Jakə 3

Tar dɔ ndɔn dəw tə̂

1Ngakɔnʼmje, maji karə dəwje tokə banya horose tə̂ ddeeje to njê-nɛ̂n-tɔjuje ang, mba ə-gərəje to sariya ləje jee njê-nɛ̂n-tɔjuje a ngəng kuta lə kəsə dəwje. 2Mba jeje tɔyn njaa jaw ndəəmje ddəw nya. A bbo marə dəw aw pa tar uru nɛ̂n muû ang a, n̂-to dəw kə̂ maji tɔyn, n̂-to dəw kə̂ nasə ta ngəm da-rɔɛ̂ tɔyn kə majɛ̂. 3Bbo jilaje jam ta sundaje tə̂ mba karə n̂-ddaje nɛ̂n kə̂ məje ndiki a, da-rɔde tɔyn aw unnje ddəw kə̂ məje ndiki tɔ. 4Ooje tɔkə toje, n̂-boje nya tɔkɔrɔ njaa, a bbo tɔkə ləl ula ngaâ uta tɔkə toje le a, ngonn nɛ̂n kə̂ tɛn baa be kə̂ ria nan gubɛrnay â nje-ndɔru to le aw tɔju nɛ̂n ddəw kə̂ n̂-ndiki karə to le unn. 5Ddəw kâra baa, ndɔn dəw to marə barkəm-rɔ kə̂ tɛn baa, a nɔsu gaji rɔɛ̂ nya.

Ooje puru kə̂ tɛn baa be asə ta ro tɔkə ku. 6A ndɔn dəw to puru tɔ, n̂-to lo kə̂ nɛ̂n-ddaje kə̂ gatə gatə ang toje tə̂. Ndɔnje to marə barkəm-rɔje kə̂ aw tuju da-rɔje tɔyn kə nɛ̂n-yərəw ngaâ kar tɔyn kə̂ dəw isi nɛ̂n duninya tə̂ nəənn, ndɔɛ̂n to tokə lə ndɔn-puru kə̂ aw tuju kisi laa, ndɔn-puru kə̂ in lo tə̂ kə̂ puru aw ɔn tə̂ kə ndɔ tɔyn. 7Daje kə əəlje kə nɛ̂nje kə̂ aw akəje kə ta məde dang dang kə̂ muû tɔyn kə da-maannje tɔyn dəw asə ta ddade karə dooje tɛɛ̂. 8A dəw kâra asə ta kɔn dɔ ndɔɛ̂n ang. N̂-to nɛ̂n kə̂ maji ang kə̂ to lo kâra ang, nɛ̂n kə̂ maji ang kə̂ aw tɔl dəw dduse. 9Ndɔnje le â jaw jɔsuje nɛ̂n gaji Əbbə-dəwje kə̂ to Bɔjeje, a ndɔnje le tɔ â jaw jɔruje nɛ̂n kə dəwje kə̂ Lubba njaa ddade arə dundaje rɔɛ̂. 10Ta dəw kə̂ kâra baa njaa â tar kə̂ maji ddəm tar kə̂ maji ang ddəm inje tə̂ aw tee. Ngakɔnʼmje, maji karə to tokə baann ang. 11Maann kə̂ maji kə maann kə̂ atə asəje ta kin kəy-maann tə̂ kə̂ kâra baa teeje wa? 12Ngakɔnʼmje, kakə tungu a kandə ərɔy wa? Wase nduu a kandə tungu wa? Ddəw kâra baa, maann kə̂ wul asə ta tee buwa-maann tə̂ kə to katə ang.

Kəm-karɛ kə̂ in rɔ Lubba tə̂

13Nân horose tə̂ â to nje-kəm-karɛ kə nje-nɛ̂n-gərə wa? Maji karə n̂-tɔju kəm-karɛ kə nɛ̂n-gərə laa ddəw pa-nja tə̂ kə̂ maji kə̂ tɔju to n̂-dda kulaje laa ddəw kəm-karɛ tə̂ ddəm kə mə ngonn-kasə ddəm. 14Bbo mə ddase nya wase kəjə kə̂ maji ang kə̂ ta nar nɛ̂n lo kə̂ bo to məse tə̂ a, maji karə ɔsuje gaji rɔse ang ddəm ərəje ngəm ə-tujuje nɛ̂n tar kə̂ tɔkɔrɔ ang ddəm. 15Kəm-karɛ kə̂ baann to kəm-karɛ kə̂ in darâ ang. To kəm-karɛ kə̂ dɔ nangə tə̂, kə̂ in da-rɔ tə̂, in rɔ Əsu tə̂. 16Mba lo kə̂ dda-mə wase kəjə nar naan lo kə̂ bo toje tə̂, to lo kə̂ nɛ̂nje kə̂ ngabula kə kula-ddaje dang dang kə̂ maji ang toje tə̂ tɔ. 17A kete njaa kara, kəm-karɛ kə̂ in darâ to nɛ̂n-yərəw ang, to kəm-karɛ kə̂ aw dda arə mə-wul-lɔm to horo dəwje tə̂, aw dda arə dəwje wulje pee, dəwje ooje ta naan, dəwje ddaje kula kə̂ maji. Kəm-karɛ le dda arə dəwje ɔruje kəm naan ang, dəwje ooje kəm-to-ndoo lə naan ddəm n̂-ddaje nɛ̂n mba kəm dəwje ang ddəm. 18Dəwje kə̂ ndikije mə-wul-lɔm ddaje arə dəwje kə̂ isije mbɔrde tə̂ isije kə mə-wul-lɔm tokə ko-ndɔɔ kə̂ dəw dubbu. Kandə-ko kə̂ dâ kujaje le to kula kə̂ gatə gatə.

Currently Selected:

Jakə 3: KabbaDkS

Highlight

Copy