TIMOTHI NSENDƐ 3

Ŋsɛmthacheɛ kil Hɔbatokɛay

1La pɔ hɔɛ la rɔŋ: Yɛ nɔɛ gbi wɔ yema sɛm ko sɛmthi kɛnda bomdɛ, yema mpanth ŋkɛlɛŋ. 2Yɛlayoɛ kɛnda bomdɛ chen ha bi nthɛkɛ, pok nɔma bul, gbɔl bɔsul, nten, juju, yɛthi anyin yeŋkɛlɛŋ, wɔ bɔ ha toŋgi, 3be nɔ kulɔ ha yil, chen ŋa che nɔ yege yege kɛ nɔ mbɔs, chen ha cheɛ nɔ ŋhɔ, ni chen ha chɔŋ fe len. 4Wɔ bɔ lɛli hoŋ wɔɛ yeŋkɛlɛŋ, dum apuma wɔɛ ihinilɛay ni limani naythindɛ gbi; 5kɛ yɛ nɔ bɔni si lɛli hoŋ wɔɛ ŋhɔ wɔ bɔ lɛli kump Hɔbatokɛ atoka? 6Chen ŋa cheɛ nɔɛ wɔ kan gbo piŋginiɛ, o wɔ bi ha che thɛŋgthiwɔl, ni wɔye bi ilɔ min wɛiyɛ; 7la lelɔpɛ wɔ ha cheɛ nɔɛ wɔ anya tilaŋ ŋa bi itɛnin kɛlɛŋ ha wɔndɛ, o wɔ yema duk ndap kunɛ ni ko chokoth min dɛ.

Anya bɛmani kil Hɔbatokɛay

8Ŋanɛ ŋa fɛtɛ ŋkɛndaɛ ŋa ha che sɔbɛ, ŋa chen ha bi miliŋ litiŋ, ŋa ma wɔŋni ŋkɛn ko mɔɛ ŋgbe, ŋa ma che njɛm ha sɔthɔ bɛrɛ, 9ŋa ha bi sɔkɔth ha laanɛ ka loni bolɛ charaŋ. 10Ni ha pɔ le ŋa hɛl nsen; ni yɛ ŋa toŋgiɛ gbo ibiɛn nthɛkɛ ŋa ha ha mpanth ma ŋanɛ ha fɛtɛ kɛndaɛ. 11Amaɛ ŋabi ha che sɔbɛ, ŋa chen ha cheɛ anya chɛŋgɛ ŋhɔk, kɛ gbɔl mɛsɛ, ŋa ha che tiŋtiŋ naythɛ than gbi. 12Ha ŋanɛ ŋa fɛtɛ ŋkɛndaɛ ŋa cheɛ apukan abiɛ ama bulbul, ni ŋa lɛli apuma ŋaɛ atok ni hoŋ thiŋaɛ yeŋkɛlɛŋ; 13haliwɔ ha ŋanɛ ha ha mpanth ŋkɛlɛŋ kendɛ ŋanɛ ha fɛtɛ ŋkɛndaɛ ŋa sɔthɔ bɛrɛ sɛmthi yegbe ŋa ndelma ha ni ŋa ye bi kithgbɔl bom ki laanɛ kɔ Krayst Jisɔsayɛ.

Jali mathan bomdɛ

14Ya bi kithgbɔl ha hun ko nɔ ko kɛkɛo, kɛ ya ni gbal lanɛ ki la ŋa ha haɛ, chelɛ, 15yɛ ya hunɔn gbo poe, ŋa ha si ŋɔ nɔ wɔ ha dumni ichɛli Hɔbatokɛay, ŋɔɛ kil hɛn Hɔbatokɛ ihɔlɔŋdɛ, tɔŋ ni sɛbɛ kil ha tiŋtiŋdɛ. 16Hi laŋniɛ kɛ sɔkɔth thubi hiɛ kɔ bomba: Pɔ ka toŋgiwɔ ki jal lɛ, ni Min Charaŋ wɔ wɔye toŋgi nɔ rɔŋdɛ, malka ha wɔ ye ke, thɛkɛsi la pɔksay, hɔlɔɛ ŋɔ wɔ ye laanɛ, thɛŋg wɔ Arijana.

Currently Selected:

TIMOTHI NSENDƐ 3: SNT

Highlight

Copy