San Marcos 12

Ejemplu gue ca unbiyuu lä du ta leni ureni sina umpaníha lo ttu yu

(Mt. 21:33-46; Lc. 20:9-19)

1Jesús udulottebe utixxiꞌe ttu ejemplu, re cana:

―Udo ttu unbiyuu udabi ca ya besuli lo yu guebiha, atti benttebabi nua currali. Nianna ulequittebabi ttu xieru atta idhícana ca besuliha. Benguabi ttu nu yadha anca attiba yoꞌo qui tsopi nu gapa lo yuha iqui nua qui gapana ca ya besuliha. Biꞌini beaca guebi lo yuha nna betettebabi lo yuha leni ca nu cuencana nua umpanía. Labi nna biríattebabi diabi idittu lheꞌe attu yiesi subi. 2Atti chi bisía sá exuu besuli betee lo yuha nna udhelhatteba benni beaca guebi lo yuha ttu benni riben sina guebiha tsiana sayúna ca nu reni umpanía lo yuha, qui utecana nu ralha biꞌiniha dhibi. 3Ttiaca ca nu reni umpanía lo yuha nna bedaxxulacana unnuha begüeecana, atti bedhelhacan na sunttebancana. 4Biꞌini beaca guebi lo yuha nna bededhelhattebabi attu benni riben sina guebiha, edeyyana sadiyúna ca nu ribeni umpanía lo yuha. Ca unnuha nna ulhaꞌalacana iqui nua leni iyya, bedhaca disacan na lhe. 5Biꞌini beaca guebi lo yuha nna bededhelhattebabi attu nu güia, ttiaca ca nu ribeni umpanía lo yuha nna bettilacan nua. Dequila nna bededhelhabi adí nu güia, ttulhe ca nua nna begüeecana, adí ca nua nna betticana.

6’Biꞌini beaca guebi lo yuha nna a sunruba xiꞌinbi nu raca xxattinbi gueniha bittu chi udhelhabi. Lenla nna udhelhabi nua, cumu raquinbi ga güeyyaba lecani unnuha de raca nua xiꞌinbi. 7Ttiaca ca nu riben umpanía lo yuha nna rátteba loescani: “Unní ancana nu eyaꞌanna lo yu-ni. Gualtá uttiri na, lania nna guebari aca lo yu-ni.” 8Nianna bedaxxuttebacana uncuitiha betticana, atti uleattebacana nua guachuꞌunacan na roꞌo yu atta te besuliha.

9Lebiꞌi nna:

—¿Bi rquinle uni benni beaca guebi lo yu atta te besuliha? Biꞌiniha etababi ettelhuxabi ca nu reni umpanía lo yuha. Lo yuha nna dhibi nua utebi umpanía len ca benni subi.

10Lebiꞌi nna:

—¿Si bittuba chi belabale lo ca sitsi gue Tata Do Iyyabaaha atta rá?:

Iyya nu uluꞌu niꞌa ca benni rucoa ca yoꞌo-na,

unnuha la beacana iyya nu ribe riden tsitsina yoꞌo.

11Benni bananie ri-naba benie raca aní.

Unní ancana ttu nu runna eban leri.#12:10-11 Salmo 118:22-23

12Ca bixxudi anca nu lo lencana ca nu ruleꞌe nu rá lo ca ley bocaꞌanaha Moisés lhe ca nu teru elha rieni gueni gue ca benni Israel lhe uxacattebacana udaxxucana Jesús, cumu guadúba lecani labacan nua rutáni benniha len ejemplu unnee. Ttiaca cumu rasquinna lo ca benni seꞌe nía, nuarca bocaꞌan chibacana Jesús, nianna güequittebacana deyyacana.

Rinnaba tisacana Jesús gansi gua dica quixacana belhi nu deyya Roma

(Mt. 22:15-22; Lc. 20:20-26)

13Lenla nna udhelhattebacana ttu chupa ca fariseo, leni attu chupa ca benni denoo nu rinnabia lá Herodes atta do Jesús, qui un ca nua ibixxi Jesús innee ttu tisa leni nu dhacana udelhiyyacane. 14Ca unnuha nna güiattebacana rácane:

—Maestro, riꞌitu nna yutu lu nna läga run lelu, bittuguaba rasinlu gue cadiga bi inná benni lhe cumu lu nna läga rugüialu ttixa anca ttu ttu ca benni, sinuqui gualíbinlu ruleꞌebalu lhixxa suba gue gaxasná raca le Tata Do Iyyabaaha tseꞌe benni. Nnanna nna utixxiꞌa sanguin riꞌitu, ¿si guagaꞌana quixari len güequixa belhi nu deyya atta do nu rinnabia do lheꞌe yiesi Roma? ¿Si quixartu aca? ¿Bitturba quixatu aca?

15Ttiaca Jesús yuxeabe ni lo ni tisaba rá ca nua anía. Lee nna ráttebe cana:

—¿Biaca runle ibixxia innea ttu nu uni qui dhale udelhiyyale neti? Gualunna ttu belhi qui ugüiaya na.

16Lacana nna betetteba cana ttu belhi len Benniha. Lee nna ráttebe cana:

—¿Nú lo unná du lo belhi-ni? ¿Nú beaca láni nu dia lo unná lhe?

Lacana nna becabicana rácana:

—Gue César nu rinnabia do Roma.

17Laniala nna rá Jesús cana:

—Gualugüeba nu rinnabia-na nu ralhana dhína, gualugüeguaba Tata Do Iyyabaaha nu ralhe dhie lhe.

Lacana na rebanbaquinna gue atti becabi Benniha guecani.

Jesús rixxiꞌe gue bixa aca len ca benni yatti-na

(Mt. 22:23-33; Lc. 20:27-40)

18Lenla nna ubigatteba ttulhe ca benni saduceo ca nu rácana dequi läga gualí reacani ca nu yatti-na, guannaba tisacana Jesús, rácane:

19—Maestro, lo sitsi bodhaꞌana Moisés len riꞌitu nna rá, gansi ttu unbiyuu chi betsá náni gattina, lana nna nuttu xiꞌinni useꞌe leni nuila gueniha, betsi unbiyuu uttiha nna daa loni edína nuila bidabiha qui anáchu nna ca xiꞌinni tseꞌe len nuilaha nna acacana attisiba xiꞌini betsini chi uttiha. 20Ttu libe nna useꞌe gasi betsi ca unbiyuu. Betsi xen guecaniha nna betsátteba náni, ttiaca uttittebana, niba ttu xiꞌinni bittu bisía. 21Betsi berupa guecaniha nna betsátteba náni len nuila bidabiha, ttiaca unnuha nna bedeattiguabana, nuttuguaba xiꞌinni beseꞌe len nuilaha. Aníaguaba guaditee betsi beyonna guecaniha. 22Iyába gasicana guatecana anía, niba ttuna lä beseꞌe xiꞌinni len nuilaha. Dequide nua nna uttiguaba nuilaha. 23Gansi chi bisía sá eyacani ca benni yatti-na, ¿núla delo gasi ca unbiyuuha aca nuilaha latselani? Cumu iyába gasicana betsá nácani len nuilaha.

24Laniala becabi Jesús re cana:

—Lebiꞌi nna läga gualínle gue nu rulaba lele-na, cumu läga radú lele gue nu rá lo ca sitsi gue Tata Do Iyyabaaha, niguaba gue elha ra xxen le gue Ben-na lhe. 25Atti isía sá eyacani ca benni yatti-na, ca unbiyuu-na lhe ca nuila-na lhe lärga dica utsá nácani, lä uterguabacana ca xiꞌinquinna qui utsá nácani lhe cumu attiba anca ca ingeli seꞌe iyyabaaha eyacacana. 26Ttiaca gue gansi güeyacani ca benni yatti-na, lebiꞌi nna ¿si bittuba chi belabale lo ca sitsi bodhaꞌana Moisés len riꞌi? Lo ca sitsi-na rixxiꞌa bixa rá Tata Do Iyyabaaha Moisés atti unnee lheꞌe bibu riteha re: “Neti anca Tata Do Iyyabaa gue Abraham lhe gue Isaac lhe gue Jacob lhe.”#12:26 Éxodo 3:6 27Tata Do Iyyabaaha läga anque Dios gue ca benni yatti-na, Ben-na anque Dios gue ca benni bani-na. Larcala lebiꞌi nna tsa läga yule gue nu rále-na.

¿Nú ca ley gue Tata Do Iyyabaaha racaru duelha dho tisa guee?

(Mt. 22:34-40)

28Ttu ca nu ruleꞌe nu rá lo ca ley bocaꞌana Moisés, bieninna nu rá Jesús ritilha tise len ca saduceo. Lana nna ute deenna tseeba chi becabi Benniha gue ca nua, ubigattebana unnaba tisana Benniha ráne:

—Delo iyá ca ley bocaꞌana Tata Do Iyyabaaha leni Moisés, ¿nú ca ben-na racaru duelha dho tisa guee?

29Jesús becabittebe gueni re na:

—Ley nu racaru duelha dho tisa guee nna anque tisa rá: “Gualiyienini, lebiꞌi benni Israel, Tata Do Iyyabaaha Benni bananie ri anque Dios gueri, sunruba Ben-na anque Benni bananie ri. 30Aquinlu gue Tata Do Iyyabaaha Benni bananie lu itú iqui itú lelu, leni itúxea lastoolu lhe leni itú elha rieni guelu lhe leni itú fuerza guelu lhe”.#12:29-30 Deuteronomio 6:4-5[Ley-na anque benni racaru duelha dho tisa guee.] 31Ley berupaha nna anque attiba benni: “Aquinlu gue ca benni attiba raquinlu gue la luba.”#12:31 Levítico 19:18 Tsa lärga birua attu ley te racaru duelha dho tisa guee attichula chupa ca ley-ni.

32Nu ruleꞌe nu rá lo ley bocaꞌana Moisés, becabittebana rána:

—Tseeba becabilu, xa Maestro. Gualíbinlu nu rálha, tturba Tata Do Iyyabaaha do, lärga nurua attu do dequide Ben-na. 33Aquinri gue Tata Do Iyyabaaha itú iqui itú leri lhe leni itú lastoori lhe leni itú elha rieni gueri lhe leni itú fuerza gueri lhe aquinri gue ca benni attisiba riꞌiba nua lhe ancana nu rerla balaꞌana lo Tata Do Iyyabaaha attichula iyába ca úna lhe ca bela gue ca nimala ratti qui rite lo becoa gue Ben-na.

34Atti biyú Jesús tseeba becabi nua leni elha rieni nna ráttebe nua:

—Läga bicaga reasa qui acalu benni sela ca benni rinnabia Tata Do Iyyabaaha.

Bedá lania nna lärga nurua beaxinna innába tisana Benniha.

¿Nú benni nua datía David?

(Mt. 22:41-46; Lc. 20:41-44)

35Atti ruleꞌeni Jesús ca benni seꞌe lheꞌeliꞌa gue yotuha nna ráttebe cana:

—¿Tti modu rá ca nu ruleꞌe nu rá lo ca ley bocaꞌana Moisés dequi Cristu anque benni datía David biꞌini uca nu unnabiaha? 36Inqui la laba David unnebi ca tisa bete Espíritu gue Tata Do Iyyabaaha rábi:

Tata Do Iyyabaaha re Cristu Benni bananie neti:

“Ni udo daca lhuitta derechu quia,

axta liba unia aca ca nu lä raca uyúcan lu-na

nu udú niꞌalu iquicani.”#12:36 Salmo 110:1

37Inqui la Davidba rábi: “Cristuha anque Benni bananie neti, ganna anía anca, ¿tti modu anca Cristuha benni datía David?”

Ixeru ca benni seꞌe nía. Lacana nna itú iqui itú lecani rudo nagacani gue Benniha.

Jesús rudianni loe ca nu ruleꞌe nu rá lo ley bocaꞌana Moisés

(Mt. 23:1-36; Lc. 11:37-54; 20:45-47)

38Jesús beleꞌettebanie ca benni seꞌe nía re cana:

—Gualudo cuidadu qui lä unle atti run ca nu ruleꞌe nu rá lo ca ley bocaꞌana Moisés, cumu ca unná nna reꞌo lecani tsequicana ucu xo tuni guecani qui uleꞌe dequi ancacana benni ra xxeni leni, radi lecani gá benni cana padiuxi len respeto lheꞌe ca atta raca ca iꞌiya-na lhe 39tsitsiba ridá lecani cuiacana lo ca xxila gaꞌana tseeru seꞌe lheꞌe ca yoꞌo atta rudhetiri ca tisa gue Tata Do Iyyabaaha lhe cuiacana atta gaꞌanaru tsee lheꞌe atta raca laní lhe. 40Güeaniba rigúacana ca yoꞌo gue ca nuila bidabi-na, nianna nilo ni tisaba isáru riseꞌecana rinnecana leni Tata Do Iyyabaaha qui uleꞌe lo dequi ancacana benni runi nu anca tsee lo Ben-na. Larcala nna ttu elha disa xeni ugüe Tata Do Iyyabaaha cunná atti adí benni.

Ttu nuila bidabi uluꞌuna iyába belhi gueniha úna

(Lc. 21:1-4)

41Ttu libe nna udo Jesús lheꞌeliꞌa gue yotuha gaxxaba atta seꞌe ca nu riguꞌu ca benni úna lheꞌecaniha. Rugüie gue ca nu riguꞌu belhi lheꞌe ca nua. Ixe ca benni te guecani riguꞌucana xxeni belhi. 42Nianna bisía ttu nuila bidabi nu bittu te gueni, uluꞌuna lheꞌe ttu ca unnuha chupa ca belhi ca nu bittu tte lidhacani te. 43Jesús beaxittebe ca benni rudheti ca tisa ruleꞌe, nianna re ca biꞌiniha:

—Neti nna gualíbatia rpea le, nuila bidabi-ni nu bittu te guen-nala bete xxenru atti adí ca nu riguꞌu belhi lheꞌe atta ruꞌu úna-na. 44Cumu iyába ca unná rutecana sunruba nu rexxa guecani, ttiaca nuila-ni nna lä caa gueni nna iyába nu dica aca bannaha betena.

Currently Selected:

San Marcos 12: zaq

Highlight

Copy