Génesis 45

José öpöedönö yöawina jawa, ötjöma kwö̧jawo̧duwi Josésa, jö̧ba̧lö

1Ja̧danö, Joséma Judá yöawi̧ a̧ja̧kwö jwiinö o̧'wo̧ tjo̧bekwibijetö ¡Chubudekwa! jö̧ba̧lö. Jo̧kwaobetjö webijetö okobe deinö ömöayedönöma ö̧jelöma latjebobö, öpöedöda tjö̧jibonö. Öpöedönö yöawotö jö̧ba̧lö, Ötjödasa kwö̧jawo̧duwi Joséma, jö̧ba̧lö, webijetö ömöayedönö latjebobö, iteda jo̧dawa'ye öpöedökwöda ö̧jobö. 2Ja̧danö, latjebaja̧ okobetjö labinö budekwijetö Joséma, Egypto jojodöma ba̧jekwadö tja̧ja̧kwinö. La'aka luwo̧ faraón ejunö ju̧kwadöbi José ubudekwi̧ yötjawi̧ma a̧ja̧kwijadötö. 3Ja̧danö, Joséma yöbawijetö öpöedönö:

—Ötjöma kwö̧ja̧wo̧duwi Josésa. Chabe'doma ina 'yaba̧lo̧ji̧?— jö̧a̧liawö̧ öpöedöma yetjaibobetjö̧ wi̧inö ju̧kwijadötö.

4Ikenama jwöbijetö jobadönö:

—Yö̧ne ichibaduwi chömöledö— jwöawö̧ yö̧öne 'ya̧wibijadötö. 'Ya̧wibajadönö yöbawijetö Joséma:

—Ötjöma ökwödö kwöjawo̧duwi Josésa. Ötjödasa Egiptobe 'ya̧nö baledajadönö mikwanö kwiyinaduwökwema. 5Chömöledö, ötjönö mikwanö kwiyinaduwa omukwatö kwo̧'wo tjo̧bekwaduwökönuwi. Ja̧danö, ökwödödada kwomajadeduwi okwanöma labiduwökönuwi, dakwö sulabenö ja̧dinajö, jö̧ba̧lö. Isabenö yötawaduwakwö: Diosda bai chichobö weinobe ötjönöma ökwödö kwabönöduwi ökwödönö pjatatobö, 'yaba̧lö kwuju̧kwaduwobö. 6Tjo̧wi̧ dötölataja a̧yo a̧wi̧chö̧lö̧ji̧ma baledinobe. Ja̧danö, ina bakwamu jawa a̧yo ja̧kobe. Tiböbi tiawökakobe, 'yeböbi 'yeawökakobe. 7Jo̧kwaobetjö̧, Diosma ötjönö baikwö weinobe kwabönöduwi kwö̧jibaduwinö pjatatobö. Jejenö ökwödötjö tupadanö jojodö tjö̧jakobetjö̧ weinobe Diosma ötjönöma. 8Jo̧kwaobetjö̧ chömöledö, Diosda weinobe bai chichoböma, ökwödö weköbinaduwama̧kö̧. Ja̧danö, Diosma faraón ipjea luwo̧ baibanö ujuninobe ötjönöma, faraónnö pjabatö yötawobö. Diosda weinobe ötjönöma faraón ömöayedö tjuluwo̧bi, Egypto jojodö tjuluwo̧bi baibanö chö̧jobö. 9Tjo̧wi̧, babema juluwanö da̧ja̧duwi chabe'do ö̧jobekwö. Jo̧banö yökawaduwo: Dabe'do, kwitji̧ Joséma ina ö̧jobe. Jo̧bama ökwönö baikwö yöawobe: Diosma ötjönö Egipto jojodö tjuluwo̧ baibanö ujuninobe. Jo̧kwaobetjö̧ lekwema jö̧kö̧nö juluwanö kwicho Egiptobe, ötjö chö̧jobekwö, jö̧ba̧lö a̧debobe kwitji̧ Joséma. Ja̧danö ju'wibi yöawobe kwitji̧ Joséma, baikwö: 10Chabe'do, bai Egiptonö kwö̧jakobe, Gosén mikwena, ötjö chö̧jelöma yö̧neawinö. Ökwöbi, kwi̧tji̧mubi, kwö'dö̧döbi, kwa̧jwi̧mu o̧bȩja̧döbi, pa̧ka̧yö̧bi jobe kwö̧jaduwakobe, okobe jwiinö kwiteaduwibi. 11Ina bakwamu jawa a̧yo a̧wi̧chö̧lö̧ji̧ma ja̧kobe. Jo̧kwaijayonö ökwödöma otiwanö, Gosénnö kwö̧jaduwakobe. Kwakwawama chiyakobe ökwönöbi, kwömöledönöbi, kwa̧jwi̧munöbi, juna̧lö kwuju̧kwaduwakobetjö̧. Chömöledö jejenö yötawi̧ma yökawaduwo dabe'donöma— jö̧ba̧lö webijetö Joséma ömöledönöma. Ina yöba̧lijetö:

12—Chömöledö, ökwödöma Benjamínbi ötjönö kwedaduwajabe, bite yöbawo̧ma dö̧jawo̧duwi Joséda, jö̧ba̧lö. 13Jo̧kwaobetjö̧ dabe'donöma yökawaduwo, kwitji̧ José, Egiptonö jo̧ma la'aka luwo̧, jö̧ba̧lö. Ja̧danö chömöledö, okobe jwiinö kwedaduwinö pjatatinabi yökawaduwo dabe'donö. Ja̧danö, juluwanö kwichejebaduwo dabe'donöma baikwö— webijetö Joséma ömöledönö.

14Ikenama Benjamínnö wo̧batö ibekasa'wonö du̧batö budekwijetö. Benjamínbi budekwijetö. 15Ikenama okobe deinö öpöedönö tjibekasa'wijunö du̧batö budekwijetö. O̧'wo̧ jwiinö ösöwanö budekwijetö Joséma, ömöledönö ösödö. Jejenö ösödiawö̧ öpöedöma bajaliyanö yebabökönö yöba̧lijadötö tjö̧ja̧wo̧ Josénöma.

Faraón José ömöledönö Egiptobe tjö̧jobö a̧debina jawa

16Ikenama faraónbi faraon ipjea luwabi ju'wedö yötjawi̧ a̧ja̧kwijadötö, José öpöedö tjichajabe, jö̧ba̧lö. Ja̧ yötjawi̧ a̧ja̧kwö ösödijadötö. 17Ja̧danö, faraónma jö̧ba̧lijetö Josénö:

—Baikwö weköbo kwömöledönö: Bu̧lu̧dönö kwakwawa wa̧nibö tjȩwa̧jo Canaán nijibe. 18Ikenama kwabe'doduwinöbi, tjömöledönöbi öbibö tjicho baikwö, Egiptobe, jö̧ba̧lö. Ja̧danö yökawodönö, bemi Egipto nijitjö jwiinö otiwemitjö̧ bajalekwönönö otiwemi chiyocha jobadönöma. Kwakwawabi otiwa jawatjö bajalekwönönö otiwi̧ jawa tjukwakobe. Jejenö yöka̧lodönö— jö̧ba̧lijetö faraónma Josénö. 19Ju'wibi jö̧ba̧lijetö Josénö:

—José kwöpöedönö weköbo bemi Egipto jawa kolukiya e'ewö tjȩwa̧jo, tji̧tji̧mubi tji̧lȩkwa̧mubi kolukanö a̧jö tjichakobetjö̧ kwabe'doduwikwö. 20Ja̧danö, tju̧kwa teama lobibö tjicho, omukwatökönö, Egipto niji jawa otiwa jawatjö bajalekwönönö jobadö tju̧kwa tea tjemakobetjö̧— faraónma webijetö Josénö, kwöpöedönö yökwawo, jö̧ba̧lö.

21Ikenama Israel i̧tji̧muma faraón weaja̧danö a̧ja̧kwijadötö. Joséma jobadönö iyijetö kolukiyabi, 'ya̧nö tjukwakwa̧bi. 22Bakwo̧nökwena kamijido̧ balekwa 'dötjawobö o̧diju iyijetö. Jo̧kwaijayonö Benjamínnö kamisibi balekwa̧ o̧diju bakwamu̧ jawa o̧diju iyijetö. Ja̧danö, trescientas plata jawa ö̧pi̧bi iyijetö Benjamínnö. 23Joséma abe'donö webijetö bu̧lu̧dö ömadönöbi domulataja luwanö Egipto batjo tjujuninatjö, otiwi̧ jawatjö tjoma'anö wa̧nö. Ja̧danö, ju'wedö bu̧lu̧dö ya̧dönöbi domulataja luwanö webijetö, trigo ochijubi, panbi tjoma'anö wa̧nö, abe'do Egiptobe ichö ukwakwa̧ma. 24Jejenö Joséma webijetö öpöedönö tjȩwa̧jobö. Ja̧danö, jobadönö jö̧ba̧lijetö:

—Ȩwa̧jöma ösödakwabikwawö yöba̧lakwawiabö kwȩwa̧jaduwo— jö̧ba̧lijetö.

Israel itji̧ Josénö yötjawi̧ a̧ja̧kwina jawa

25Ikenama José öpöedöma Egiptotjö labebö ȩwa̧jadöma ichibijadötö Canaánnö, tjabe'do ö̧jenaobe. 26Ichibajadö tjabe'donö yöbawijadötö:

—Dabe'do, kwitji̧ Joséma ina 'yaba̧lo̧. Isabenö okobe jwiinö Egiptonö ju̧kwadö tjuluwo̧ baibanö ö̧jobe— yöbawijadötö. Jejenö yötjawijayonö tjabe'doma wi̧ ja̧nö ja̧nö eda̧lijetö. Omajadenö omukwatijetö, Omöna yötja̧lena, jö̧ba̧lö. 27Jo̧kwaijayonö José yötjawobö weina yötjawi̧ma a̧ja̧kwö, ja̧danö, kolukiyabi edö, Jweinö yötja̧lena, jö̧ba̧lö, o̧'wo̧ ösöwachibijetö. 28Ikenama jö̧ba̧lijetö:

—Otiwa. Chitji̧ Joséma ina 'yaba̧lo̧. Jo̧banö edö chi̧'yocha wotakwa̧ abönö— jö̧ba̧lijetö Israelma.

Currently Selected:

Génesis 45: WPC

Highlight

Copy