MARCOS 1

Juan, ma ona iñajeanobiajji poani enaojjohuasijje, se-ejjama' meshijo nequiapoa

(Mt 3.1-12; Lc 3.1-9,15-17; Jn 1.19-28)

1Jiquio esohui queapamenee tehuecoocapoa Jesosa Quitojo, Eyacuiñajjija Bacuaejjajo.

2Esohuihuohuijjiya Isaías bajjaniya yahuajonei tehuecapoa ma Eyacuiñajji mimiapoa oja Bacuaejjanijje. Jama mimime Eyacuiñajji poa ba'a:

—Eyaya oe esohuihuohuijji ebionei huoojeaje mi huoojeajjimahuajo.

Jiquio ecua dejjacuaa ejeojji chacocani epijajinei queapojjenee pea poejji, jama pea-aiya ohuaya mi poejjijo huohuicaje cuana mijo ejjashahuabaqui'yojji.

3Oya se-ejjama' meshijo nequi taaamajamajanequije ojjañacuanaja eshajja-ajjajji.

Jama ponequije ba'a: “Jjashahuabaquicue quiana oe Emeshimesenei poejjijo.

Apoa pocue jiquio ecua ejeojji queapojjenee epijajinei chacome acani cuaa pea poejji, jamaya oe pocue ojo queaja'a ejjashahuabaqui'yojji” jamaya tehuecapoa.—

4Juanya se-ejjama' meshijo nequiya iñajeanobiacapoa cuana enaojjohuasijje. Ohuaya huohuicanequiapoa cuana pea-ai jama ba'a: —Pea jjashahuabaquime po'yocue quiana miquianaja mimishijo. Majoya quiana oe jjaiñajeanobiameequicue enaojjohuasijje Eyacuiñajjija miquianaja mimishicuana ecuijea'yojji.— 5Queahuisonee provincia Judeacuiñajjicuana Jerusalén meshijo ba'ecacuana pea-ai poquicapoa o shajja-ajjaa. Majoya aje Juanya esohui huohuicaje shajja-ajjamajje queahuisocuaa oja mimishi huohuica'yapoa ja'anee Eyacuiñajjija oja mimishi ecuijea'yojji. Majoya Juanya iñajeanobiacapoa cuana Jordán bajjani cueiyasijje.

6Juanya camelloja ña daqui huoshocapoa. Oya jjayica'aquiapoa ejeejo. Ohuaya satejjee ijjiacapoquiapoa. Meshidojjojo nequi huini pea-ai ishicapoquiapoa. 7Ohuaya huohuicapoa cuana jama ba'a: —Quijjepishana equiquishijji poeje pea dejja queaca'aneenee jiquio ecua eya nequi quiajja pojjeama. Jamajjeya eya jjabaquiani queapame pojjeama ojo echacochacopoquijji oya queapameneeneejojoya. 8Eyaya quiana e'ejojonei iñajeanobiaña enaojjoneiyasijje. Pea dejjaa ma quijje equishishi poejeya ca quiana ca oe Dojjoshahuapame yamijji pomeecaje— jamaya ohuaya huohuicapoa cuana.

Juanya Jesosa iñajeanobiacapoa enaojjohuasijje

(Mt 3.13-17; Lc 3.21-22)

9Pueblo Nazaret meshi provincia Galilea meshimijijje jaa. Majoya aje quijjepishana Jesosa Nazaret meshijo ani poquiapoa ma Juanya ona iñajeanobiacaqui cueiyasijje. Jesosa cuei Jordán bajjaniyasijje poeajo Juanya oya iñajeanobiapea-aicapoa enaojjohuasijje. 10Majoya Jesosaa enaojjojo nequiya cojjacuaya'yomajje bajeasohuacapoa eyatahuatahua ejjaca'apejoqui nequi. Edojjoshahuapame huia' jayojja cuabesaoqueapoa oja yamibiajje aniñaa bapea-aicapoa. 11Majoya esohui Eyajo mimije jama shajja-ajjacapoa cuaa jama ba'a: —Miya ecue Bacuaejja ecuea queajeanee, eya mijo queabihuinee poani.—

Edosiquiaa Jesosa queamimishi epomeejjinisho a-ajjacapoa

(Mt 4.1-11; Lc 4.1-13)

12Majoya aje Edojjoshahuapameya Jesosa dojocapoa meshi queajabo se-ejjamahuasijje. 13Majotii Jesosa oenei nequiapoa 40 cahuime huiso. Ebiocuiñajjicuana queamase jaacajo oya aniapoa. Ma meshijoya ebionei eshahua Satanasya Jesosa queamimishi epomeejjinisho a-ajjacapoa. Majoya ohua jiñacajo Eyacuiñajjija angelcuana poeapoa Jesosa asahuaa.

Jesosaa oja echacojji acoocapoa provincia Galilea meshijo nequiya

(Mt 4.12-17; Lc 4.14-15)

14Majoya aje Juan ma ona iñajeanobiajji poani dejja ejjajeanobiaquijji equiyasijje jeanobiacapoa cuaa. Juan ejeanobia anijo Jesosa Galilea meshiyasijje poquiapoa Eyacuiñajjija esohui queapame ona huohuiya. 15Jesosaa jama sohuihuohuime acapoa cuana ba'a: —Jjeya apoa. Eyacuiñajji, ojjañacuana huoojeapoquiajjitii poani, jjeyahuanei poeje. Jamajjeya quiana oe pea jjashahuabaquime po'yocue miquianaja mimishijo. E'ejojonei jjashahuabaqui'yocue quiana Eyacuiñajjija esohui queapameneejo majoya ejjanahuemeequi'yojji.—

Jesosaa dejjacuana nahuooshojeajji poani iyaacapoa

(Mt 4.18-22; Lc 5.1-11)

16Majoya aje Jesosaa Galilea bae-aisahuajje poquijeya Simón, oja chahua Andrés pea-ai bacañaquiapoa nahuoo shojeapoequi. Oya nahuooshojeajjinei poa. 17Jesosaa ma beca dejja huohuicapoa jama ba'a: —Enijje po'yocue. Jjeya miquiaa nahuoo shojeapajeaje'yo. Jiquio ecua miquiaa nahuoo sa-ajjaneinequinaje jama pea-aiya miquiaa dejjacuana sa-ajjaje ecuea epeejji epo'yojji.—

18Jamajjeya maneitiiya ojaya nahuooshojeajjicuana jeacana'yapoa Jesosanijje epo'yojji. Majoya oya poqui'yapoa onijjetii.

19Jesosaa poquipishananiya pea dejja Santiago bacapoa Juannijje, o dohue pea-ainijje nequi. Oya Zebedeoja bacuaejja poa. Oya bishe'aijotii ani nahuooshojeajji sipi'yo po-aniapoa. 20Maneitiiya Jesosaa oya iyaacapoa o dohue pea-ai. Jamajjeya ma beca dejjaa oja chii Zebedeo, o chacosahuajji poani dejjacuananijje bishe'aijo ani, jeacana'yapoa Jesosanijjetii epo'yojji.

Dejja eshahuamase yamijji poa

(Lc 4.31-37)

21Majoya aje Jesosa o shajja-ajjajji poani dejjacuananijje pueblo Capernaúm meshi bañaquimajje judiocuanaja equi-ai ejjachichaquijji aniyasijje nobiquiñaquiapoa ejomishocajji sábado epojjajo. Majoya Jesosaa sohuihuohuicapoa cuana. 22Jesosaa sohuihuohuicani shajja-ajjamajje ma anicacuana jama poa ba'a: —Jesosaa queaja'aneenee esohui huohuicani pea esohuihuohuijji poanicuaa jama pojjeama. Ohuaya ca queaja'aneenee huohuicani, ojaya ebaneinei.— 23Majoya aje oe dejja eshahuamase yamijji poani nobiquiapoa equi-aiyasijje ma judiocuanaja ejjachichaqui anicahuasijje. Oya taaapoa janobajjimanei jama ba'a: 24—Jesosa Nazaretcuiñajji dejja, ¿ajeo acuae mi ecuananijje ani? ¿A'a mi ecuana chama'yotii pojeamee'yohua poeyanaje? ¡Ecuea miya ebanei! Miya Eyacuiñajjija huoojea e'ejojonei queapamenee poani mimishima'nei.—

25Majoya Jesosaa eshahuamase tecueacapoa jama ba'a: —¡A'a mimijji! ¡Cuayaqui'yocue miya coma dejjaja eyamijo nequi!—

26Jesosa jama pojeahuajotii eshahuamaseya ma dejja niñepoquimeecuajicao'oyapoa. Majoya o taaasajasajameemajje eshahuamase cuayaqui'yapoa. 27Jesosaa jama acaje bamajje queahuisocuana jjabaneineiquiapoa ojo. Jama mimime poa cuana ba'a: —¿Yajja shai oya acanaje, de? Ohuaya pea esohui eyacua huohuicani. Ojaya ebaneinei, emeshimese jamaa huohuime acani. Ohuaya eshahuamasecuana huoojeacuayajeaca'yani. Ojaya esohuijo jjashajja-ajjaquiani eshahuamasecuana.—

28Majoya queahuiso provincia Galilea meshijo ba'ecacuaa shajja-ajjacuajicapoa Jesosajo ma ohua dejjaja ajjima'neineicuana acapoquianijo.

Jesosaa Simonja eanomese huoecameeca'yapoa

(Mt 8.14-15; Lc 4.38-39)

29Jesosa judiocuanaja equi-ai ejjachichaquijjijo nequi cuayaqui'yomajje poquiapoa ojee Santiagonijje, Juannijje pea-ai Simonja equiyasijje, o dohue pea-aija Andresja equiyasijje. 30Simonja eanomese queaquiyoneenee jaapoa. Jamajjeya Jesosa huohuicapoa cuaa. 31Jesosa o jaahuasijje poquimajje me iñacañaquiapoa o anisohuamee'yojji. Ohua me iñacajeahua Simonja eanomese huoecanana'yapoa, yejjecananapoa quiyohua. Majoya nequisohuanana'yomajje eanomeseya bobiacapoa cuana.

Jesosaa queahuiso emanojaacacuana jja-ajameequica'yapoa

(Mt 8.16-17; Lc 4.40-41)

32Majoya aje sinecuanei, eshequi eoquequijo Jesosaque queahuisocuaa emanojaacacuana yecapoa. Eshahuamase yamijjicuana queahuiso pea-ai yecapoa Jesosaja huoojeacuayajea'yojji. 33Jamajjeya ojjañacuana jjachichaquicapoa esecuepejjejotii. 34Jesosaa pea pea emanomeejjijo emanocuana jja-ajameequica'yapoa. Eshahuamasecuana dejjacuanaja yamijo nequi Jesosaa huoojeacuayajeaca'yapoa pea-ai. Ohuaya eshahuamasecuana oja huoojeacuayajea'yo mimimeejjima pomeecapoa eshahuacuanaja ebajojoya oya e'ejojonei Eyacuiñajjija huoojea poani.

Jesosaa sohuihuohuicanequiapoa cuana judiocuanaja equi-ai ejjachichaquijji queahuiso aniyasijje

(Lc 4.42-44)

35Majoya aje quijje jjapojjaquiyasijje quea-aapojotii Jesosa shequiapoa emimijji oja Chiinijje. Jamajjeya Jesosa equijo ani cuayaquimajje oenei poquiapoa se-ejjama' meshiyasijje Eyacuiñajjinijje mimiya. 36Majoya aje Simón Jesosa chama' bamajje poquiapoa oja epeejjicuananijje Jesosa sa-ajja'yohua. 37Oya Jesosa ba'yomajje jama acapoa cuaa ba'a: —Ojjañacuaa mi sa-ajjaca'yoqui.—

38Jesosaa saja-acapoa cuana jama ba'a: —Cua'a epoqui pea meshicuanachipineiyasijje macuiñajjicuana sohuihuohuiya. Majoya eya poeyanaje jiquiacua ojjañaque esohui huohuiya.—

39Jamajjeya Jesosa ojjaña provincia Galilea meshiyasijjeyee poquinequiapoa majo ba'ecacuana sohuihuohuiquinequiya judiocuanaja equi-ai ejjachichaquijji anicuanahuasijje. Jesosaa eshahuamasecuana dejjaja yamijo nequi huoojeacuayajeacapoqui'yapoa pea-ai.

Jesosaa oe dejja queamanonee leprajo jjajeameequica'yapoa

(Mt 8.1-4; Lc 5.12-16)

40Majoya aje oe dejja queamanonee leprajo poquiapoa Jesosaque. Ohuaya ecuioshajjajo nequiñaquimajje jama acapoa ba'a: —Miyaya che eya jjajeameequi'yosa-amajje eya jjajeameequije'yo.—

41Jesosaa dejja queamanonee leprajo bamajje queayeno jjashahuabaquiapoa ojo. Majoya dejja emanoja eyami napamajje oja emeya oya jama acapoa ba'a: —E'e eyaya miya jjajeameequi'yosa-aña. Jjeyanei mi jjajeameequije'yo, lepra yamima' mi poaje'yo.—

42Jesosaa oya jama huohuime acajeahua dejja leprajo queamanonee jjajeananaqui'yapoa. 43Majoya Jesosaa ma dejja queamano poanaje huoojea'yojjimahua jama acapoa ba'a: 44—Shajja-ajjacue. A'a peacuana che oema'nei huohuijji jiquio eya mi jjajeameequi'yonajejo. Poquicue so'o Eyacuiñajjija equi-aijo chacochacopoquiani dejjaque jjabameequi'yohua mi apoa epo'yo. Oe ehuone enaa jehui'yojji dojocue jiquio ecua Moisesja tehuecuana poani jama ya'yojji equiajji. Miya jama quiajo bacaje cuaa miya jjajeaqui'yonaje, leprama'yo.—

45Jamatii ma queamanonee poanaje dejjaa huohuicapoqui'yapoa queahuisocuana Jesosaa o jjajeameequica'yonajejo. Jamajojoya aje Jesosa ja'anei epoquinequijji pojjeama poa pea pueblocuanahuasijje dejjacuana queahuisoneenee ojo jjachichaquipoquiapoajojoya. Jamajjeya oya se-ejjama' meshiyasijje nequiapoa. O se-ejjama' meshijo nequijo peajaajjicuana poenequiapoa o baa.

Currently Selected:

MARCOS 1: ESE

Highlight

Copy