Jakə 2

Maji ta kɔru kəm dəw ang

1Ngakɔnʼmje, unnje məse arəje Əbbəjeje Jeju-Kristə kə̂ piti to laa mban. Maji karə ɔruje kəm dəw ang ngaa. 2Junnje nɛ̂n-kɔju-marɛ̂: Bbo marə dəw ula əninga narɛ jia tə̂ ngaâ ula kubbu kə̂ kura aw nɛ̂n kəy mbɔn-naan tə̂ ləse, a nje-ndoo ula bar kubbu aw nɛ̂n tɔ. 3Bbo undaje kəmse tɔyn kə dɔ dəw tə̂ kə̂ ula kubbu kə̂ kura le ngaâ ə-paje nan: «Əi, ə-ddee isi lo tə̂ kə̂ maji nəənn», a ə-paje arəje nje-ndoo le nan: «Əi, ar lo tə̂ nəənn» wase ə-paje nan: «Əi isi nangə̂ mbɔr nɛ̂n kungu gɔl tə̂ ləm nəənn» a, 4yeenn to kɔru kəm naan ang wa? Ə-toje to njê-gangəje sariya kə̂ kəjə kə̂ maji ang to məse tə̂ ang wa?

5Ngakɔnʼmje kə̂ m-ndikise nya, ooje tar nəənn: Lubba mbərə dəwje kə̂ dəwje kə̂ duninya tə̂ nəənn oojede to njê-ndooje, ta karə n̂-ddeeje to njê-nɛ̂n-kingaje ddəw mə-kunn tə̂ ddəm ta karə Bbe-kɔn kə̂ Lubba unn ndue ta karə dəwje kə̂ ndikeje le ddee to ləde ddəm. 6A sese, aw ooje nje-ndoo to dəw ang kəmse tə̂. Njê-nɛ̂n-kingaje â aw ddaje singa kə se ang wa? Dede â daw dawje kə se nɔn gɔl njê-gangəje sariya tə̂ ang wa? 7Dede njaa daw tujuje ri kə̂ maji kə̂ dunda dɔse tə̂ ang wa?

8Tɔkɔrɔ, bbo ə-ddaje kula kə ndu kə̂ Mbay-dɔ-mbayje unn makəturu tə̂ nan: «Maji karə ə-ndiki nje-mari tokə da-rɔi njaa», a yeenn ə-ddaje nɛ̂n kə̂ maji. 9A bbo aw ɔruje kəm naan a, ə-ddaje majang ngaâ sariya to dɔse tə̂ mban, ə-ddaje kula kə turu ndu ang. 10Mba bbo dəw ngəm tarje tɔyn kə̂ ndu pa bba aal dɔ marə tar kâra hore tə̂ a, sariya to dɔɛ̂ tə̂ mba kəsə ndu le tɔyn ngaa. 11Dəw kə̂ pa nan: «Maji karə ə-dda lo-to-majang ang» le, ne njaa tɔ â n̂-pa nan: «Ə-tɔl dəw ang.» Yeenn bba bbo, ə-dda lo-to-majang ang, a bbo ə-tɔl dəw a, ə-to nje-kaal dɔ ndu ngaa. 12Maji karə ə-paje tar ta ə-ddaje nɛ̂n tokə dəwje kə̂ Lubba asə gangə sariya dɔde tə̂ ddəw ndu tə̂ kə̂ aw ɔru dəw kɔ bbərə tə̂. 13Dəw kə̂ oo kəm-to-ndoo lə nje-marɛ̂ ang, Lubba a koo kəm-to-ndoo laa ndɔ gangə sariya tə̂ ang tɔ. A dəw kə̂ oo kəm-to-ndoo lə nje-marɛ̂ a tee ta sariya tə̂.

Tar mə-kunn kə kulɛ̂

14Ngakɔnʼmje, bbo marə dəw pa nan: «Mə-kunn ləm to», â bbo n̂-dda kulɛ̂ ang a, ddi â mə-kunn le a dda karɛ̂ wa? Mə-kunn kə̂ baann asə ta kaji dəw wa? 15Bbo kubbu goto rɔ ngokɔnse tə̂ kə̂ dingaw wase kə̂ dɛnɛ̂n ngaâ dingaje nɛ̂n-kusa tade kə ndɔ kə ndɔ ang, 16ngaâ marə dəw kâra horose tə̂ pa arəde nan: «Awje kə majɛ̂, ə-kirije rɔse kə kubbu arəje rɔse tunga ta usaje nɛ̂n arəje məse ndann», a bbo narəde marə nɛ̂n kə̂ asə ta kumande ang a, maji ddi â tar laa le a dda kə dəwje le wa? 17Tar mə-kunn tokə baann tɔ. Mə-kunn kə̂ kulɛ̂ goto to mə-kunn kə̂ oy.

18Marə dəw a pa nan: «Əi, mə-kunn ləi to, a əman kulaje kə̂ m-dda to. Ə-tɔjum mə-kunn ləi kə̂ kulɛ̂ goto le, a əman mâ tɔji mə-kunn ləm ddəw kulaje tə̂ kə̂ m-dda.» 19Ə-ndiki tə̂ to Lubba to kâra baa, yeenn maji, a ndilje kə̂ maji ang njaa kara ndikije tə̂ tokə baann tɔ ngaâ disaje kə bbəəl. 20A əi, dəw kə̂ baa be, maji karə ə-gərə to mə-kunn kə̂ kulɛ̂ goto dda nɛ̂n kâra ang. 21Lubba oo bɔjeje Abaraham to dəw kə̂ gatə gatə ddəw kula-ddɛɛ̂ tə̂, mba nunn ngonnɛ̂ Ijakə nilɛ̂ dɔ bann tə̂ ta polo nɛ̂n Lubba. 22Mə-kunn laa dda nɛ̂n ddəw kâra baa kə kulaje laa ngaâ kulaje laa le ddaje arə mə-kunn laa ddee to nɛ̂n kə̂ maji tɔyn. 23Baann â tar kə̂ Lubba pa makəturu tə̂ le ddee to nɛ̂n kə̂ tɔkɔrɔ. Makəturu lə Lubba le pa nan: «Abaraham unn məɛ̂ arə Lubba, yeenn bba Lubba ooe to dəw kə̂ gatə gatə ngaâ Lubba bbarɛ̂ to namɛ̂.» 24Ooje, dəw to gatə gatə kəm Lubba tə̂ ddəw kula tə̂ laa, bbo ddəw mə-kunn tə̂ laa kâra baa ang. 25Ddəw kâra baa, Rahabə kə̂ to dɛnɛ̂n nje-kaya ddee gatə gatə kəm Lubba tə̂ ddəw kula-ddɛɛ̂ tə̂, mba n̂-taa ngann njê-kulaje kə̂ toje to ngann Ijarayɛlje kə kə̂y laa ngaâ narə n̂-təlje bbeê ləde kə ddəw kə̂ dang. 26Ddəw kâra baa kə da-rɔ dəw kə̂ bbo kəwn laa tee a, oy le, mə-kunn kə̂ kulɛ̂ goto oy tɔ.

Currently Selected:

Jakə 2: KabbaDkS

Highlight

Copy