San Marcos 13

Jesús rixxiꞌe isía sá iseꞌe lo yotu do Jerusalén

(Mt. 24:1-2; Lc. 21:5-6)

1Atti chi bería Jesús lheꞌeliꞌa gue yotuha nna unnetteba ttu ca benni rudheti ca tisa ruleꞌe rábi Benniha:

—¡Maestro, begüiarga! ¡Análirba de anca ca iyya cua-na, análirba de tsee gaꞌana ca yoꞌo-na lhe!

2Jesús becabittebe re:

—Ca yoꞌo elha rilenlu sia-na, iyárechaba ca unná iseꞌe lo. Ni ttu ca iyya coa ca unná lä eyaꞌanru lä itapaba iqui loescani.

Nu aca deoba lhuxa yies lo yu-ni

(Mt. 24:3-35, 42-44; Lc. 21:7-36; 17:22-24)

3Atti do Jesús lo lhilhi nu te láni Atta Daa Ca Ya Olivu do ttu ladu gue atta do yotuha nna sigába unnaba tisa Pedro lenbi Jacobo lhe Juan lhe Andrés lhe rácabi Benniha:

4—Utixxiꞌen riꞌitu, ¿núca aca nu ralha? ¿Bi aca qui uleꞌe lo dequi chi deoba isía sá aca iyá nu ralha?

5Jesús, becabie re:

—Gualudo cuidadu qui nuttu nu dhana dhi yienle. 6Cumu ixe ca nu isía uncana dequi ancacana neti, nianna innácana: “Neti nua Cristu.” Ixeru benni dha ca nua dhiyiecana.

7’Lebiꞌi nna atti unale chi ritilha len loesi ca yiesi, chi daa tisa itilha len loesi ca yiesi lhe bittu gasinle, cumu labíaba aca aná. Ttiaca läga chi bisía sá lhuxa yies lo yu-ni. 8Cumu ttu yiesi xeni leni attu yiesi xeni itilha len loescani, ttu nu rinnabia leni attu nu rinnabia itilha len loescani. Gatti laduba gue yies lo yu-ni ixúxxatta, aca ubina lhe. Ttiaca iyába unní ancana sunruba nu daneru gue elha disa nu chi daba uyú ca benni seꞌe yies lo yu-ni.

9’Lebiꞌi nna gualdo cuidadu, cumu udaxxu ca benni le saseꞌecan le lo ca uxtisi-na. Ca unná nna quincan le lheꞌe ca yoꞌo atta rudheti ca benni Israel ca tisa gue Tata Do Iyyabaaha. Lo niꞌa quia nna ichecanle lo ca nu lo gue ca uxtisi-na, lo ca nu rinnabia xeni-na lhe. Aníaliba nna qui aca quixxiꞌenle ca nua ca tisa quia-ni. 10Ttiaca antisla isía sá lhuxa yies lo yu-ni, labíaba quixxiꞌani ca benni iyárecha ca benni seꞌe lheꞌe ca yiesi seꞌe itúba yies lo yu-ni ca tisa tsee rixxiꞌa gue gaxasná rinnabia Tata Do Iyyabaaha. 11Gansi chi bedaxxu ca benni le qui saseꞌecan le lo ca uxtisi-na, bittu ichacha iquile gue bixa innále. Gualnneba ca tisa ute Tata Do Iyyabaaha len lebiꞌi la uraha, cumu läga lebiꞌi nua innee, Espíritu gue Tata Do Iyyabaahaba Benniha innee. 12La betsiba ttu benni utena attu betsiniha las ná ca nu uttican na, unnuhaguaba uni ca tata len ca xiꞌincani lhe ca xiꞌincaniha nna eyequicana usia lecani ca tata guecaniha, nianna uncana qui gatti ca nua. 13Lebiꞌi nna iyába ca benni bitturu aca uyúcan le lo niꞌa quia, ttiaca benni dhana dhu tsitsina lo neda gue Tata Do Iyyabaaha axta atti isía sá gattina, unnuha liba lhána bittu tsia nittina.

14’Larcala nna ca nu ulabacana ca tisa dia lo ca sitsi-ni, uncana duelha qui sadú lecani bixa dia le nu rá atti re: Atti ilenle aca ttu nu satsa atta bittu dica acana, gue nu satsaha nua utixxiꞌa profeta Daniel. Unnuha nna acana atta bittu dica acana. Lania nna ca nu seꞌe lo yu te láni Judea-na, uxunnicana tsiacana ca iꞌiyattoo-na. 15Nu do iqui yoꞌo gueniha nna bittu aquinna eyadina, lä sataꞌaguabana lheꞌe yoꞌoha qui saleana bixa reasinna. 16Nu requi ranchu nna bittu eyyana lheꞌe lisniha qui saxína gabana gueniha. 17¡Carusiꞌiru ca nuila nuja xiꞌincani lania, ca nuila deni unto rasi xisi lhe! 18Gualinnaba lo Tata Do Iyyabaaha qui bittu saxxína isía sá atti uxunnileha tiempu ribe beyya. 19Cumu lania nna anca ca nua ca sá atti uyúxxatta ca benni elha disa. Desdeba atti ben Tata Do Iyyabaaha yies lo yu-ni axta nnanna lägabi loesi elha disaha chi biyú benni, bitturguaba uyú benni attu elha disa loesi unnuha lhe. 20Gansi Tata Do Iyyabaaha bittuba odatsie ca sá atti uyúxxatta benni elha disaha, ni ttu benni bittu dhana lhána lo elhuttiha. Ttiaca lo niꞌa gue de runrube lhá ca benni chi becuee anca guee, nuarca odatsie ca sáha.

21’Lania nna gansi nuxa iríana gán le: “Gualgüiarga, ni Cristuha du nii”, o innána: “Gualgüiarga, ni Cristuha du na”, lebiꞌi nna bittu tsia lele gue nu inná anía. 22Cumu ixe ca benni iría innácana dequi labacana nua anca Cristu, iría ca nu inná dequi ancacana profeta gue Tata Do Iyyabaaha lhe. Lacana nna uncana ixeru ca milagru, unguabacana ilen benni ca nu uni ebanin ca benni lhe. Leni ca unnuha nna dhi yiecana ca benni. Axtaba ca benni chi becuee Tata Do Iyyabaaha, un ca nua dhi yiecana. 23Larcala nna gualudo cuidadu, cumu desde nnannali chi rixxiꞌatia le gue iyá nu aca.

24’Lania nna dequide tte ca sá atti uyú ca benni seꞌe yies lo yu-ni elha disaha nna echulhatteba lo tatubisa-na, lo nanto beo-na lhe bitturu cuꞌuna xieni. 25Ca beli sia lo bea-na, iyinnabacana lo yu, iyába ca nu ra xxeni leni seꞌe lo bea-na ixidicana lhe. 26Lania liba nna iláni ca benni seꞌe yies lo yu-ni neti Benni unbiyuu daa iyyabaaha dedaaya lheꞌe ca bea-na anca benni ra xxeni leni, ruꞌu xieni gaꞌana tsee quia lhe. 27Nianna idhelhatteba ca ingeli quia-na saxícana iyárechaba ca benni chi becuee Tata Do Iyyabaaha anca guee seꞌe itapa laduba gue yies lo yu-ni. Desdeba ca benni seꞌe axta atta riluxa yies lo yu-ni saxícana, axta ca benni seꞌe atta ridú niꞌa iyyabaaha lhe.

28’Gualudheti ejemplu gue ya igu-na: Atti rilenle chi re reꞌeni ca lo xiquini, chi reꞌeyu lhaga gaꞌa gueni lhe lebiꞌi nna ritedaattebinle chi dedaa tiempu iyya. 29Anáguaba lebiꞌi, gansi chi bilenle aca iyába ca nu chi ria-ni, lania nna chi yule chi daa ribiga esíaya neti Benni unbiyuu daa iyyabaaha. 30Neti nna gualíbatia rpea le, iyába nu ria-ni aca, antisla lhuxa ca benni seꞌe-ni. 31Lo bea-na lhe yies lo yu-ni lhe lhuxabacana, ttiaca labíaba saxxína aca nu rá ca tisa quia-ni.

32’Ttiaca gue bixa sá lhe gue bixa ura aca unnuha lhe tsa läganu yu, ni ca ingeli seꞌe iyyabaaha lhe niguaba neti benni anca Xiꞌini Tata Do Iyyabaaha lhe bittu yua. Sunruba Tata Do Iyyabaaha yue.

33’Larcala, lebiꞌi nna satía gualtseꞌe ubeda, tsitsi gualtseꞌe lhe gualne len Tata Do Iyyabaaha lhe cumu läga yule nucaxa isía sá atti aca anía. 34Lania nua aca attiba uca len ttu unbiyuu chi ridána diana idittu attu yiesi subi. Lana nna bocaꞌanattebana yoꞌo gueniha las ná ca nu riben sina gueniha. Ttuttuba ca nua bocaꞌanna bixa uncana. Nu bodúna gapana roꞌo yoꞌoha nna benna nua mandadu gapa tsitsina roꞌo yoꞌoha. 35Lebiꞌi nna bittu tseꞌe xulhale, cumu attiba anca ca nu upa yoꞌoha ancale. Ca unnuha nna läga yu ca nua bixa sá esía benni beaca gueni yoꞌoha, si gansi chi daba raca ela lhe si riloela lhe o si gansi chi uxxá liba roꞌo berudiha lhe o si chi daa rani liba lhe. 36Quini lä ttutterba esíaya nna lania nna ettettiꞌaya le tele tiꞌedhile. 37Nu rpea lebiꞌi nna unnáguaba rpea iyába adí benni: “¡Gualeseꞌe tsee, tsitsi gualdo cuidadu!”

Currently Selected:

San Marcos 13: zaq

Highlight

Copy