JUD 1

1Jud womnɔ Jisɔs Kraystɛ, ni mpɛnte Jemsɛ.

Ko ŋanɛ ŋa pɔ vellɛ anya nchɔŋmalen Hɔbatokɛay Baaɛ ni ŋa pɔ thɔndɔ ŋa Jisɔs Krayst.

2Ha keyendapani, mbɔs, ni nchɔŋmalen ma bɛrɛni ŋanay.

Ŋkɛnda ambollɛ

3Anya chɔmalen ya ŋgbelŋgbel ha gbal konɔko ha lol hiɛ gbi kɔ hi poɔniɛ, ya ke la tenka-tenka ha gbal ŋa thɛlɛnɔni ha chɔ ha laanɛ tiŋtiŋdɛ kɔ pɔ ka koŋ wɔŋ libul ko anya charaŋdɛ. 4Haliwɔ anya isi Hɔbatokɛ apum ŋa koŋ hi binthimani thɔŋkumay. Ŋa gbath vil ŋa ŋanɛ ŋa sini Hɔbatokɛ ha shimi ha pɔ koŋ baŋ ilɔɛ ki. Anya isi Hɔbatokɛ ŋa piŋkiɛ wɔŋɔ Hɔbatokɛ hiɛ ki jali iwɛi ni ŋa hɛm sɛmthache hi bullɛ ni Bɛɛ, Jisɔs Krayst.

5Yɛlayoɛ ya yema nɔ wok ntenɛ, yɛlabɛ pɔ kakoŋ nɔ la hɔm yeŋkɛlɛŋ lɛ wɔnɛ wɔ loliɛ anyin hiŋg pɔk Igiptɛ, yɛ la chaŋ lɔɛ wɔ ye rimi ŋanɛ ha ka laanɛ niyɛ. 6Ni malkaɛ ŋa thɔŋgulɔni sɛmthiŋaɛ kɛ ŋa ye le ichɛliŋa ayɛnaɛ, Hɔbatokɛ koŋ ŋa thɔŋgul ndambama chɔŋgbaɛ lɔ ŋa cheni ihɔɛay haŋ hɔɛ lɔko thoŋga bomdɛ. 7Kendɛ Sodɔm ni Gomora ni trithɛ tha piriŋɛ ŋandɛ, nŋɔ thanbɛ ŋa ha jali chondal ni ŋa bini nkɛn naythindɛ tha chen tiŋtiŋdɛ, ŋa ye cheɛ thambase ha sɔthɔ gbalthil ma jɛmdi chɔŋgbay.

8Kɛ chekiŋ mbulay anyao ŋa ha jal thiŋaɛ igbɛth ŋa hɛm fɔsa, ŋa ye sɔl anya gbɛŋdɛ. 9Kɛ yɛ sɛmthache malkaɛ Maykɛl, ŋa ha ŋhɔ ni minwɛi, ni ŋa thoŋga ha jal Mosisɛ, ni thekɛni ha wɔŋ thoŋga ŋsɔlɔk wɔn atok, kɛ hɔɛ, “Bɛɛ hɔl mɔ.” 10Kɛ anyao ki ŋa poli lanɛ gbi la saŋani ntendɛ, ni ka lanɛ la ŋa siɛ la ŋa ka haniɛ kendɛ visɛ ha haɛ, pɔ ŋa ye rimi. 11Ranka kɔ che ŋa! Haliwɔ ŋa gbɛɛ naythi Kendɛ, ni ŋa ye kosini nkɛn ha satokin bɛrɛ ko tuki Belamdɛ, ni ŋa rim ikweyɛ len Koraɛ. 12Ki thay thi path ko nje ma nɔ chɔmalendɛ, kendɛ ŋa dikini leyŋ bon kulayɛ, ŋa lɛlini ŋkɛn atok, tokɛ pithɛ ibiɛ mɛn ŋhɔ ihɛnd yɔkmaɛ, ŋthɔk ma ibiɛ mgbemaŋ mɛŋk rɔkɛ, ma koŋ wui fuli, pɔ ma ye futhi; 13mbuŋgliŋ bomdɛ hɛlɛ ko, wɔ pɔŋ iwe wɔɛ ha ndap ma ŋaɛ; nde chaŋchaŋ ma pɔ ko thɔŋgul ŋa rithi mɛnmɛndɛ ŋa chɔŋgba.

14La ka cheɛ ha lanɛ ki pɛ hiŋg ko gbal ŋgbeni mɔɛkɛ mɛntiŋdɛ hiŋg Adam, la Inɔk ka chamdɛ, hɔɛ, “Ndɛli, Bɛɛ hun ni bimbi wɔ jali malka a charaŋdɛ, 15ha wɔŋ thoŋga ko nɔ-o-nɔ , ni ha chu gbɔl thi ŋanɛ gbi ŋa sini Hɔbatokɛ ko jali ŋa haɛ gbi ha isi Hɔbatokɛ la ha koŋ haɛ la cheni naythin Hɔbatokɛayɛ, ni ha ja gbekathɛ gbi tha anya iwɔɛ ŋa sini Hɔbatokɛ ha koŋ hɔ la cheni ha wɔndɛ.”

16Ŋanɛki ŋa anya hɔlɔni, hi biɛn hinigbɔl, ŋa lemil jali ŋa liyema li wɛiyɛ, nyɔhɔl thi kathil ŋkoloni, ji ahin bolmin ha sɔthɔ fɔsa.

Mɛi ni gbɔŋda

17Kɛ ŋa ha lonbolɛ, anya nchɔmalen, ŋtheŋ ma awoma Bɛɛ hiyɛ Jisɔs Krayst; 18ŋa hɔ ko mɔ koɛ, “Mɛŋk mɛkindɛ anya poliɛ ŋa bi ha chelɔ ŋa lemil jali ŋa liyema li wɛiyɛ.” 19La kiɛ ŋa sɛyn anyin thiyeŋ, anya jali hɔlɔɛ, ŋa biɛn min charadɛ. 20Kɛ ŋan, anya ŋchɔmalen, ŋa sɛmkath laanɛ nɔ charaŋday, ŋa sɛli Min Charaŋday, 21ŋa bɛsil che chɔŋmalen ma Hɔbatokɛ, telɛ kelenyendapani Bɛɛ hiyɛ Jisɔs Krayst ihɔlɔŋ chɔŋgbaɛ.

22Ni ŋa bɛmani apum ŋa tombaɛ, 23ŋa loliɛ apum, ŋa kwe ŋa jɛmday, ke apum yendapani ni ŋkwath, ha mith kumba bɛ kɔ jalɛ koŋ bɛ thipathɛ.

Sɛli ŋa tɔŋ

24Yɛlayowɛ ko wɔnɛ wɔ bɔ ha paa mɔ hiŋk dukɛ ni ha wɔŋ mɔ ha ibiɛ thipath gbɛŋ wɔɛ chee ka mɛmini. 25Ko Hɔbatokɛ bulɛ, Nɔloliɛ hiyɛ hiŋk Jisɔs Krayst Bɛɛ hiɛ, che gbɛŋ, juju, fɔsa, ni sɛmthache, mɛnkɛ gbi nŋɔ koŋ chandɛ ni yɛlayowɛ ni chɔŋgba. Vɛlache.

Currently Selected:

JUD 1: SNT

Highlight

Copy