Shiyanso 12

UNguluvi ikimuhaagula uAbulaamu

1Ilijuva limonga uMutwa uNguluvi wámujoveele uAbulaamu, wáaja, “Wuukha ku nyi yaakho, uvaleshe avalukholo lwakho na vamaamo, ulute ku nyi yina nikhakuwonensa. 2Nikhakuyimiilila na kikuyoolosa, mukhava vinshi. Khanji ilitaawa lyakho likhamanyikha, kwa kiiva yaakho avaanu woona vakhayimiililwa. 3Avaanu vina vikikuyimiilila, nisivayimiilile, vina vikikuyiijila, nisivayiijile. Kwa kiiva yaakho avaanu woona ava mu nyi vakhayimiililwa.”

4-5Baheene, uAbulaamu wáwuukha mu lijumbi lya Halani, ngaja uNguluvi shina akhandi amujoveele. Uluhaavi ulo akhandi ana maakha mashumi fungati na gasaanu. UAbulaamu wámutoola umudala waakwe uSalaayi, uLooti umuswamuve wa maame umuvaha, ni fiinu fyanave fyona fina vakhandi nafyo, lumo na vavanda vaakwe, vina vakhandi vavapatile ku Halani. Baheene vayitenekha nu lushuulo lwanave mbakha ku nyi ya Kanaani.

Wáganile kifikha ku Kanaani 6wáyitenekha kiluta mbakha wáafikha ku nyi ya Moole kuna kukhandi kuna mupishi umukhome umwalooni, ku lijumbi lya Shekemu. Insiku iso aVakanaani vakhandi viikhala mu nyi iyo. 7Baheene uNguluvi wámutwiwushila uAbulaamu, wámujovela wáaja, “Inyi iyi yiyeene nikhavapeela ishisafi shaakho.” Apo baheene uAbulaamu wásenga uluvala ulwa kihumisa ishadanda kwa Nguluvi.

8Kihuma apo wáaluta ulubali lwa fidunda, kunena ya lijumbi lya Beteeli wásenga ilitinga lyakwe. IBeteeli yikhandi kusikha, ilijumbi lya Ayi likhandi kunena. Apo poope wámusenjela uNguluvi uluvala ulwa kihumisa ishadanda. Na apo baheene wámufuunya uNguluvi. 9Baheene uAbulaamu wáyansa kishuula, wáaluta ku Negebu, ulubali lwa kunyagamo ya nyi iya Kanaani.

UAbulaamu iiluta ku Misili

10Uluhaavi ulo, injala yagwile ku nyi ya Kanaani. Injala iyo yaali nkhome mandu mbakha uAbulaamu wálamwile kiwuukha kiluta ku Misili kikhala kwa luhaavi lufupi. 11UAbulaamu pina akhandi ali nkholeela kifikha ku Misili, wámujovela umudala waakwe uSalaayi wáaja, “Puliisa! Nimeenye kiija owe uli mudala munofu. 12AVamisili nda vakwaje vasiijove, ‘Uyu mudala waakwe.’ Baheene vasinibude, leelo owe vasikubuda. 13Lino, uvajovelaje kiija owe uli wulumbu wangu, baheene vasinibuda kwa kiiva yaakho.”

14Lino, vaganile kifikha ku Misili, aVamisili vamwaga umudala wa Abulaamu kiija munofu mandu. 15Avanandeje va Falawo, umutwa uwa ku Misili, vaganaga kimwaga uSalaayi kiija munofu, vaaluta vamusufya kwa mutwa, baheene vaatina kimutoola, vamutwala ku mbalino. 16UAbulaamu wágahilwagwa amanofu nu mutwa kwa kiiva ya Salaayi. Wápeelwa inkholo, ingʼombe, idogovi, ingamiya na vavanda va shigoosi na va shidala.

17Lino, kwa kiiva uSalaayi wátwalwagwa ku mbalino, uMutwa uNguluvi wámulafyaga uFalawo na vaanu woona ava mu nanda yaakwe, kwa matamu makhome. 18Apo, uFalawo wámushemeela uAbulaamu wámuposa wáaja, “Liswi lishi ili lina wanigahila? Kwashi usikhanijoveele kiija uyu mudala wangu? 19Wanijovelaga kiija uyu wulumbu waakho, baheene one namutoola ave mudala wangu. Lino, umudala waakho uyu, mutoolaga, muwuyaje kunyeenyu!” 20UFalawo wálajisa avaanu vaakwe kiija vamusindishile uAbulaamu nu mudala waakwe nu wusi waakwe woona wuna akhandi anawo.

Currently Selected:

Shiyanso 12: Shisangu

Highlight

Copy