua ya? Uje arapujnánguenie chiraja daguíjnane jogadode. Enga chungúperenie iguíjnane, úbiredie cusapo rĩ iji erámi. Jé basa Dupade utocaidi uyu que yiguíjnarique cusipise to go.–

21Ga jnanione uñai uje jecucha tangári Jesús acajnaquéode to, chojningame Jesús:

–Yocangaráni á, a yimope yapade aja jnutíguiji cachotique jne. Jé u jne ujetiga yijína ua to jne.–

22Jesús chajnai uté enga chojninga:

–Jé ajína yu. Enga jé ca báyipieraque déji bayé. Jiépisi ore gu uje que ore tangári yuruode to. Enga a bayé añerasórone u ore jne.–

Jesús chaquĩ́ra úyujna cuchabé iji yote quedéjnai ajei

(Márcos 4:35-41; Lúcas 8:22-25)

23Quigade enga Jesús nóna dacadigode aja uraque dabi cuco. 24Qué ore déji yote quedéjnai ajei uje qué ore chiramísara mu Jesús mo. Jé u uje úyujna cucháberaque chorei ore iji yote quedéjnai gatócoro. Enga yodi chĩreta cucoi ajei. 25Jé u uje ore chiringare Jesús enga ore chojningame:

–Yocangaráni á, ¡Be yoque! ¡E yico ome yote quedéjnai údi gu!–

26Jesús chajnai ore enga chojninga:

–¿Jé gotique gu a uacasadodéringai? A garósi uacanguretigai.–

Jé u uje Jesús cháguena ore ajei enga botare úyujna, yote quedéjnai ore. Enga jĩraque úyujna cho jnaque. Jé u uje yote quedéjnai cho paráguiji jnumi. 27Enga acadigode tijapísa átedatéi. Enga jé u uje ore catecã́ri ñane enga ore chojninga:

–¿Chimo jóroque re uje uté chaquĩ́ra yote quedéjnai, úyujna ore enga ore doi uruode?–

Jesús chiqueta Satanás utocaidode píode iji ore uniri u i tu Gadára

(Márcos 5:1-20; Lúcas 8:26-39)

28Uje Jesús chise ore uniri Gadára iji yote quedéjnai uéchai enga jnani gáreode ore chachai Jesús. Udore ore charidode u ducódedie. Enga Satanás utocaidode pi ore enga ore chachẽre ayoréode ome dájningane. Jecute jé ca jnanírique cási ore arúbuchaque quitique. 29Jé u uje ore chinguíra dabijnanone aja Jesús enga ore chojningame:

–Jesús á, Dupade ujnacari ua ya, ¿gotique gu a uje bapota jeta ajocase yoque? Mu cáma deréjnai u go ujetiga ajṍcarome yoque.–

30Mu yãcoré quedéjnanie qué idógosi iji ore uje qué taque. 31Enga Satanás utocaidode ore chijócha Jesús ajei údi enga ore chojningame:

–Ujetiga ajócãrirasi yoque enga ajmare yógaja yãcoré quedéjnanie usidé jne.–

32Jé u uje Jesús chojningame ore:

–Acáyoja.–

Jecute Jesús jocarane udore doi guesi iji jnanione enga ore chacája yãcoré quedéjnanie. Enga Satanás utocaidode udore pésu ũrusoi iji yãcoré quedéjnanie. Enga yãcoré quedéjnanie idájai jnumi, mu jé ore basíji cucarani gaté, enga ore tṍra rángaja yote quedéjnai. Enga que toc ujetiga piqueta uñáraque.

33Yãcoré quedéjnanie irodisórone uje ore chimo udore ga chajuque ore agutedie. Enga ore chayome. Uje ore chise dedai enga jĩraque ore chatata cucha dacadode udore jnese; uje Jesús chiqueta jnanione udore uje Satanás utocaidode déji ore. 34Jé u uje Gadára jogosórone ore yore Jesús gai. Enga ore chijócha ajei údi ujetiga jnoji ore gari.

Currently Selected:

Matéo 8: Ayore

Highlight

Copy