Kulaje 19

Pɔl tee Epɛjə

1Kar tə̂ kə̂ Apolos nayn Kɔrɛntə a, Pɔl nday kə ddəw kə̂ Aji kə̂ to ddingirije ngaâ tee Epɛjə. Ninga marə njê-njaje go Əbbə-dəwje tə̂ lo tə̂ənn, 2ngaâ n̂-dujude nan: «Ndɔ kə̂ ooje məse tə̂ le ingaje Ndil-mə-nda wa?» Dilɛ̂je tə̂ nan: «Joo ri Ndil-mə-nda ndɔ kâra ang.» 3Pɔl təl dujude nan: «Batɛm ddi â ingaje wa?» N̂-paje nan: «Batɛm lə Jan.» 4Pɔl ilade tə̂ nan: «Jan dda batɛm dəwje kə̂ ndikije ta turu məde. Jan le duju dəwje karə dooje məde tə̂ kə dəw kə̂ a ddee goe tə̂. Dəw le to Jeju.» 5Dəwje le ooje tar le ngaâ ingaje batɛm kə ri Əbbə-dəwje Jeju. 6Pɔl ila jia dɔde tə̂ ngaâ Ndil-mə-nda ddee dɔde tə̂. N̂-paje tar kə ndɔn-tarje kə̂ dang dang ngaâ dilaje mbər tar lə Lubba. 7Kɔr dəwje le tɔyn aw ngɔsi kə dɔku gire joo. 8Nɛyn mota njaa Pɔl aw aw kəy mbɔn-naan tə̂ lə Jiipije kə ndɔ tɔyn aw pa tar Bbe-kɔn lə Lubba kə bbəəl ang. N̂-dda gan njaa karə n̂-ndikije tə̂ saa. 9A mə marɛ̂je kətərə ngaâ n̂-ndikije tar tə̂ lə Pɔl le ang. Darje kə kəm dəwje tə̂ kə̂ banya le njaa daw paje tar «ddəw lə Əbbə-dəwje» daw kokoje nɛ̂n. Yeenn bba, Pɔl tusude inyade, a mbɔn kəsə njê-njaje go Əbbə-dəwje tə̂ aw kə de kəy nɛ̂n-ndo tə̂ lə Tiranos aw pa tar arəde kə ndɔ kə ndɔ. 10Nɛ̂ɛnn le to tokə baann ndərəng bbal joo arə dəwje kə̂ Aji, Jiipije kə Gɛrɛkəje ooje tar lə Əbbə-dəwje.

Nɛ̂n-singa kə̂ inga ngann lə Seba

11Lubba dda tɔkə nɛ̂n-mɔrije ddəw tə̂ lə Pɔl. 12Yeenn bba bbo, dəw ddee kə mbita kubbu wase kubbu kə̂ ɔru rɔ Pɔl ɔru nɛ̂n nje-rɔ-to a, rɔ-to le goto ddəm ndilje kə̂ maji ang kara teeje kə ddang ddəm. 13Marə Jiipije kə̂ aw tubbaje ndilje kə̂ maji ang rɔ dəwje tə̂ kə lo lo, aw unnje ri Əbbə-dəwje Jeju bba aw tubbaje nɛ̂n ndilje le tɔ. N̂-paje nan: «Kə ri Jeju kə̂ Pɔl aw ila mbər tar laa, ə-teeje kə ddang!» 14Ngann lə Seba â aw ddaje nɛ̂ɛnn. Seba le to Jiipi kə̂ to tɔkə nje-polo Lubba. 15A marə ndɔ ndil kə̂ maji ang le ilade tə̂ nan: «M-gərə Jeju ngaâ m-gərə Pɔl tɔ. A sese ə-toje to njê kə̂ dda wa?» 16Dəw kə̂ ndil kə̂ maji ang isi məɛ̂ tə̂ le aal uru dɔde tə̂, singɛ̂ utade arə n̂-teeje kəy laa kə ngɔru daynje rɔde baa ddəm kə do rɔde tə̂ ddəm. 17Njê-bbeje tɔyn kə̂ Epɛjə kə Jiipije kə Gɛrɛkəje, dooje tar nəənn le. Bbəəl uta dɔde tɔyn arə dɔsuje gaji ri Əbbə-dəwje Jeju kə̂ to ri kə̂ bo. 18Marə dəwje nya kə̂ ooje məde tə̂ ddee paje tar nɛ̂nje kə̂ maji ang kə̂ n̂-ddaje kə ddaka. 19Marə njê-əmbilije nya unguje makəturu əmbilije ləde dɔ naan tə̂ ngaâ roje kəm dəwje tə̂ tɔyn. Dəwje turaje gatə makəturuje le a, asə kəm kandə narɛ doro dɔmin. 20Baann â tar lə Lubba aw kə kete kete ngaâ ee kə singa-mɔngu ddəw tə̂ lə Əbbə-dəwje.

Tɔkə tar oso Epɛjə

21Go nɛ̂nje tə̂ənn, Pɔl unn ndu ddəw tə̂ lə Ndil-mə-nda ta kaw Jerujalɛm kə ddəw kə̂ Maseduwann kə Akay. N̂-pa nan: «Bbo m-tee nunn a, maji karə m-tee Rɔm tɔ.» 22Yeenn bba, nula marə njê kə̂ aw umɛ̂nje kula tə̂ joo Maseduwann, Timɔte kə Erastə, a ne n̂-nayn nangə tə̂ kə̂ Aji ndɔ ngaji bbay.

23Dɔ ndɔɛ̂ tə̂ənn njaa tɔkə tar oso Epɛjə ɔju dɔ tar «ddəw lə Əbbə-dəwje» le. 24Marə nje-dda nɛ̂nje kə andə-narɛ kə̂ ria nan Demetrus unn andə-narɛ aw dda nɛ̂n ngann nɛ̂nje kə̂ ndaji naan kə kəy-polo kɔr, kɔr kə̂ to dɛnɛ̂n. Ri kɔr le nan Artemis. Njê-kula marɛ̂je aw ingaje narɛ nya ddəw nɛ̂nje tə̂ənn le. 25N̂-mbɔn njê-kula marɛ̂je kə dəwje kə̂ aw ddaje marə nɛ̂nje dang dang kə andə-narɛ ngaâ n̂-pa narəde nan: «Namʼmjedede, ə-gərəje kə majɛ̂ to ddəw kula tə̂ nəənn â jisi nɛ̂n kə̂ majɛ̂. 26A sese njaa ooje kə kəmse ddəm ooje kə mbise ddəm nan Pɔl mbɔn dəwje pa arəde nan kɔrje kə̂ n-dda kə jije to lubbaje ang ngaâ dəwje nya nya ndikije tə̂ saa. Tarje nəənn taa dɔ nangə kə̂ Aji tɔyn bbo Epɛjə kâra baa ang. 27Tar nəənn, kula ləje kâra baa â ria a tuju ang. Kəy-polo kɔr lə Artemis kə̂ to tɔkə kɔr kə̂ dɛnɛ̂n kə̂ ria aw bbar nya ngaâ dəwje aw poleje nangə tə̂ kə̂ Aji kə kəsə loje tə̂ tɔyn le a təl to nɛ̂n ang kəm dəwje tə̂ tɔ.» 28Dəwje le ooje tar le a, wungu ɔnde nya ngaâ n̂-paje kə taar nan: «Artemis kə̂ Epɛjə bo nya!» 29Tar le taa mə bbe le tɔyn ngaâ dɔtuje kə ngɔru dawje natâ daw duwaje njê-buwa-njaje lə Pɔl, Gayus de kə Aristarkə kə̂ toje to dəwje kə̂ Maseduwann le dawje kə de. 30Pɔl ndiki ta kaw nɔn dəwje tə̂ kə̂ banya le, a njê-mə-kunnje mbətəje. 31Marə tɔkə dəwje kə̂ Aji kə̂ toje to njê-buwa-kuraje lə Pɔl kara ulaje ndəjəje Pɔl karə naw natâ le ang. 32Dɔ dəwje kə̂ banya le turu arə marɛ̂je uruje marə əkii, a marɛ̂je uruje marə əkii dang tɔ. Dəwje nya horode tə̂ gərəje gəl nɛ̂n kə̂ n̂-mbɔnje nɛ̂n naan le ang. 33Jiipije utaje Alɛkəjandərə kə kete ngaâ marə dəwje horo dəwje tə̂ kə̂ banya le ɔruje gəl nɛ̂n le arɛ̂je. Alɛkəjandərə le dda jia arə dəwje le karə lo to ddekeke bba ta kɔru gəl tar karə dəwje kə̂ banya le. 34A dəwje le gərəje to n̂-to Jiipi ngaâ n̂-paje tar kə̂ kâra baa naan tə̂ kə taar asə gɔl kar joo nan: «Artemis kə̂ Epɛjə bo nya!» 35Nje-kuja makəturu kə̂ mə bbe tə̂ le ddee gangə dəwje tar tə̂ ngaâ pa nan: «Dəwje kə̂ Epɛjə, ə-gərəje to Epɛjə to bbe kə̂ aw ngəm kəy-polo Artemis kə̂ to tɔkə kɔr kə̂ dɛnɛ̂n ddəm aw ngəm ətaar laa kə̂ in darâ ddəm. 36Dəw kâra asə mayn tar nəənn ang. Yeenn a, maji karə isije ddekeke bbo ə-ddaje nɛ̂n kə tɔkɛ̂ baa ang. 37Dingawje kə̂ ə-ddeeje kə de nəənn ddaje majang kə kɔr kə̂ dɛnɛ̂n le ang ddəm tajɛ̂je ang ddəm. 38A bbo Demetrus de kə njê-kula marɛ̂je â deeje kə tar kə marə dəw a, lo gangə sariya kə njê-gangəje sariya lə Jiipije toje. Maji karə njê-tarje le awje lo gangə sariya tə̂. 39A bbo eeje kə marə tar dang bbay a, dâ dda tar le lo kuwa-dɔ-naan tə̂ kə̂ njê-kɔn-bbeje gərəje. 40Mba mbɔn-naan kə̂ bbokənɛn nəənn a dda karə dooje to njê-kilaje ndɔ bbe tə̂, mba nɛ̂n kə̂ arəje ddəw karə n-dda mbɔn-naan kə̂ be goto.» 41Go tar tə̂ənn le a, n̂-tubba dəwje kə̂ mbɔnje naan le narə dɔtuje.

Currently Selected:

Kulaje 19: KabbaDkS

Highlight

Copy