Makuˊ 16

Yesuˊ tang kuhˊ imˊ Eun

1Yam seunyi Sinˊ naˊ hawcˊ ka naˊ, Mariˊ peue veng Magadalaˊ, Mariˊ ma eun Yakopˊ maeeˊ Salome naˊ ce heulˊ leuvaee lamawn homˊ kaw ri lhuikˊ tuˊ Eun Yesuˊ naˊ. 2Peunngup cawo ka seunyi keuhti ka vung yam seunyi lih ka naˊ, ce heulˊ ri keutuiˊ leumuic naˊ. 3Ce mhaingˊ puri, “Aˊnhawˊ ciˊ naˊ teumˊkawm eˊ cutˊ ri tec meulˊ seumu dhoˊ ka keutuiˊ leumuic naˊ?”

4Daecti yam seuconˊ ce a naˊ, ce nyu meulˊ seumu keuting nyawkˊ awnˊ cutˊ a ri tec ri hawcˊ. 5Yam ingˊ lec ce hk'aˊnaee ka keutuiˊ leumuic naˊ, ce nyu nang nhumˊ cuipˊ hk'o dalˊ paing ti peue titˊ mokˊ eun hk'aˊ aˊtawmˊ naˊ. Ce tokˊseupa ruing nyawkˊ.

6Eun lahˊ, “Pawlaee tokˊseupa ruing. Heulˊ sok peˊ Yesuˊ peue veng Nasaraetˊ tawkˊ peue yeum pang kleumˊ rawngˊtawpˊ naˊ Eun. Kuhˊ imˊ Eun hawcˊ, hpaw Eun caˊ laee utˊ maenˊ. Ingˊ nawk vang uinˊ peue Eun naˊ reuˊ. 7Peˊ naˊ ingˊ lahˊ a ri tapaeˊ Eun naˊ ce maeeˊ Petruˊ eun yeuh keutitˊ, ‘Buih heulˊ Eun nang kuingˊ Galilaeˊ nanggalˊ peˊ. Peˊ kaw nyu Eun tehˊ seunˊ lahˊ Eun a ri peˊ hawcˊ naˊ.’ ”

8Beunˊ awnˊ ce tokˊseupa ruing lhatˊ keuyuingˊ pucti lih hk'aiˊ keutuiˊ leumuic naˊ vaeevaee. Kopti lhatˊ nyawkˊ ce naˊ, ce unˊ lahˊ keunhawˊ ri aˊnhawˊ.

Yesuˊ tuilˊ Eun Mariˊ peue veng Magadalaˊ ka nyu ri

9Peunngup cawo ka seunyi keuhti ka vung yam Yesuˊ kuhˊ imˊ Eun naˊ, Eun tuilˊ Mariˊ peue veng Magadalaˊ naˊ ka nyu ri nanggalˊ. Beunˊ awnˊ ka meuh kuˊ Yesuˊ tawn ra Eun ri tec seucaˊ aˊres tuˊ lih hk'aiˊ ka naˊ. 10Mariˊ ka heulˊ ris peue tawn utˊ maeeˊ Yesuˊ Eun naˊ ce mhawngˊ a. Ce buih hpumˊ suiˊ hpumˊ tuk yam. 11Yam mhawngˊ ce lawng Yesuˊ imˊ Eun naˊ maeeˊ lawng Mariˊ pun ka ri nyu Eun naˊ, ce hkuinˊ yumˊ a.

Yesuˊ tuilˊ Eun tapaeˊ lalˊ peue ka nyu ri

12Hawcˊ awnˊ na, Yesuˊ Eun tuilˊ tapaeˊ lalˊ peue ri naˊ ka nyu ruprang seubu ri naˊ yam buih long ka hk'aˊ heulˊ hk'aˊnok ka veng naˊ. 13Ka tang ingˊ ris peue seubu naˊ ce mhawngˊ a, daecti ce ku unˊ yumˊ a yeut.

Yesuˊ tuilˊ Eun tapaeˊ ri naˊ ce nyu ri

14Hawcˊ awnˊ na, Yesuˊ Eun tuilˊ tapaeˊ kulˊti peue ri naˊ ce nyu tuˊ ri naˊ yam buih somˊ ce naˊ. Eun isˊ ce kopti unˊ kueˊ ce hk'aˊ yumˊ, maeeˊ kopti lheuˊ ce leukahˊ ce unˊ yumˊ kuˊ lahˊ ce peue pun ri nyu Eun hawcˊ tang kuhˊ imˊ Eun naˊ.

15Eun lahˊ a ri ce, “Heulˊ pang bhenˊ keuteˊ naˊ ku duihˊ ka, lahˊ peue gawmˊeucˊ peue mhawngˊ leukahˊ munˊ renˊkawn naˊ reuˊ. 16Aˊnhawˊ lawn yumˊ, rap ri ti hk'aˊ cumˊ naˊ koˊ, eun kaw pun hk'aˊ htut lawtpon naˊ. Daecti pun ce peue unˊ yumˊ naˊ, ce kaw pun ri hkamˊ hk'aˊ tawsˊ aˊmu naˊ. 17Pun ce peue yumˊ naˊ a kaw kueˊ hetˊ keuting yeuhkiˊ, ce naˊ cu muis Uiˊ naˊ ce naˊ ra ri tec seucaˊ, ce naˊ lahˊ leukahˊ hk'uˊ heunˊ ceu, 18ce naˊ mheutˊ seueuengˊ ri tiˊ ri, ce saecˊ naˊ hk'a yunˊ, ce hkuinˊ kaw yeuh keunhawˊ ri ka, ce naˊ tangˊ tiˊ ri hk'aˊpang peue peuyhat, peuyhat ce peue awnˊ a ku naˊ cuin.”

Yesuˊ hukˊ Eun kuingˊ pang maoˊ

19Yam Cawoˊ Yesuˊ hawcˊ lahˊ Eun a ri ce naˊ, Peucawoˊ Eun yuk Eun hukˊ nang kuingˊ pang maoˊ. Eun mokˊ hk'aˊ aˊtawmˊ Eun Peucawoˊ naˊ. 20Hawcˊ koˊ, tapaeˊ naˊ ce pucti heulˊ sangsawnˊ leukahˊ munˊ renˊkawn naˊ ku duihˊ hk'awpˊ. Cawoˊ Peucawoˊ Eun yeuh kanˊ maeeˊ ce. Eun htawhkam leukahˊ ri naˊ ri yeuh Eun hetˊ keuting pucti lih naˊ.#16:20 Nang htawm Seungaˊ naˊ ngonˊ, a hkuinˊ kueˊ nambat aetˊ 16:9-20 aenˊ ce.

Currently Selected:

Makuˊ 16: blrPL

Highlight

Copy