Génesis 35

Uje Jacob jnoji Padan-áram nanique enga Dupade chiqueta raja iji ore idai Betel enga cho darúja

1Enga jé u uje Dupade catecã́ri Jacob enga chojningame: "Boyóji de to jne. Enga acáji bapesudi casica baserãte jne uje yiqueta yu aja ua iji ica uje bapesute i nanique enga i tu Betel. Uje barengúi tu nanique enga bamóji nanique uje bayome bayai Esaú nanique." 2Enga jé u uje Jacob catecã́ri dajogasui, jé aja darógode ore to. Enga chojningame ore:

–Yipota jeta óraño uacacatecãrainone ayoré gajnu oredie jnese iji uacajade. Enga ẽ́sachoji yodi jnese jne, enga ecãchópo uacaguidedie rĩ ujetiga ichai to. 3Enga amácho uaque jne enga yico jne enga yicagóji yipesudi casica gaserãte jogadi Betel jne. Yigaidi tu gu ujetiga yipésapo yaserãte gatérique jne rĩ iji uté jogadi ome Dupade. Chamáñaje Dupade chiqueta yu iji yajnenie pujuré jmainie nanique gu, enga nonapísa yu aja yajesúode erámio údode jnese.–

4Enga jé u uje ore chisi ome dacatecãrainone ayoré gajnúo ome Jacob jnese. Enga ore chijnime órodie uje déji ore angoroinie eruéode enga ore chisiapome Jacob rĩ. Enga Jacob jno ore angoroinie eruéode jogosórone údi aja poredaté údi enga chijóchame ore iji, jé aja ore icatecãrainone ayoré gajnúo ore jnese. Enga poredaté uaté i u encína enga idógosiji ore idáidatéi Siquem nanique. 5Enga uje Jacob, ujnacarode ore jnopise enga Dupade chisi ome pisadodéringai ome guidai idaisórone uñane jnese enga ore todópisa enga que ore chajna Jacob ore uje ore jno.

6Enga jé u uje Jacob ore jno jnese, enga ore chise ore idai uté uje i tu Luz uje déji ore uniri Canaán ajei to. Enga e ore chĩ́care Betel aja dedai tuté to enga ore cho i iji to. 7Enga ore jno ga ore chicáji dapesudi casica daserãte jogadi te rĩ ujetiga pésapo icháriguiji gaté rĩ. Ga chimánapo rĩ enga pésapo i gaté te rĩ enga chĩ́care El-Betel aja to uje chojninga: "Uje yayome yuyai nanique enga Dupade chiqueta raja uyu nanique iji udé." 8Mu Jacob daté casica irogué Débora uje irasé ica nóna ore aja to, mu chise Betel nanique enga jé u uje topísiji uté. Enga ore chijóchame iji poredaté uburúdi uje poria uaté i tu encína. Enga poria uaté idógosiji ore idai Betel nanique. Enga ore popise ejode nanique. Jecute Jacob pésu uaté ode i nanique enga i tu "Ore agoyedie jogadi" nanique.

9-10Uje Jacob jnoji Padan-áram nanique uje chajnésaru daniri enga Dupade chiquetápo raja rĩ enga catecã́ri enga chojninga:

"Bei tu Jacob, mu a yécãre bérique jne.

Jé iji diri tudé, jé aja beruénique quigáningo enga a bei u Israel ome ore jnese jne."

Enga Dupade e chimate Jacob i ome enga jé jnopo daruode údi ome rĩ. 11Enga chojningame:

"Dupa Pujnuéngaisṍripísi tu yu uje yicatecã́ri ua.

A yipésu ua jne enga a jiépisi bape disi ejórigo ore jnese to jne.

Enga bape disi ejode a ore cãra dajogadode ome ñane jne iji erámi údode jnese enga ore unirone jiépisi iji erámone údode jnese.

Enga a eduguéjnapise bape disi ejórigo uñéngo jne.

12E yingome báqui casica Abraham, jé aja bayé Isaac uje ore gajneque yuruode nanique, mu bajnecho yuru uréone to uje a uacajnenguipise puniri tudé jne.

Enga a bape disi ejórigo a ore gajnenguipise to jne iji baquigáningo."

13Uje Dupade e cha chisi ome daru iyiejájnane ome Jacob, enga jé u uje jnoji gari. 14Uje Dupade e jno ga Jacob chisingare cucarané taja gaté, enga jé u uje cháguena gaté. Enga jé u uje doi aceite, víno ore enga chojne aja gai. 15Enga pésu uaté jogadi i enga chĩ́care Betel aja nanique.

Uje Raquel ape ejoi base, enga jé u uje topísi nanique

16Mu ore jnopo iji Betel to rĩ enga ore chajna dajei taja ore idai Efráta. Qué idája óriji ore idai Efráta enga Jacob acoté Raquel ica tagúji. Mu Raquel ica que base míraque uje patíja iji ajei. 17Mu Raquel chejnarenguipise dabi achaminone uje base. Mu irodito catecã́ri enga chojninga: "Ca atodo, enga ca ejnáreque achaminone uje babi e base que, enga diyocape rĩ." 18Mu Raquel e chapu re iji dabi achaminone jmainie, mu uje cáma toi enga chojninga: "A yipésu yabi írique jne enga jé u jetiga yitoi." Enga narare mu uruode nóna ujñari aja guesi, enga chojninga: "I a u Benoní jne." Enga chingo i taja enga jé u uje topísi. Mu Jacob que chĩ́care dacoté ĩcarai taja dabi to mu cãra i, enga ĩcarai tu Benjamín taja.

19Uje Raquel topísi enga ore chijóchame iji dajeque pajei iji Efráta yui. Iji dirode udojo enga idai uté i uñai cuse, enga ore chĩ́care i taja enga i ichai tu Belén. 20Enga Jacob doi cucarané enga chisingare to iji dacoté ode. Gaidi tu gu ujetiga pijoque cucarané tiji gaté enga ca ore chicadígui to. Enga jé chuságaja deréjnane udojo uje obiréjna Raquel ode ome cucarané uaté to.

21Enga Israel, e ore jnopo rĩ enga ore chise ore idai Edar enga ore chicáji guidai uéchai enga ore chicha darengúi taja ore ipesudé cototé uéchai. 22Enga iyajmaque ore iji ore irengúi uje ore chapáji. Mu chise diri nanique uje Israel ujnacarode uñai Rubén e pota dayé acoté uña, uje i tu Bílha. Enga chisa ejode uje pota. Mu chise diri uje Israel chudute to uje ujnacari pota acoté uña enga chisa ejode, enga jé u uje ájningaránguipíse ome dajnacari.

Jacob ujnacarode ore íode u udojo nanique

Jacob ujnacarode gare iji yirídai nanique. 23Enga abode iji acoté Léa gari chojmára iji yijmanuñai enga ore íode u udojo: ape bajaguipísi i tu Rubén. Jé basa ga quigaminórone ore íode u udojo: Simeón u uñai, jé basa ga Leví u uñai to, jé basa ga Judá u uñai, jé basa ga Ísacar, Zabulón u uñane. 24Enga gare abode iji acoté uña gari to uje uaté i tu Raquel nanique. Enga ore abode íode u udojo to: José, Benjamín ore. 25Enga Raquel irogué cuse to nanique enga Jacob abode déji uaté gari to. Enga uaté i tu Bílha nanique, enga Jacob abode gare iji darogué gari to enga ore íode u udojo: Dan, Neftalí ore. 26Enga Jacob abode gare to iji dacoté Léa irogué gari to, uje uaté i tu Zílpa. Enga ore íode u udojo: Gad, Aser ore. Enga Jacob abode ore batigai u ore uniri Padan-áram nanique.

Isaac guejnanie sequerei chise 180 uje topísi to nanique

27Enga Jacob chajniapója dáqui casica Abraham, dayé Isaac ore idai te rĩ uje i tu Mámre, uje i gatérigo u Árba, Hebrón ore. Pota gu jeta chimopo dai casica rĩ uje i tu Isaac. 28Mu udojo quigade nanique enga jé u uje Isaac toi to, enga guejnanie sequerei chise 180 uje topísi to. 29Enga choquíjnapise Isaac uje chajna dayé casica Abraham ore aja jnaropié uje toi nanique, enga ujnacarode Esaú, Jacob ore cháta raja ñane uje ore chijóchame dai uté nanique.

Currently Selected:

Génesis 35: Ayore

Highlight

Copy