Hechos 3

Kwebachö̧kö̧nö Pedro otidina wene

1Ju'wi möle, Pedro, Juan, Dios ejube 'yi̧jadötö jojodö Diosnö abebö tebachajitjena. 2Tjichena ju'wedöma bakwo̧nö, kwebachö̧kö̧nö e'ewö ichejebijadötö. Jo̧ba kwebachö̧kö̧ma, la'akatjöda ömasapiya sulina. Ja̧danö, ju'wi möle jwiinö ju'wedöma jo̧banö ichejebiabijadötö Dios eju tjöekwemi apjude a'o ö̧bobö. Jade apjudema, otiwade, mikwade. Jena ba̧nö jo̧ba kwebachö̧kö̧ma Dios eju tjöekwemi okwa tebachadönö balada abeba̧lö bi̧abijetö. 3Jo̧bama, Pedronö Juannö Dios eju tjöekwemi okwa tebachadönö edö abebijetö balada tjiyobö. 4Jejenö aebiawö̧ Pedro, Juan jo̧banö edijadötö. Ja̧danö, Pedroma jö̧ba̧lijetö:

—Chömöledöso̧. Ökwödönö edi— jö̧ba̧lö. 5Jejenö jö̧a̧liökwe kwebachö̧kö̧ma jobadönö edijetö, Balada tjiyena, jö̧ba̧lö. 6Jo̧kwaijayonö Pedroma jö̧ba̧lijetö jo̧banöma:

—Ötjöma orobi, platabi jwibo̧sa. Jo̧kwaijayonö, chujuna̧li̧tjö pjatatokwö. Jesucristo Nazaretnö da̧peachina ujulunö wetakwö: ¡A̧laibö 'ya̧wi!— jö̧ba̧lijetö. 7Jejenö jö̧ba̧lö Pedroma jo̧ba ömamunö, öwaisamunö do̧batö a̧lapedijetö. A̧lapedökwe omönanö ömasapiyabi, ömasapa junekwemibi otiwanö baibijetö. 8Jejenö baibökwe jo̧bama döbö jamatö kwebachijetö. Ikenama möakwö döbakwiabö 'ya̧nö, Diosma otiwanö jo̧, jö̧ba̧lö, yöba̧liabö Pedrokwö Juankwö Dios eju tjöekwemi okwa tebachijetö. 9Ja̧danö, jobe ju̧kwadöma jo̧ba, Diosnö ösödö yöba̧lö kweachobe edijadötö. 10Tjedemi, ¿Tajijö? Itema tjöekwemi apjude, otiwade mikwade ö'öbö ba̧nö abeba̧lajibo̧. Jo̧banöma ¿dakwö otiwanö baibaja̧jö? jö̧ba̧lö, edijadötö.

Pedro Dios eju tjöekwemi okwa ja̧nö yöawina wene

11Ja̧danö, Pedro, Juan, otiwanö baibajökwe Dios eju tjöekwemi okwa tebachajadö löwötedanö jobekwö 'yi̧jadötö, Pórtico de Salomón mikwena. Ömasapiya otiwanö baibajökwema Pedronö Juannö do̧ba̧lö ji̧jetö. Ba̧jekwadö jobadö tjö̧jobekwö juluwanö ö'öbakwawö 'yi̧jadötö. Ichibö, ¿Dakwö baibaja̧jö? jö̧ba̧lö, eda̧lijadötö ömasapiya otiwanö baibajökwenö. 12Jobadö ö'öbakwawö tjichiökwe Pedroma jobadönö edö yöbawijetö:

—Ökwödö israel jojodö ¿Tajawedö eda̧löda, Dakwö baibaja̧jö, jö̧ba̧lö, kwö̧jaduwa? ¿Tajawedö ökwödönö kweda̧laduwa? ¿Ökwödö dujulunö dotidaja̧ji̧ bitenöma, kweachinö baibanö? ¿Ökwödöma dusuli̧ jwidobetjö̧ bitema kweachinö baibaja̧ji̧? 13Jweinö yötawa, ökwödö jawamaökö chömöledö. A̧ja̧kwaduwitjö. Ökwödötjö ajayinö ji̧nadö Abraham, Isaac, Jacob Tjuluwo̧ Diosma junijetö Jesúsnö, iteda weina ja̧bo̧nö, la'aka inesö luwo̧ baibanö. Jo̧kwaijayonö, ökwödöma kwöpöjödaduwijatö jo̧banö. Dios la'aka inesö luwo̧ babibina Jesúsnö, kwöpöjödaduwijatö. Jo̧kwaobetjö̧ ökwödöma, Jesúsnö döpöjödökwe, jö̧ba̧lö, Pilatonö iyö loköbaduwijatö. Ja̧danö, Pilatoma, abebaduwitjö, Jesúsnö latebo jö̧a̧lonöbi iyö loköbaduwijatö. 14Jesúsnö, suli̧ jwibo̧nö, Dioskwö wene jwibo̧nö öpöjödö, laeboböma akebaduwijökötö, Jesúsnö labebökönuwi, jö̧ba̧lö. Jo̧banö laebo jö̧ba̧lö weköbaduwokonö jelo̧nö, sulabo̧nö, jojodönö kwabö lobinanöda weköbaduwijatö Pilato laeboböma. 15Ja̧danö, ökwödöma weköbaduwijatö ösötenö bȩbö tjujunobö Jesúsnö, ja̧kwawa iyo̧nöma, ö'wöchobö. Jo̧kwaijayonö chömöledö, Diosma ja̧bijetö yemidanö 'yaibajinö. Jo̧ba 'yabibajo̧nö dedinobetjö̧ jweinö yödawa. 16Ökwödöma Jesúsnö dösödobetjö̧ bite kwebachö̧kö̧nö otiwanö baibaja̧bi Jesús ujulunöda baibajabe. Babema jo̧banö kwedaduwobe. Kwöwaisaduwökwe. Ökwödöma Jesúsnö dösödobetjö̧ iteda ujulunö otiwanö baibajabe bitenöma, ökwödö kweda̧laduwonö— yöbawijetö Pedroma. 17Ina yöbawijetö:

—Ja̧danö chömöledö, chöwaisa. Ökwödöbi kwuluwo̧duwibi Jesúsnö wajwibö sulabenö weköbaduwijatö Jesúsnö bȩtjobö. 18Jo̧kwaijayonö ökwödö sulabenö weköbaduwinama Diosda webijetö, iteda yöawi̧ yöbawadö yötjawina badekwachinö. Damötjö Dios yöawi̧ yöbawadöma yöbawijadötö Dios weakwo̧ usula emawakwa̧ma. Ja̧danö, yöbawijadötö Dios yöawi̧ yöbawadöma, Dios yöbawö ujuninökwe, jojodö tjö̧jibinö pjaatobö yöbawö ujuninökwema, usula emawakobe, jö̧ba̧lö. 19Jo̧kwaobetjö̧ kwomukwataduwi̧ma kabatibö balewachaduwi, Diosnö omukwatö, Diosma ökwödö kwusuladuwi̧ söbebö loobö. Jejenö kwöbalewachaduwitjö̧ma kwo̧'wo̧ luwo̧duwi ösöwö kwö̧jaduwena, Duluwo̧ Diosma ökwödökwö ö̧jobetjö̧— yöbawijetö. 20Ina yöbawijetö:

—Chömöledö, ju'wi jawabi baledena jejenö kwomukwataduwi̧ kabatibö kwöbalewachaduwitjö̧ma. Diosma, ju'winö yöbawö ujuninökwe Jesúsnö yemidanö weakobe. Ökwödö kwö̧jibaduwinö pjaatobö yöbawö ujuninökwe Jesúsnö weakobe yemidanö. 21Jo̧kwaijayonö babema Jesúsma ina mölejȩbe jo̧, Diosma böjȩ yemidanö otiwöjȩ baibanö otidenanö baibanö, ajayinö ji̧nadanö. Ja̧ baledakwa̧ma Dios yöawi̧ yöbawinadö, iteda ujuninawö̧ma yöbawijadötö, damötjöma. 22Damötjö Moisés baikwö yöbawijetö Israel jojodönö: Ökwödö Duluwo̧ Diosma ju'wi möle ökwödötjö bakwo̧nö weakobe, Dios yöawi̧ yöbawo̧nö, ötjödanö. Jo̧ba yöawi̧ma kwa̧ja̧kwaduwo. 23Ja̧danö, jo̧ba yöawi̧ a̧ja̧kwö̧kö̧ma, Dios i̧tji̧mutjö 'da̧batö lobawo̧ baibakwo̧. Jo̧banö lȩebi̧ma jwiinö labi̧ jawa baledakwo̧. Jejenö yöbawijetö Moisésma— yöbawijetö Pedroma. 24Pedroma ina yöbawijetö:

—Ja̧danö, damötjö okobe deinö Dios yöawi̧ yöbawinadöma, Samuelbi, Samueltjö tupadanö Dios yöawi̧ yöbawadöbi babe möle baledakwa̧ yöbawijadötö. 25Dios yöbawö ujunina wenema, ökwödönöbi yöbawö junijetö Diosma. Ökwödöda Dios yöawi̧ yöbawinadötjö tupadanö jojodösa. Ja̧danö, ökwödö kwa'dödöbinadökwö omukwatakwawö̧ yöa̧lakwawenama Diosma ökwödönöbi omukwatijetö. Ja̧danö, Diosma yöbawijetö Abrahamnö, baikwö: Abraham, ökwötjö tupadanö jojodötjö bakwo̧ pjaatobetjö̧ okobe deinö böjȩnö ju̧kwadönöma pjatatakwawö̧, jö̧ba̧lö, yöbawijetö Diosma damötjö Abrahamnöma. 26Jo̧kwaobetjö̧ Diosma webijetö Jesúsnö iteda weina ja̧akwo̧nö. Webijetö Jesúsnö ökwödönöma, judío jojodönöma abönöma, ökwödönö pjaatobö, okobe deinö sulabenö kwujuna̧laduwi̧ kakatibaduwinö— yöbawijetö Pedroma.

Currently Selected:

Hechos 3: WPC

Highlight

Copy