كارێن هنارتیان 11

پەترۆس روهنكرنێ بۆ جڤاكا باوەرداران پێشكێش دكەت

1هنارتی و برایان ل یەهودیایێ بهیست كو مللەتێن نەجوهی ژی پەیڤا خودێ یا وەرگرتی. 2دەمێ پەترۆس سەركەفتیە ئورشەلیمێ، باوەردارێن سونەتكری#11‏:2 باوەردارێن سونەتكری: ئانكو جوهیێن باوەری ب عیسای ئینای. رەخنە لێ گرت 3و گۆتن: «تۆ چوویە مالا زەڵامێن سونەتنەكری#11‏:3 سونەتنەكری: ئانكو ئەوێن نەجوهی. و تە ل گەل وان خوار!» 4پەترۆسی دەست پێ كر بۆ وان ئێك ل دویڤ ئێكێ شڕۆڤە كر و گۆت: 5«من ل باژێڕێ یافا نڤێژ دكر و د بێهشیێ دا من بینینەك دیت كو تشتەكێ وەكو چارچەڤەكا مەزن داددا، ژ هەر چوار كوژیان ڤە ژ ئەسمانی دهاتە شۆڕكرن و نێزیكی من بوو. 6دەمێ من باش بەرێ خۆ دایێ و هزر تێدا كری، من گیانەوەرێن چوارپێ یێن ئەردی و دڕندە و خشۆك و باڵندەیێن ئەسمانی دیتن. 7هنگی من گو‍‌ھ ل دەنگەكی بوو، گۆتە من: ‹پەترۆس، رابە، ڤەكوژە و بخۆ.› 8ئینا من بەرسڤ دا: ‹حاشا، خودان! تشتێ هەڕمی یان حەرام چ جاران نەچوویە د دەڤێ من دا.› 9ئینا ئەوی دەنگی دووبارە ژ ئەسمانی بەرسڤا من دا: ‹ئەو تشتێ خودێ پاقژ كری، نەبێژە یێ هەڕمیە.› 10ئەڤ تشتە سێبارە بوو و پاشی هەمی بۆ ئەسمانی هەلكێشانەڤە. 11هەر د وی دەمی دا، سێ زەڵام ل بەر دەرگەهێ وێ مالێ راوەستیان یا ئەم لێ مێڤان، كو ژ قەیسەریێ هنارتبوونە ب دویڤ من را. 12ئینا گیانی فەرمان ل من كر كو بێ دوودلی ل گەل وان بچم. ئەڤ هەر شەش برایە ل گەل من هاتن و ئەم چووینە د مالا وی زەڵامی ڤە یێ ئەو هنارتینە ب دویڤ من را. 13وی ژی بۆ مە ڤەگێڕا كا چەوا وی فریشتە دیت د مالا وی ڤە یێ راوەستیایە و دبێژیتە وی: ‹هندەكان بهنێرە یافایێ و گازی شەمعونی بكە، ئەوێ دبێژنێ پەترۆس. 14ئەو دێ پەیامەكێ گەهینیتە تە، تۆ و هەمی خەلكێ مالا تە دێ پێ قورتال بن.› 15دەمێ من دەست ب ئاخفتنێ كری، گیانێ پیرۆز ب سەر وان دا هات، هەروەكو ل دەستپێكێ ب سەر مە دا هاتی. 16ئینا گۆتنا خودانی هاتە بیرا من، كو گۆتبوو: ‹یوحەننای ب ئاڤێ تافیر كر، لێ هوین دێ ب گیانێ پیرۆز هێنە تافیركرن.›#11‏:16 كارێن هنارتیان 1‏:5 17ئەڤجا ئەگەر خودێ ئەو دیاری دابیتە وان وەكو یا دایە مە، دەمێ مە باوەری ب خودان عیسایێ مەسیح ئینای، ما ئەز كیمە دا بشێم بەرهنگاریا خودێ بكەم؟» 18دەمێ وان گو‍‌ھ ل ڤێ چەندێ بووی، بێدەنگ بوون. ئەوان پەسنا#11‏:18 پەسن: مەدح و سەنا خودێ كر و گۆتن: «ئانكو خودێ لخۆزڤڕین ژ بۆ ژیانێ یا دایە مللەتێن نەجوهی ژی.»

جڤاكا باوەرداران ل ئەنتاكیایێ

19ئەڤجا ئەوێن ژ ئەگەرێ وێ تەپەسەریا پشتی كوشتنا ستیڤانۆسی بەڵاڤبووین، چوونە فینیقیا و قوبرس و ئەنتاكیایێ و وان بەحسێ مزگینیێ بۆ كەسێ نەدكر، ژبلی جوهیان. 20لێ هندەك ژ وان هەبوون، خەلكێ قوبرس و قەیرەوانێ بوون، دەمێ گەهشتینە ئەنتاكیایێ، بۆ یونانیان ژی دئاخفتن و مزگینیا خودان عیسای ددایێ. 21دەستێ خودانی ل گەل وان بوو و ژمارەیەكا زۆر باوەری ئینا و بۆ خودانی زڤڕین.

22ئەڤ نوچە گەهشتە جڤاكا باوەرداران ل ئورشەلیمێ، ئینا ئەوان بارناباس هنارتە ئەنتاكیایێ. 23دەمێ گەهشتی و كەرەما خودێ دیتی، گەلەك كەیفخۆش بوو و هەمی هاندان كو ژ دل ل گەل خودانی بمینن. 24ئەو مرۆڤەكێ باش بوو و ژ گیانێ پیرۆز و باوەریێ یێ پڕ بوو. گەلەك كەس ژی گەهشتنە خودانی.

25بارناباس چوو تەرسۆسێ دا ل شائوولی بگەڕیێت، 26دەمێ دیتی، وی ئەو ئینا ئەنتاكیایێ. ساڵەكا تەمام ئەو پێكڤە ل گەل جڤاكا باوەرداران كۆم دبوون و گەلەك كەس فێر دكرن. ل ئەنتاكیایێ بوو كو شاگرد بۆ جارا ئێكێ ب ‹مەسیحی› هاتنە بناڤكرن.

27ل وان رۆژان هندەك پێغەمبەر#11‏:27 پێغەمبەر: ئەوێن پەیاما خودێ رادگەهاندن. ل فەرهەنگۆكێ بنێڕە. ژ ئورشەلیمێ ژۆردا هاتنە ئەنتاكیایێ. 28ئێك ژ وان ناڤێ وی ئاگابۆس بوو و د كۆمبوونەكێ دا رابوو ژ پێرڤە و ب رێكا گیانی#11‏:28 گیان: مەبەست پێ گیانێ پیرۆزە كو گیانێ خودێیە. ل فەرهەنگۆكێ بنێڕە گیانێ پیرۆز. دیار كر كو نێزیكە دێ كولبەكا مەزن ل هەمی جیهانێ#11‏:28 مەبەست پێ هەمی ئیمپراتۆریا رۆمایێیە. چێبیت. (ئەڤ كولبە ل سەر دەمێ قەیسەر كلودیۆسی چێبوو.) 29ئینا شاگردان ل ئەنتاكیایێ بڕیار دا، كو هەر ئێك ل دویڤ پێچێبوونا خۆ هاریكاریێ بۆ برایێن ل یەهودیایێ#11‏:29 ئانكو: باوەردارێن ل یەهودیایێ. بهنێریت. 30وان ئەڤ چەندە كر و ب دەستێ بارناباسی و شائوولی بۆ ریهسپیان هنارت.

Currently Selected:

كارێن هنارتیان 11: BHD

Highlight

Copy