Kulaje 11

Piyɛr ɔru gəl tar arə njê-mə-kunnje kə̂ Jerujalɛm

1 Njê-kaw-kulaje kə njê-mə-kunnje kə̂ eeje nangə tə̂ kə̂ Jude ooje nan dəwje kə̂ toje to Jiipije ang kara taaje tar lə Lubba tɔ. 2Piyɛr təl aw Jerujalɛm a, njê-mə-kunnje kə̂ toje to Jiipije aw inje saa. 3N̂-paje nan: «Andə kəy lə dəwje kə̂ ujaje ganja ang ngaâ usa nɛ̂n kə de mba ddi wa?»

4Yeenn a, Piyɛr unn kutu kɔru gəl nɛ̂n kə̂ to le kə goe goe arəde. N̂-pa nan: 5«Mee mə bbe tə̂ kə̂ Jope maw duju Lubba a, moo nɛ̂n tokə lə nin. Moo marə nɛ̂n tokə lə bəl-kubbu kə̂ tatə ngaâ duwa tɛɛ̂ kə̂ sɔ. Nɛ̂n le in mə dara tə̂ ddisi ndərəng tee lo tə̂ kə̂ mee tə̂. 6Kəmʼm to kə dɔɛ tə̂ ngaâ m-təənn a, moo daje kə̂ gɔlde sɔ kə̂ dɔ nangə tə̂, daje kə̂ muû, daje kə̂ aw akəje nangə̂ kə əəlje. 7Moo marə ndu dəw pa arəm nan: ‹Piyɛr, in taar ə-tɔl ɔn!› 8Mila tə̂ m-pa nan: ‹Baann ang, Əbbəmje! Mba nɛ̂n kə̂ ndu mbətə wase nɛ̂n kə̂ maji ang, musa ndɔ kâra ang.› 9M-təl moo ndu dəw le mə dara tə̂ nan: ‹Maji karə nɛ̂n kə̂ Lubba dda arə ddee maji a, oo to nɛ̂n kə̂ maji ang kəmi tə̂ ang.› 10Nɛ̂ɛnn le to tokə baann gɔl mota ngaâ dunn nɛ̂n le tɔyn n̂-təl nɛ̂n darâ. 11Kar tə̂ənn njaa, dingawje mota kə̂ dulade rɔm tə̂ inje bbe tə̂ kə̂ Sejare teeje mə kəy tə̂ kə̂ jisi tə̂ le. 12Ndil pa arəm nan mɔtu maw kə de bbo məjə ang. Ngakɔnʼmje kə̂ misan nəənn dannəmje ngaâ jandə mə kəy tə̂ lə Kɔrnɛy le. 13Nɔru gəl gusu kə̂ anjə tee ingɛ̂ nɛ̂n mə kəy tə̂ laa ngaâ pa arɛ̂ nan: ‹Ula bbe tə̂ kə̂ Jope arə Simɔn kə̂ daw bbarɛ̂ nan Piyɛr ddee. 14Simɔn le a pa tarje kari. Əi kə njê kə̂ kəy ləi â kingaje kaji ddəw tarje tə̂ənn le.› 15Munn kutu pa tar a, Ndil-mə-nda ddisi dɔde tə̂ tokə n̂-ddisi dɔje tə̂ kunn-kute tə̂ le. 16Yeenn bba, mole məm dɔ tar tə̂ lə Əbbə-dəwje kə̂ pa nan: ‹Jan dda dəwje batɛm maann, a sese, â kingaje batɛm Ndil-mə-nda.› 17Lubba arəde Ndil-mə-nda tokə narəje kar tə̂ kə̂ junn nɛ̂n məje jarə Əbbə-dəwje Jeju-Kristə le. Yeenn a, m-to dəw ddi bba mâ kasə kɔku ddəw Lubba karə dda marə nɛ̂n wa?» 18Dəwje le ooje tarjeenn le a, əwje rɔde ngaâ ɔsuje gaji Lubba paje nan: «Lubba arə ddəw dəwje kə̂ toje to Jiipije ang karə n̂-turuje məde mba kinga nɛ̂n təbbə tɔ.»

Kunn-kutu Egilisi kə̂ Antiyos

19Njê-mə-kunnje kə̂ sanrɛje naan mba nɛ̂n-singa kə̂ ingade go yo tə̂ lə Etiyɛnn le awje ndərəng teeje bbe tə̂ kə̂ Penisi, Sipərə kə Antiyos. A mə bbeje tə̂ənn le Jiipije kə karəde baa â n̂-tɔjude tar lə Lubba. 20A marɛ̂je horode tə̂ kə̂ gəlde to dəwje kə̂ Sipərə kə dəwje kə̂ Sirɛnn ddeeje bbe tə̂ kə̂ Antiyos a, paje Tar kə̂ Maji lə Əbbə-dəwje Jeju arə dəwje kə̂ aw paje ndɔn-tar gɛrɛkə tɔ. 21Singa-mɔngu lə Əbbə-dəwje to dɔde tə̂ arə dəwje nya ooje məde tə̂ kə Əbbə-dəwje ngaâ n̂-turuje ddəw ləde.

22Njê-mə-kunnje kə̂ Egilisi tə̂ kə̂ Jerujalɛm ooje tar nəənn le ngaâ ulaje Barnabas Antiyos. 23Barnabas le ddee tee ngaâ oo mə-maji kə̂ Lubba dda kə njê-mə-kunnje le a, inga rɔ-nəəl nya ngaâ ndəjəde karə dundaje məde tɔyn dɔ Əbbə-dəwje tə̂. 24Mba Barnabas le to dəw kə̂ maji ddəm dəw kə̂ Ndil-mə-nda dduse ddəm mə-kunn laa bo nya ddəm arə dəwje nya ddeeje to dəwje lə Əbbə-dəwje.

25Goe tə̂ a, Barnabas le ɔtu aw bbe tə̂ kə̂ Tarsə mba sangə Sɔl. 26Ningɛ̂ a, n̂-ddee saa Antiyos. N̂-ddaje bbal kâra Egilisi tə̂ kə̂ Antiyos ngaâ n̂-tɔjuje nɛ̂n dəwje nya nya. Bbe tə̂ kə̂ Antiyos â dəwje unn kutu bbar ri njê-njaje go Jeju tə̂ to «dəwje lə Kristə.»

27Dɔ ndɔɛ̂ tə̂ənn, marə njê-kilaje mbər tar lə Lubba inje Jerujalɛm awje bbe tə̂ kə̂ Antiyos. 28Ndil unda tar ta marɛ̂ tə̂ kâra kə̂ ria nan Agabus. Nin taar ngaâ n̂-pa nan: «Marə ndɔ a, tɔkə bbo a koso dɔ nangə tə̂ tɔyn.» A tɔkɔrɔ njaa bbo le oso dɔ ndɔ tə̂ kə̂ Kolodə to nɛ̂n to tɔkə mbay. 29Njê-njaje go Jeju tə̂ ooje ta naan karə dəw kâra kâra unn nɛ̂n kə̂ asə singɛ̂ mba kula nɛ̂n karə duman nɛ̂n njê-mə-kunnje kə̂ Jude. 30N̂-ddaje tokə baann. Darəje nɛ̂nje le Barnabas de kə Sɔl darə dawje nɛ̂n darə dəwje kə̂ dɔ Egilisi tə̂ kə̂ nangə tə̂ kə̂ Jude.

Currently Selected:

Kulaje 11: KabbaDkS

Highlight

Copy