MARCOS 3

Jesosaa meshahuama'yo dejja meshahuajji pomeeca'yapoa ejomishocajji epojjajotii

(Mt 12.9-14; Lc 6.6-11)

1Majoya aje Jesosa nobiquio'oyapoa judiocuanaja equi-ai ejjachichaquijji aniyasijje. Ma equi-aijoya oe dejja meshahuama'yo poani aniapoa. 2Fariseo dejjacuaa quehuajje nequiya Jesosa bacanequiapoa a'a ohua ejomishocajji sábado epojjajotii dejja meshahuama'yo ani meshahuajji pomeecaje'yo ebajji. Jesosaa jama acajo fariseo dejjacuaa oya dojocaje dejja etii poaniyasijje enapameejji. 3Jesosaa dejja meshahuama'yo jama acapoa ba'a: —Nequisohuacue, jiquiacua poecue ojjaña anicacuana cojjaneiyasijje enequijji.—

4Majoya Jesosaa jama huohuime acapoa cuana ba'a: —¿Yajja poani Eyacuiñajjija esohui Moisesja tehue ejomishocajji epojjajo? ¿A'a pea queapame acajji, a'a oya queanee pomeecajji? ¿A'a acuae dejja queamano jaa jjeya jiquio ejomishocajji sábado epojjajotii jja-ajameequica'yojji, a'a oya manomeeca'yojji pojja'a?—

Ohua jama huohuiajjame acajje mimima'nei anicapoa cuana. 5Jesosa ma o chipineijo ejjachichaqui anicuanaja dejja ehuijo nequi queajea a-ajja bamajje queaquenepishana poa onijje. Majo anica queaquehuatii jjashahuabaquisapoani bamajje Jesosa queayenonee pea-ai poa comacuanajo. Majoya ohuaya meshahuama'yo dejja huohuicapoa jama ba'a: —Miquea eme jeaapihuihuicue.—

Majoya dejjaa oja me jeaapihuihuicajo jjameshahuanequimeecanana'yapoa. Ojaya eme queapame po'yapoa. 6Fariseo dejjacuana equi-aijo ani cuayaqui'yomajje emeshimese Herodesja epeejjicuananijje ojee quehuajje jjaquecuapanaquiapoa Jesosajo.

Queahuisoneecuana baesahuajo ejjachichaqui anicapoa

7Jesosa o shajja-ajjajji poanicuananijje poquiajo baesahuahuasijje queahuisonee Galileacuiñajjicuaa Jesosa equijje acapoa. 8Jesosaa dejjaja ajjima'neineicuana queahuiso acani shajja-ajjamajje peacuiñajjicuana pea-ai poquicapoa o baa. Poquicapoa queahuisocuana jama ba'a: Judeacuiñajjicuana, ma ciudad Jerusalén meshijo ba'ecacuana pea-ai, provincia Idumea meshijo ba'ecacuana, Jordán cuei ojjemijijje ba'ecacuana, Tirocuiñajjicuana, Sidoncuiñajjicuana pea-ai. Mahuiso cuana poquicapoa Jesosa baesahuajo nequi baa. 9Jamajjeya Jesosaa o shajja-ajjajji poanicuana huohuicapoa bishe'ai jjequijji queahuisoneecuaa oya ecuiape'eca poanijje. Majoya Jesosaa bishe'ai baesahua enajo ba'ejo sohuihuohuicapoa cuana. 10Jesosaa queahuisonee emano jaacacuana jja-ajameequicaje'yo bamajje pea emanocuaa Jesosa mojoiyaca'yapoa o napajji ojaya Jesosaja ejja-ajameequi'yojji.

11Ojjaña joya eshahuamase yamijji poanicuana Jesosa bamajje nequiñaquiapoa oja ecuioshajjajo Jesosa cojjaneijo eanijji. Jama taaame poa cuana ojo ba'a: —Miya Eyacuiñajjija Bacuaejja e'ejojonei poani.—

12Majoya Jesosaa eshahuamasecuana huoojeacuayajea'yomajje jama acapoa eshahuamasecuana ba'a: —¡A'a eya Eyacuiñajjija Bacuaejja poani peacuana huohuijji!—

Jesosaa 12 huisome dejjacuana babacacapoa ona sohuihuohuiquinequijji epojji

(Mt 10.1-4; Lc 6.12-16)

13Majoya aje Jesosa eyiyohuasijje jaasohuaquiapoa. Ohuaya ma ohua queapame bacanaje huisotii dejjacuana iyaacapoa. Jamajjeya oque poquicapoa cuana. 14Ojjaña oja iyaacuana jjachichaquiajo Jesosaa 12 huisome dejja babacacapoa ona sohuihuohuiquinequijji epojji. 15Jesosaa oja babaca dejjacuana queaca'a pomeecapoa eshahuamasecuana cuayameequi'yojji epojji oja bajjanijo. 16Mahuiso dejjacuana Jesosaa babacacapoa ba'a: Simón, oya bajjani beca poa ba'a: Pedro. 17Beca Zebedeoja bacuaejja Santiago, Juan pea-ai babacacapoa. Santiago, Juan pea-ai pea bajjani acapoa ba'a: Boanerges bajjani. Boanerges jama poanijje ba'a: “Cueji jayojja poani.” 18Jesosaa Andrés, Felipe, Bartolomé, Mateo, Tomás, Santiago Alfeoja bacuaejja, Tadeo, pea Simón pea-ai babacacapoa. Simón romano dejjacuana botiamaneinei poa. 19Jesosaa Judas Iscariote babacacapoa pea-ai, ma quijje Jesosa iñameesahuajji bejjo sosejje poaje dejja. Mahuisoya cuana poa oja babaca ona sohuihuohuiquinequijji epojji.

Jesosa niñebacapoa cuaa oya ebionei eshahua Satanás bajjanijo queaca'a poani poso

(Mt 12.22-32; Lc 11.14-23; 12.10)

20Majoya aje Jesosa oe equiyasijje nobiquiapoa o shajja-ajjajji poanicuananijje. Ma equijo o ani bamajjeya queahuisocuana jjachichaquicao'oyapoa Jesosaque. Equi cuiocapoa cuaa, jamajjeya Jesosa o shajja-ajjajji poanicuana pea-ai ijjiaijjiameejjima acapoa cuaa. 21Becacuana ca jjaniñebaquiapoa Jesosajo. Jama mimime poa ba'a: —Jesosa oya eniñepoqui jayojja mimime poani.— Queaquehua mimiani Jesosajo shajja-ajjamajje oja huapa pojjeamacuana poeapoa Jesosa jjehuaa nisho.

22Moisesja tehuehuohuijji poanicuana Jerusalén meshijo nequipea-aiapoa Jesosa aniyasijje. Jama acañapoa ba'a: —Beelzebuhua, eshahuamasecuanamese poaniya, Jesosa queaca'a pomeecani eshahuamasecuana cuayameequi'yojji dejjacuanaja yamijo nequi.—#3.22 Nota: Judío dejjacuaa Satanás pea bajjani acapoa, Beelzebú bajjani.*

23Etiicuana jama poani shajja-ajjamajje Jesosaa iyaacapoa cuana pea esohui ehuohuijji jama ba'a: —Bacue, ¿a'a acuae oyatii ebionei eshahua Satanás bajjaniya jjahuoojeacuayameequi'yome? Chojja. 24Oecuiñajjicuana onijjejaajjineinijje jjaquecuaquimajje jjachamaquipoquije'yo cuana. Enequitiijji pojjeama oya pea jjashahuabaquime poanijjejojo. 25Oya jayojja pea-aiya dejja oja huapa pojjeamacuananijje jjaquecuaquimajje jjachamaquipoquije'yo. 26Ebionei eshahua Satanás bajjani ojayanei eshahuamasecuana huoojeacuaya'yojji poanijjemo, oya queaca'a ojjañacuana huoojeapoquiajji pojjeama pome, chama'yotii pea-ai pome.

27Bacue, ¿yajja pomajje dejja queaca'a poanija equiyasijje nobiquicajji oja aquiana siiya? Ebionei dejja queaca'a poani jeyocajji. Majoya oja aquianacuana siicajji. Jamatii jeyojjima nequiya ohuaya oja aquiana siimeejjima acaje.#3.27 Nota: Jiquio dejja queaca'a poani ejeyo ebionei eshahua Satanás bajjani jayojja poani. Yahuajonei Eyacuiñajjiya oya Eyajo ani huoojeaoqueaca'yapoa cajaa amajje. Jamajojoya aje Jesosaa eshahuamasecuana huoojeacuayajeaca'yapoa.*

28Eyaya quiana e'ejojonei esohui huohuiaña Eyacuiñajjiya dejjaja mimishicuana ojjañatii cuijeaca'yojji. Ojjaña oja esohuitai, siajjecuana, cuijeaca'yojji pea-ai. 29Joya queatai mimiani Eyacuiñajjija Edojjoshahuapamejo caca oe coma mimishi ecuijea'yojjitii pojjeama poaje jjeya, quijjenei pea-ai.—#3.29 Nota: Joya Edojjoshahuapame cajaa ajji poanicuana Eyacuiñajjija enahue'yojji pojjeamatii poaje.*

30Jamaya Jesosaa huohuicapoa cuana majo anicacuaa queatainee huohuicapoajojoya ojo. Ebionei eshahua Satanás bajjaniya Jesosa queaca'anee pomeecani poso acapoa cuaa.

Jesosaja enaese, oja chahuacuana pea-ai poeapoa o baa

(Mt 12.46-50; Lc 8.19-21)

31Jesosaa esohui huohuicaquijotii oja nae oja chahuacuana pea-ai poeapoa o baa. Ohuaya esecuejotii nequiñamajje Jesosa iyaameecapoa onijje emimijji. 32Jesosapejjejo ejjachichaqui anicacuaa jama acapoa ba'a: —Jesosa, mique nae, mique chahuacuana, jjo'i pea-ai esecuejo nequi. Mi basapoani.—

33Jesosaa saja-acapoa cuana jama ba'a: —¿Ache acuae comaya ecue nae, ecue chahuacuana pea-ai poani?—

34-35Majoya Jesosaa ma o nequijo ejjachichaqui anicacuana baneimajje jama acapoa ba'a: —Jiquio ecue nae, ecue chahuacuana, ecue jjo'icuana pea-ai jayojja poani ba'a: ojjaña joya Eyacuiñajjija ejjashahuabaquijji jayojja ba'epoquiani cuana. Comaya ecue nae, ecue chahua, ecue jjo'i pea-ai jayojja poani— jamaya Jesosa poa.

Currently Selected:

MARCOS 3: ESE

Highlight

Copy