Hechos 11

Pedro yöawina wene: —Judío jojodöböködöbi Jesúsnö tjösödijatö— jö̧ba̧lö

1Ja̧danö, ba̧jekwadö Jesúsnö ösödadöma Cesareatjö baledi̧ wene yötjawi̧ a̧ja̧kwijadötö, Cesareanö ju̧kwadö judío jojodöböködöbi Dios iwene a̧ja̧kwö, Jesúsma dö̧jibinö pjabato̧, jö̧ba̧lö, tjösödinobe Jesúsnöma, jö̧ba̧lö, yötjawi̧ma. Judea nijinö comunidadeskwena ju̧kwadö, Jesúsnö ösödadöbi, ja̧danö, Jesús webawedöbi, Jerusalénnö ju̧kwadöma, ja̧ yötjawi̧ma a̧ja̧kwijadötö. 2Ikenama, Pedroma Cesareabetjö ȩwa̧jö Jerusalénnö ichibijetö. Ichibenama judío jojodötjö ju'wedöma, Jesúsnö ösödadöma, wene juna̧lakwawijadötö Pedrokwö, judío jojobö̧kö̧ eju okwa tebachö ukwiawö̧. Jobadöma öpöjödö abebö a̧ja̧kwijadötö Pedronöma:

3— Pedro ¿Tajawedö sulabenö tebachö jobadökwö kwukwinada? ¿Tajawedö judío jojobö̧kö̧ eju okwa tebachö jobadökwö kwukwinada, Pedro?— öpöjödö abebö a̧ja̧kwijadötö. 4Jejenö abebö tja̧ja̧kwiökwe, Pedroma yöbawijetö okobe jwiinö, ajayinö baledinatjö jemi tupakwö baledinama. Ja̧danö, yöbawijetö Pedroma, Dios jo̧banö öba̧ja̧dinama, tjöwaisachibobö judío jojodöböködönö baledinama. 5Ja̧danö, Pedroma yöbawijetö:

—Chömöledö. Belöma ötjöma Jopenö ja̧nö Diosnö atebijatö. Atebemi abökönö chi̧'wi̧di̧danö chedijatö biya̧: Mölejȩbetjö böjȩkwö sawana'wodanö jala'wo chedijatö 'do̧'do̧kwetenia do̧lachibö jwiachobe, ötjö chö̧jobekwö. 6Ja̧danö, jwiacha'wonöma okobe deinö jojodö tja̧jwi̧mubi, tebo luwabi tjö̧ja'wo chedijatö. Nijinö kwebachadöbi, nijinö töbawadöbi, mönö ba̧ladöbi ja'wonö tjö̧jobe chedijatö. 7Ikenama iwene cha̧ja̧kwijatö, baikwö yöawi̧: Pedro a̧laibö kwabi kwukwo, jö̧ba̧lö. 8Jejenö a̧ja̧kwö jö̧ta̧lijatö, Chuluwo̧ kwabö chukwökena, la'akatjöda kwiachijökötö jobadöjayedönöma, judío jojodönö tjukwoko, jö̧ba̧lö, wetjinawö̧nöma, jö̧ba̧lö, jö̧ta̧lijatö. 9Jejenö jö̧ta̧lijayonö yemidanö mölejȩbetjö iwene cha̧ja̧kwijatö, Pedro babema bidöma otiwadö jö̧ta̧la. Sulabedö jö̧ka̧la Pedro, Dios bidöma otiwadö, jö̧ba̧lö, kwukwobö weawö̧nöma, jö̧ba̧lö, cha̧ja̧kwijatö. 10Ja̧jaye wenema wa̧pötakwanö cha̧ja̧kwijatö. Ikenama sawana'woma yemidanö do̧lachibö kaekwajijatö mölejȩbe—yöbawijetö Pedroma. Ina yöbawijetö:

11—Ja̧danö, jejenö baledö kaatena judío jojodöböködö wa̧medukwama ichijadötö dejunö Cesareatjö, ötjönö edö weinawö̧ma. 12Ja̧danö, Dios O̧'wo̧ Luwo̧ma ötjönö öbibö jö̧a̧lijatö, Pedro, jobadöma judío jojodöböködöjayonö öpöjödabökönö jobadökwö kwi̧'yo, jö̧ba̧lö. Jo̧kwaobetjö̧ jobadökwö chi̧'yijatö, Cesareabe. Bidöbi, jelemutjö bakwo̧nö chömöledöma, Dios ömöledö babibadöma, ötjökwö tjichijatö. Ja̧danö, ökwödöma Cesareabe ichibö bakwo̧ Cornelio mikwo̧, judíoso̧bökö ejube tedachijatö. 13Tedachajena Cornelioma yöawijatö jo̧banö baledina. Ajayinö baikwö baledinobe jo̧banöma: Cornelioma ángelnö, jo̧ba eju okwa tebachajo̧nö edinobe. Jo̧ba ángelma weinobe Cornelionö, Kwömöayedönö webi Jopebe tji̧'yo, bakwo̧ Simón mikwo̧nö, Pedro ötjabökwenö öbibö tji̧'yo baikwö icho, jö̧ba̧lö. 14Jo̧ba Pedroma ökwödö kwö̧jibaduwinö pjaatakwawa wene yöawakwo̧, ökwönöbi okobe deinö kwejunö ju̧kwadönöbi, jö̧ba̧lö, yöawinobe ángelma Cornelionöma. Jejenö yöawijatö Cornelioma ökwödönöma— yöbawijetö Pedroma. 15Ina yöbawijetö:

—Ikenama Cornelionö, ejunö ju̧kwadönöbi, Dios iwene otiwa jawa wene yötawijatö. I̧ya̧nö yötawena Dios O̧'wo̧ Luwo̧ma ichö tebachibö öjamatijatö jobadönöma, bakwo̧nökwena, judío jojodöböködönöma, ökwödönö ajayinö tebachibö öjamatinadanö. 16Jejenö baledobe edö chomukwatijatö Duluwo̧ belö yöawinama. Duluwo̧ Jesúsma ökwödökwö ina ö̧jayi baikwö yöawijatö: Ajayinöma Juanma jojodönö ojwetjöda bu̧datijetö. Jo̧kwaijayonö Diosma ubu̧datakobe ökwödönöma iteda O̧'wo̧ Luwo̧kwöda, ökwödönö tebachibö öjamatinö. Jejenö yöawijatö Duluwo̧ Jesúsma. 17Chömöledö, yötawaduwakwö, Diosma jo̧ba O̧'wo̧ Luwo̧nö judío jojodöböködönöbi weijatö, Jesúsnö ösödadönöma. Jejenö weijatö jobadönö, ökwödö judío jojodönö bakwainö weinadanö, Jesúsma dö̧jibinö pjabato̧, jö̧ba̧lö, dösödinena Jesúsnöma. Jo̧kwaobetjö̧ chömöledö abebö cha̧ja̧kwa ötjödada, ¿Ötjöma Diosnö wetenaji̧, Dios bidönö Kwo̧'wo̧ Luwo̧nö weköba, jö̧ba̧lö? Ja̧maökö chömöledö. Ötjöma Diosnö webökösa— yöbawijetö Pedroma. 18Ikenama Pedrokwö wene juna̧lakwawö yöba̧ladöma Pedro yöawobe a̧ja̧kwö wene tjujuna̧li̧ma kabatakwawijadötö. Wene tjujuna̧li̧ma kabatibö Diosnö ösödö jö̧ba̧lijadötö:

—Diosma judío jojodöböködönöbi otiwanö pjaatinobe. Tjomukwati̧ balewachö itekwöda tjichibobö, itekwöda ba̧kwȩlö̧jatebö tjuju̧kwobö pjaatinobe— jö̧ba̧lö, ösödijadötö Diosnö.

Antioquíanö ju̧kwadötjö ju'wedö Jesúsnö tjösödina wene

19Ja̧danö, ajayinö Jesúsnö ösödadönö baledinama baikwö baledijetö: Estebannö ikwawö tjö'wötina möletjö jemi tupakwö, usula tjemawinö ja̧tjiawö̧ Jesúsnö ösödadöma Jerusaléntjöma döbibajijadötö. Jerusaléntjö döbibajadöma ödö 'yi̧jadötö Feniciabe ju'wedö, Chiprebe ju'wedö, Antioquíabe ju'wedö. Jobadöma wainökwena ja̧nö yöbawiabijadötö Dios iwene, otiwa jawa wenema. Jo̧kwaijayonö ja̧ yötjawinama ina judío jojodönöda yöbawiabijadötö. 20Jobadöma judío jojodönöda yötjawijayonö jobadötjö ju'wedöma, Chipre jojodöbi, Cirene jojodöbi Antioquíabe 'ya̧jadö jobetjöma judío jojodöböködönöbi yöbawiabijadötö, Duluwo̧ Jesús pjaatina wenema. 21Ja̧danö, Duluwo̧ Jesús ujulunö yötjawiawö̧ judío jojodöböködöma a̧ja̧kwö ba̧jekwadö sulabenö tjomukwati̧ma kabatibö balewachö, Jesúsma dö̧jibinö pjabato̧, jö̧ba̧lö, Jesúsnö ösödijadötö.

22Ikenama, ja̧ baledinama, Jerusalénnö ju̧kwadö, Jesúsnö ösödadöma ju'wedö yötjawi̧ a̧ja̧kwijadötö. Judío jojodöböködö, Antioquíanö ju̧kwadöma Jesúsnö tjösödinobe, jö̧ba̧lö, yötjawi̧ma a̧ja̧kwijadötö. Ja̧ yötjawi̧ a̧ja̧kwö, Bakwo̧nö Antioquíabe edajo wedonö, jö̧ba̧lajadö Bernabé mikwo̧nö webijadötö, Antioquíabe i̧'yobö. 23-24Ja̧danö, jo̧ba Bernabéma otiwanö omukwatö, Diosnö jwiinö ösödö ji̧abijetö. Dios O̧'wo̧ Luwo̧ iteda o̧'wo̧ luwo̧ okwanö öba̧ja̧di̧ ösödö ji̧abijetö jo̧ba, Bernabéma. Ja̧danö, jo̧bama Antioquíabe wetjajökwe 'ya̧jo̧ edö ösödijetö. Bidö judío jojodöböködönöma Diosma lȩlö̧jino edö pjaatinobe, jö̧ba̧lö, ösödijetö. Ikenama Bernabéma Jesúsnö ösödadönö tjo̧'wo̧ ösöwachibanö tjomukwatobö yöba̧lijetö, Jesúsnö kabatibökönö kwo̧'wo̧ kwöwana̧laduwo, jö̧ba̧lö. Ja̧danö, Bernabéma Antioquíanö ja̧nö Jesús ö̧jina yöawiawö̧ ba̧jekwadö ju'wedö Antioquíanö ju̧kwadöbi, Jesúsma dö̧jibinö pjabato̧, jö̧ba̧lö, ösödijadötö Jesúsnöma.

25Jemi ikenama Bernabéma Tarsobe Saulonö öbibö chȩwa̧jo, jö̧ba̧lö, omukwatajo̧, Tarsobe 'yi̧jetö, Saulonö isakwö. 26'Ya̧jo̧ma, Saulonö badekwajö öbibö ȩwa̧jijetö Antioquíabe, Saulobi Dios iwene yöawobö jobetjöma. Jemi tupakwöma Bernabékwö Saulokwö Antioquíanö bakwöta o̧ba ja̧nö ba̧jekwadönö, Jesúsnö ösödadönö ba̧ja̧dijadötö Dios iwene. Ja̧danö, jobetjöma Jesúsnö ösödadönöma, ajayinö jamatö öbabijadötö, Cristo ömöayedö, jö̧ba̧lö.

27Ja̧danö, Bernabé, Saulo Antioquíanö tjuju̧kwena Dios yöawi̧ yöbawadöma ju'wi möle ju'wedö, ju'wi möle ju'wedö Jerusaléntjö Antioquíabe 'yi̧jadötö. 28Jobadötjö bakwo̧ma, Agabo mikwo̧ma, Jesúsnö ösödadö ko̧ko̧kwö tjöba̧jemi 'da̧de jamatö yöbawijetö:

—Dokwa chömöledö. Babema yötawa a̧wi̧chö̧lö̧ji̧ma lekwokobetjö baledakobe böjȩ bakwameachibanö— yöbawijetö Agaboma, Dios O̧'wo̧ Luwo̧ öba̧ja̧da̧lonö. Ja̧ a̧wi̧chi̧ tjöawa Agabo baledakwa̧ yöawinadanö, tupakwö baledijetö romano jojodö tjuluwo̧ Claudio mikwo̧ yöbawö ö̧benama. 29Ikenama Dios yöawi̧ yöbawo̧ Agaboma, jejenö yöawiawö̧:

—Balada pjabatakwawö wedo— jö̧ba̧lijadötö Jesúsnö ösödadöma. Jejenö jö̧ba̧lajadö balada ko̧ko̧dijadötö, bakwo̧nökwena tjujuna̧li̧tjö Judea nijibe wetjobö. 30Ikenama webijadötö Bernabénö, Saulonö ja̧ tjiyaja̧ baladama tje'ewobö, Jesúsnö ösödadönö te'ada̧lakwawa jojodönö tjiyobö.

Currently Selected:

Hechos 11: WPC

Highlight

Copy