Génesis 9
9
Dupade catecã́ri Noé, ujnacarode ore nanique enga cho darúja ore
1Ga jé u nanique uje Dupade chopo darúja Noé, ujnacarode ore nanique enga chojninga: "A jiépisi uacatígo enga a ore chĩretápo erámi údode jnese jne rĩ. 2Enga a cuchisode ore todópisa jnanione uaque jne enga a ore tãrara jne ome dasadodéringáringo ome uaque. Enga a yisi ome cucha ponáyone ome uaque jne ujetiga apéso uacajegaitígo iji ore ujade. Yojningane u udore uje ore déji gaté yui, jé upome jnumi jogosórone, jé upome yote quedéjnai jogosórone. A uacajnecho cuchade udore jnese jne ujetiga ajnuéño ore gáyode enga ore todo uaque jnese. 3Enga acho uacajegaitígo iji ore jnese, jé iji cuchisode jnese, jé iji cuchade ujade jnese iji poridie, cucha pacade ore jnese. 4Gusu cucha chojmarai uje que yipota jeta acho, enga yojningai tuté u cuchisode iyojna jetiga ca acho. Chamáñaje cuchisode ucuecaringuei u dayode gu, jecute que yipota jetiga acho iyojna. 5Enga jé adi tu ujetiga gosi chujé dojórique ayoré enga máraque uté gosi ome yu jne. Jeoga cuchisórique u uje chujé ayorérique enga a jé márangapo uté to ome yu jne rĩ. Enga a ore gajneque pitoringai jnese jne." Dupade e jno daruode údi enga chojninga:
6"Chamáñaje yipésu jnani nanique gu enga yajnui tu nanique.
Jecute gajnareque ujetiga gosi chujé dojórique ayoré.
Enga a jé arec ujetiga ore doi uté yungónique, enga ore chujé to ga ore chujépise.
7Mu uhuaque, a jiépisi uacatígo jne, ga beyoi enga ãretáyo erámi ome uacatígo jne."
8Enga Dupade catecãrápoi Noé, ujnacarode ore rĩ. 9Enga chojninga: "Angachopísi yuruode, enga a uacajneque yuruode jne, enga a uacape disi ejórigo ore gajnechópo yuruode to jne rĩ. 10Que gusu uaque mu cuchisode uje ore déji cucoi ajei to ica, ore gajneque yuruode jnese to. Jé aja cuchiso parágode, sijnángone ore, jé aja chugúperone ore jnese." 11Ga chojninga: "A ca yécãre yuru quitique jne enga a jé yuruode jogate iji deréjnane jnese jne ome uaque. Ga yuruode e chósi te ome uaque: a ca yirógapo gue dequejnangónique aja jnumi jne rĩ ujetiga chejna jnanione, cuchisode ore. Yijáro yuruode iji jnumi, a ca yirógapo gue cuchátique aja jnumi jne rĩ ujetiga chejna cucha ponáyone iji jnumi jne rĩ. 12-13Enga a yicha aquesúraque aja gaté yui jne enga a arajáyo jne ome uaté uje yuruode e tocade. 14Enga ujetiga yiroque gue abujárigui aja gatéode jne enga a nóna aquesúrigui aja gatéode jne. 15Enga a jé u jne ujetiga yimo yipesudé tuaqué iji gaté enga a yujnusina yuruode jne ome jnanione, cuchiso ponáyone uaque jnese jne enga a ca yirógapo gue cuchátigaja erámi to jne rĩ. 16Enga ujetiga yimo yipesudé tuaqué aquesu iji gue abujadie ujade enga jé u jne ujetiga yujnusina ayoréode, cuchisode uaque jnese iji erámi údode jnese enga a yojninga: A yípisi yuruode jne enga ca yirógapo gue dequejnangónique aja erámi jnese jne rĩ." 17Enga Dupade qué jnopo daruode údi rĩ ome Noé enga chojninga: "Yosõraquéode gãrapié a u aquesua tuaté jne enga a yípisi yuruode jne ome jnanione, cuchisode ore jnese iji jnumi tudé jne."
Noé cho darúja dajnacarode ore nanique
18Enga Noé ujnacarode uje ore doi guesi iji cucoi ajei nanique enga ore íode u udojo: Sem u uñai, jé basa uñai i tu Cam uje Cam uté abi i tu Canaán nanique, jé basa uñai i tu Jafet nanique. 19Enga erámi unirisórone ore gãrapíode u Noé ujnacare gadiógode udojo ore nanique, jé aja udore ape disi ejode.
20Enga utáca Noé nanique. Enga bajaque Noé uté nanique uje chaca úvadie iji dejnai. 21Enga Noé na dacadie úvai enga chijose udire adie enga pésu yote pioi tiji nanique. Enga jé u uje Noé chóji dapesudi enga ũrusóji quigade uje chujé. Enga e choquíbi nanique iji daguíjnai cárpa údi, enga terẽtáji údi uje serẽrája gu. 22Enga jé u nanique uje Noé ujnacarode uñai uje i tu Cam uje uté abi i u Canaán, e chimo dayé iji iguíjnai cárpa údi. Mu choquíbi iji údi. Enga jé u uje chayóji dajorane ore yui ujetiga chatata dayé ome ore. 23Uje Sem, Jafet ore chudute uraque desai uruode enga jĩraque ore chisa daguidé umáreraque ome dedobode, enga jé u uje ore chacája dayé iguíjnai cárpa ajei ga ore chijñaque dedobode aja yui enga ore chaco dayé gai ome dedoboi bajaque enga jé u uje ore chimate dayé iguidé taja gai. Enga ore gaidi tu ujetiga ca ore chajire dayé, uje choquíbi iji jnumi gu.
24Uje Noé niji iji dáringai ũruso quigade ga ore chatatame uje ape ejoi toji gai tiji jnumi uje ũruso enga choquíbi iji jnumi. 25Enga jé u uje Noé chĩ́care Cam uté ujnacari Canaán, ape disi ejode ore enga chojninga:
"A yo yurúja Canaán jne, enga a doi dayé uyade, ore ape disi ejode ore iroquéode jne.
Enga udore irógode uñane a suépise Canaán, ape disi ejode ore gáyode jne ome dáringane piroque."
26Qué Noé jnopo daruode údi rĩ nanique enga chojninga:
"Yipésupú ga Yangarádejnai Dupade chatapísaja Sem jne.
Enga yájnami Canaán doi iroquéode to jne."
27Enga Noé e cho darúja dajnacari Jafet to nanique enga chojninga:
"Yipésupú ga Dupade chatapísaja Jafet, ape disi ejode ore enga juéga ujetiga jiépisi ore jne enga ore chajnerame re jne iji erámi.
Enga a Jafet, Sem ore ape disi ejode jõrapise ñane jne. Jé basa Canaán ape disi ejórigo a ore doi Jafet iroquérigo to jne."
28Iji cucoi tuté quigade uje Dupade chiroque gue dequejnangóri aja jnumi nanique enga Noé guejnanie sequerei e chise 350 años nanique iji quigade. 29Enga Noé guejnanie sequerei chise 600 años nanique uje chacája cucoi ajei, enga dopoi guesi te rĩ iji cucoi ajei enga guejnanie sequerei chise 350. Jecute yáta guejnanie sequerei aja ñane jnese enga chise 950 nanique uje Noé topísi.
Currently Selected:
Génesis 9: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
