JƆN MƆƐKƐ RAƐ 1
1
1Nɔ bɛndɛ ko Gayɔs nɔ chɔmalendɛ, wɔ ya chɔŋlen tiŋtiŋdayɛ.
2Anyami chɔmalen ya sɛli chelɛ len gbi la kɔ kɔni yeŋkɛlɛŋ ni hɔm ni ha ŋche liveay, ya siyɛlɛ la che yeŋkɛleŋ ni minnɔ ihɔlɔŋdɛ. 3Ya mɛmiɛni li bombayɛ mpɛnte apum ŋa muɛ ni ŋa wɔŋ tɔk kɛlɛŋ ko thambasay tiŋtiŋ ihɔlɔŋ mɔy, kendɛ ni la rɔŋ kɛ ŋa lem tiŋtiŋday. 4Mɛmini bom chaŋa ki che lɔ ni, ha theyɛ lɛ apumamdɛ ŋa lem tiŋtiŋdɛ.
Pɔ tɔŋkɔ Gayɔs
5Anya chɔmalen la tiŋtiŋ yɛ ŋa wɔŋni ha len gbi ko mpɛnteɛ ki thɛmbɛ thɛmbɛ anyan, 6Ŋa koŋ wɔŋ li thamba sei koŋ ŋchɔmalen ma nɔɛ kump Hɔbatokɛ chee. Mɔ la ha ikɛlɛŋ yɛ ŋwom gbo bia ŋay kendɛ la kɔkani. 7Haliwɔ ŋa koŋ hɔni ha sabu wɔɛ ni ŋa kweyɛni yen ibɛ ko mpɛnteɛ. 8Labiɛ hi ha wɔŋ bɛmani paopa ko anya chevɛ, chelɛ yi bɔ cheɛ anya hakani mpanth tiŋtiŋday.
Dayotrifɛs ni Dɛmɛtrius
9Ya koŋ gbal len ko kump Hɔbatokɛ; kɛ Dayotrifɛs wɔ chɔŋleŋ ŋa bɛniŋkɛn nsendɛ, kweyɛ ni la ya wɔ wɔm dɛ, kamini limani ko sɛmthache limdɛ. 10Chelɛ yɛ ya hun gbo, ya nɔ lemɛ la wɔ ŋaɛ, ko simi ni ka ŋhɔk ŋwɔy. Ni hinɛn gbɔl ka lanɛ vɛ, yomɔni ha gbaŋa mpɛntenɛ ni wɔ ye pɛ thapa ŋanɛ ŋa yema ŋa gbaŋaɛ ni tho ŋa hiŋg kump Hɔbatokɛay. 11Anya chɔmalen, ŋa ma nɛmɛni iwɛi kɛ ŋa nɛmɛni ikɛlɛŋ. Nɔ ha ikɛlɛŋ wɔɛ nɔk Hɔbatokɛ; nɔ ha iwɛi kenmu Hɔbatokɛ.
12Nɔ gbi wɔ hɔ tɔkɔ kɛlɛŋ Dɛmitriɔsɛ, ni hiŋg kɔ na yɛni, ni ŋa siɛ lɛ sei limdɛ lɔ rɔŋ.
Ŋlɛn mɛkindɛ
13Ya bi ligbe ha gbal ko mɔ ko, kɛ ya che yema gbalka ni mɛn gbalkaɛ; 14ya bi kithgbɔl ha ke nɔ kɛkɛo, ni yi ni vɛlɛni ha theli.
15Mbɔs ma che ko nɔ ko.
Nthɛmbayɛ ŋa nɔ lɛyŋ. Ŋa lɛyŋ nthɛmbaɛ ŋan gbi.
Currently Selected:
JƆN MƆƐKƐ RAƐ 1: SNT
Highlight
Share
Copy
Want to have your highlights saved across all your devices? Sign up or sign in
Sherbro New Testament Portions © Bible Society in Sierra Leone, 2020.