Lucas 6

Otikwö̧kö̧ möle jawa Jesús yöawina wene

1Ju'wi möle otikwökö möle, Jesúsma iteda öba̧ja̧di̧ waisachadökwö kweachinobe, trigo batjo ö'wejeyunö kwetjachinobe. Jejenö kwetjachonö, ja'yubeda trigo tjebö, tjömamunö molö, kwetjachonö tjukwinobe Jesús öba̧ja̧di̧ waisachadöma. 2Jejenö baledi̧ edö, fariseo jojodöma edö yötja̧linobe:

—Tjebö kwukwaduwi̧ma sula, tjekebaduwenama kwotidaduwobetjö̧. Jejenö tjebö kwukwaduwenama, ökwödö judío jojodönö weawa laeböködanö, tjotidökö mölejayonö sulabenö kwotidaduwobe—

jö̧ba̧lö. 3-4Yötja̧liökwe Jesúsma baikwö atadinobe:

—Bidö tjebö tjukwi̧ kwöpöjödaduwijayonö, sulökö. Jobadöma sule Davidmine damötjö ja̧inadanö ja̧badö. Davidmine ja̧ina wene ¿la'akatjöda kwöwaisachinaduwökiji̧? A̧wi̧chi̧lö̧jinobe Davidnöbi, iteda ömöayedönöbi, ja̧danö a̧wi̧chi̧ lö̧jökwe Dios eju okwa tebachö, Diosnö iyawapja̧ emö ukwinobe Davidma, ¿jö̧tö? Jau, Davidma ja̧ Diosnö iyawapja̧ pan ukwinobe, ja̧danö ju'wibi David ömöayedöbi ja̧ pan tjukwinobe, ¿jö̧tö? Ja̧ pan kwöwaisaduwa, sule Diostjö jojodötjö ö'weje pjabatadöda tjukwobö jo̧be jö̧ba̧lö laebobe Moisés iwȩyudinama, ¿jö̧tö? Ja̧danö chömöledö, Davidma ö'weje pjabato̧ ö̧jokobetjö̧, la'akatjöda ja̧ pan ukwobö jwiinena, ¿jö̧tö? Jo̧kwaijayonö, la'akatjöda ja̧ pan ukwobö jwiobe jö̧ba̧lö Moisés iwȩyudina laebijayonö, ja̧ pan wene jwiinö ukwinobe Davidma, ja̧danö ju'wibi iteda ömöayedönö iyinobe, jobadöbi wene jwiinö tjukwobö, ¿jö̧tö? Jau, jojodö edö sulabenö kwadö jö̧ba̧lö yötja̧lo jö̧tja̧lijayonö, Dios öba a'otjö wene jwiinö tjukwinobe.

Ötjö chöba̧ja̧di̧ waisachadöbi ja̧danö, ökwödöma edö sulabenö tjebö kwadö jö̧ba̧lö kwomukwataduwijayonö, Davidmine wene jwiinö ukwinadanö bidöbi Dios öba a'otjö wene jwiinö kwadö—

jö̧ba̧lö atadinobe Jesúsma. 5Ja̧danö tupakwö jobadönö yöawinobe:

—Ötjö jojo baibanö jeminökwema, otikwökö möle jawa luwo̧sa, jo̧kwajabetjö̧ ötjöda otikwökö möle jojodö ja̧tji̧ otiwojobö, sulojobö jö̧ba̧lö yötawobö jo̧be—

jö̧ba̧lö yöawinobe Jesúsma.

Otikwökö möle Jesús ömamu 'wabo̧nö otidö loina wene

6Jemi ikenama, ju'wi otikwökö möle baibenama, Jesúsma judío jojodö ba̧nö tja̧ja̧kwa̧leju okwa tebachibö öba̧ja̧dinobe. Jobe öba̧ja̧donö, bakwo̧ ömamu öwaisobekwöchobesamu 'wabo̧ma jobe ö̧jinobe. 7Jejenö ö̧jiawö̧, Moisés iwȩyudina ba̧ja̧dadöbi, fariseo jojodöbi Jesúsnö tjeda̧linobe, otikwökö möle jo̧banö otidö loojobö jö̧ba̧lö. Jejenö tjeda̧linobe, jo̧banö Jesús otidö loenama, Jesúsma sulabenö otikwökö möle otido̧, jö̧ba̧lö, Jesúsnö wanedö yötja̧lakobetjö̧.

8Jesúsma sulabenö tjomukwati̧ öwaisinobe, jo̧kwaijayonö öwaisijayonö, yayonö ömamu 'wabo̧nö weinobe:

—A̧laibö baikwö ichi—

jö̧ba̧lö. Weökwe, ömamu 'wabo̧ma a̧laibö Jesús ö̧jobekwö ichibinobe. 9Ikenama, Jesúsma jo̧banö eda̧ladönö abebö a̧ja̧kwinobe:

—Ökwödö judío jojodönö weawama ¿dakwö laebobeda, otikwökö möle otiwanö ja̧doböena, sulabenö ja̧doböena? Jojodö tjö̧jibobö pjadatoböena, jojodönö söbebö lodoböena, ¿dakwö laebobeda ökwödö judío jojodönö weawama?—

jö̧ba̧lö abebö a̧ja̧kwinobe Jesúsma, jobadönö. 10Jejenö yöba̧lajo̧, jobadönö bakwo̧nökwena edinobe Jesúsma, ikenama jalachibö weinobe ömamu 'wabo̧nö:

—Kwömamu debati—

jö̧ba̧lö. Weökwe, ömamu deatinobe, ja̧danö deatenama, juluwanö otiwamu baibinobe.

11Ikenama, jejenö otikwökö möle ömamu 'wabo̧nö otidö loiawö̧, Moisés iwȩyudina ba̧ja̧dadöbi, fariseo jojodöbi jwiinö tjölabinobe Jesúsnö, ja̧danö Jesúsnö öpöjödö yötja̧lakwawinobe, Jesúsnö sulabenö ja̧tjakwa̧ma.

Jesús iteda webawedönö omudawö ujunina wene

12Jemi ikenama ja'yubenö lekwajabetjö, Jesúsma mö'ösa'obe önöchinobe, jobetjö Diosnö aebobö, ja̧danö yö̧te baledibanö Diosnö aebinobe. 13Yö̧te baledibanö abebajo̧, dewachena iteda öba̧ja̧di̧ waisachadönö jwöinobe, tjichobö, ja̧danö jobadötjö a̧li̧nösamutjö du̧ju̧tajabedönö omudawö ko̧ko̧dö ujuninobe, iteda webawedö batjibobö. Jobadöma bidö: 14Simón, ju'wi imi Pedro jö̧ba̧lö Jesús imidinökwebi, Pedro öjawo̧ Andrésbi, Jacobobi, Juanbi, Felipebi, Bartolomébi, 15Mateobi, Tomásbi, Alfeo itji̧ Jacobobi, jwaikwöda Romano luwedönö öpöjödo̧ jö̧ba̧lö ötjabökwe Simónbi, 16Jacobo itji̧ Judasbi, tupakwö Jesúsnö iyö loakwo̧ Judas Iscariotebi.

Ba̧jekwadönö Jesús otidö loina wene

17-18Ba̧jekwadö jojodöma Jesús yöawi̧ tja̧ja̧kwoböbi, tjö'wöchi̧ Jesús otidö looböbi tjichinobe. Jobadö ichajadöma bidö: ba̧jekwadö Jesús öba̧ja̧di̧ waisachadöbi, ju'wedö okobe jwiinö judea nijitjö ichajadöbi, Jerusaléntjö ichajadöbi, jwaibalawa ö'öbö niji Tirotjö ichajadöbi, jwaibalawa ö'öbö niji Sidóntjö ichajadöbi. Jobadöma Jesúsnö edö tjichinobe, ja̧danö mö'ösa'otjö iteda webawedönö omudawö junajo̧, Jesúsma iteda öba̧ja̧di̧ waisachadökwö mö'ösa'otjö yutuajinobe, ba̧ba̧lawobekwö jojodö tjuju̧kwobe. Jobe jojodökwö ja̧nö, Jesúsma tjö'wöchi̧ otidö loinobe, ja̧danö jobadötjö tjo̧'wo̧ luwo̧nö sulabedönö juna̧ladönöbi pjaatinobe, tjo̧'wo̧ luwo̧nö sulabedönö a'dewö lobö. 19Jojodö Jesúsnö matjenama, Jesús ujulutjö mabadöma tjö'wöchaja̧tjö tjö̧bibajinobe, jo̧kwajabetjö̧ okobe deinö Jesúsnö matjobö tjisakwinobe, jejenö matjenama tjö'wöchi̧tjö tjö̧bibajakobetjö̧. Ja̧danö Jesúsma okobe deinö jobadönö otidö loinobe.

Jesús jojodönö yöawina wene

20Jojodönö otidö lobajo̧, Jesúsma iteda öba̧ja̧di̧ waisachadönö edö yöawinobe, baikwö:

—Ökwödötjö usula jojodöma isabenö tjo̧'wo̧ ösöwanö ja̧dö, Dios la'aka luwo̧ ö̧jena#6:20 Dios la'aka yöbawö ö̧jena jojodötjobetjö̧. 21Ökwödötjö a̧wi̧chi̧ lö̧jawö̧ma isabenö tjo̧'wo̧ ösöwanö tjö̧jakwedö, tjomeawachibanö tjujuna̧lakobetjö̧. Ökwödötjö o̧'wo̧ tjo̧achö budekwadöma isabenö tjo̧'wo̧ ösöwanö tjö̧jakwedö, isabenö tupakwö jwiinö tjo̧'wo̧ ösöwachibanö tjö̧jakobetjö̧.

22Ja̧danö, ötjönö jojo baibanö jeminökwenö kwösödaduwiawö̧ jojodö ökwödönö tjöpöjödena, ja̧danö ökwödönö 'da̧batö lotjena, ja̧danö ökwödönö otjena, ja̧danö sulabenö yötja̧lena. Jejenö baleditjö̧ma, isabenö kwo̧'wo̧ ösöwanö kwö̧jaduwakwedöja chömöledö, Diosma isabenö otiwanö ökwödönö iyakobetjö̧. 23Jau chömöledö, jejenö ökwödönö tjöpöjödenama, isabenö kwo̧'wo̧ ösöwachibanö kwösödaduwo, Isabenö Diostjö inesö otiwa jawa demakwedösa, jö̧ba̧lö. Jau chömöledö, kwöwaisaduwa, ökwödönö sulabenö tjöpöjödi̧danö damötjö ji̧nadö Dios yöawi̧ yöbawadönöbi tjöpöjödinobe, ja̧danö ju'wibi kwöwaisaduwobö jo̧be, jobadö damötjö otiwanö ja̧bö ji̧nadö Diostjö otiwa jawa tjemi̧danö ökwödöbi bakwainö kwemaduwakwedöja—

jö̧ba̧lö yöawinobe.

24Ja̧danö ju'wibi yöawinobe Jesúsma:

—Ja̧danö ökwödötjö nöinö juna̧ladöma, Ayö, isabenö o̧'wo̧ tjo̧achö tjö̧jakwedö, tjo̧'wo̧ ösöwachibanö ji̧ jawama ida̧ökö okobe jwiinö tjujuna̧lajabetjö̧. 25Ja̧danö, ökwödötjö babe tjomeawinö kwajadöma, ayö, isabenö o̧'wo̧ tjo̧achö tjö̧jakwedö, isabenö a̧wi̧chi̧ lö̧jawö̧ tjö̧jakobetjö̧. Ja̧danö, ökwödötjö babe tjo̧'wo̧ ösöwanö obadöma, Ayö, isabenö o̧'wo̧ tjo̧achö tjö̧jakwedö, isabenö o̧'wo̧ tjo̧achö tjubudekwakobetjö̧.

26Ja̧danö, ökwödötjö okobe deinö jojodö bidöma otiwanö yöbawadö jö̧ba̧lö tjösödawö̧ma, Ayö, isabenö o̧'wo̧ tjo̧achö tjö̧jakwedö. Kwöwaisaduwa chömöledö, Bidöma otiwanö yöbawadö, jö̧ba̧lö jojodö tjösödawö̧ma, Dios yöawi̧ jweinö yöbawöködöda, ¿jö̧tö? Jau chömöledö, kwa'dödöma ¿didö yötjawi̧ a̧ja̧kwö, otiwanö yöbawadö jö̧ba̧lö tjösödinada, Dios yöawi̧ jweinö yöbawadöena, Dios yöawi̧ omöna yöba̧ladöena? Dios yöawi̧ omöna yöba̧ladönöda tjösödinobe, ¿jö̧tö? Jau chömöledö, Dios yöawi̧ jweinö yöbawadönö la'akatjöda ösödöködö böjȩ jojodöma. Jo̧kwajabetjö̧ ökwödö yökawaduwi̧ ösödö, Bidöma otiwanö yöbawadö, jö̧ba̧lö ökwödönö tjösöditjö̧ma, öwaetjöda öwawena, Dios yöawi̧ omöna yöka̧laduwobetjö̧ yökawaduwi̧ ösödadö jö̧ba̧lö. Ja̧danö, ju'wibi yötawaduwakwö: Jejenö Dios yöawi̧ omöna yöka̧laduwiökwe, Diosma isabenö ökwödönö lȩebakobe, damötjö ji̧nadö sulabenö yöbawadönö lȩebi̧danö—

jö̧ba̧lö yöawinobe Jesúsma.

—Kwöpöjojodönö kwösödaduwo— jö̧ba̧lö Jesús yöawina wene

27Tupakwö yöawinobe Jesúsma:

—Chömöledö, ju'wedö yötja̧lena, Kwöpöjojodönö balekwa mikwa kwöpöjödaduwo, jö̧ba̧lö. Jo̧kwaijayonö wainö yötawaduwakwö, kwöpöjojodönö kwösödaduwo jö̧ba̧lö. Jau chömöledö, bakwo̧nökwena baikwö yötawaduwakwö: Ökwönö sulabenö öpöjödadönö otiwanö ja̧köbo, 28ja̧danö ökwönö Dios lȩebobö abebadönö Dios otiwanö pjaatobö akebo, ja̧danö ökwönö sulabenö ja̧badönö Diosnö akebo jobadönö pjaatobö. 29Ja̧danö, jelo̧ kwibekasa'wonö 'bȩitjö̧ma, jalachibö bakwachobesa'wobi kwi̧sebo, ja'wobi 'bȩobö, balekwa mikwama jo̧banö 'bȩbökönö. Ja̧danö, jelo̧ kwökamijido̧ tiyuwena 'duawado̧ 'döebobö isakwitjö̧ma, ja̧bi, jeledo̧ okwanösado̧bi kwiyonö. 30Ja̧danö, ökwönö abeba̧lo̧nö a̧'dȩlökönö kwiyo, ja̧danö jelo̧ kwitea 'döebitjö̧ma tjeatobö weköboko.

31Chömöledö, kwöwaisaduwa ju'wedö ökwödönö otiwanö ja̧tjobö kwösödaduwi̧ma, baikwö ötjönö ja̧tjobö chösöda, baikwö ötjönö ja̧tjobö chöpöjöda jö̧ba̧lö, ¿jö̧tö? Baikwö wetaduwakwö chömöledö: Ja̧ baikwö chösödo jö̧ta̧lena jö̧ba̧lö kwöwaisaduwi̧danö ju'wedönö ja̧bö kwö̧jaduwo, bakwainö otiwanö jojodönö ja̧bö kwö̧jaduwakobetjö̧—

jö̧ba̧lö yöawinobe.

32Tupakwö yöawinobe Jesúsma:

—Jau chömöledö, sule ökwödönö ösödadönöda kwösödaduwitjö̧ma, ¿tajawedö kwösödaduwi̧ omukwatobö Diosma, Bidöma otiwanö ösödadö, jö̧ba̧löma? Jau chömöledö, sule ökwödönö ösödadönöda kwösödaduwitjö̧ma, sulabenö ja̧badö tjösödi̧danöda kwösödaduwena, jobadöbi idönöda ösödadönöda tjösödobetjö̧.

33Jau chömöledö, sule ökwödönö otiwanö ja̧badönöda otiwanö ja̧köbaduwitjö̧ma, ¿tajawedö ja̧köbaduwi̧ omukwatobö Diosma, Bidöma otiwanö ja̧badö, jö̧ba̧löma? Jau chömöledö, sule ökwödönö otiwanö ja̧badönöda otiwanö ja̧köbaduwitjö̧ma, sulabenö ja̧badö ja̧tji̧danöda ja̧köbaduwena, jobadöbi idönöda otiwanö ja̧badönöda otiwanö ja̧tjobetjö̧.

34Ja̧danö sule okobe jwiinö tjetjatakwedönö balada kwöbalewaduwitjö̧ma, ¿tajawedö kwöbalewaduwi̧ omukwatobö Diosma, Bidöma otiwanö pjabatö balada balewadö, jö̧ba̧löma? Jau chömöledö, sule okobe jwiinö tjetjatakwedönöda kwöbalewaduwitjö̧ma, sulabenö ja̧badö tjöbalewi̧danöda kwöbalewaduwena, jobadöbi okobe jwiinö tjetjatakwedönöda tjöbalewobetjö̧.

35Jo̧kwajabetjö̧ baikwö wetaduwakwö: Kwöpöjojodönö kwösödaduwo, ja̧danö jobadönö otiwanö ja̧köbaduwo. Jojodönö kwitea kwöbalewaduwenama, tupakwö tjetjatakwa̧ omukwatökönö kwöbalewaduwo, tjetjatökötjö̧ma jo̧kwada jö̧ba̧lö. Jau chömöledö, jejenö ja̧bö kwö̧jaduwiökwe, Diosma isabenö otiwanö ökwödönö iyakwo̧ mölejȩbetjö. Ja̧danö, ju'wibi yötawaduwakwö, jejenö ja̧bö kwö̧jaduwitjö̧ma kwi̧sebaduwena, Isabenö okobe jwiinö juluwo̧ Dios i̧tji̧mu otiwadösa, jö̧ba̧lö, Kwabe'doduwi ja̧i̧danö bakwainö ja̧köbaduwobetjö̧. Jau chömöledö, Diosma sulabenö ja̧badönöbi, otiwanö iyaja̧ ösödinö omukwatöködönöbi dösölö̧jinö pjabato̧, jo̧kwajabetjö̧ jo̧ba pjaati̧danö pjakataduwenama, Dios i̧tji̧mu otiwadösa, jö̧ba̧lö kwi̧sekwaduwobe.

36Jau chömöledö, Kwabe'doduwi Dios lȩlö̧jinö edo̧ ö̧ji̧danö, ökwödöbi lȩlö̧jinö edadö kwö̧jaduwobö jo̧be—

jö̧ba̧lö yöawinobe Jesúsma.

—Ju'wedönö kwöpöjödaduwa, sulabedö— jö̧ba̧lö Jesús yöawina wene

37Tupakwö yöawinobe Jesúsma:

—Chömöledö, jojodönö bidöma sulabedö jö̧ba̧löma lȩkebaduwa, Diosma ökwödönöbi sulabedö jö̧ba̧lö lȩebapji jö̧ba̧lö. Ja̧danö, jojodönö kwöpöjödaduwa, bidö sulabedönö Dios lȩebobö jo̧be jö̧ba̧löma, Diosbi ökwödönö lȩtebobö jo̧be jö̧ba̧lö öpöjödapji jö̧ba̧lö. Ja̧danö, jojodö ökwödönö sulabenö ja̧tjenama, sulabenö ja̧tjaja̧ omukwatökönö kwösödaduwo jobadönö, Diosbi ökwödö sulabenö ja̧köbaduwi̧ omukwatökönö ökwödönö ösödakobetjö̧.

38Ja̧danö ju'wedönö kwiyaduwo, kwiyaduwiökwe Diosbi ökwödönö iyakobetjö̧. Jau chömöledö, ju'wedönö kwiyaduwiökwe Diosma isabenö balekwa mikwa otiwanö ökwödönö iyakobe. Baikwö wanedö yötawa: 'Diinö a̧jibanö ja̧danö jemi ikenama ajayinö anaja̧tjö bajalekwönönö welachibanö anö iyakobe. Jau chömöledö, ju'wedönö kwiyaduwi̧ badedö edö, bakweminö otiwanö ökwödönö iyakobe Diosma, jo̧kwajabetjö̧ a̧'dȩlökönö kwiyaduwitjö̧ma balekwa mikwa ökwödönöbi a̧'dȩlökönö iyakwo̧ Diosma—

jö̧ba̧lö yöawinobe.

39Ja̧danö tupakwö wanedö yöawinobe Jesúsma:

—Chömöledö, baikwö wanedö yötawa: Bakwo̧ öbajale tjewawo̧ma, jelo̧ öbajale tjewawo̧nö ¿otiwanö öibenaji̧? Edokobema otiwanö öibökena, ja̧danö öibökwebi öbibo̧bi, bakobe laju okwa metja̧kwedö, ¿jö̧tö? 40Jau chömöledö, kwöwaisaduwa, waisachadöma, jobadönö ba̧ja̧do̧nötjö bajalekwönönö wajwitjena, ¿jö̧tö? Jau chömöledö, waisachadöma jobadönö ba̧ja̧do̧ öba̧ja̧di̧ okobe jwiinö tjöwaisachibenama, ba̧ja̧do̧danö babibadö, ja̧danö jejenö batjibo jö̧ba̧lö waisachadö. Jo̧kwajabetjö̧ te'ada̧lönö kwö̧jaduwo, tjöbajale tjewawadödanöbedö sulabenö ba̧ja̧dadö tjöba̧ja̧di̧ kwöwaisachaduwapji jö̧ba̧lö. Jau chömöledö, jobadö tjöba̧ja̧di̧ kwöwaisachaduwitjö̧ma bakobe jobadökwö kwöbajaleduwi tjewawadödanö bakibaduwena, ja̧danö bakobe meköbaduwobö ötjibena—

jö̧ba̧lö wanedö yöawinobe Jesúsma.

41Tupakwö yöawinobe Jesúsma:

—Chömöledö, ökwödöma kwömöledöduwi wene tjujuna̧li̧ omukwatadöja, ¿jö̧tö? ¿Tajawedö kwömöledöduwi wene tjujuna̧li̧ kwomukwataduwijayonö, ökwödöda wene kwujuna̧laduwi̧ma kwomukwataduwokobeda? ¿Tajawedö ju'wedönö jwekebaduwijayonö, ökwödöda ja̧bö kwö̧jaduwi̧ma jwekekwaduwokobeda? Baikwö wanedö yötawa: Ökwödöma kwömöledöso̧ öbajaletjö iso̧pja̧ ja'yuwo̧pja̧ edadöja, jo̧kwaijayonö ja̧ kwedaduwijayonö, ökwöda kwöbajaletjö towisöte nööte edöködöja. 42Jejenö ösöte kwöbajalenö a̧jijayonö, kwömöledöso̧nö yöba̧ladöja, Kwöbajaletjö iso̧pja̧ loköbobö pjatatakwö, jö̧ba̧lö. Jo̧kwaijayonö ösöte kwöbajalenö a̧jöte kwedökötjö̧ma, ¿dakwö otiwanö edö kwömöledöso̧nö pjakatobö? Jejenö ja̧bo̧ dötölatajanö omukwato̧nö baikwö yötawa: Abönö ökwöda kwöbajaletjö towisöte emawö loköbo, ikena emö lobajo̧, otiwanö kwedena, kwömöledöso̧ öbajaletjö iso̧pja̧ emö loköbobö—

jö̧ba̧lö wanedö yöawinobe Jesúsma.

Towinö wa̧ji̧ jawa Jesús wanedö yöawina wene

43Tupakwö wanedö yöawinobe Jesúsma:

—Chömöledö, towibiya kwöwaisaduwa, otiwowima, suli̧ jawa wa̧jobö jwiowi, ja̧danö sulabowima otiwa jawa wa̧jobö jwiowi, ¿jö̧tö? 44Jau chömöledö, opobiya wa̧jina edö, ja̧ towi kwöwaisachibaduwena, Aaa, ajayinö bowitjö wa̧jinobe jö̧ba̧lö. Jau chömöledö, higos ötjabi̧ wa̧ji̧ma sȩötjetjöma la'akatjöda 'dötjokobe, sule higos towitjöda 'dötjobe, ja̧danö na̧i̧ma sȩowitjöma la'akatjöda 'dötjokobe, sule na̧i̧nutjöda 'dötjobe, ¿jö̧tö? 45Jojodöbi ja̧danö chömöledö, otiwo̧ma, omajadenö otiwa jawa omukwati̧tjö otiwa jawa yöba̧lo̧, ja̧danö sulabo̧ma, omajadenö suli̧ jawa omukwati̧tjö suli̧ jawa yöba̧lo̧, jojodöma tjomajadenö tjomukwati̧tjö yöba̧ladötjobetjö̧—

jö̧ba̧lö yöawinobe Jesúsma.

O̧do otidadönö Jesús wanedö yöawina wene

46Tupakwö yöawinobe Jesúsma:

—Chömöledö, ökwödöma ötjönö duluwo̧ jö̧ba̧lö öbabidöja ötjönö, ¿jö̧tö? Ja̧danö, jejenö duluwo̧ jö̧ba̧lö ötjönö ökabiduwitjö̧ma, ¿tajawedö yötawi̧danö ja̧bö kwö̧jaduwokobeda? Isabenö yötawi̧danö ja̧bö kwö̧jaduwobö jo̧be. 47Baikwö wanedö yötawa yötawi̧ a̧ja̧kwö yötawi̧danö ja̧bö jo̧nö: 48Jo̧bama otiwanö o̧do otido̧danö ichejekwobe. O̧'do otiwanö otido̧ma, okwa sobö, inawa ichibenanö sobo̧, otiwanö o̧do la'aka jawa ujunobö. Ja̧danö jejenö inawa wame la'aka jawa otidobetjö̧, ojwe okwatibö balawa loijayonö, otiwanö 'diinö o̧do otidinobetjö̧ 'dieju. Jo̧badanö ichejekwo̧ yötawi̧danö ja̧bö jo̧ma chömöledö. 49Jo̧kwaijayonö yötawi̧ a̧ja̧kwibö yötawöködanö ja̧bö jo̧ma, la'aka jwiinö o̧do otido̧danö ichejekwo̧. Ja̧danö, jo̧ba otidineju ajayinö otiweju ichejekwijayonö, ojwe okwatibenama juluwanö jwiinö meeju, la'aka jwiobetjö̧—

jö̧ba̧lö wanedö yöawinobe Jesúsma, jo̧ba yöawi̧ a̧ja̧kwadönöma.

Currently Selected:

Lucas 6: WPC

Highlight

Copy