San Marcos 11

Jesús die gueꞌe lheꞌe yiesi Jerusalén

(Mt. 21:1-11; Lc. 19:28-40; Jn. 12:12-19)

1Atti chi deoba isíni Jesús lenie ca benni rudheti ca tisa ruleꞌe lheꞌe yiesi Jerusalén, bisínttebacabi atta re lheꞌesi nu te láni Betfagé leni lheꞌesi nu te láni Betania ttu ladu gue lo lhilhi nu te láni Atta Daa ca Ya Olivu. Laniala nna udhelha Jesús chupa ca biꞌini rudheti ca tisa ruleꞌe. 2Lee nna re ca biꞌiniha:

—Gualtsia lheꞌesi re ttu ladu-na. Gansi chi utaꞌale lheꞌesi-na, na sattiꞌale ttu burru cuiti nalhana. Unnuha nna tsa nuttu nu chi udon cuꞌeni. Lebiꞌi nna gualudhán-na, atti gualetá tte lenna ni. 3Gansi nuxa innána: “¿Biaca runle aná?” Lebiꞌi nna gualgás na: “Benni bananie ri-naba reasanie unní, lenla nna güetteruꞌunttebe na.”

4Lacabi nna güiattebacabi. Níaba guattiꞌacabi burru cuitiha nalhana gaxxaba lheꞌe puerta gue ttu yoꞌo do xitsi nedaha. Nianna udhasttebacabi nua.

5Ttu ca nu seꞌe nía nna unnaba tisattebacana rácana:

—¿Biunna runle na? ¿Biaca burru-na ridhasle?

6Lacabi nna becabittebacabi attiba rába Jesús cabi. Ca unnuha nna lärgabi rua rá ca nua. 7Besinba lencabi burrutoha atta du Jesús, atti uluꞌuttebacabi ca lari rucucabiha cuꞌe nua. Benniha nna udottebe cuꞌe nua. 8Ixeru ca benni ritsilacana ca lari nucucanaha lo neda atta dia Benniha, adícana nna lo ca yaga daa níaba ritsa cana qui ritsilacana lo nedaha. 9Ca nu denalha lhe ca nu dia neruha lhe ribesiꞌacana rácana:

¡Xxeni ra lelu o!

¡Carbárulu, lu ancalu benni udhelha Tata Do Iyyabaaha!

10¡Carbárulu, lu benni daa innabia attiba unnabia David benni datíariha!

¡Xxeni ra le benni do iyyabaaha!

11Atti utaꞌa Jesús lheꞌe yiesi Jerusalén, güiattebe lheꞌeliꞌa gue yotuha. Dequide begüia xxa tseebe iyába nu tee sabiꞌaba nía nna deyyatteba lenie ca benni tsiꞌinu rudheti ca tisa ruleꞌe lheꞌe yiesi Betania, cumu chiba ulha sá nua.

Ya igu bittu sia nu xixxi loniha

(Mt. 21:18-19)

12Betteyú sá nna atti bería que lheꞌe yiesi Betania, Jesús nna utunie. 13Idittuli bilánie du ttu ya igu sia lhaga gueni. Lee nna güiattebe guagüie gansi gua sia nu xixxi gue nua. Ttiaca sunruba lhaga gue nua sia, niba ttu nu xixxi bittu te lo nua cumu läga lania anca atti ribía gue nua. 14Laniala nna rá Jesús ya iguha:

—¡Tsa ni ttu libe nutturu gona nu xixxi guelu!

Ca biꞌini rudheti ca tisa ruleꞌe nna bienbaquinbi nu rá Benniha.

Jesús bería lee ca nu yuꞌu güettoꞌo lheꞌeliꞌa gue yotuha

(Mt. 21:12-17; Lc. 19:45-48; Jn. 2:13-22)

15Bisínbacabi lheꞌe yiesi Jerusalén nna utaꞌatteba Jesús lheꞌeliꞌa gue yotuha, atti udulottebe bería lee ca nu yuꞌu güettoꞌo nía, ca nu roꞌoha lhe. Berixxi lottebe ca mexa gue ca nu rotsía belhiha lhe atta sia ca nu rutoꞌo becha lhe. 16Tsa ni ttu benni bitturu begüeelhe ttecana lheꞌeliꞌa gue yotuha leni ca nu checanaha. 17Lee nna udulottebe beleꞌenie ca benni re cana:

—¿Si läba gua yubale, lo ca sitsi atta dia ca tisa gue Tata Do Iyyabaaha rinne Ben-na re: “Yoꞌo quia-ni acana yoꞌo atta inne iyáxea ca benni seꞌe lheꞌe ca yiesi seꞌe yies lo yu-ni leni neti?#11:17 Isaías 56:7 Ttiaca lebiꞌi nna attiba belea anca lisi ubana la chi beonle yotu-ni.”#11:17 Jeremías 7:11

18Atti bienini ca bixxudi anca nu loha lencana ca benni ruleꞌe nu rá lo ca ley bocaꞌana Moisés nu rá benniha, lacana nna udulottebacana beguila lecani gaxasná uncana qui utticana Benniha de rasquinna loe, cumu iyába ca benni rebanquinna gue nu ruleꞌe Benniha. 19Atti chi daa raca ela nna beríatteba Jesús lenie ca benni rudheti ca tisa ruleꞌe lheꞌe yiesi Jerusalén.

Jesús rixxiꞌe ttixuca ubisi ya iguha

(Mt. 21:20-22)

20Betteyú dila nna ute Jesús lenie ca benni rudheti ca tisa ruleꞌe atta du ya iguha. Lacabi nna biláquinbi chi ubisi yagaha itupa lhu-ni. 21Laniala nna bexxatteba le Pedro gue nu rá Jesús yagaha, nianna ráttebabi Benniha:

—¡Maestro, begüiarga! ¡Chi ubisi ya igu nu rálu ni ttu libe bitturu cuia nu xixxi gueniha!

22Jesús becabie re cabi:

—Gualtsia lele Tata Do Iyyabaaha. 23Cumu neti nna gualíbatia rpea le nuxaba benni gansi gána iꞌiya do-na: “¡Ubietta atta dolha nna güia tte bixudi lheꞌe indattoo-na!”, lana nna bittu rudú chupana leni sinuqui ria leni aca nu ránaha, lania nna acaba nu chi ránaha. 24Larcala nna rpeale, iyába bixa rinnabale gansi chi rinnele leni Tata Do Iyyabaaha guadíbale nua, ladiba ria tsitsi lele Ben-na. 25Gansi chi rinnele leni Tata Do Iyyabaaha, gualdhí elha xen lasi gue bixa uxacale leni nuxa benni, qui anáchu nna dhi Tata guele Benni do iyyabaaha elha xen lasi gue ca tulha guele. 26[Cumu gansi bittuba ridíle elha xen lasi nna niguaba Tata guele Benni do iyyabaaha bittu dhie elha xen lasi gue ca tulha guele.]

Riguꞌubia ca nu lo gue ca nu Israel dhacana lo Jesús

(Mt. 21:23-27; Lc. 20:1-8)

27Atti chi besincabi Jerusalén, níaba requi Jesús lheꞌeliꞌa gue yotuha. Ca bixxudi anca nu lo gue adí ca bixxudiha lencana ca nu ruleꞌe nu rá lo ca ley bocaꞌana Moisés lhe ca nu teru elha rieni gueni gue ca benni Israel lhe ubigattebacana lo Benniha. 28Nianna unnaba tisattebacana rácane:

—¿Bi elha rinnabia rapalu qui runlu aná? ¿Nú betena elha rinnabia lenlu qui unlu nu runlu na?

29Jesús becabittebe guecani re cana:

—Gansi güecabile quia gue nu innába tisa le nna anáguaba neti ecabiguaba guele quixxiꞌatia le nuxa betena elha rinnabia quia qui runia nu runia ni. 30¿Nú udhelhana Juan ugadibi benni inda? ¿Si Tata Do Iyyabaaha aca? ¿Si ca benni seꞌe yies lo yu-ni aca? Gualecabi quia.

31Lacana nna uyuꞌuttebacana unne len loescani, nianna rácana:

―Gansi ecabiri innári: “Tata Do Iyyabaahaba udhelhe biꞌiniha”, lania nna innáttebunna: “¿Biacala bittu güia lele nu rá biꞌiniha ganna?” 32Bittuguaba aca innári dequi ca benni seꞌe yies lo yu-niba udhelhacana biꞌiniha.

Lacana nna rasbaquinna lo ca benni, cumu iyába ca benni rácana gualíba uca Juan ttu profeta gue Tata Do Iyyabaaha. 33Laniala nna becabicana gue Jesús rácane:

—Bittu yutu.

Benniha nna becabie re cana:

—Anáguaba neti bittuguaba quixxiꞌaya nuxa betena elha rinnabia quia qui unia nu runia-ni.

Currently Selected:

San Marcos 11: zaq

Highlight

Copy