TIMOTHI NSENDƐ 1
1
1Pɔl, lemnɔ Krayst Jisɔsɛ, hiŋk la Hɔbatokɛ hɔɛ, nɔloliɛ hiɛ ni Krayst Jisɔs kithgbɔl hiɛ, 2ko Timothi, komɔmi gbemɛ ayɛndɛ ko laanɛ: Wɔŋɔ Hɔbatokɛ, keyendapan, ni mbɔs hiŋk Hɔbatokɛ Baaɛ ni Bɛɛ Krayst Jisɔs.
Mɛyŋ ha kɛŋgiyɛni mbolɛ
3Kendɛ ya gbɔnda nɔɛ yɛ ya ka che kɔni Masidonia koɛ, ntelɛ Ɛphisɔs ko, chelɛ, mɔ bɔ gbɔnda anya pum ŋa ma toŋgi jali Hɔbatokɛ li tilaŋ, 4ŋa ma binthima jali mbɛnɛ ni gbal ram la biɛni mɛkindɛ la chi thoŋgaɛ la chen chi kaŋ Hɔbatokɛ kɔ laanɛayɛ; 5ni kithgbɔl gbɔnda hiɛ kɔ nchɔŋmalen ma hokɔ hiŋk gbɔl charaŋ ni bolɛ yegbe ni laanɛay. 6Anya pum yɛ ŋa hɛthni hiŋk lanɛ kiayɛ ŋaye pɔŋni ko theliaŋ yaiyai, 7ŋani ŋgbelŋgbel ha toŋgi sabaɛ, ibiɛ saa nten ko lanɛ la ŋa hɔɛ o lanɛ la ŋa thekɛndɛ la rɔŋdɛ.
8Yɛlayoɛ hi siɛ kɛ sabaɛ ŋɔ yegbe, yɛ nɔ ŋa ŋɔ kendɛ saba ŋɔ hɔɛ, 9ki la sa nɔ gbo nten, kɛ pɔ bɛni saba ha ŋanɛ ŋa tiŋtiŋdayɛ kɛ ha ŋanɛ ŋa chen kwe sabaɛ ni ikweyɛ lendɛ, ha ŋanɛ ha sini Hɔbatokɛ ni anya kafaɛ, ŋanɛ ha iche charaŋdɛ ni iche jali Hɔbatokɛay ha ŋanɛ ŋa diy mbaaɛ ni ŋyaaɛ, ha nɔ diyɛ anyin, 10hanɛ ŋa biyɛni bisin ni sabaɛ, apukanaɛ ha bi athɔma ha apukanɛ, anya wɔŋgulɔ anyin ken awok, anya mbolɛ, ŋanɛ ha gbethani mbolayɛ, ni lanɛ gbi la cheni naythin Hɔbatokɛ, 11la kɔkani ni womdi yegbeɛ lɔ bi gbɛŋ ko Hɔbatokɛ rubandɛ la komi kaɛ.
Chɔŋ sɛkɛ ha yendapan Hɔbatokɛ
12Ya chɔŋ sɛkɛ ko wɔnɛ wɔ kami fɔsa ha lanɛ ki, Krayst Jisɔs Bɛɛ hiɛ, haliwɔ thoŋka mi tiŋtiŋday ni toŋgimi ko mpanth ma wɔay, 13yɛlabɛ ya ka che fothi mbol, ni poli ni sɔl wɔ; kɛ kemi yendapani haliwɔ yaka sini la ya haɛ ni ibiyɛ laanɛ, 14ni wɔŋɔ Bɛɛ hiɛ kɔ mi ye gbiŋgith ka laanɛ ni nchɔmalendɛ ma Krayst Jisɔsɛ. 15La pɔ hɔɛ la rɔŋ ni la ha laanɛ fuli, lɛ Krayst Jisɔs ka hun hɔlɔoay ha loli anya kafaɛ. Ni yaŋ ya anya kafaɛ cheɛ; 16Kɛ ya sɔthɔ ke yendapan ha lanɛki, chelɛ, ya cheɛ nɔ nsendɛ, Jisɔs Krayst yɔn toŋgi muyu wɔ yegbeɛ ha thambasei ko ŋanɛ ŋa ka che ha bɛ laanɛ wɔnay ha ihɔlɔŋ chɔŋgbaɛ. 17Ko Sɛmthache chɔŋgbaɛ, wɔ chen wuɛ, wɔ chen keniɛ, Hɔbatokɛ wɔn kɛn gbo, bi limani ni gbɛŋ ha hɔlɔ chɔŋgba ni chɔŋgba. Vɛlache. 18Jaloki la ya mɔ ni kaɛ, Timothi, taa mi, kendɛ ŋhɔk ma kɛndaɛ ma vɛlɛmɔndɛ, landa kamɔ gbɔl kathil, ni chɔ chɔthi yegbeɛ, 19mbi laanɛ ni bolɛ yegbe. Ha hɛm itɛnin, anya pum ŋa koŋ simi laanɛ ŋaɛ, 20ŋan thiyeŋ Haymineɔs ni Alɛkzandra, ŋa ya koŋ wɔŋ ko min sɔyandɛ chelɛ ŋa bɔ kaŋ ŋa ma simi nɔ jɛm.
Currently Selected:
TIMOTHI NSENDƐ 1: SNT
Highlight
Share
Copy
Want to have your highlights saved across all your devices? Sign up or sign in
Sherbro New Testament Portions © Bible Society in Sierra Leone, 2020.
