Génesis 13

Abram Lot wainökwena tjuju̧kwina jawa

1-2Ja̧danö, Abramma Egiptonö ö̧jonö balada luwo̧ babibijetö. Pa̧ka̧yö̧nö ba̧jekwadö yebebö, ja̧danö platabi, orobi nöinö juna̧lö balada luwo̧bijetö. Ja̧danö Egiptotjö tja'dewajökwe ȩwa̧jijetö Abramma, Neguev nijibe. Ilekwokwö, okobe jwiinö u̧kwa teakwö ȩwa̧jijetö. Lotbi ȩwa̧jijetö jobadökwö. 3Ikenama Neguevbetjö labebö ja'ö abiabö ȩwa̧jijadötö Betel nijibe. Ichibö 'yi̧jadötö Betel niji Ai niji 'da̧denö, ajayi isa̧do̧tjö o̧dodanö debatö otidö tjuju̧kwinobekwö. 4Jobema Abram ajayinö Isabenö Jo̧ Diosnö juwö iyawemi ji̧jetö. Jelö Abramma Isabenö Jo̧ Diosnö juwö iyö ösödijetö.

5Ja̧danö, Lot, Abramkwö 'yi̧nama, jo̧babi yebebijetö pa̧ka̧yö̧nö, o̧bȩja̧dönö. Ju'wedö, Lot ömöledöbi, ömöayedöbi Lotkwö ju̧kwijadötö. 6Ja̧danö Abram a̧jwi̧mu, Lot a̧jwi̧mu ba̧jekwadötjobetjö̧ okobe deinö tjukwa'ye meje'ye, tjowobu ojwiyo jwiijetö. Jwiiawö̧ bakwena tjuju̧kwoböma jwiijetö. 7Ja̧danö, Abram a̧jwi̧munö te'ada̧ladökwö Lot a̧jwi̧munö te'ada̧ladökwö wene juna̧lakwawijadötö. Ja̧ mölema ju'wedöbi jobema ju̧kwijadötö, cananeo jojodöbi ferezeo jojodöbi. 8Ikenama Abram a̧jwi̧munö te'ada̧ladökwö Lot a̧jwi̧munö te'ada̧ladökwö wene tjujuna̧liökwe jö̧ba̧lijetö Abramma Lotnö:

—Chitji̧ a̧ja̧kwitjö. Ökwödöma dömöledö. Jo̧kwaobetjö̧ wene jwiinö dö̧jo, Ja̧danö cha̧jwi̧munö te'ada̧ladökwöbi ökwö kwa̧jwi̧munö te'ada̧ladökwöbi wene jwiinö dö̧jobö jo̧be. 9Edi yaima, okobe jwiinö niji jo̧be, jalobe. Jo̧kwaobetjö̧ belöma 'da̧bachibö jelobekwö kwi̧'yitjö̧ma otiwena, wainökwena dö̧jobö. Chitji̧, baikwö yöta̧la: Ökwöma a̧li̧kwö kwi̧'yitjö̧ma ötjöma u'dakwö chi̧'yena. Ja̧danö, u'dakwö kwi̧'yitjö̧ma ötjöma a̧li̧kwö chi̧'yena— jö̧ba̧lijetö Abramma Lotnöma.

10Jejenö jö̧a̧liökwe Lotma Jordán ojwe ö'öbö niji ba̧ba̧lawemi eda̧lijetö. Edemi jwiinö otiwanö tiyuwijetö jemi nijima, Sóar niji ichibanö. Otiwanö tiyuwijetö, Edén batjo nijidanö, ja̧danö, Egipto nijidanö. Ja̧ mölema Sodoma niji Gomorra niji Isabenö Jo̧ Dios ina lȩebokobetjö̧ jemima jwiinö otiwijetö.

11Ja̧danö, Lotma niji edemi otiwiökwe emijetö okobe jwiinö Jordán ojwe ö'öbö nijima. Ja̧danö, Lotma Abramkwö, Abram ömöledökwö, ömöayedökwö, a̧jwi̧mukwö bakobe tjö̧jajelöma labebö 'yi̧jetö ja̧wo̧ ichobekwö iteda ömöledökwö, ömöayedökwö, a̧jwi̧mukwö, wainö ö̧jobö. Jejenö Abram, Lot, idödada tjömöledökwö, tjömöayedökwö, tja̧jwi̧mukwö wainökwena ju̧kwijadötö. 12Abramma Canaánnöda ji̧bijetö. Lotma niji ba̧ba̧lobe comunidadeskwö 'yi̧jetö jobe ö̧jobö, Sodoma comunidad yö̧neawinö. 13Ja̧danö, jemima jwiinö otiwijayonö Sodoma comunidadnö ju̧kwadöma jwiinö sulabeda omukwatö ju̧kwijadötö, Isabenö Jo̧ Dios jwiinö öpöjödi̧ jawa ja̧bö.

Isabenö Jo̧ Dios Abramnö iteda iwene yöbawö ujunina jawa

14Ja̧danö, Lot i̧'ya̧jabe okobetjö Isabenö Jo̧ Diosma jö̧ba̧lijetö Abramnöma:

—Abram, otiwanö eda̧li, ja̧wo̧ laebobekwöbi, ja̧wo̧ meajobekwöbi, ja̧wo̧tjö u'dakwöbi, ja̧wo̧tjö a̧li̧kwöbi— jö̧ba̧lijetö—. 15Okobe jwiinö öwawemi nijima ökwönö, ökwötjö tupadanö jojodönö chiyocha, ba̧kwȩlö̧jatebö jobe kwuju̧kwaduwobö. 16Ja̧danö Abram, ökwötjö tupadanö jojodö tjöba̧jekwachinö pjatatakwo̧sa. Yelösöda, niji so̧pja̧danö tjöba̧jekwachakwedö, ökwötjö tupadanö jojodöma. Niji so̧pja̧ma ¿ti öba̧ja̧dobeda? Deobe. Jejenö ökwötjö tupadanö jojodöma. Ba̧jadöbi tjöba̧jadobö jwiakobe ba̧jekwadötjobetjö̧. 17Abram, a̧laibö kwi̧'yo bemi niji tupakwö jalobekwö ökwönö chiyakwemi edinö— jö̧ba̧lö webijetö Isabenö Jo̧ Diosma.

18Jejenö weiökwe Abramma isa̧do̧tjö otidinejuma ejatibö e'ewö 'yi̧jetö. 'Ya̧jo̧ Hebrón comunidad ö'öbönö ju̧kwijetö, towibiya owiawi ju̧kwena. Jobema jelo̧ itebo, Mamre mikwina. Abramma jobetjö otidijetö juwö iyawemi, Isabenö Jo̧ Diosnö ösödobö.

Currently Selected:

Génesis 13: WPC

Highlight

Copy