Juan 15

Jesús öba̧ja̧di̧ waisachadönö wanedö yöawina wene, Ötjökwö dötewinö ja̧duwi ubasa'ba opjiya dötewi̧danö, jö̧ba̧lö

1Jesúsma wanedö yöawinobe öba̧ja̧di̧ waisachadönö:

—Ötjöma uba sa'basa, inesö sa'ba. Ja̧danö, Chabe'doma uba batjo otido̧— yöawinobe—. 2Ja̧danö, Chabe'doma ötjötjö wa̧jökemima 'dölö lobo̧. Jo̧kwaijayonö wa̧jemima ochobiya otiwanö wa̧jobö, ja'öda 'wibebö lobö otido̧, jwiinö otiwanö wa̧jobö. Ja̧danö, 'wibebö lobö otidobetjö̧ ajayinö wa̧jemitjö o̧penönö otiwanö wa̧jakobe. 3Chömöledö ökwödöbi 'wibebö lobö otidajemi otiwanö wa̧jemi baibi̧danö ida̧ökö otiwanö babibinadöja. Ötjö chiwene a̧ja̧kwö kwo̧'wo̧ luwo̧duwinö ösödö do̧katinaduwobetjö̧ otiwanö babibinadöja, 'wibebö lobö otidajemi otiwanö wa̧jemi baibi̧danö—yöawinobe Jesúsma öba̧ja̧di̧ waisachadönöma—. 4Chömöledö, ubasa'ba opjiya dötewi̧danö ötjöma ökwödökwö dötewinö jo̧sa. Ja̧danö, wetaduwakwö. Ötjökwö dötewinö ja̧duwi. Ötjökwö dötewinö ja̧döma ubasa'ba otiwanö wa̧ja'ba wa̧ji̧danö otiwanö da̧peachö tji̧'yakwedö. Ja̧danö, ubasa'ba sopja wa̧jokopja, 'döbebö loawopjama ¿dakwö wa̧jobö? Wa̧jökö. Kököbachöda kököachopja. Jejenö kwi̧'yaduwobe ökwödöma, ötjökwö dötewinö. Ötjökwö dötewinö kwi̧'yaduwökötjö̧ma ¿dakwö da̧peachö kwi̧'yaduwobö? Ötjökwö dötewinö kwö̧jaduwobö jo̧be chömöledö. 5Ötjödasa ubasa'bama. Ökwödöma ubasa'ba opjiyabedöja, ötjökwö dötewinö ja̧nö. Ja̧danö, ötjöma ötjökwö dötewinö ja̧dökwö dötewinö jo̧sa. Jobadöma ubasa'ba otiwanö pokwö wa̧ji̧danö otiwanö da̧peachö tji̧'yakwedö. Ja̧danö, jobadöma otiwanö tjomukwatakwedö ötjökwö dötewinö tjö̧jobetjö̧. Jo̧kwaijayonö ötjökwö dötewinö jö̧ködöma otiwanö omukwatö tjö̧joböma jwibadö, ötjökwö dötewinö tjö̧jokobetjö̧. 6Ja̧danö, ötjökwö dötewinö jö̧ködöma ubasa'ba opjiya 'döbebö loawa opjiya kököachibi̧, emibö ökwölanö ubinö juwawakwa̧ opjiyadanö ja̧dö— yöawinobe Jesúsma öba̧ja̧di̧ waisachadönöma. 7Ina yöawinobe:

—Ötjökwö dötewinö ja̧duwi. Jejenö ötjökwö dötewinö ja̧nö, ötjö yötawi̧ kwo̧'wo̧ luwo̧duwinö omukwatö kwö̧jaduwitjö̧ma Chabe'donö akebaduwi̧ma okobe jwiinö a̧ja̧kwö pjabato̧. 8Ja̧danö, jojodöma ökwödö otiwanö da̧peachö, otiwanö omukwatö ja̧bö kwö̧jaduwobe edö, Bidöma Jesús öba̧ja̧di̧ waisachadö, jö̧ba̧lö, tjomukwatakobe. Ja̧danö, jobadöma ökwödö otiwanö kwö̧jaduwiawö̧ Diosnö tjösödakobe, Jwiinö otiwo̧, jö̧ba̧lö— yöawinobe Jesúsma öba̧ja̧di̧ waisachadönöma. 9Ina yöawinobe:

—Chömöledö, jwiinö ile nitebobe ökwödönö. Chabe'do ötjönö jwiinö ile niebi̧danö ökwödönö ile nibebo̧sa. Ja̧danö chömöledö, ötjökwö dötewinö ja̧nö, ötjö ile niteba'wo okwada ja̧duwi. 10Ötjöma Chabe'do wei̧da a̧ja̧kwö chö̧jobetjö̧ jo̧bakwö dötewinö ja̧nö ile nieba'wo okwada jo̧sa, jelobekwö 'yö̧könö. Ja̧danö ökwödöbi. Ötjö weti̧ a̧ja̧kwö kwö̧jaduwitjö̧ma ötjökwö dötewinö ja̧nö niteba'wo okwada kwö̧jaduwena— yöawinobe Jesúsma—. 11Ja̧ yötawaja̧ma, kwo̧'wo̧duwi̧ ötjö cho̧'wo̧ ösöwanö chö̧ji̧danö jwiinö ösöwanö kwö̧jaduwobö yötawaduwakwö, Ötjökwö dötewinö ja̧duwi, jö̧ba̧lö. 12Ja̧danö, ökwödönö wetaduwakwö. Ötjö ökwödönö ile nitebi̧danö kwömöledöduwinö ile nibekwö kwö̧jaduwo. 13Ja̧danö, bakwo̧ ömöledönö ile niebi̧ i̧sebi̧ma, ju'witjö o̧penönö ile niebi̧ i̧sebi̧ma biya̧: Bakwo̧, ömöledö tjö̧jibobö iyawö, jobadö tjö'wöchökönö itedada ö'wöcho̧. Jejenö iyawö bakwo̧ma ju'witjö o̧penönö jwiinö ile niebi̧ma i̧sebobe— Jesúsma yöawinobe öba̧ja̧di̧ waisachadönöma. 14Ina yöawinobe:

—Ja̧danö, ökwödöma ötjö weti̧ ja̧bö kwö̧jaduwitjö̧ma ökwödönö ötabiwö̧ja, Chömöledöja, jö̧ba̧lö. 15Belöma, Chömöayedö, jö̧ba̧löda ötabijatö ökwödönöma. Jo̧kwaijayonö babema jejenöma ötabököwö̧ja. Babema, chömöledö, jö̧ba̧löda, ötabiwö̧ja. Kwöwaisaduwa, bakwo̧ uluwo̧ omukwatö ja̧akwa̧ma wajwiobe. Jo̧kwaijayonö ökwödö ötjö chömöledököbaduwobetjö̧ ötjö omukwatö ja̧takwa̧ma kwöwaisaduwobe, ökwödönö yötawobetjö̧. Jau chömöledö, okobe jwiinö Chabe'do ötjönö yöawi̧ma ökwödönö yötawobe kwöwaisachibaduwobö— yöawinobe—. 16Ja̧danö, ötjöma omudawö chujunijatö ökwödönöma ötjö chömöledö bakibaduwanö. Ökwödömaökö. Ötjönö omudawö juninöködöja. Ötjödasa. Ja̧danö, ökwödönö 'da̧batö chujunijatö ötjö yötawi̧ jojodönö yöbawö kwi̧'yaduwobö. Wanedö yötawa: Jojodöma ba̧jekwadö, nöinö wa̧ji̧danö, ökwödö yökawaduwi̧ a̧ja̧kwö ötjönö tjösödakobe. Ja̧ wa̧ji̧ma kököbachibö woökönö ba̧kwȩlö̧jatebö 'wa̧jakobe— wanedö yöawinobe—. Chömöledö, jejenö jojodönö yöbawö 'ya̧nö, okobe jwiinö ötjö chiminö Chabe'donö akebaduwinö jo̧bama a̧ja̧kwö pjaatakwo̧. 17Ja̧danö chömöledö, yemidanö wetaduwakwö. Ökwödödada ile nikekwaduwo— yöawinobe Jesúsma öba̧ja̧di̧ waisachadönöma.

Jesús öba̧ja̧di̧ waisachadönö yöawina wene, Ba̧jekwadö ökwödönöbi tjöpöjödakobe, jö̧ba̧lö

18Jesúsma ina yöawinobe öba̧ja̧di̧ waisachadönö:

—Böjȩ jojodöma ba̧jekwadö yökawaduwi̧ a̧ja̧kwö tjöpöjödakobe ökwödönöma— yöawinobe—. Jejenö baibena kwomukwataduwo, Aaa, ba̧jekwadö Jesúsnöbi tjöpöjödinobe, jö̧ba̧lö. Ajayinö ötjönö tjöpöjödinobe. Ja̧danö, ökwödönöbi tjöpöjödakobe. 19Ökwödöma jojodö tjomukwati̧danö, böjȩ jawada omukwatö kwö̧jaduwitjö̧ma jojodöma ökwödönö tjösödena, Bidöma ökwödödanö omukwatadö, jö̧ba̧lö. Jo̧kwaijayonö ökwödöma böjȩ ja̧wada omukwatöködöja. Jejenö, böjȩ jawada kwomukwatiaduwiököwö̧ tjöpöjödakobe. Ja̧danö, ötjöma böjȩnö ju̧kwadötjö omudawö chujuninobe ökwödönöma, böjȩ jawa omukwatökönö kwo̧'wo̧ luwo̧duwi jawada omukwatadö bakibaduwinö ja̧bö. Jejenö ja̧nö kwomukwatiaduwiawö̧ yelösöda tjöpöjödakobe ökwödönöma—yöawinobe—.

20Kwomukwataduwo ötjö ökwödönö yötawaja̧ma, biya̧: Ömöayedöma tjuluwo̧nötjö o̧penönö mikwawöködö, ¿jö̧tö? Tjuluwo̧nö inia tjöjinö baledobö ji̧tjöma, ömöayedönöbi inia tjötjinö baledobö jo̧be, ¿jö̧tö? Jo̧kwaobetjö̧ yötawaduwakwö. Ötjö, kwuluwo̧duwinö inia tjötinö ja̧tji̧danö ökwödö, chömöayedönöbi inia tjököbaduwinö ja̧tjakobe. Ja̧danö, jojodötjö ju'wedö ötjö yötawi̧ a̧ja̧kwö do̧tjati̧danö, ju'wedöma ökwödö yökawaduwi̧ a̧ja̧kwö do̧tjatakwedö. 21Jau, ökwödöma ötjö chömöledököbaduwobetjö̧ ötjönö öpöjödadöma inia tjököbaduwinö ja̧tjakwedö ökwödönöma. Ja̧danö, jobadöma, ötjönö webinanö wajwitjobetjö̧ inia tjököbaduwinö ja̧tjakwedö— Jesúsma yöawinobe öba̧ja̧di̧ waisachadönöma. 22Ina yöawinobe:

—Jobadö sulabenö ja̧tji̧ma öwawinö i̧sebö yötawijatö, tjöwaisachibinö. Chichinökötjö̧ma tjöwaisachibokotjinena. Ja̧danö, chichinökötjö̧ma jojodönö lȩeboböma jwiena, sulabenö ja̧tji̧ chi̧sebokobetjö̧. Jo̧kwaijayonö sulabenö ja̧tji̧ i̧sebö yötawi̧ tja̧ja̧kwinobetjö̧ tjuju̧kwawoböma jwiobe. Bakwo̧, Ötjöma otiwanö ja̧bo̧sa, Dios lȩebakwa̧ baledökakwo̧sa, jö̧a̧loböma yelösöda jwiobe, jojodö sulabenö ja̧tji̧ i̧sebö yötawinobetjö̧— yöawinobe Jesúsma—. 23Ja̧danö, ötjönö öpöjödadöma ötjö Chabe'donöbi öpöjödadö. 24Ja̧danö, jojodökwö ja̧nö juluwi̧ jawa i̧sebiachijatö, jelo̧ la'akatjöda i̧sebajiökö jawama. Ja̧ chi̧sebi̧ edö, Ayö bitema Dios weinökwe, jö̧ba̧lö, tjösödobö ji̧jayonö tjöpöjödijatö ötjönöbi, Chabe'donöbi. Jo̧kwaobetjö̧, jobadönöma lȩebakwawö̧. 25Ja̧danö, jobadöma damötjö Dios wei̧ wȩyudadö tjiwȩyudinadanöbedö. Baikwö laebobe Dios iwenetjö:

Jojodöma, ötjönö tjöpöjödoböma jwiijayonö, tjöpöjödinobe, jö̧ba̧lö, tjiwȩyudinobe damötjöma. Ja̧danö ja̧ tjiwȩyudinadanö badekwachinö tjöpöjödobe ötjönöma,

jö̧ba̧lö laebobe Dios iwenetjö— yöawinobe Jesúsma, Dios wei̧ wȩyudadö tjiwȩyudinama. 26Jesúsma ina yöawinobe öba̧ja̧di̧ waisachadönö:

—Ötjöma Pjabato̧nö wetakwo̧sa, Dios O̧'wo̧ Luwo̧nöma, ökwö kwö̧jaduwobekwö —yöawinobe—. Jo̧bama jweinöda yöbawo̧. Baikwö ichö ötjönö yöawakobe ökwödönöma. 27Ja̧danö, ökwödöbi ötjönö yökawaduwakwedöja jojodönöma. Ötjökwö, ajayinö chotidina jamatö tupakwö kwö̧jaduwobetjö̧ ötjö jawa yökawaduwakwedöja.

Currently Selected:

Juan 15: WPC

Highlight

Copy