Génesis 15

Isabenö Jo̧ Dios Abram omukwati̧ okwa yöawina jawa

1Jemi ikenama Isabenö Jo̧ Diosma Abramnö i̧sebijetö, i̧'wi̧didanö. Ja̧danö, Abramma Isabenö Jo̧ Dios yöawobe a̧ja̧kwijetö, baikwö yöawi̧ma:

—Abram yekabi. Ötjöma ökwönö tjöbeba̧lo̧sa, sulabe baledokobö. Ja̧danö Abram, ötjöma ökwönö jwiinö mikwawinö chiyakwo̧sa— yöbawijetö.

2Jejenö yöawökwe Abramma abebö a̧ja̧kwijetö:

—Chuluwo̧, Isabenö Jo̧ Dios ¿dakwö mikwawobö kwiyakwa̧ma? Wotaja̧ okobe ¿tinö emibobö wetakwa̧da chitji̧ detobema?— abebö a̧ja̧kwijetö—. Wotaja̧ okobema chömöayo̧ Damasco jojo, Eliezer mikwo̧ okobe jwiinö chiteaaja̧ma iteda u̧kwa tea baibakobe. 3Ja̧danö, chitji̧nö kwiyokobetjö̧ jo̧bada, chömöayo̧da, chejunö chöbötatinökweda okobe jwiinö chiteaaja̧ma ö̧jibakwo̧— jö̧ba̧lijetö Abramma Isabenö Jo̧ Diosnö.

4Jejenö jö̧a̧lökwe Isabenö Jo̧ Diosma Abramnö yöbawijetö:

—¡A̧ja̧kwitjö! Kwömöayo̧ma ökwö kwiteaaja̧ma ö̧jibökakwo̧. Ökwö kwitji̧da kwiteaaja̧ma ö̧jibakobe, ökwö kwitebiyatjö jo̧ma— yöbawijetö Isabenö Jo̧ Diosma.

5Ikenama Isabenö Jo̧ Diosma Abramnö apetube öbibö labebijetö. Labebajo̧ yöbawijetö Abramnö:

—Abram, mölejȩbekwö edi si̧li̧'i̧dönö. Ba̧jekwadö tjö̧lobe ¿jö̧tö? Ba̧jadidönö, kwöba̧jadenanö ji̧tjö̧ma. Abram yötawakwö. Si̧li̧'i̧dö tjöba̧jekwi̧danö ökwötjö tupadanö jojodöma tjöba̧jekwakwedö— yöbawijetö Isabenö Jo̧ Diosma Abramnöma.

6Ja̧danö, Abramma Dios yöawi̧ ösödijetö, Diosma jweinö yöbawo̧, jö̧ba̧lö. Jejenö ösödiökwe Diosma jo̧banö jö̧ba̧lijetö, Chedemi bitema suli̧ jwibo̧, jö̧ba̧lö.

Dios Abramnö iteda isabenö iwene yöbawö ujunina jawa

7Ikenama Isabenö Jo̧ Diosma yemidanö jö̧ba̧lijetö Abramnö:

—Abram, ötjöma Isabenö Jo̧ Diossa. Ötjödasa ökwönö webinama, caldeo jojodö tjitebo Ur mikwelö labebö jelobe kwi̧'yobö. Jao, ötjödasa jobetjö labebö kwitebo baibanö niji chiyakwemi jobekwö kwi̧'yobö. Abram bemida niji chiyakwemima— jö̧ba̧lijetö.

8Jejenö jö̧a̧lökwe:

—Chuluwo̧, Isabenö Jo̧ Dios ¿Dakwö kwi̧sebakwa̧da chöwaisobö yöka̧li̧danö chemakobe bemi nijima?— abebö a̧ja̧kwökwe:

9—Ichejebitjö pakayasujunöbi, chiwosujunöbi, obejaso̧nöbi tres a̧yo juna̧ladönö. Ja̧danö, du̧ju̧taja mö köba̧lö ju̧kwadönöbi bidö: tótula bakwo̧nö, ja̧danö, palomino bakwo̧nö, ina möayedönö ichejebitjö— webijetö Isabenö Jo̧ Diosma Abramnö. 10Jejenö weökwe Abramma ichejebijetö okobe deinö weinawö̧nö, Isabenö Jo̧ Diosnö iyobö. Ichejebawö̧tjö wa̧medukwanö, pakayasujunö, chiwosujunö, obejaso̧nö tjö̧kwöla 'wi'wibö lobijetö. Ja̧danö, 'wi'wiajawö̧nö 'da'dabö okobe jwiinö ö'wejenö 'da̧chawö bakwacho̧kwena wainö lödijetö nijinö. Jo̧kwaijayonö mö köba̧lö ju̧kwadönöma, tótula mikwo̧nö, palomino mikwo̧nö 'da̧chebijökötö.#15:10 Ja̧ mölema jejenö ja̧biatjinobe, isabenö yöta̧li̧danö ja̧tocha, jö̧ba̧lö i̧sebö 11Ja̧danö, bo̧lö̧nö, wobadönö tjukwotö jö̧ba̧lö ichadönöma a'dewa̧lijetö Abramma.

Dios Abramnö yöawina, Abramtjö tupadanö jojodö tjö̧jakwa̧ jawa

12Jemi ikenama, ja̧wo̧ meajena Abramma abibijetö, dö̧bachibajo̧danö jwiinö bötisinö abö. Abonö ¡ayö! o̧'wo luwo̧ okwanö isa'wo yȩa'wo isa'wodanö meobedanö meinobe, Abramnö jwiinö yebeabinö.

13Ikenama Isabenö Jo̧ Diosma yöba̧lijetö Abramnö bötisinö abemi o̧'wo luwo̧ okwanö:

—Abram, a̧ja̧kwitjö, ökwötjö tupadanö jojodönö yötawi̧, jobadö tjö̧jakwa̧ yötawi̧ma. Jweinö yötawa isabenö kwöwaisobö. Abram, ökwötjö tupadanö jojodöma ju'wedö tjitebonö tjöja̧kwedö. Ja̧danö, jobe jojodöma idöda wetji̧ labinö tjodidobö wetjakwedö ökwötjö tupadanö jojodönöma, usula tjemawinö. Jejenö tjuju̧kwakobe ökwötjö tupadanö jojodöma lekwe, cuatrocientos o̧biya jenanö. 14Jo̧kwaijayonö ötjöma kwömöledönö labinö weba̧ladönöma lȩtebakwo̧sa. Jobadönö lȩtebaja ikena kwömöledöma ka̧lenasijutjö ejachaibawö̧danö jobetjö latjebakwedö. Ja̧danö, tea jwiinö mikwawi̧kwö latjebakwedö— yöbawijetö Isabenö Jo̧ Diosma Abramnöma.

15Ina yöbawijetö Abramnö, bötisinö abemi okwanö:

—Ja̧danö, ökwöma ina lekwe o̧biya, kwo̧'wo ösöwanö kwö̧jakwo̧ja. Ja̧danö, jwiinö pöe kwö̧jena woköbakobe. Ja̧danö, woköbenama kwömöledöma ökwönöma tjödakobe. 16Ja̧danö, kwömöledöma ju'winö, lekwe o̧biya, cuatrocientos o̧biya jenanö baibajena yemidanö tjetjachajakobe baikwö, Canaán nijibe. Ja̧ mölema bemi Canaánnö ju̧kwadö amorita mikwadönö lȩtebakobe. Jobadö lekwe sulabenö ja̧bö tjuju̧kwakwedö. Ja̧danö, sulabenö ja̧tjemitjö o̧penönö sulabenö ja̧bö tjuju̧kwena ötjöma bajaliyanöma lȩtebakwawö̧. Ikenama, lȩtebaja̧ okobe kwömöledöma yemidanö tjetjachakobe baikwö— yöbawijetö Isabenö Jo̧ Diosma Abramnö.

Dios Abramtjö tupadanö jojodönö iteda iwene yöbawö ujunina jawa, tjitebo baibanö bemi niji chiyakwo̧sa, jö̧ba̧lö

17Ja̧danö, jawo̧ meajena jwiinö yȩatibajena, Abramma baikwö edijetö: Omönanö öwawobe uliyu ubajayubi, ja̧danö, öjiya ubi̧ öjiyabi edijetö. Ja̧yu uliyu ubajayu, ja̧ja öjiya ubi̧ öjiya Abram 'da̧chawö ödajawö̧ wobadö tjö̧ba̧jemi 'da̧denö 'ya̧nö baledobe edijetö. 18Jejenö baledena mölema Isabenö Jo̧ Diosma yöbawö junijetö iteda iwenema Abramnö, baikwö:

—Abram, biya̧ chiwene ökwönö yöbawö chujuna: Bemi nijima ökwötjö tupadanö jojodönö chiyakwo̧sa, tjitebo baibanö. Ja̧danö, okobe jwiinö niji Egipto ojwetjö Éufrates ojwe mikwödö, nöödö ichibanö chiyakwo̧sa ökwötjö tupadanö jojodönöma— yöbawö junijetö—. 19Ja̧danö, bemi niji ba̧jekwadö tjitebokwena, quenitas jojodöbi, quenizitas jojodöbi, cadmoneos jojodöbi. 20Ja̧danö hititas jojodöbi, ferezeos jojodöbi, refaítas jojodöbi tjitebokwena bemi nijima. 21Ja̧danö, amorreos jojodöbi, cananeos jojodöbi, gergeseos jojodöbi, jebuseos jojodöbi tjitebokwena bemi nijima. Jobadö okobe deinö tjitebokwenama ökwötjö tupadanö jojodö tjitebo baibanö 'da̧yawö chiyakwo̧sa Abram— jejenö iteda iwene yöbawö junijetö Isabenö Jo̧ Diosma Abramnö, abo̧nö.

Currently Selected:

Génesis 15: WPC

Highlight

Copy