Lucas 12

—Fariseo jojodö tjomukwati̧danö omukwatökönaduwi— jö̧ba̧lö Jesús yöawina wene

1Yelösöda ba̧jekwadö jojodöma tjoko̧ko̧kwachibinobe, ja̧danö yelösöda ba̧jekwadö tjo̧ko̧kwachibobetjö̧ ja̧tabikwawö tjö̧jinobe. Ja̧danö, jojodö ichö tjo̧ko̧ko̧kwonö, Jesúsma iteda öba̧ja̧di̧ waisachadönö yöawinobe:

—Chömöledö, wanedö yötawa, te'ada̧lönö kwö̧jaduwo, fariseo jojodö tjujuna̧li̧ ye'yeachi̧ jawa ökwödönöbi ye'yeachapji jö̧ba̧lö. Jobadö tjujuna̧li̧ ye'yeachi̧ jawama dötölatajanö omukwatakwawa, baikwö labebö lobö yötawa chömöledö. Jobadöma okwanö sulabenö tjo̧mukwatijayonö, wamenö otiwanö omukwatadödanö tjichejekwobe, ja̧danö tjomukwatobe, sulabenö domukwatijayonö wene jwia, la'akatjöda sulabenö domukwati̧ma öwawökakobe— jö̧ba̧lö wanedö yöawinobe—.

2Jobadö tjomukwati̧danöma kwomukwataduwa chömöledö. Isabenö yötawaduwakwö: Okobe jwiinö babe öwawökö ji̧ jawama, tupakwö öwawakobe, ja̧danö okobe jwiinö babe jojodö tjöwaisapji jö̧ba̧lö tojö tjujuni̧ jawama, okobe deinö tupakwö tjöwaisakobe. 3Jau chömöledö, ju'wedö tja̧ja̧kwokonö yöka̧laduwi̧ma, tupakwö okobe deinö tja̧ja̧kwobö yötjawakobe, ja̧danö okwasȩko̧nö ja̧nö tjo̧'omanö yöka̧laduwi̧ma a̧petutjö labinö yötjawakobe okobe deinö tja̧ja̧kwobö. Jo̧kwajabetjö̧ fariseo jojodö dötölatajanö tjomukwati̧danöma kwomukwataduwa chömöledö. Wamenö kwi̧sebaduwi̧danö okwanöbi otiwanö omukwatö kwö̧jaduwo—

jö̧ba̧lö yöawinobe iteda öba̧ja̧di̧ waisachadönö, fariseo jojodö tjomukwati̧danöma omukwatökönaduwi jö̧ba̧lö.

—Böjȩ jojodönö yebabökönaduwi. Sule Diosnöda yekabiduwo— jö̧ba̧lö Jesús yöawina wene

4Tupakwö yöawinobe Jesúsma öba̧ja̧di̧ waisachadönö:

—Ökwödö yöne chömöledönö baikwö yötawa: Jojodönöma yekabiduwoko, jojodöma sule tjiteba'oda kwabö lobadötjobetjö̧. Jau chömöledö, sule tjiteba'oda kwabö lotjobö juluwadö jojodöma. Tupakwö ökwödönö suli̧ tjöwaedoböma juluwöködö, jo̧kwajabetjö̧ jobadönö yekabiduwoko. 5Jelo̧nöda isabenö juluwo̧ Diosnöda yekabiduwobö jo̧be chömöledö. Diosma ökwödö kwiteba'oduwibi kwabö loobö juluwo̧, jo̧kwaijayonö ja̧damaökö. Jau chömöledö, Diosma tupakwöbi juluwo̧. La'aka luwo̧obetjö̧ kwabö lobajo̧ ökwöla nöolabe ikwö looböbi juluwo̧ chömöledö, jo̧kwajabetjö̧ jo̧banöda yekabiduwobö jo̧be, Diosnöda—

jö̧ba̧lö yöawinobe.

6Ja̧danö, tupakwö yöawinobe Jesúsma:

—Chömöledö, Diosma isabenö ökwödönö te'ada̧lo̧. Baikwö wanedö yötawa: Pji̧yu̧ma, nöinö mikwawöködö, ¿jö̧tö? Döpi̧lataja baladasapi̧nö bakwamu luwanö emawobe emawejutjö, ¿jö̧tö? Jo̧kwaijayonö, mikwawöködötjijayonö, Kwabe'doduwi Diosma okobe deinö jobadö pji̧yu̧nö omukwato̧, jobadötjö bakwo̧nöbi o̧'wo̧ jwibibökönö. 7Jobadönö omukwatitjö̧ma ¿ökwödönöbi omukwatökenaji̧? Isabenö ökwödönö omukwato̧ chömöledö, otiwanö ökwödönö ite'ada̧lakobetjö̧. Jau chömöledö, isabenö otiwanö waiso̧ Diosma ökwödönö. Okobe jwiinö kwöwö'yebi waiso̧, dokwa ba̧jekwa'yebiya jö̧ba̧lö. Isabenö ökwödönö waiso̧ Diosma chömöledö, jo̧kwajabetjö̧ yekabiduwa, Diosma ökwödönö omukwatökena jö̧ba̧löma. Jau chömöledö Diosma pji̧yu̧nö omukwatö ite'ada̧litjö̧ma, isabenö ökwödönöbi ite'ada̧lakwo̧. Jau chömöledö, Dios edemi, ökwödöma pji̧yu̧ ba̧jekwadötjö bajalekwönönö nöinö mikwawadöja—

jö̧ba̧lö yöawinobe Jesúsma.

—Böjȩtjö ötjönö ösödadönöma mölejȩbetjö chösödakwawö̧, ja̧danö böjȩtjö ötjönö öpöjödödadönöma mölejȩbetjö chöpöjödakwawö̧— jö̧ba̧lö Jesús yöawina wene

8Tupakwö yöawinobe Jesúsma:

—Yötawaduwakwö, okobe deinö böjȩtjö ötjönö ösödö jojodö tjöba a'otjö Jesúsnö ösödo̧sa jö̧ba̧lö yöbawadönöma, mölejȩbetjö ötjö jojo baibanö jeminökwema jobadönö ösödö Dios ömöayedö ángelesdö tjöba a'otjö yötawakobe, ötjö chömöledö jö̧ba̧lö. 9Ja̧danö, böjȩtjö ötjönö öpöjödö, Jesúsnö öpöjödo̧sa, jö̧ba̧lö jojodö tjöba a'otjö yöbawadönöma, ötjöbi Dios ömöayedö ángelesdö tjöba a'otjö chöpöjödakobe, chömöledöböködö jö̧ba̧lö.

10Jejenö yöba̧lö, babe ötjönö öpöjödadöma la'akatjöda chömöledö batjibökakwedö jö̧ba̧löma yöta̧lökö chömöledö. Baikwö yötawa: Ötjö jojo baibanö jeminökwenö sulabenö yöba̧ladöma Dios lȩebi̧tjö tjö̧jibobö ina jo̧be. Ötjönö sulabenö yötja̧lijayonö, tupakwö sulabenö tjomukwati̧ kabatibö tjöbalewachitjö̧ma Dios lȩebakwa̧tjö tjö̧jibobö ina jȩna. Jo̧kwaijayonö ji̧kwa jwiakobe Dios O̧'wo̧ Luwo̧ otidi̧ edö, Awetja otidi̧da jö̧ba̧lö yöba̧ladönöma, la'akatjöda tjö̧jibökakwedö—

jö̧ba̧lö yöawinobe Jesúsma.

11Ju'wibi yöawinobe Jesúsma:

—Ja̧danö, ötjönö kwösödaduwobetjö̧, ökwödönö do̧batö öbibö tjujunena, judío jojodö ba̧nö tja̧ja̧kwa̧leju jojodö tjöba a'otjöbi, lȩekwa luwedö tjöba a'otjöbi, la'aka luwedö tjöba a'otjöbi. Ja̧danö tjöba a'otjö junajadö, ökwödönö sulabenö yötja̧lena, bidöma sulabedö jö̧ba̧lö. Jejenö baledenama kwo̧'wo̧ tjo̧kekwaduwa chömöledö, ¿dakwö datadakwajö? ¿taji yöda̧lakwajö? jö̧ba̧löma, Dios O̧'wo̧ Luwo̧da kwatadaduwakwa̧ pjaatakobetjö̧. 12Jau chömöledö, kwatadaduwobö baibenama, Dios O̧'wo̧ Luwo̧da ökwödönö öba̧ja̧dakobe otiwanö kwatadaduwakwa̧ma, jo̧kwajabetjö̧ kwo̧'wo̧ tjo̧kekwaduwa, Dios O̧'wo̧ Luwo̧ma isabenö ökwödönö pjaatakobetjö̧—

jö̧ba̧lö yöawinobe Jesúsma.

—Inesö mikwawi̧ jawama böjȩ jawamaökö— jö̧ba̧lö Jesús wanedö yöawina wene

13Jojodö ko̧ko̧kwajadötjö bakwo̧ Jesúsnö jwöinobe:

—Ba̧ja̧dakwawa luwo̧, chabe'do woaja̧ ikena chöpöema sulabenö iyö̧kö̧ ötjönöma. Jo̧banö weköbo chabe'do ujunina jawatjö otiwanö 'da̧batö junö ötjönö iyobö—

jö̧ba̧lö. 14Yöa̧lökwe Jesúsma atadinobe:

—Chömöledöso̧, jejenö webö̧kö̧sa ötjöma. Ötjöma ja̧ weawa luwo̧ baibanöma tjujuninökökwesa—

jö̧ba̧lö. 15Ja̧danö jejenö atadajo̧ Jesúsma tupakwö yöawinobe:

—Chömöledö, te'ada̧lönö kwö̧jaduwo, jwaikwöda kwemaduwotö jö̧ba̧lö isakwö kwö̧jaduwapji jö̧ba̧lö. Jau chömöledö, ju'wedö tjomukwatena nöinö chujuna̧litjö̧ma otiwanö chö̧jena, jo̧kwaijayonö ja̧maökö. Isabenö ja̧kwawa mikwawi̧ma, nöinö tjujuna̧li̧ jawadamaökö chömöledö— jö̧ba̧lö.

16Jejenö yöba̧lö Jesúsma jojodönö wanedö yöawinobe baikwö:

—Bakwo̧ nöinö juna̧lo̧ma öbatjo otiwayu ujuna̧linobe, ja̧danö wa̧ji̧ma otiwanö wa̧jinobe. 17Jejenö nöinö wa̧jiökwe omukwatinobe: ¿Dakwö ja̧takwajö? Yelösöda nöinö wa̧jobema, ja̧ wa̧ji̧ lödawejuma obiökena. ¿Dakwö ja̧takwajö? jö̧ba̧lö omukwatinobe. 18Ikenama jejenö omukwatajo̧ omukwatinobe: Aaa, lödaweju pjolatö lobö, jelejubiya nöejubiya chotidocha, okobe jwiinö wa̧ji̧ obieananö. 19Ja̧danö, jejenö isabenö nöinö chujuna̧lobetjö̧, yöta̧lakobe ötjödada, Aaa, babe nöinö chujuna̧lobetjö̧ otiwa. Lekwe o̧biya otiwanö chö̧jobö chujuna̧la babema, jo̧kwajabetjö̧ tupakwö otidökönö kwanöbi, owöbi, cho̧'wo̧ ösöwanö chö̧jo, jö̧ba̧lö omukwatinobe jo̧ba nöinö juna̧lo̧ma.

20Jo̧kwaijayonö, jejenö omukwatijayonö Diosma jo̧banö yöa̧linobe: Ökwöma wajwibö omukwato̧ja, biya̧da yö̧teda woköbakwo̧ja. Ja̧danö jejenö woköbaja̧ okobema, nöinö kwujuna̧li̧ma ¿ti ujuna̧lakwa̧da? Kwujuna̧li̧ma ¿ökwönö pjaatakwa̧ji̧?—

jö̧ba̧lö wanedö yöawinobe. 21Jejenö wanedö yöbawajo̧ Jesúsma yöawinobe:

—Jo̧badanö tjichejekwobe Diosnö omukwatökönö, idöda tjujuna̧lotö jö̧ba̧lö böjȩ jawa ko̧ko̧da̧lö isakwadöma. Jobadöma, Aaa, otiwanö juna̧ladösa, jö̧ba̧lö tjomukwatijayonö Dios öba a'otjö isabenö jwibadöda tjö̧jobe—

jö̧ba̧lö yöawinobe Jesúsma.

—Diosnö kwo̧'wo̧ wa̧na̧lö kwö̧jaduwo— jö̧ba̧lö Jesús yöawina wene

22Jemi ikenama Jesúsma iteda öba̧ja̧di̧ waisachadönö yöawinobe:

—Böjȩ jawama nöinö mikwawokobetjö̧ baikwö yötawaduwakwö chömöledö: Böjȩnö kwö̧jaduwi̧ jawama omukwatö kwö̧jaduwoko, Aaa, ¿taji dukwakwa̧jö? ¿taji 'dudawakwa̧jö? jö̧ba̧löma.

23Jau chömöledö, ja̧kwawa mikwawi̧ma, sule kwakwawadamaökö, ja̧danö sule kwiteba'oduwinö 'duawakwawadamaökö, jo̧kwajabetjö̧ ja̧ jawa omukwatö kwö̧jaduwoko.

24Mikwawöködö bo̧lö̧nö omukwatö edaduwi chömöledö. Jobadöma batjo lödö, ja̧danö wa̧ji̧ emö ¿tjotidobeji̧? Jobadöma kwakwawa ko̧ko̧dö, kwakwawa lödawejunö ¿tjödobeji̧? Jejenöma otidöködö chömöledö, jo̧kwaijayonö ja̧ jawa tjotidököjayonö Diosma jobadönö kwakwawa iyö ite'ada̧lobe, ¿jö̧tö? Ja̧danö chömöledö, Dios edemi ökwödöma jobadö bo̧lö̧nötjö bajalekwönönö mikwawadöja, jo̧kwajabetjö̧ jobadönö ite'ada̧litjöma, ökwödönöbi ite'ada̧lakwo̧ chömöledö.

25Ja̧danö chömöledö, Aaa, ¿dakwö ja̧bö lekwe chö̧jakwa̧jö? jö̧ba̧lö kwomukwataduwi̧ma, ajayitjö bajalekwönönö lekwe kwö̧jaduwobö ¿pjaatenaji̧? Pjaatokobe chömöledö. 26Jau chömöledö, Diosma ida̧ökö ö'wö bakibaduwakwa̧ möle badedö ujuninobe, ja̧ möleda ö'wö batjibakwedö jö̧ba̧lö, ¿jö̧tö? Ja̧danö, ökwödötjö bakwo̧ omukwatena, Aaa, Dios badedö ujunina möle ö'wö batibökena, ja̧ möle balewö lotena, ja̧tjö bajalekwönönö lekwe chö̧jobö jö̧ba̧lö, ¿jö̧tö? Jejenö balewö lotjoböma wayökena ichejekwa chömöledö, jo̧kwaijayonö ja̧bi kwöbalewaduwoböma juluwöködöja, ¿jö̧tö? Jo̧kwajabetjö̧ baikwö yötawaduwakwö chömöledö: Ö'wö bakibaduwakwa̧ möle ja'yubebi balewö loköbaduwobö kwujuluwaduwökötjö̧ma, ¿tajawedö ju'wi kwö̧ja̧duwi̧ jawa dakwö ja̧dakwajö jö̧ba̧lö kwomukwataduwobö chömöledö? ¿Dakwö ja̧dakwajö? kwomukwataduwoböma jwiobe chömöledö. Diosnöda kwo̧'wo̧ kwöwana̧laduwo, jo̧bada otiwanö te'ada̧lo̧ jö̧ba̧lö.

27Jau chömöledö, ¿tajawedö kamijido̧ jawa kwomukwataduwobö chömöledö? Mejetjö o̧bubiya edö kwomukwataduwo chömöledö, otiwa, ¿jö̧tö? Jejenö otiwi̧ma, 'diinö otidajabetjö ¿otiwobeji̧? Kamijido̧ otiwado̧ 'dö̧ajabetjö ¿otiwobeji̧? Otidokobe chömöledö, jo̧kwaijayonö otiwanö 'duawobedanö ichejekwa o̧bubiyama, ¿jö̧tö? Jau chömöledö, damötjö ji̧na la'aka luwo̧bina Salomónmine inesö otiwanö 'duawi̧tjö bajalekwönönö otiwanö 'duawobedanö ichejekwa ka̧putjö o̧bubiyama.

28Jau chömöledö, ja̧ o̧bubiyama, babe ji̧jayonö, itekwayi juwö lotjakwa̧. Ja̧danö, ja̧ juluwanö juwö lotjakwa̧ o̧bubiya Dios otiwanö ite'ada̧litjöma, ökwödönöbi ¿ite'ada̧lökenaji̧? Isabenö otiwanö ökwödönöbi pjabatö te'ada̧lo̧ chömöledö. Jau chömöledö, Diosma otiwanö pjabatö chite'ada̧lakwo̧sa jö̧ba̧lö yöbawö ujuninobe, jo̧kwaijayonö, ina dö̧ji̧ jawa ¿dakwö ja̧dakwajö? jö̧ba̧lö omukwatadöja chömöledö. Ja̧danö, jejenö omukwatö kwi̧sebaduwobe, ina Dios chite'ada̧lakwo̧sa jö̧ba̧lö yöawi̧ omukwatökönö kwö̧jaduwi̧ma.

29Diosma isabenö ökwödönö ite'ada̧lakwo̧ chömöledö, jo̧kwajabetjö̧ Diosda te'ada̧lö iyakwo̧ jö̧ba̧lö, kwukwaduwakwa̧bi, kwowaduwakwa̧bi kwisakwaduwoko, ja̧danö ja̧ jawa omukwatö kwo̧'wo̧ tjo̧kekwaduwoko chömöledö.

30Jau chömöledö, ¿tajawedö ja̧ jawa omukwatö kwo̧'wo̧ tjo̧kekwaduwobö? Kwabe'doma ¿ökwödönö wajwienaji̧, ja̧ jawa tjujuna̧lobö jo̧be jö̧ba̧löma? Böjȩ bakwameachibanö jojodöma ja̧ jawa isakwadö chömöledö, ja̧danö Kwabe'doduwima isabenö ökwödönö waiso̧, ju'wedö ja̧ jawa tjujuna̧lobö ji̧danö, chi̧tji̧mubi ja̧ jawa tjujuna̧lobö jo̧be, jö̧ba̧lö.

31Jo̧kwajabetjö̧ ja̧ jawa omukwatökönö kwö̧jaduwo chömöledö. Ja̧ jawa omukwatökönö jwaikwöda Dios la'aka luwo̧ ö̧jakwa̧ jawada isakwö kwö̧jaduwo. Ja̧danö chömöledö, jwaikwöda Dios la'aka luwo̧ ö̧jakwa̧ jawa isakwö kwö̧jaduwiökwe, Kwabe'doma isabenö ökwödönö ite'ada̧lakobe, kwakwawabi, owawabi, 'dukawaduwakwa̧bi jo̧bada ökwödönö te'ada̧lö iyakobe.

32Jejenö jo̧be, jo̧kwajabetjö̧ ökwödö cha̧jwi̧mu chite'ada̧lawö̧ o̧bȩja̧dödanöbedönö baikwö yöta̧la: Yekabiduwa, Kwabe'doduwi Diosma otiwanö ökwödönö iyobö ösödobetjö̧. Jau chömöledö, Kwabe'doduwima isabenö otiwanö ökwödönö iyobö ösödo̧, ja̧danö jejenö iyobö ösödobetjö̧ iteda la'aka luwo̧ ö̧jenabi ökwödönö iyakobe. Jo̧kwajabetjö̧, jwidena jö̧ba̧lö yekabiduwobö jwiobe yelösöda chömöledö, Diosma isabenö otiwanö ökwödönö te'ada̧lö iyakwo̧, jö̧ba̧lö.

33Isabenö mikwawi̧ma böjȩ jawadamaökö chömöledö, mölejȩ jawada. Jo̧kwajabetjö̧ kwujuna̧laduwi̧ iyö lobö, jwibadönö kwiyaduwo, jejenö ja̧bö mölejȩbetjö kwujuna̧laduwakwa̧ ko̧ko̧dö kwödaduwakobetjö̧. Jau chömöledö, böjȩtjö baladasa'woma damö jawa jwöbachö suli̧ jwöachobe, ¿jö̧tö? Ja̧danö, böjȩ jawa nöinö mikwawi̧ma suli̧ jwöachobe, ¿jö̧tö? Ja̧danö naukwabidö tjö̧naukwobe, ja̧danö pjȩlȩbö̧ma suli̧ tjöwaedobe, ¿jö̧tö? Jo̧kwajabetjö̧ mölejȩbetjöda nöinö mikwawi̧ ko̧ko̧dö kwödaduwobö kwisakwaduwo chömöledö, mölejȩbe jawa baladasa'woma, damö jawa babibö suli̧ waekwokobetjö̧, ja̧danö jobe nöinö mikwawi̧ jawama, suli̧ waekwokobetjö̧, ja̧danö naukwabidö tetjachokobetjö̧, ja̧danö pjȩlȩbö suli̧ tjöwaedokobetjö̧.

34Jau chömöledö, mölejȩbetjöda ko̧ko̧dö kwödaduwobö kwisakwaduwo. Baikwö yötawa: Nöinö mikwawi̧ jawa böjȩtjö juna̧ladöma, jwaikwöda böjȩ jawada omukwatadö, ja̧danö mölejȩbetjö nöinö mikwawi̧ jawa juna̧ladöma, jwaikwöda mölejȩbe jawada omukwatadö, ¿jö̧tö? Jo̧kwajabetjö̧ mölejȩbetjöda ko̧ko̧dö kwödaduwo nöinö mikwawi̧ jawama, jobe jawada omukwatö kwö̧jaduwakobetjö̧—

jö̧ba̧lö yöawinobe Jesúsma iteda öba̧ja̧di̧ waisachadönö.

—Yemidanö chichakwa̧ te'ada̧lö kwö̧jaduwo— jö̧ba̧lö Jesús yöawina wene

35-36Tupakwö yöawinobe Jesúsma:

—Yemidanö chichakwa̧ te'ada̧lö kwö̧jaduwo chömöledö. Baikwö wanedö yötawa: Bakwo̧ luwo̧ma tji̧lȩkwa̧munö emawa pjiesta junö i̧'yena, ja̧danö jejenö i̧'yitjö̧ma, ömöayedöma ȩwa̧jakwa̧ te'ada̧lö tjö̧jena, ¿jö̧tö? Tjuluwo̧ ȩwa̧jakwa̧ te'ada̧lö, otidadö 'dutjawado̧ kamijido̧ 'dubawajadö, ja̧danö dejewa'yu̧ nötedajadö tjite'ada̧lena, tjuluwo̧ ichibenama juluwanö apjude po̧bebö tetjatobö. 37Ja̧danö, tjuluwo̧ ichibena ina eda̧lö̧ tjite'ada̧litjö̧ma, isabenö tjo̧'wo̧ ösöwanö tjö̧jakwedö joba̧ ömöayedöma chömöledö. Isabenö yötawaduwakwö chömöledö, ina te'ada̧lö tjö̧jiökwe, tjuluwo̧ma jobadönö ösödö iteda otidadö 'dutjawado̧ kamijido̧ 'duawena, ja̧danö iteda ömöayedönö weena, mesasötenö ba̧nö jo̧bada ite'ada̧lonö tjukwobö. 38Yö̧te ja'öbi, dewachenabi ichibö ina te'ada̧lö eda̧ladönö öbadekwaitjö̧ma, isabenö tjo̧'wo̧ ösöwanö tjö̧jakwedö chömöledö, jo̧kwajabetjö̧ te'ada̧lö tjö̧jobö jo̧be, ichibakwa̧ hora wajwitjobetjö̧. Jobadö tjite'ada̧li̧danö ötjö chichakwa̧ kwite'ada̧laduwo chömöledö.

39Ja̧danö, biya̧ wene kwöwaisaduwobö jo̧be chömöledö, chichibakwa̧ wajwiköbaduwakobe, babe ichibakobe jö̧ba̧löma. Baikwö wanedö yötawa chömöledö: Eju luwo̧ma, naukwabo̧ ichibakwa̧ hora öwaisitjö̧ma, ja̧ hora te'ada̧lö ö̧jena, naukwabo̧ tebachö önaukwapji jö̧ba̧lö, ¿jö̧tö? 40Jau chömöledö, naukwabo̧ma jojodö wajwitjonö tebacho̧, ja̧danö ötjö chichakwa̧bi jojodö wajwitjonö chichakwo̧sa. Jo̧kwajabetjö̧ ba̧kwȩlö̧jatebö te'ada̧lö kwö̧jaduwo, ötjö jojo baibanö jeminökwe chichibakwa̧ma, ina ichökena jö̧ba̧lö kwomukwataduwonö badekwachakobetjö̧—

jö̧ba̧lö yöawinobe Jesúsma.

41Jejenö yöawiökwe, Pedroma Jesúsnö abebö a̧ja̧kwinobe:

—Ja̧ yökawaja̧ma, ¿didönö wanekwachobeda? Ökwödö kwöba̧ja̧di̧ waisachadödaena, okobe deinö a̧ja̧kwadödaena, ¿tinö yökawaja̧da te'ada̧lö dö̧jobö?—

jö̧ba̧lö. 42Abebö a̧ja̧kwökwe Jesúsma atadö wanedö yöawinobe:

—Chömöledö, la'aka luwo̧ ömöayo̧ otiwanö iteda uluwo̧ wei̧ ja̧bö ö̧ji̧danö kwö̧jaduwo. Baikwö wanedö yötawa: Bakwo̧ la'aka luwo̧ma, jelobe i̧'yakwa̧ abönö iteda ömöayedötjö bakwo̧nö weinobe, iteda eju jawa ite'ada̧lobö, ja̧danö ju'wedö uluwo̧ ömöayedönö te'ada̧lö, tju̧kwa kwakwawa tjukwo jö̧tja̧lena iyobö. 43Ja̧danö, la'aka luwo̧ ȩwa̧jenama, jo̧ba ömöayo̧ma weinadanö ja̧bö ö̧jitjö̧ma, isabenö o̧'wo̧ ösöwanö ö̧jakwo̧ jo̧ba ömöayo̧ma, ¿jö̧tö? 44Jau chömöledö, otiwanö wei̧danö ja̧bö ö̧jiökwe, la'aka luwo̧ma jo̧banö ujunena, okobe jwiinö ujuna̧li̧ itea te'ada̧lo̧ baibanö, ¿jö̧tö?

45Jo̧kwaijayonö, jo̧ba ömöayo̧ sulabo̧ ö̧jitjö̧ma, iteda uluwo̧ weaja̧danö ja̧bökönö, Aaa, chuluwo̧ma lekwe deakobe jö̧ba̧lö, ju'wedönö uluwo̧ ömöayedö ömadönöbi ya̧dönöbö kwakwaena, ja̧danö kwanöbi nöinö ukwena, ja̧danö owa̧löbi owa̧lena, 'dukwachökwe baibanö. 46Jo̧kwaijayonö, jo̧ba sulabo̧, Aaa, chuluwo̧ma ina ichökö, ina ichakwa̧ hora badekwachokobe, jö̧ba̧lö ina omukwatayi, juluwanö uluwo̧ ȩwa̧jena. Ja̧danö chömöledö, iteda uluwo̧ weinöködanö ja̧bo̧nö jejenö öbadekwajitjö̧ma, ömöayo̧nö labinö lȩebakobe chömöledö, ja̧danö jo̧banö ikwö loakobe, ju'wedö tjuluwo̧ wei̧danö ja̧böködökwö usula emawobö.

47Jau chömöledö, jo̧ba ömöayo̧ sulabo̧ma, uluwo̧ wei̧ öwaisinobe, uluwo̧ ȩwa̧jakwa̧ abönö otido jö̧a̧li̧ma. Jo̧kwaijayonö, uluwo̧ wei̧ öwaisijayonö, uluwo̧ wei̧danö ja̧inokobe, ja̧danö uluwo̧ ȩwa̧jakwa̧ jawa otidinokobe. Jo̧kwaiökwe, uluwo̧ma isabenö jo̧banö labinö kwakwaakobe chömöledö, öwaisijayonö öwaisi̧danö ja̧okobetjö̧. 48Jo̧kwaijayonö ömöayedötjö uluwo̧ wei̧ wajwibö uluwo̧ öpöjödi̧danö ja̧bo̧nöma labinö kwakwaökena uluwo̧ma. Wajwibö sulabenö ja̧obetjö̧, uluwo̧ma labinö kwakwaökena, ja'yubeda kwakwaena, wajwibö sulabenö ja̧ajabe jö̧ba̧lö—

yöawinobe Jesúsma.

Wanedö yöbawajo̧, Jesúsma labebö lobö yöawinobe baikwö:

—Chöba̧ja̧di̧ waisachadötjö nöinö chöba̧ja̧dawö̧ma, nöinö tjotidobö weakobe Diosma, bidöma isabenö otiwanö otikwa waisadö jö̧ba̧lö. Ja̧danö ju'wibi yötawaduwakwö, bidöma otiwanö tjotidakwedö jö̧ba̧lö nöinö tjotidobö Dios 'da̧batö ujunawö̧ma, ju'wedötjö bajalekwönönö nöinö tjotidobö jo̧be—

jö̧ba̧lö yöawinobe.

—Ötjöma jojodö böjȩtjö wene jwiinö tjö̧joböma ichinö̧kö̧sa— jö̧ba̧lö Jesús yöawina wene

49-50Tupakwö yöawinobe Jesúsma:

—Ötjöma böjȩtjö wene baibobö chichajabe. Wanedö yötawa: Ötjöma böjȩtjö ökwöla chönötedobö chichajabe, ja̧danö ida̧ökö ubitjö̧ma otiwo jö̧a̧lajena. Baikwö yötawa: Jejenö chönötedakwa̧ abönö, nöinö usula chemawobö ja̧kobe, ja̧danö usula chemawakwa̧ omukwatö, cho̧'wo̧ tjo̧ekwobe. Jejenö omukwatö, ida̧ökö ubitjö̧ma otiwo jö̧a̧lajena jö̧ba̧lö yöta̧lobe, ida̧ökö ubatjö̧ma, usula emawö chöbaledakwa̧ ida̧ökö chöbaledo jö̧ta̧lajena jö̧ba̧lö. Jau chömöledö, usula chemawakwa̧ chöbaledenanö kabatö nöinö cho̧'wo̧ tjo̧ekwakobe, juluwanö baledowe jö̧ba̧lö.

51Ötjöma böjȩtjö wene jwiinö tjö̧jobö ¿chichinaji̧? Isabenö böjȩtjö wene jwiinö tjö̧joböma ichinö̧kö̧sa chömöledö. Wene ichejebo̧sa. Ja̧danö ökwöla chönötedi̧danö isabenö wene baibobö chönötedakobe, ötjönö ösödadökwöbi öpöjödadökwöbi nöinö wene ja̧kobetjö̧. 52Jau chömöledö, bemi tupakwö, ba̧jekwadö tjejunö baikwö baledakobe: Bakwejunö ju̧kwadöbi 'da̧bachibö tjölakwabikwawakobe, ötjönö ösödadökwö öpöjödödadökwöma. Baikwö yötawa chömöledö: Bakwejunö ju̧kwadötjö du̧ju̧taja ötjönö tjösödonö, wa̧medukwa ötjönö tjöpöjödena, ja̧danö jelejunö wa̧medukwa ötjönö tjösödonö, du̧ju̧taja tjöpöjödena, ja̧danö ösödadökwö öpöjödadökwö ölakwabikwawö tjö̧jakobe. 53Isabenö yöne tjömöledökwöbi wainökwena tjö̧jakobe, abe'do ötjönö ösödonö, itji̧ ötjönö öpöjödakobe, ja̧danö jelo̧ itji̧ ösödonö, abe'do öpöjödakobe. Ja̧danö jojo'dö jösödonö jitjiju jöpöjödakobe, ja̧danö jeluju jitjiju jösödonö, jojo'do jöpöjödakobe. Ja̧danö jöja'u jösödonö, jo̧jo̧liju jöpöjödakobe, ja̧danö jeluju jo̧jo̧liju jösödonö jöja'u jöpöjödakobe. Jejenö isabenö wene baibakobe ötjönö ösödadökwöbi ötjönö öpöjödadökwöbi, jo̧kwajabetjö̧ ökwöla chönötedobö chichajabe jö̧ba̧lö yöta̧la—

jö̧ba̧lö yöawinobe Jesúsma.

—Babe baledi̧ edö, isabenö ötjönö kwöwaisaduwo jö̧ka̧laduwajabe— jö̧ba̧lö Jesús yöawina wene

54Ja̧danö, Jesúsma jojodö ko̧ko̧kwadönö yöawinobe baikwö:

—Ökwödöma mölejȩ edö waisadöja, ojwiyo o̧bakwa̧bi, tubakwa̧bi, ¿jö̧tö? Jau, ja̧wo̧ laebobekwö ojwiyo'wo kaekwobe kwedaduwenama, kwöwaisaduwobe, makö ojwiyo o̧bena jö̧ba̧lö, ja̧danö kwöwaisaduwi̧danö baledobe, ¿jö̧tö? 55Ja̧danö a̧li̧tjö jwa̧lȩ'epjo jwa̧lȩ'ewenama kwöwaisaduwobe, makö tubakobe jö̧ba̧lö, ja̧danö kwöwaisaduwi̧danö baledobe, ¿jö̧tö? Jau, ojwiyo'wo kaekwi̧bi, jwa̧lȩ'epjo jwa̧lȩ'ewi̧bi i̧sebobe baledakwa̧ma, ja̧danö ja̧ edö waisadöja ökwödöma, ¿jö̧tö?

56Ja̧danö, ojwiyo'wobi, jwa̧lȩ'epjobi i̧sebi̧danö, babe kwöba a'oduwitjö chi̧sebi̧ jawama öwaetjöda ötjönöbi i̧sebobe, edö ötjönö kwöwaisachibaduwobö. ¿Tajawedö ja̧ edö kwomukwataduwokobeda? ¡Ökwödöma isabenö dötölatajanö sulabenö omukwatadöja! Mölejȩ baledi̧bi böjȩnö baledi̧bi edö, ojwiyo o̧bakwa̧bi, tubakwa̧bi kwöwaisachibaduwi̧danö, kwöba a'oduwitjö chi̧sebi̧ jawa edö isabenö ötjönö kwöwaisachibaduwo jö̧ka̧laduwajabe—

jö̧ba̧lö yö̧awinobe Jesúsma.

—Kwömöledökwö wene kwujuna̧laduwi̧ ökwödöda otikwö loköbaduwo— jö̧ba̧lö Jesús yöawina wene

57Tupakwö yöawinobe Jesúsma:

Ja̧danö, kwömöledökwö wene kwujuna̧laduwenama, ¿tajawedö ökwödöda yöba̧lakwawö otikwö loköbaduwokobeda? ¿Tajawedö ökwödöda yöba̧lakwawökönö lȩekwa luwo̧ öba a'o kwi̧'yaduwobeda? 58Baikwö ja̧köbaduwo chömöledö: Bakwo̧ ökwönö öbibö lȩekwa luwo̧ öba a'otjö sulabenö ja̧köbaja̧ yöawotö jö̧ba̧lö öibitjö̧ma, lȩekwa luwo̧ öba a'o kwichibaduwakwa̧ abönö jo̧bakwö yöba̧lakwawö otikwö loköbaduwobö kwisakwaduwo. Jejenö yöba̧lakwawö otikwö loköbaduwobö kwöpöjödaduwitjö̧ma, lȩekwa luwo̧ öba a'o kwö̧jobö ujunena, ja̧danö lȩekwa luwo̧ma guardia jojo ökwönö do̧atobö weena, ja̧danö guardia jojoma ka̧lena kwö̧bobö ödena. 59Isabenö yötawaduwakwö, jejenö baibitjö̧ma, ökwönö balada kwimidobö wetjena, ja̧danö ka̧lena kwö̧bena, okobe jwiinö wetjaja̧ balada kwimidenanö kabatö—

jö̧ba̧lö yöawinobe Jesúsma jojodönö.

Currently Selected:

Lucas 12: WPC

Highlight

Copy