Génesis 8
8
Dupade chaquĩ́ra yodi nanique, ga guei e cha nanique
1Dirode udore quigade nanique enga Dupade áyipie doi Noé ore nanique. Jé aja cuchisode to rĩ iji cucoi ajei. Ga jé u nanique uje Dupade chiroque emi aja erámi nanique ujeta chubúchu yodi jetiga doi jnumi, doi jnumi, doi jnumi, doi jnumi nanique. 2Enga jé u nanique uje Dupade chaquĩ́ra yodi nanique iji yote quedéjnai údi enga chácare nanique. Enga chaquĩ́rapo yodi te rĩ iji gaté yui jetiga chácarapo nanique rĩ. Ga guei e cha nanique. 3Enga yodi chicai jnumi garósi, garósi nanique. Enga dirode 150 enga yodi jé ate uje cho yãra, yãra aja jnumi yui. 4Enga Noé pi cuco e chicáji jnumi yui to enga diga chujé raja cucaranone uñai ójo gai uje cucaranone udore ore i u Arárat nanique. Enga ore isecaranone guedosío e chise 7 nanique, jé basa ore isecaranone dire iji guedosi uté e chise 17 to nanique uje Noé pi cuco e chácariji cucaranone uñai ójo nanique. 5Mu yodi jé ate uje chicai jnumi yui garósi, garósi. Enga iyajmaque nanique iji udojo quigade enga jé u uje cucarãte umarone ójodie e pijógome Noé ore iji erámone údode jnese. Enga ore isecaranone guedosío quene chise 10 nanique uje Noé ore e ore chimo cucarãte umarone udore ójodie nanique.
6Enga dirode guejnanie ayoré gare nanique iji udojo quigade uje Noé doi enga chuchẽre dapesudi cuco piago ajámi gai nanique. 7Enga jé u nanique uje Noé doi tamoré nanique enga tṍraja guesi. Mu tamoré uaté que chise jnupe cajnónique iji nanique ga chisṍriji gaté bisideque. 8Dire uñai nanique rĩ enga Noé dopoi cucujnadatei rĩ enga e tṍrapo nanique rĩ. Enga gaidi tu nanique jeta cucujnadatei chisírase jnupe cajnónique nanique. 9Mu cucujnadatei e chajniápo cucoi gai nanique rĩ uje que chise jnupe cajnónique nanique gu. Chamáñaje yodi qué chaco jnumi gai nanique gu. Enga uje cucujnadatei diapo iji cucoi rĩ enga jé u uje Noé chicha dajmanai taja cucujnadatei iquei nanique enga jé u uje cucujnadatei basája jmanai nanique enga napója cucoi nanique rĩ.
10Mu uje e dirode garapo iji ti nanique rĩ iji udojo quigade enga Noé tṍrapo cucujnadatei nanique rĩ. 11Enga guedé e chacasipise nanique ga e totási dore mu cucujnadatei e diapóji Noé ore rĩ. Mu cucujnadatei chaquesúsi poria eruébi, ga e chijnája Noé ore nanique iji damatarámi. Enga poria tuaté i tu olívo nanique. Jecute Noé e chiraja uje jnupe cajnóri a e cuse. 12Mu uje dirode e garapo iji ti rĩ iji yijmanuñai enga jé u uje Noé tṍrapo cucujnadatei rĩ. Mu cucujnadatei jno nanique enga que diapo nanique rĩ. Jé noñaji erámi.
13Enga e cajnoripise jnumi nanique enga Noé guejnanie sequeré e chise 601 años nanique. Enga jé u nanique uje Noé chuchẽre cuco cuchábi ójo gai nanique. Enga jé u uje chajiripise dejode enga chajire erámi enga e cajnore. Ga guedosi tuté bajai tu iji sequeré ichai nanique, enga guedosi tuté dirode bajai tupo rĩ uje Noé chuchẽre cucoi ójo gatébia nanique. 14Mu chise guedosi ejoi nanique uje ore isecaranone dire e chise 27 enga jé u nanique uje jnumi cajnoripise ga ueradipise rĩ. 15Enga jé u nanique uje Dupade catecãrápoi Noé nanique rĩ. 16Enga chojningame: "Noé á, be guesi tiji cucoi ajei te á, bacoté uaté, bajnacarode, bacaridie ore rĩ. Beyoi guesi jnese tiji cucoi ajei. 17Enga jé u ujetiga ajnime cuchisode jnese iji cucoi ajei to, jé aja chugúperone ore, jé aja cuchiso parágode ore jnese rĩ, jé aja cuchisode rĩ uje que ore guichárique cuse iji jnumi. Yigaidi tu gu ujetiga ore chicáji erámi jnese ujetiga ore atígo basíji erámi jnese enga jiépoi ore iji erámi údode jnese rĩ."
18Ga jé u nanique uje Noé, acoté, ujnacarode, icaridie ore doi guesi tiji cucoi ajei jnese. 19Enga jé u nanique uje cuchisode doi guesi to jnese iji cucoi ajei nanique: cuchiso parágode, sijnángone ore jnese, jé aja cuchiso ponáyone uñane jnese uje que ore guichárique cuse enga quĩrique ore dique iji jnumi, jé aja chugúperone ore rĩ uje ore chojí gaté jnese. 20Enga jé u nanique uje Noé pésu daserani tome Dupade gajnéone dosipécho. Enga jé u uje doi dosipeque chojmara, chojmara, chojmarane iji cuchisode ujade jetiga chujé ore jnese enga chibore ore iji daserani ome Pangarádejnai Dupade. 21Enga Noé iborigode dosipeque ai chise Pangarádejnai Dupade nanique enga ai uneripísome Dupade uje chojare ai enga irasiguipise re ome ai. Enga jé u uje Dupade narare nanique enga chojninga nanique: "A ca yopo yurúja jnumi jne rĩ ga ca yirógapo gue dequejnangónique aja jnumi te rĩ. Uje yiroque gue dequejnangóri aja jnumi nanique enga yiroque gu uje jnanione que ore áyipieraque jnopóji dasijnaringuéone nanique rĩ uje ore pésu dasijnaringuéone iji dáringane jnacáño nanique, jé aja ore úringane jnanípiso enga que ore cho daja ome dapesute gajnaréngone udore nanique. Enga yátaja cuchisode aja jnanione nanique uje yejna ore nanique, mu a ca yejnapo cuchisode jne rĩ." 22Dupade e jno daruode údi enga chojninga:
"A yipésu jne enga jnanione a ore chutãre gatuaque iji putáningai.
Jé basa ga ore napo dacatígo cucha jne rĩ iji sequeredie údode jnese.
Enga tejnuringai a jecucha di iji esórique jne.
Jé basa piocaraidie jecucha diji sequeredie.
Enga a jecucha dirode di jne jé aja dejade to rĩ."
Currently Selected:
Génesis 8: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
