Matiye 6

Gusu karə nɛ̂n njê-ndooje

1«Aaje rɔse! Kar tə̂ kə̂ aw ddaje nɛ̂n kə turu Ndu lə Lubba a, ə-ddaje nɛ̂n le mba kəm dəwje ang. Bbo ə-ddaje nɛ̂n le mba kəm dəwje a, Bɔsese kə̂ isi darâ a kukase ang.

2«Yeenn bba, bbo aw arə nɛ̂n njê-ndooje a, maji karə uru nɛ̂n əkii ang. Mba njê-ngəmje aw ddaje tokə baann mə kəy mbɔn-naan tə̂ lə Jiipije wase dɔ ddəw tə̂, mba kinga nɛ̂n piti ta dəwje tə̂. Tɔkɔrɔ njaa, m-pa marəse, dingaje kuka ləde mban. 3A bbo arə nɛ̂n nje-ndoo kə jii kə̂ kɔl a, arə jii kə̂ gəl gərə ang. 4Yeenn bba nɛ̂n kə̂ arə le a to lo-kiyɛ̂ tə̂. Yeenn bba Bɔije Lubba kə̂ oo nɛ̂n kə̂ to lo-kiyɛ̂ tə̂ le a kukai.»

Gusu duju Lubba

5«Bbo aw dujuje Lubba a, ə-ddaje tokə lə njê-ngəmje ang. Dede, n̂-ndikije nya ta kar taar bba duju Lubba mə kəy mbɔn-naanje tə̂ wase tɔ-ddəwje tə̂ karə dəwje tɔyn oojede. Tɔkɔrɔ njaa, m-pa marəse, dingaje kuka ləde mban. 6A əi, bbo a ta duju Lubba a, aw mə kəy tə̂ ləi, utu ta-kəy bba ə-duju Lubba lo-kiyɛ̂ tə̂. Bɔije Lubba kə̂ aw oo nɛ̂n kə̂ to lo-kiyɛ̂ tə̂ le a kukai.

7«Bbo aw dujuje Lubba a, tar kə̂ kâra baa njaa ə-təlje dɔɛ̂ tə̂ gɔl banya nya ang, mba dəwje kə̂ gərəje Lubba ang aw ddaje tokə baann. Dəjəje to n̂-paje tar nya bba Lubba a koo. 8Ə-ndajijede ang, mba Bɔsese gərə nɛ̂n kə̂ ə-ndikije bba ə-dujeje guku baa.»

Jeju tɔju gusu duju Bɔjeje

9«Maji karə ə-dujuje Lubba tokə be:

Əi, Bɔjeje kə̂ isi mə dara tə̂,

Maji karə dəwje bbəəlje rii.

10Arə kɔn-mbay ləi ddee!

Maji karə dəwje ddaje nɛ̂n kə̂ məi ndiki dɔ nangə tə̂,

tokə ye kə̂ darâ.

11Arəje nɛ̂n-kusa taje kə̂ bbokənɛn.

12Ɔru tar majang ləje dɔje tə̂,

tokə jeje kara jaw jɔru tar dɔ dəwje tə̂ kə̂ ddaje majang kə je tɔ.

13Inya arə marə nɛ̂n nanje ang.

A ɔruje ji Nje-mə-majang tə̂.

[Mba əi njaa kɔn-mbay, singa-mɔngu kə piti toje to ləi kə ndɔ kə ndɔ! Amɛnn.]

14«Mba bbo ɔruje tar dɔ dəwje tə̂ kə̂ ddaje nɛ̂n kə̂ maji ang kə se a, Bɔsese kə̂ isi darâ a kɔru tar dɔse tə̂ tɔ. 15A bbo ɔruje tar dɔ dəwje tə̂ ang a, Bɔsese a kɔru tar majang dɔse tə̂ ang tɔ.»

Tar kɔku rɔ nɛ̂n-kusa

16«Bbo ɔkuje rɔse nɛ̂n-kusa a, ə-tɔjuje to isije kə rɔ-katə tokə njê-ngəmje aw ddaje le ang. Daw tɔjuje dɔ kəmde tə̂ to daw dɔkuje rɔde nɛ̂n-kusa. M-pa marəse, to tar kə̂ tɔkɔrɔ, dingaje kuka ləde mban. 17A əi, bbo ɔku rɔi nɛ̂n-kusa a, ə-toko kəmi, ungu yambo dɔi tə̂. 18Baann bba karə dəwje gərəje to aw ɔku rɔi nɛ̂n-kusa ang. A arə Bɔije kâra baa njaa kə̂ ee lo tə̂ənn kə̂ dəw asə kooe ang â gərə. Bɔije kə̂ aw oo nɛ̂n kə̂ to lo-kiyɛ̂ tə̂ le a kukai.»

Tar nɛ̂n-kingaje kə̂ nangə̂ kə yeje kə̂ darâ

19«Ə-mbɔnje nɛ̂n-kingaje kə dɔ naan tə̂ duninya tə̂ nəənn ang, mba duninya tə̂ nəənn, sɔlɔlɔ kə mbɔrkasɛ a tujuje nɛ̂n-kingaje le ngaâ njê-bbokoje a tətə ta-kəy mba bboko. 20A maji karə ə-mbɔnje nɛ̂n-kingaje kə dɔ naan tə̂ darâ, mba dara to lo kə̂ sɔlɔlɔ a kɔn nɛ̂n tə̂ ang ddəm nɛ̂n a kuwa mbɔrkasɛ tə̂ ang ddəm njê-bbokoje kara a tətə ta-kəy mba bboko nɛ̂n tə̂ ang ddəm. 21Mba lo kə̂ nɛ̂n-kinga ləi to tə̂ a, məi a to tə̂ tɔ.»

Kəm dəw to lambe kə̂ rɔɛ̂ tə̂

22«Kəm dəw to tokə lambe kə̂ da-rɔɛ̂ tə̂. Bbo kəmi to kə majɛ̂ a, da-rɔi tɔyn njaa a to dann lo-karɛ tə̂. 23A bbo kəmi to kə majɛ̂ ang a, da-rɔi tɔyn a to lo ndul tə̂. Yeenn bba, bbo lo-karɛ kə̂ rɔi tə̂ təl to lo ndul a, lo ndul le a təl kil biti biti bbay.»

Maji ta dda kula karə Lubba kâra baa

24«Dəw kâra, asə dda bbərə lə əbbeejedede joo ang, mba nâ mbətə marɛ̂ kâra, a nâ ndiki marɛ̂ kâra. Wase nâ kunn rɔɛ̂ karə marɛ̂ kâra, a nâ mbətə marɛ̂ kâra. A kasəje ta dda bbərə lə Lubba ddəm narɛ ddəm ang.»

Tar kunda-mə dɔ Lubba tə̂

25«Mba yeenn bba, m-pa marəse: Əjəje tar təbbə ləse mba nɛ̂n-kusa tase ang ddəm nɛ̂n-kayse ang ddəm, əjəje tar da-rɔse mba kubbu kə̂ ta kula ang. Təbbə ləse ngəng uta nɛ̂n-kusa ddəm da-rɔse ngəng uta kubbu ddəm ang wa? 26Ooje əəlje kə̂ darâ. N̂-dubbuje nɛ̂n ang ddəm dujaje ko-ndɔɔ ang ddəm n̂-mbɔnje nɛ̂n-kusa damâ ang ddəm. A Bɔsese kə̂ darâ aw ngəmde kə nɛ̂n-kusa. Gatəse uta gatə əəlje ang wa?

27«Nân bba horose tə̂, a kasə kila ndɔ ngaji njaa be dɔ ndɔ tə̂ laa kə̂ duninya tə̂, ddəw kəjə-tar tə̂ wa? 28Mba ddi bba aw əjəje tar mba kubbuje wa? Aaje ddəw kə̂ kakəje kə̂ muû aw nduje nɛ̂n. Daw ddaje kula ang ddəm dujuje nɛ̂n ang ddəm. 29A m-pa marəse: Salomɔn njaa kara ndɔ piti tə̂ laa tɔyn, ula kubbu kə̂ kura asə kakəjeenn kâra ang. 30Bbo Lubba ula kubbu kə̂ kura kakəje kə̂ muû kə̂ toje bbokənɛn nəənn ngaâ puru a kɔnde bara a, sese, nâ dda kə se karə uta yeenn ang wa? See njê kə̂ mə-kunn ləse ngaji baa!

31«Yeenn a, maji karə əjəje tar ang, ta pa nan: Ddi â ja kusa wa? Ddi â ja kay wa? Kubbu ddi â ja kula wa? Əjəje tar mba nɛ̂njeenn ang. 32Dəwje kə̂ gərəje Lubba ang â aw sangəje nɛ̂njeenn kə kar tɔyn. Mba Bɔsese kə̂ darâ gərə to ə-ndikije ta kinga nɛ̂njeenn tɔyn. 33Ə-sangəje Bbe-kɔn lə Lubba kə gatə gatə laa dɔngɔr, a nâ karəse kəsə nɛ̂njeenn tɔyn dɔɛ̂ tə̂.

34«Yeenn a, əjəje tar mba nɛ̂n kə̂ bara ang. Mba bara njaa a sangə nɛ̂n laa bbay. Ndɔ kâra kâra to kə ndoo laa kə̂ ta koo.»

Currently Selected:

Matiye 6: KabbaDkS

Highlight

Copy