Mateo 1

Jesús a'dödönö Mateo iwȩyudina wene

1Baikwö laebobe Jesucristo a'dödöminenö yöawa'yema. Jo̧ba Jesucristoma Davidmine itji̧ tupadanö jojo, ja̧danö Davidma Abraham itji̧ tupadanö jojoinobe. Baikwö laebobe Jesucristo a'dödöminenö yöawa'yema:

2Abrahamma Isaac mikwo̧ abe'doinobe, ja̧danö Isaacma Jacob mikwo̧ abe'doinobe, ja̧danö Jacobma Judá mikwo̧bi, Judá ö̧ja̧wo̧döbi tjabe'doinobe. 3Judáma Tamar mikwuju ji̧tji̧mu Fares mikwo̧bi, Zara mikwo̧bi tjabe'doinobe, ja̧danö Faresma Esrom mikwo̧ abe'doinobe, ja̧danö Jezrónma Aram mikwo̧ abe'doinobe. 4Aramma Aminadab mikwo̧ abe'doinobe, ja̧danö Aminadabma Naasón mikwo̧ abe'doinobe, ja̧danö Naasónma Salmón mikwo̧ abe'doinobe. 5Salmónma Rajab mikwuju jitji̧ Booz mikwo̧ abe'doinobe, ja̧danö Boozma Rut mikwuju jitji̧ Obed mikwo̧ abe'doinobe. Obedma Isaí mikwo̧ abe'doinobe, 6ja̧danö Isaíma la'aka luwo̧ David mikwo̧ abe'doinobe. Davidma Uríasmine wobö ujunibinoko jitji̧ Salomón mikwo̧ abe'doinobe. 7Salomónma Roboán mikwo̧ abe'doinobe, ja̧danö Roboánma Abias mikwo̧ abe'doinobe, ja̧danö Abiasma Asá mikwo̧ abe'doinobe. 8Asáma Josafat mikwo̧ abe'doinobe, ja̧danö Josafatma Jorán mikwo̧ abe'doinobe, ja̧danö Joránma Uzías mikwo̧ abe'doinobe. 9Uzíasma Jotán mikwo̧ abe'doinobe, ja̧danö Jotánma Acaz mikwo̧ abe'doinobe, ja̧danö Acazma Ezequíasma mikwo̧ abe'doinobe. 10Ezequíasma Manasés mikwo̧ abe'doinobe, ja̧danö Manasésma Amón mikwo̧ abe'doinobe, ja̧danö Amónma Josías mikwo̧ abe'doinobe. 11Josíasma Jeconías mikwo̧bi, Jeconías ö̧ja̧wo̧döbi tjabe'doinobe. Jobadö tjö̧jinenama, Babilonia jojodöma Israel jojodönö kwakwabö tjujuluwinobe, ja̧danö tjujuluwajawö̧nö Israel nijitjö latjebinobe, ja̧danö Babilonia nijibe öbibö tjȩwa̧jinobe.

12Babilonia jojodö Israel jojodönö tjitebotjö latjebaja̧ ikena ji̧nadö Jesús a'dödöma bidö: Jeconíasma Salatiel mikwo̧ abe'doinobe, ja̧danö Salatielma Zorobabel mikwo̧ abe'doinobe. 13Zorobabelma Abiud mikwo̧ abe'doinobe, ja̧danö Abiudma Eliaquín mikwo̧ abe'doinobe, ja̧danö Eliaquínma Azor mikwo̧ abe'doinobe. 14Azorma Sadoc mikwo̧ abe'doinobe, ja̧danö Sadocma Aquín mikwo̧ abe'doinobe, ja̧danö Aquínma Eliud mikwo̧ abe'doinobe. 15Eliudma Eleazar mikwo̧ abe'doinobe, ja̧danö Eleazarma Matán mikwo̧ abe'doinobe, ja̧danö Matánma Jacob abe'doinobe. 16Jacobma José mikwo̧ abe'doinobe, ja̧danö Joséma María mikwujunö eminobe, ilekwo bajibanö. Jobuju Maríama jitji̧ Jesúsnö jeminobe, ja̧danö Jesúsma, Cristo jö̧ba̧lö ötjabökwe, Dios weakwo̧ jö̧a̧linökwe jö̧ba̧lö.

17Jejenö laebobe Jesús a'dödönö yöawa'yema. Abrahamtjö jamatö, David mikwo̧ ö̧jenanö baibanö Jesús a'dödö a̧li̧nösamutjö ö'wejemu jojodö tjö̧jinobe, ja̧danö Davidtjö jamatö Israel jojodö tjitebotjö labebö Babiloniabe tji̧'yenanö baibanö Jesús a'dödö a̧li̧nösamutjö ö'wejemu jojodö tjö̧jinobe, ja̧danö tjitebotjö labebö Babiloniabe tji̧'yinemi baikwö Jesúsnö jemena baibanöma, Jesús a'dödö a̧li̧nösamutjö ö'wejemu jojodö tjö̧jinobe.

Jesúsnö jemina wene

18Baikwö laebobe Jesucristonö jemina wenema: Maríama yöbawö juninuju, tupakwö Josénö chemakwujusa, jö̧ba̧lö. Jo̧kwaijayonö jo̧banö ina jemapji, ja̧danö iso̧nö ina jö̧kuju jö̧jayi, Dios O̧'wo̧ Luwo̧ ujulunö metu'wo jö̧jinobe. 19Jemakwo̧ José mikwo̧ma Dios wei̧ a̧ja̧kwö ö̧jinobe, ja̧danö metu'wo jö̧jiökwe emökönö Maríanö kaatibobö omukwatinobe. Jo̧kwaijayonö, kaatibobö omukwatinajayonö, Maríama sulabenö ja̧buju, katatibajö jö̧ba̧lö jojodö tjöba a'otjö yöawobö öpöjödinobe, jobujunö taba lö̧japji jö̧ba̧lö. Jo̧kwajabetjö̧ sulabenö ja̧jaja̧ yöbawökönö kaatibobö omukwatinobe. 20Jobekwö omukwatö ö̧jonö, Duluwo̧ weökwe ángelma jo̧banö yöawinobe, i̧'wi̧dinö:

—David itji̧ tupadanö jojo José, yebabökönuwi. Maríanö kwemo, kwilekwo bajibanö. Jelo̧nö ja̧bö metu'woma jö̧kuju. Dios O̧'wo̧ Luwo̧ ujulunöda metu'wo ju̧ju. 21Maríama jitji̧ iso̧nö jemakobe, ja̧danö jemakwo̧nö Jesús jö̧ba̧lö kwimidonö, iteda ömöledönö tjusulatjö tjö̧jibanö ja̧akwo̧obetjö̧—

jö̧ba̧lö yöawinobe Dios weökwe ángelma.

22Jejenö baledi̧ma baledinobe, Duluwo̧ yöawinadanö baledakobetjö̧. Dios yöawi̧ yöbawo̧ma ja̧ Duluwo̧ yöawina damötjö iwȩyudinobe, baikwö:

23Yötawaduwakwö, ina iso̧nö ja̧bökujuma, metu'wo jö̧jakobe, ja̧danö jitji̧nö jemakobe, ja̧danö jo̧banö Emanuel jö̧ba̧lö ötjabikobe, Diosma ökwödökwö jo̧,

jö̧ba̧lö laebobe Dios iwene.

24José wiluenama, Duluwo̧ weajökwe ángel yöawaja̧danö ja̧inobe, ja̧danö Maríanö eminobe, ilekwo bajibanö. 25Jo̧kwaijayonö, jobujunö emijayonö, jobujunö ja̧inokobe, jitji̧nö jemenanö kabatö. Ja̧danö, jitji̧nö jemenama, Joséma jo̧banö Jesús jö̧ba̧lö imidinobe.

Currently Selected:

Mateo 1: WPC

Highlight

Copy