Daniel 11

1Jau Daniel, ötjöma Dios weökwe ángelso̧ Miguelnö pjabatö jo̧sa. Medo jojodötjö inesö la'aka luwo̧ Darío mikwo̧ luwo̧ baibina o̧bama, ötjöma ajayinö Miguelnö pjatatijatö, ja̧danö ja̧ o̧batjö baikwö bajalenö Miguelnö pjabatö jo̧sa, ökwödö israel jojodönö tjöbeba̧lö pjabatö.

La'aka luwedö kwakwabakwawö ja̧tja̧kwa̧ ángel Danielnö yöawina wene

2Tupakwö yöawinobe ángelma Danielnö:

—Baikwö yötawakwö, isabenö baledakwa̧ wenema. Babe luwedö Persia jojodötjö, babe möle luwo̧ Ciro mikwo̧ woaja̧ ikena ina wa̧medukwa bakwo̧nökwena yöbawö wetjakobe. Ikenama, jobadö ikena, ö'wejemubo̧ baibanö jelo̧ la'aka luwo̧ yöbawö weakobe, Persia jojo, jo̧batjö ajayinö ji̧nadötjö bajalekwönönö nöinö balada juna̧lo̧ma. Jo̧bama nöinö balada ujuna̧li̧tjö̧, jwiinö juluwo̧ baibakobe, ja̧danö juluwo̧ babibajo̧, okobe deinö ömöayedö tjitebokwena jojodökwö, Grecia niji la'aka luwo̧nö ujuluwobö isakwakobe, jo̧kwaijayonö waekwakobe.

3Jemi ikenama Grecia nijitjö bakwo̧ la'aka luwo̧ma öbamatakobe, jwiinö juluwo̧ma, ja̧danö jo̧bama böjȩ bakwameachibanö ba̧jekwadönö yöbawö weakobe, ja̧danö iteda ösödi̧danö ja̧akobe. 4Jo̧kwaijayonö, jwiinö juluwo̧ ö̧jenama, ö'wö baibakobe, ja̧danö jo̧ba yöbawö ö̧jaja̧ma, 'da̧'yö tjujunakobe, ö'wejemubedö tjitebokwena yöbawö wetjobö, ja̧wo̧ meajobekwö bakwo̧, jakwölakwö bakwo̧, jawo̧ laebobekwö bakwo̧, jakwölakwö bakwo̧. Ja̧danö jobadö ikena yöbawö wetjakwedöma, jo̧ba i̧tji̧muböködö, ja̧danö jo̧ba ujuluwaja̧danöma tjujuluwökakwedö, sule yöbawö weinemi ja'öda wetjobetjö̧.

5Ja̧danö jobadönö baledakwa̧ baikwö yötawa: jakwölakwö a̧li̧kwötebö Egipto la'aka luwo̧ma juluwo̧ ö̧jakobe, jo̧kwaijayonö jo̧ba ömöayedötjö bakwo̧ guardia la'aka luwo̧ma, iteda uluwo̧tjö bajalekwönönö juluwo̧ baibakobe, ja̧danö uluwo̧bajo̧nö ujuluwakobe, ja̧danö isabenö jalobe yöbawö weakobe guardia la'aka luwo̧ma, ajayinö uluwo̧bajo̧tjö bajalekwönönö jalobe yöbawö weakobe.

6Jemi ikenama, ja'yubenö lekwe o̧biya baledaja̧ ikena, Egipto niji la'aka luwo̧ma Siria niji la'aka luwo̧kwö bakobe omukwatö yöbawö tjujunakobe, bakobe omukwatö bakwo̧nökwena pjabatakwawö dö̧jakwedösa jö̧ba̧lö. Ja̧danö, jejenö pjabatakwawö tjö̧ja̧kwa̧ yöbawö tjujunenama, Egipto la'aka luwo̧ itjijuma Siria la'aka luwo̧nö jemakobe, bitenö chemitjö̧ma chabe'dobi chilekwebi bakobe otiwanö pjabatakwawö tjö̧jakwedö jö̧ba̧lö. Jo̧kwaijayonö, waekwakobe, ja̧'yubenö lekwajabetjö jobujunöbi, jilekwe Siria la'aka luwo̧nöbi, jitji̧nöbi, jö̧möayedönöbi ju'wedö kwabö lotjobö wetjachakobe, ja̧danö bakobe pjabatakwawö tjö̧jo̧ jö̧tja̧linama waekwakobe.

7Ja̧danö yöne jömöledötjö bakwo̧ Egipto niji la'aka luwo̧ baibakobe, abe'do ö̧binemima. Ja̧danö, ömöayedökwö Siria nijibe kwakwabakwawö i̧'yakobe. Jobe 'ya̧jo̧, Siria jojodönö ujuluwakobe, ja̧danö Siria niji inesö comunidad, 'diinö tjöbebö tjotidina comunidad tebachö ujuluwakobe. 8Ja̧danö, jejenö juluwajo̧, nöinö tjitea emö ȩwa̧jakobe itebo Egiptobe, 'dii jawatjö otikwedö o̧'wo̧ jawa tjösödawö̧bi, nöinö mikwawi̧ dȩja̧pi̧ya orotjöbi platatjöbi otikwaö̧pi̧yabi. Jemi ikenama ja'yubenö lekwe Siria jojodökwö ölakwabikwawoböma isakwökakobe.

9Jemi ikenama, ja'yubenö lekwajabetjö, Siria la'aka luwo̧ma ömöayedökwö Egipto nijibe i̧'yakobe ölakwabikwawobö, jo̧kwaijayonö juluwanö tjitebobe tjȩwa̧jakobe.

10Jemi ikenama Siria la'aka luwo̧ i̧tji̧muma, Egipto luwo̧kwö tjölakwabikwawakobe. Jobadöma yelösöda ba̧jekwadö guardia jojodönö ko̧ko̧dö Egipto nijikwö tji̧'yakobe, ja̧danö yelösöda ba̧jekwadö Israel niji tjöbaledakobe, wanedö yötawa, ojwe okwatö okobe jwiinö okwati̧danö, okobe jwiinö Israel niji bakwameachibanö tjö̧jakobe. Ja̧danö ölakwabikwawö ichö, Egipto luwo̧ 'diinö tjöbebö otidina comunidad tjichibakobe, jo̧banö tjujuluwotö jö̧ba̧lö.

11Jejenö tjichibiökwe, Egipto la'aka luwo̧ma jwiinö dameakwö ölabikobe, ja̧danö ömöayedö guardia jojodökwö laebakobe, Siria la'aka luwo̧ ömöayedökwö ölakwabikwawobö. Ja̧danö, Siria la'aka luwo̧ yelösöda ba̧jekwadökwö ichö ölakwabikwawijayonö, Egipto la'aka luwo̧ma jobadönö ujuluwakobe.

12Jejenö yelösöda ba̧jekwadönö ujuluwobetjö̧, Egipto la'aka luwo̧ma, Aaa, isabenö juluwo̧sa, yelösöda ba̧jekwadönö kwabö lotajabe jö̧ba̧lö omukwatakobe. Jo̧kwaijayonö, jemi tupakwö ujuluwökakobe Egipto la'aka luwo̧ma. 13Jemi ikenama Siria la'aka luwo̧ma yemidanö ömöayedö guardia jojodönö oko̧ko̧dakobe, ajayinö ö̧ko̧ko̧dinatjö̧ bajalekwönönö yelösöda ba̧jekwadönö o̧ko̧ko̧dakobe. Ja̧danö ja'yubenö lekwajabetjö yemidanö Egipto nijikwö ölakwabikwawobö i̧'yakobe, yelösöda ba̧jekwadö guardia jojodökwöbi, yelösöda nöinö itea kwakwaakwawa jawakwöbi.

14Ja̧danö ja̧ möle jenanö, Egipto nijitjö ba̧jekwadö la'aka tjuluwo̧ wei̧ öpöjödö ölakwabikwawö tjö̧jakobe, ujulutjö latjebotö jö̧ba̧lö. Ja̧danö Daniel, ökwö kwömöledö Israel jojodötjöbi, ju'wedö kwakwaakwawa ösödadöbi Egipto la'aka luwo̧ ujulutjö latjebotö jö̧ba̧lö ölakwabikwawö kwakwatjakwawakobe. Bakwo̧ i̧'wi̧dinö edakobe, Egipto la'aka luwo̧ ujulutjö latjebakwa̧ma, ja̧danö ja̧ badekwachinö ja̧tjotö jö̧ba̧lö, kwakwatjakwawakobe, jo̧kwaijayonö waekwakobe, ujulutjö tö̧jibökakobe.

15Jemi ikenama Siria la'aka luwo̧ma ichö, comunidad otiwanö 'diinö tjöbebö tjotidina comunidad tjösawö ichakobe ömöayedökwö, ja̧danö tjöekwemi 'dii jawa 'dobö loawaö̧kiya otidakobe, tjöekwemi 'dobö comunidad ujuluwobö. Ja̧danö ujuluwakobe Siria la'aka luwo̧ma, Egipto kwakwaakwawa jojodöma tjujulu jwitjakwedö, 'diinö ja̧nö kwakwatjakwawobö, jobadötjö juluwadöbi tjujulu jwitjakwedö. 16Ja̧danö ujuluwobö ichajo̧ Siria la'aka luwo̧ma ujuluwakobe, ja̧danö okobe jwiinö ösödi̧danö ja̧akobe, ja̧danö bakwo̧bi jo̧ba öba a'o 'diinö ö̧jobö jwiakobe. Ja̧danö, jo̧bama inesö otiwobe Israel niji okobe jwiinö ujuluwakobe, ja̧danö nöinö söbebö loakobe.

17Ikenama omukwatö ujunakobe Siria la'aka luwo̧ma, okobe deinö ömöayedö guardia jojodökwö a̧li̧kwö 'ya̧nö a̧dekwanö Egipto nijibe ichibobö. Jo̧kwaijayonö, jobe ichibö, Egipto la'aka luwo̧kwö ölakwabikwawö katjatakwa̧ yöbawö tjujunakobe, tjowita jö̧ba̧lö. Ja̧danö, Siria la'aka luwo̧ma itjijunö Egipto la'aka luwo̧ ilekwo bajibanö iyakobe, isabenö wene jwibadösa, yöne dömöledö babibadösa jö̧ba̧lö. Jo̧kwaijayonö jejenö yöba̧lö itjijunö iyijayonö, Siria la'aka luwo̧ isabenö isakwi̧ma itjijunötjö Egipto la'aka luwo̧nö ujuluwobö. Jo̧kwaijayonö omukwati̧ma waekwakobe, itjijuma jabe'donö pjajatökakobe jilekwenö ujuluwobö.

18Jemi ikenama, jwaibalawa ö'öbö niji ujuluwobö isakwakobe, ja̧danö jobetjö ju'wi comunidadkwenada ujuluwakobe. Ja̧danö, bajalianö öpöjojodötjö bakwo̧ guardia luwo̧ma jo̧banö ujuluwakobe, ja̧danö Siria luwo̧ juluwo̧sa̧ jö̧ba̧lö omukwati̧ kaatibobö ja̧akobe. Siria la'aka luwo̧ma, ajayinö jo̧banö ujuluwakwo̧nö omukwatinobe, mikwawö̧kö̧, ötjödanö juluwö̧kö̧ jö̧ba̧lö. Jo̧kwaijayonö jejenö omukwati̧ kaatibobö ja̧akobe öpöjojoma, ja̧danö balekwa mikwa Siria luwo̧ ujulu jwii̧ wene öwawatö i̧sebakobe, mikwawö̧kö̧ja, ötjödanö juluwö̧kö̧ja jö̧ba̧lö.

19Jemi ikenama Siria la'aka luwo̧ma itebobe ȩwa̧jakobe, chitebo comunidad otiwanö tjöbebö dotidina comunidadnö otiwanö chö̧jakobe jö̧ba̧lö. Jo̧kwaijayonö ja̧bi waekwakobe, jo̧banö tjujuluwakobe, ja̧danö kwabö lotjakobe.

20Jemi ikenama, jo̧ba ö̧binemi jelo̧ yöbawö weakobe, ja̧danö jo̧bama ömöayedötjö bakwo̧ balada te'ada̧lö ko̧ko̧do̧nö weakobe, Jerusalénbe 'ya̧nö, Jerusalén ju̧kwadö tjitea balada emobö. Jejenö weakobe, yöbawö wȩi̧ma, nöinö balada ujuna̧lakobetjö̧. Jo̧kwaijayonö lekwema yöbawö weökakobe, ö'wö baibakobe. Ja̧danö, ö'wö baibakwa̧ma, öpöjojodö kwakwabakwawö tjujuluwökwema ö'wö baibökakobe, ja̧danö waapji jojodö tjöba a'o kwabö lotjökakobe jo̧banö, jojodö wajwitjonö ö'wö baibakobe.

21Ja̧danö jo̧ba ö̧binemi jelo̧ jwiinö sulabo̧ la'aka luwo̧ baibakobe, la'aka luwo̧ ömöledöso̧bö̧kö̧. Jo̧bama waapjima luwo̧ baibobö ichibökakobe, jojodö tjo̧'wo̧ söba̧lö tjö̧jonö, jojodö tjösödachibanö yöba̧lö ichibakobe, ja̧danö jejenö la'aka luwo̧ baibakobe. 22Ja̧danö jo̧ba kwakwabakwawö i̧'yenama, öpöjojodö tjömöayedö guardia jojodönö söbebö loakobe, ojwe okwatö okobe jwiinö jwodachibobedanö söbebö loakobe. Ja̧danö inesö Diostjö jojodötjö ö'weje pjabato̧nöbi kwabö loakobe.

23Ja̧danö ju'wedö luwedökwö bakobe pjabatakwawö tjö̧ja̧kwa̧ yöbawö ujunakobe jo̧ba Siria la'aka luwo̧ma, jo̧kwaijayonö omöna yöa̧lakobe, waapjima ichö ujuluwökakobe, kwömöledöso̧sa̧ jö̧ba̧lö, omöna yöba̧lö suli̧ öwaedakobe. Ja̧danö ömöledö tjöba̧jekwachököjayonö, jwiinö juluwo̧ baibakobe.

24Waapjima ujulowobö ichökakobe jo̧ba Siria luwo̧ma, jojodö tjo̧'wo̧ söba̧lö wene jwia jö̧ba̧lö omukwatö tjö̧jena, juluwanö nöinö juna̧ladö comunidad jojodönö ichö ujuluwakobe ömöayedö guardia jojodökwö, ja̧danö juluwajo̧ nöinö tjujunala̧ja̧ 'döbebö, ömöledönö iyabikobe. Jo̧batjö ajayinö ji̧nadö jo̧ba iyi̧danö tjömöledönö 'dötjebaja̧ tjiyabobö waekwinajayonö, jo̧bama ba̧jekwadö nöinö juna̧ladönö ujuluwakobe, ja̧danö iteda ömöledönö tjiteaja̧ma iyabikobe. Jo̧bama 'diinö tjöbebö tjotidina comunidad ujuluwobö isakwakobe, jo̧kwaijayonö lekwemaökö.

25Ja̧danö Egipto niji ujuluwobö omukwatö ujunakobe omajadenö, ja̧danö ba̧jekwadö ömöayedö guardia jojodönö ko̧ko̧dajo̧, Egiptobe ölakwabikwawö i̧'yakobe. Jejenö ichiökwe, Egipto la'aka luwo̧ma yelösöda ba̧jekwadö ömöayedö guardia jojodökwö jo̧bakwö ölakwabikwawö ö̧jakobe. Jo̧kwaijayonö, Egipto luwo̧ ba̧jekwadö ömöayedökwö ölakwabikwawijayonö, waekwakobe, ömöayedötjö ju'wedö iyö lotjobö tjisakwakobe, ja̧danö 'diinö ja̧nö Siria luwo̧nö ölakwabikwawobö omukwati̧ma waekwakobe. 26Jo̧ba yö̧nȩ ömöayedötjö bakobe jo̧bakwö kwadöma iyö lotjakobe, ja̧danö öpöjojo Siria luwo̧ma ömöayedö guardia jojodönö söbebö loakobe, ja̧danö jobadönö ba̧jekwadönö kwabö loakobe.

27Ja̧danö, ölakwabikwawajadö, jobadö du̧ju̧taja la'aka luwedöma mesasöte bakwötenö tjöbamatakobe, ölakwabikwawö dö̧ji̧ kadatobö jö̧ba̧ladösa jö̧ba̧lö. Jo̧kwaijayonö, jejenö wamenö tji̧sebijayonö, bakwo̧nökwena jelo̧nö suli̧ waedö tjujuluwotö jö̧ba̧lö omöna yötja̧lakobe. Jo̧kwaijayonö, Diosma jobadötjö bakwo̧ inesö la'aka luwo̧ baibobö badedö ujuninokobetjö̧, tjomukwati̧ma waekwakobe, Diosda tjö̧ji jawa webo̧obetjö̧.

28Ja̧danö, nöinö itea emajo̧, Siria la'aka luwo̧ma itebobe ȩwa̧jakobe. Ja̧danö, ȩwa̧jena, Israel nijibenö ȩwa̧jakobe. Jejenö Israel niji baledö ȩwa̧jonö, jwiinö öpöjödakobe, Israel jojodö Diosnö tjösödi̧ma, ja̧danö jobadö Diosnö ösödadönö sulabenö ja̧akobe, ja̧danö sulabenö ja̧bajo̧, ȩwa̧jakobe.

29Ja̧danö Dios badedö ujunina möle badekwachenama, yemidanö Egipto nijibe ujuluwotö jö̧ba̧lö i̧'yakobe Siria la'aka luwo̧ma. Jo̧kwaijayonö yemidanö i̧'yenama, ajayinö ujuluwinadanöma baledökakobe, 30Quitim nijitjö Egipto jojodönö pjabatadö tjisowinö tjichakobetjö̧. Ja̧danö, pjabatö ichajadönö edö, yeaibakobe, ja̧danö ȩwa̧jakobe.

Ja̧danö ȩwa̧jö, jwiinö ölabikobe Diosnö ösödadönö, ja̧danö Diosnö ösödakwawa söbebö lootö jö̧ba̧lö ja̧akobe, ja̧danö Israel jojodötjö Diosnö kabatibadönö pjaatakobe. 31Jo̧ba ömöayedö guardia jojodöma Dios eju sulamachibanö ja̧tjakobe. Möletenia Diosnö iyawa katjatibobö weakobe, ja̧danö ju'wibi jwiinö suli̧ jawa Dios ejunö tjujunakobe, Dios ejuma sulabeju baibanö.

32Israel jojodötjö Diosnö ösödakwawa kabatibadönö tjösödachibanö omöna yöa̧lakobe, ja̧danö jo̧banö tjösödakobe, ömöayedö batjibanö. Jo̧kwaijayonö isabenö tjuluwo̧ Diosnö waisadöma jo̧banö tjöpöjödakobe, ja̧danö 'diinö ja̧nö ölakwabikwawö tjö̧jakobe. 33Israel jojodötjö isabenö waisadöma ju'wedönö otiwanö tjöba̧ja̧dakobe. Ja̧danö jobadö Diosnö ösödadötjö ba̧jekwadö debö tji̧'yakobe, jobadötjö ba̧jekwadönö kwabö loakobe Siria luwo̧ma. Jobadötjö ju'wedönö kwölöte'onö kwabö loakobe Siria luwo̧ma, ja̧danö ju'wedönö ökwölanö juwö loakobe, ja̧danö jobadötjö ju'wedönö tjitea tjö̧naukwakobe, ja̧danö jobadötjö ju'wedönö ka̧lena tjödakobe.

34Jejenö Siria luwo̧ Diosnö ösödadönö usula tjemawinö ja̧onö, ba̧jekwadö jobadönö pjabatadöma deakobe, ja̧'yubenöda jobadönö pjatjatakobe Diosnö ösödadönöma. Ja̧danö jobadö pjabatadötjö ju'wedöma, pjatjatijayonö, isabenö tjösödökakobe Diosnö ösödadönöma. 35Jojodönö waisanö ba̧ja̧dadötjö ju'wedönö kwabö lotjakobe, ja̧danö usula tjemawakobe. Jejenö baledi̧ma jwiinö waiyakobe, jo̧kwaijayonö jwiinö waiyi̧jayonö, ja̧ wene tjöbaledi̧tjö Diosma jobadönö dichö loakobe, bakwainö otiwadö dewadö batjibanö. Ja̧danö jejenö usula tjemawakobe, Dios badedö ujunina möle badekwachenanö kabatö—

jö̧ba̧lö yöawinobe ángelma, Danielnö.

Siria la'aka luwo̧ Diosdanöbo̧sa jö̧ba̧lö omukwatakwa̧ wene

36Tupakwö yöawinobe ángelma:

—Jo̧ba Siria la'aka luwo̧ma iteda ösödi̧danö ja̧akobe. Ja̧danö yöa̧lakobe, ötjöma okobe deinö diosbedötjö bajalekwönönö juluwo̧sa jö̧ba̧lö, ja̧danö jojodö tjöbajale jalaka baibanö Okobe Jwiinö Juluwo̧ Diosnöbi sulabenö yöa̧lakobe, mikwawö̧kö̧, ujulu jwibo̧ jö̧ba̧lö. Ja̧danö jejenö sulabenö ja̧ijayonö, ina iteda ösödi̧danö ja̧obö ja̧kobe, Dios jo̧banö lȩebobö badedö ujunina möle badekwachenanö kabatö, ja̧danö ja̧ mölema, Diosma jo̧banö dameakwö labinö lȩebakobe.

37Ja̧danö jo̧ba Siria luwo̧ma iteda ömöledö o̧'wo̧ jawa tjösödökwenöbi öpöjödakobe, ja̧danö ba̧jekwadö ya̧dö o̧'wo̧ jawa tjösödökwenöbi öpöjödakobe, ja̧danö okobe deinö jojodö tjösödawö̧nö öpöjödakobe, jobadötjö bajalekwönönö juluwo̧sa̧ jö̧ba̧lö. 38Okobe deinö ju'wedönö öpöjödö, sule bakwo̧nöda ösödakobe 'diinö tjöbebö tjotidina comunidad te'ada̧lö pjabato̧ jö̧ba̧lö tjösödökwenöda ösödakobe, ju'wedö jojodö tjösödawö̧nö öpöjödö. Jo̧ba ösödökwema, jo̧batjö ajayinö ji̧nadö tjösödinökökwe, jo̧kwaijayonö nöinö mikwawi̧ jawa iyö jo̧ba o̧'wo̧ jawa ösödakobe, orobi, platabi, nöinö mikwawi̧ inawiyabi, ju'wi nöinö mikwawi̧ jawabi iyakobe, ösödökwe o̧'wo̧ jawa ösödö.

39Ja̧danö ju'wedö tjitebo 'diinö tjöbebö tjotidina comunidad jojodönö ujuluwobö isakwena, iteda ömöledö diosbedö jö̧ba̧lö tjösödawö̧nö aebökakobe pjatjatobö, ju'wedö tjitebo jojodö o̧'wo̧ jawa tjösödökwenöda aebakobe.

Ja̧danö, jojodö jo̧ba Siria luwo̧ tjuluwo̧ baibobö tjösöditjö̧ma, balekwa mikwa jobadönöbi ösödakobe, ja̧danö jobadötjö ju'wedönö luwedö batjibanö ujunakobe, ja̧danö jo̧banö tjösödobetjö̧ niji 'da̧'yö iyakobe.

40Ja̧danö, yöbawö wei̧ 'dö̧ibakwa̧ möle ida̧ökö yöneawachibenama, Egipto la'aka luwo̧ma ömöayedö guardia jojodökwö ichö jo̧banö tjölakwabikwawakobe, jo̧kwaijayonö waekwakobe. Jejenö tjichibiökwe, Siria la'aka luwo̧ma jobadönö labinö meibakobe. Ömöayedöma kabayu̧dö tjötji̧ kolukiyanö a̧jöbi, ka̧bayudönö wanöbi, isowi nöowinö a̧jiböbi, Egipto luwo̧nö labinö metjibakobe, ja̧danö ju'wedö tjitebobenö baledö, ojwe okwatibidanö yelösöda ba̧jekwadö tjöbaledakobe.

41Inesö otiwobe Israel nijibebi tjichibakobe, ja̧danö yelösöda ba̧jekwadö tjitebotenia jojodönö kwabö lotjakobe, jo̧kwaijayonö Edom jojodöbi, Moab jojodöbi, ja̧danö Amón i̧tji̧mu tupadanö jojodötjö juluwadöbi Siria la'aka luwo̧tjö tjö̧jibakobe.

42Jemi ikenama ju'wedö tjitebokwena jojodönö ujuluwobö isakwakobe Siria luwo̧ma, ja̧danö Egipto niji jojodönö ujuluwakobe, jo̧batjö tjö̧jibökakobe Egipto jojodöma. 43Ja̧danö jo̧ba Siria luwo̧ma Egipto jojodönö juluwajo̧ okobe jwiinö Egipto niji nöinö mikwawi̧ jawa tojö tjujunina jawa 'döebakobe, orotjö ja̧danö platatjö ja̧danö ju'wi nöinö mikwawi̧ jawatjö otikwa jawama. Ja̧danö ju'wibi Libia jojodöbi, Etiopía jojodöbi wetjakobe, Siria luwo̧ma la'aka tjuluwo̧ baibobö.

44Jemi ikenama jawo̧ meajobekwötjö baledi̧ wenebi, jakwölakwötjö baledi̧ wenebi a̧ja̧kwakobe, ja̧danö a̧ja̧kwö yeaibakobe. Ja̧danö juluwanö labinö i̧'yakobe öpöjojodönö söbebö loobö, ja̧danö ba̧jekwadö jojodönö kwabö loobö. 45Ja̧danö, Siria luwo̧ma 'ya̧nö, tji̧sȩdo̧tjö otikwöte, iteda ö̧jakwöte löwötebiya ujunakobe Israel nijinö, jobe ja̧nö ölakwabikwawobö. Ja̧ ujunakwa̧ma, inesö otiwa'o Jerusalén comunidadsa'obi, jwaibalawabi 'da̧de löwötebiya ujunakobe, ja̧danö jobetjö debö i̧'yakobe, jo̧banö pjabatadö detjakobetjö̧—

jö̧ba̧lö yöawinobe ángelma Danielnö.

Currently Selected:

Daniel 11: WPC

Highlight

Copy