Luˊka 9
9
Yesuˊ cusˊ Eun tapaeˊ kulˊleualˊ peue naˊ ce pucti heulˊ
1Yesuˊ klawng Eun ri cu tapaeˊ kulˊleualˊ peue ri naˊ ce. Hawcˊ koˊ, Eun tuilˊ tiˊca ra ri tec seucaˊ gawmˊeucˊ naˊ maeeˊ tiˊca baiˊ peue peuyhat cuin naˊ ri ce. 2Eun cusˊ ce pucti heulˊ sangsawnˊ lawng kuingˊ Eun Peucawoˊ naˊ, kah ce baiˊ peue peuyhat naˊ ce cuin. 3Eun lahˊ a ri ce, “Pawlaee pinˊ keunhawˊ pun hk'aˊ heulˊ peˊ naˊ. Hkuˊji unˊ lahˊ, huilˊ unˊ lahˊ, kuˊ hk'a unˊ lahˊ, paec unˊ lahˊ, hk'o naˊ lheuˊ ti hpuinˊ naˊ pawlaee pinˊ a heulˊ. 4Peˊ lawn lec nang nya nangnhawˊ koˊ, utˊ nang nya awnˊ na rot ti heulˊ peˊ hk'aiˊ veng awnˊ na. 5Peue lawn unˊ rap ri ti peˊ koˊ, yam puc peˊ ri heulˊ hk'aiˊ veng awnˊ a naˊ, punta kaw a meuh saˊhkiˊ Peucawoˊ kaw Eun ciyang ce naˊ, rawsˊ ri tec peuluing pit dak cung peˊ naˊ reuˊ.” 6Kop awnˊ na, tapaeˊ naˊ ce pucti heulˊ sangsawnˊ leukahˊ munˊ renˊkawn naˊ. Ce baiˊ peue peuyhat naˊ ce cuin ku duihˊ ku yungˊ.
7Yam Herotˊ cawoˊ uˊpeung kuingˊ naˊ pun eun ri mhawngˊ lawng aenˊ ce gawmˊeucˊ naˊ, eun kuit unˊ dohˊ nyawkˊ. Kopti ngonˊ lahˊ peue Yoˊhan eun yeum, eun tang kuhˊ imˊ naˊ. 8Ngonˊ peue lahˊ Eˊliˊya eun tang pucti. Ngonˊ peue lahˊ peue suip leukahˊ Eun Peucawoˊ leumahˊ ti ri peue naˊ tang kuhˊ imˊ eun. 9Herotˊ eun lahˊ, “Rengˊ uiˊ ngok eun Yoˊhan hawcˊ. Kop awnˊ na pun uiˊ ri mhawngˊ lawng kuˊ yeuh keutitˊ naˊ, peue aenˊ eun ciˊ naˊ meuh aˊnhawˊ?” Hawcˊ koˊ, eun sok ri kaw nyu Yesuˊ Eun.
Yesuˊ tuilˊ Eun peue hpawnˊhengˊ naˊ ce somˊ
10Yam peue caee Eun Yesuˊ naˊ tang ingˊ rot ce naˊ, ce ingˊ ris Yesuˊ Eun mhawngˊ lawng kuˊ yeuh ri naˊ ce. Hawcˊ Eun va ce heulˊ koe nang veng Betsaiˊdaˊ naˊ. 11Daecti yam peue heunˊ naˊ yawng ce a, ce hotˊ Yesuˊ Eun heulˊ. Eun rap ri ti ce. Eun sangsawnˊ ce ri lawng kuingˊ Eun Peucawoˊ naˊ. Kuˊ htukˊ ri baiˊ ri naˊ ce, Eun ku baiˊ ce cuin.
12Yam hk'aˊpul ka naˊ, tapaeˊ kulˊleualˊ peue naˊ ce ingˊ ri Heun. Ce lahˊ, “Kah peue heunˊ aenˊ ce heulˊ sok vang itˊ vang somˊ nang yungˊ nang pangˊ keunam caonaoˊ naˊ ce reuˊ. Maenˊ naˊ kopti meuh a vang hk'ohˊhk'oengˊ naˊ.”
13Daecti Eun lahˊ a ri ce, “Peˊ ri tuilˊ ce somˊ reuˊ.”
Ce tang lahˊ a ri Heun, “Eˊ lawn unˊ heulˊ leuvaee kuˊ hk'a pun peue heunˊ naˊ ce koˊ, gup kueˊ eˊ hkawomunˊ hpawnˊ meulˊ maeeˊ kaˊ lalˊ tuˊ.” 14(Kopti me naˊ ce palkoe, kueˊ ce hk'ao hpawnˊhengˊ peue.)
Daecti Yesuˊ Eun lahˊ a ri tapaeˊ ri naˊ ce, “Gvah peue aenˊ ce mokˊ meuh cum, meuh cum ri hk'ao hpawnˊkulˊ peue reuˊ.” 15Tapaeˊ naˊ ce ku yeuh a seunˊ awnˊ na. Hawcˊ koˊ, ce mokˊ gawmˊeucˊ ri. 16Hawcˊ Yesuˊ Eun ti hkawomunˊ hpawnˊ meulˊ maeeˊ kaˊ lalˊ tuˊ awnˊ a naˊ, Eun mungˊ maoˊ naˊ, Eun munˊ keuting ri Peucawoˊ Eun. Eun ves ri tuilˊ a ri tapaeˊ naˊ ce. Eun kah ce eoˊ tuilˊ a ri peue cum heunˊ naˊ ce. 17Naˊ peue pun ri hk'a ri sakˊ gawmˊeucˊ ri koˊ, tapaeˊ naˊ ce seutˊ kuˊ hk'a lheuˊ naˊ a pun kulˊleualˊ tengˊ nuk.
Petruˊ rap eun ri ti Yesuˊ meuh Eun Hkrit
18Yam Yesuˊ hk'oˊ Eun munˊ koe maeeˊ tapaeˊ ri ce naˊ, Yesuˊ Eun mhaingˊ tapaeˊ naˊ ce, “Peue heunˊ naˊ ce ciˊ lahˊ Uiˊ meuh aˊnhawˊ?”
19Ce topˊ a, “Ngonˊ lahˊ peue Mi meuh Yoˊhan cawoˊ tuilˊ hk'aˊ cumˊ naˊ eun. Ngonˊ peue lahˊ Mi meuh Eˊliˊya eun. Ngonˊ peue lahˊ Mi meuh peue suip leukahˊ Eun Peucawoˊ leumahˊ ti ri peue eun tang kuhˊ imˊ.”
20Yesuˊ Eun mhaingˊ ce, “Peˊ ri sae, peˊ ciˊ lahˊ Uiˊ meuh aˊnhawˊ?”
Petruˊ eun topˊ a, “Meuh Mi Hkrit Eun Peucawoˊ.”
Yesuˊ lahˊ Eun lawng kaw ri pun ri yeum
21Eun deunˊ ce ri leukahˊ reng, Eun unˊ kah ce ris lawng aenˊ a ri peue. 22Hawcˊ koˊ, Eun lahˊ, “Konˊ aiˊ peue naˊ kaw Eun pun ri hkamˊ kuˊ tukhka naˊ heunˊ ceu. Nang kawt, roˊ peue jhawpˊ rit maeeˊ peue guil leukahˊ ritroe naˊ ce kaw unˊ rap ri ti Eun. Eun kaw pun ri hkamˊ toh peue ri. Loeˊ seunyi ti seunyi naˊ, Eun naˊ tang kuhˊ imˊ.”
23Hawcˊ koˊ, Eun lahˊ a ri ce gawmˊeucˊ ce, “Aˊnhawˊ lawn sumˊ hotˊ Uiˊ koˊ, eun kaw pun ri tec alo ri, klawmˊ kleumˊ rawngˊtawpˊ ri naˊ keuyuit. Hawcˊ koˊ hotˊ Uiˊ heulˊ. 24Kopti aˊnhawˊ lawn sumˊ aˊyu pon koˊ, eun kaw pun ri sum aˊyu ri. Daecti aˊnhawˊ lawn sum aˊyu ri naˊ pun Uiˊ koˊ, eun kaw pun aˊyu pon. 25Kopti saecˊ meuh aˊnhawˊ, eun saecˊ naˊ pun kuˊ kueˊ pang bhenˊ keuteˊ naˊ meuh isˊ ti gawmˊeucˊ ka naˊ, daecti aˊyu eun naˊ a lawn sum koˊ, a ciˊ kaw kueˊ munˊ keunhawˊ pun eun? 26Kopti aˊnhawˊ lawn kaic ri Uiˊ maeeˊ leukahˊ Uiˊ naˊ koˊ, yam Konˊ aiˊ peue naˊ lih Eun maeeˊ munhpungˊ ri maeeˊ munhpungˊ Eun Aˊkuiingˊ maeeˊ munhpungˊ ce inˊhpom seungaˊ chakˊ naˊ, Eun kaw kaic ri peue awnˊ eun. 27Kaw Uiˊ lahˊ a ri peˊ neumneum, peue cawng maenˊ naˊ ce ngonˊ nanggalˊ yam unˊ nang yeum ce naˊ, ce kaw pun ri nyu kuingˊ Eun Peucawoˊ naˊ.”
Yesuˊ plinˊ Eun rup ri
28Hawcˊ Yesuˊ lahˊ Eun a yeuh keutitˊ naˊ, a pun hk'ao seudiˊ seunyi naˊ. Eun va Petruˊ, Yoˊhan maeeˊ Yakopˊ ce hukˊ hk'oˊ munˊ pang gong naˊ. 29Yam buih hk'oˊ Eun munˊ naˊ, buh Eun naˊ a plinˊ rup ri. Hk'eung Eun naˊ a cengˊ seungung seunˊ cengˊ cakˊcalˊ naˊ. 30A kueˊ me lalˊ peue, a meuh Moˊse eun maeeˊ Eˊliˊya eun. 31Ka pucti hk'aˊnaee munhpungˊ ka kuingˊ pang maoˊ naˊ, ka u Yesuˊ Eun. Ce u lawng Yesuˊ kaw Eun yeum naˊ. Eun kaw yeuh alo Eun Peucawoˊ naˊ htonnuk nang veng Yeruˊsalaem naˊ. 32Petruˊ eun maeeˊ aˊmawo eun naˊ ka, ce itˊ jingˊ nyawkˊ. Daecti yam tang hk'awnˊ ce meulamlam ri naˊ, ce pun ri nyu munhpungˊ Eun Yesuˊ naˊ maeeˊ peue cawng keunam Eun lalˊ peue naˊ ka. 33Yam peue lalˊ peue awnˊ kaw ka gahˊ hk'aiˊ Yesuˊ Eun naˊ, Petruˊ eun lahˊ a ri Yesuˊ Eun, “Cawoˊ, utˊ eˊ maenˊ naˊ chakˊ ka. Pawh, eˊ naˊ plengˊ tupˊ loeˊ lhangˊ, pun Mi ti lhangˊ, pun Moˊse ti lhangˊ, pun Eˊliˊya ti lhangˊ.” (Eun unˊ yawng kuˊ lahˊ ri naˊ meuh a keunhawˊ.)
34Yam buih leukahˊ eun naˊ, putumˊ naˊ a lih ghuimˊ ce. Yam utˊ ce hk'aˊnaee putumˊ naˊ, ce lhatˊ nyawkˊ. 35A kueˊ sengˊ lawsˊ lih neum putumˊ naˊ, “Peue aenˊ meuh Eun Konˊ aiˊ leuk Uiˊ ri ti. Leuceng ri ti leukahˊ Eun naˊ reuˊ.” 36Yam sengˊ naˊ hawcˊ ka naˊ, ce nyu Yesuˊ Eun ti peue koe. Tapaeˊ naˊ ce uinˊ lawng aenˊ a nang hpumˊ ri koe. Hk'aˊnaee meuyam awnˊ na, ce unˊ lahˊ aˊnhawˊ mhawngˊ kuˊ nyu ri naˊ saecˊ ti peue.
Yesuˊ baiˊ Eun konˊ nyom me seucaˊ rai a lec eun
37Hawcˊ ka naˊ ti seunyi yam lih ce neum pang gong naˊ, peue cum heunˊ naˊ ce ingˊ ri Yesuˊ Eun. 38Hk'aˊnaee peue cum heunˊ awnˊ ce, a kueˊ aˊtaˊ ti peue. Eun klawng ri lahˊ, “Seuraˊ, kaw uiˊ hk'oˊ Mi ingˊ nawk konˊ me uiˊ naˊ eun, kopti meuh eun konˊ ti peue uiˊ. 39Seucaˊ naˊ lec ka eun, eun keulawnˊ aecˊrak. A yeuh eun toˊtetˊ rawsˊ ri, baikeutamˊ naˊ a ruˊ ri lih hk'aiˊ moeng eun naˊ. Seucaˊ naˊ a unˊ chaeeˊ pucti heulˊ hk'aiˊ heun. A gawm yeuh eun lu. 40Hk'oˊ uiˊ tapaeˊ Mi naˊ ce ra ri tec seucaˊ awnˊ a yeut, daecti ce yeuh unˊ pun a.”
41Yesuˊ Eun lahˊ, “Peue unˊ kueˊ hk'aˊ yumˊ cu aenˊ peˊ, Uiˊ ciˊ kawnˊ kaw utˊ lingˊ maeeˊ peˊ aˊneng? Uiˊ ciˊ kawnˊ kaw yeunˊhkam pun peˊ aˊneng? Va konˊ mi naˊ eun ingˊ maenˊ reuˊ.” 42Saecˊ meuh yam konˊ nyom awnˊ buih ingˊ eun naˊ, seucaˊ naˊ a yeuh eun cungˊkus toˊtetˊ rawsˊ ri pang keuteˊ naˊ. Daecti Yesuˊ Eun isˊ seucaˊ rai naˊ. Eun baiˊ konˊ nyom naˊ eun cuin. Hawcˊ koˊ, Eun tang ap eun ri kuiingˊ eun naˊ eun. 43Peue gawmˊeucˊ naˊ ce amˊ ri tiˊca keuting lhungˊ Eun Peucawoˊ naˊ.
Yesuˊ tang lahˊ Eun lawng kaw ri pun ri yeum naˊ
Yam peue heunˊ naˊ buih amˊ ce ri lawng kuˊ yeuh Eun Yesuˊ naˊ, Eun lahˊ a ri tapaeˊ ri naˊ ce, 44“Leuceng ri pawn leukahˊ kaw Uiˊ lahˊ ri peˊ naˊ meulamlam ri reuˊ. Konˊ aiˊ peue naˊ kaw peue fuin ri ap Eun nang tiˊ peue.” 45Daecti ce unˊ cengˊ ri leukahˊ awnˊ na, kopti punta kaw ce unˊ cengˊ ri leukahˊ naˊ, a lahˊ geupˊ ri ri ce. Daecti ce unˊ hatˊ ri mhaingˊ Eun ri lawng ka naˊ.
Aˊnhawˊ ciˊ kaw keuting hk'aiˊ peue?
46Tapaeˊ naˊ htuˊhtingˊ ce puri kop lawng aˊnhawˊ ciˊ kaw keuting hk'aiˊ peue. 47Kopti Yesuˊ yawng Eun kuˊ kuit ce nang hpumˊ ri naˊ, Eun ti konˊ nyom ingˊ uinˊ eun cawng maeeˊ ti ti peue. 48Hawcˊ koˊ, Eun lahˊ a ri ce, “Aˊnhawˊ lawn rap ri ti konˊ nyom aenˊ eun hk'aˊnaee muis Uiˊ naˊ koˊ, eun ku rap ri ti Uiˊ yeut. Aˊnhawˊ lawn rap ri ti Uiˊ koˊ, eun ku rap ri ti Cawoˊ kuˊ cusˊ Uiˊ lih naˊ Eun yeut. Kopti kuˊ meuh peue aetˊ hk'aiˊ peue ri peˊ naˊ eun, meuh eun peue keuting hk'aiˊ peue.”
Peue unˊ hkatˊhkan peˊ naˊ meuh ce hk'aˊ peˊ
49Yoˊhan eun lahˊ, “Cawoˊ, nyu ye peue ti peue eun ra ri tec seucaˊ hk'aˊnaee muis Mi naˊ. Kopti unˊ meuh eun cum ye naˊ, ye hamˊ eun.”
50Yesuˊ Eun lahˊ, “Pawlaee hamˊ eun, kopti peue unˊ hkatˊhkan peˊ naˊ meuh ce hk'aˊ peˊ.”
Peue yungˊ Samariˊ ti yungˊ naˊ unˊ rap ce ri ti Yesuˊ Eun
51Yam kaw a hk'awsˊ rot yam Yesuˊ kaw Eun pun hk'aˊ yuk ri hukˊ nang kuingˊ pang maoˊ naˊ, Eun kaw hukˊ nang veng Yeruˊsalaem naˊ Eun kuit a deut. 52Eun kah peue ri naˊ ce bai heulˊ nanggalˊ. Punta kaw ce rangraen pun Yesuˊ Eun naˊ, ce heulˊ lec yungˊ ce peue Samariˊ ti yungˊ naˊ. 53Daecti peue awnˊ ce unˊ rap ri ti Yesuˊ Eun, kopti kaw Eun caw ri hukˊ nang veng Yeruˊsalaem naˊ. 54Kuˊ meuh tapaeˊ Yesuˊ muis Yakopˊ maeeˊ Yoˊhan naˊ yam pun ka ri nyu yeuh a keutitˊ naˊ, ka lahˊ, “Cawoˊ, lakˊ sumˊ kah Mi ya naˊ kah ngawl a lih neum kuingˊ pang maoˊ a naˊ hk'ue ce aw?” 55Daecti Yesuˊ Eun hpawtˊ ti keueˊ ri ka, Eun isˊ ka. 56Hawcˊ koˊ, ce tang heulˊ hk'aˊ yungˊ tawk seubu naˊ.
Peue sumˊ hotˊ Yesuˊ Eun naˊ ce
57Yam buih heulˊ ce langˊhk'aˊ naˊ, kuˊ ti peue naˊ eun lahˊ a ri Yesuˊ Eun, “Mi saecˊ heulˊ tawngnhawˊ, kaw uiˊ hotˊ Mi heulˊ yeut.”
58Yesuˊ Eun topˊ a, “Soˊ hk'i naˊ kueˊ a keutuiˊ. Saecˊ meuh simˊ peulˊ nang vawo naˊ a ku kueˊ hanˊ. Daecti Konˊ aiˊ peue naˊ Eun koˊ, Eun unˊ kueˊ vang uinˊ cingˊ.”
59Yesuˊ Eun tang lahˊ a ri kuˊ seubu ti peue naˊ eun, “Hotˊ Uiˊ reuˊ.” Daecti eun topˊ a, “Cawoˊ, hk'oˊ Mi kah uiˊ ingˊ puingˊ kuiingˊ uiˊ eun nanggalˊ.”
60Yesuˊ Eun lahˊ a ri heun, “Peue yeum naˊ kah ce puingˊ puri meun reuˊ. Daecti mi ri koˊ, mi naˊ heulˊ lahˊ lawng kuingˊ Eun Peucawoˊ naˊ reuˊ.”
61Kuˊ seubu ti peue naˊ eun tang lahˊ, “Cawoˊ, kaw uiˊ hotˊ Mi yeut, daecti hk'oˊ Mi kah uiˊ ingˊ tawmˊ peue nya ri naˊ ce nanggalˊ.”
62Yesuˊ Eun lahˊ, “Peue jhawpˊ kan htaeeˊ hpawtˊ ti keueˊ hk'aˊkuiˊ ri naˊ ce koˊ, unˊ kuingˊ ce ri yeuh kanˊ pun kuingˊ Eun Peucawoˊ naˊ.”
Currently Selected:
Luˊka 9: blrPL
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
