MATEO 8

Jesosaa oe dejja leprajo queamanonee poani jjajeameequica'yapoa

(Mc 1.40-45; Lc 5.12-16)

1Majoya aje Jesosa esohui huohuijeyomajje eyiyojo ani jaaoque'yajo queahuisocuaa oya equijje acapoa, onijje poquicanequiapoa. 2Queahuisocuana onijjetii poquianijo oe dejja leprajo queamanonee nequi Jesosaque poechipiapoa. Ohuaya Jesosa nequi cojjaneijo oja cuioshajjajo nequiñamajje huohuiajjaneicapoa jama ba'a: —Emeshimesenei, miyaya eya jjajeameequi'yosa-amajje eya jjajeameequije'yo.—

3Jesosaa emanoja eyami napamajje oya jama acapoa ba'a: —E'e, eyaya miya jjajeameequi'yosa-aña. Jjeyanei mi jjajeaquije'yo, leprama' poaje'yo.— Jesosaa esohui jama acajeahuatii dejja leprajo queamanonee jjajeananaqui'yapoa, leprama'yo poa. 4Majoya Jesosaa oya huohuipea-aicapoa jama ba'a: —Shajja-ajjacue. A'a peacuana che oema'nei huohuijji jiquio eya mi jjajeameequi'yonajejo. Poquicue so'o Eyacuiñajjija equi-aijo chacochacopoquiani dejjaque jjabameequi'yohua miya apoa epo'yo. Oe ehuone enaa jehui'yojji dojocue equiajji jiquio ecua Moisesja tehuecuana poani jama ea'yojjiya. Miya ehuone jama ajo bacaje cuaa miya jjajeaqui'yonaje, lepra'ma'yo.— Jama huohuimeya acapoa oya Jesosaa.

Jesosaa romano soldado capitanja oja tiimee jja-ajameequica'yapoa

(Lc 7.1-10; Jn 4.43-54)

5Majoya aje Jesosa pueblo Capernaúm meshijo aniñaquiajo oe romano dejja capitán oque poeapoa o huohuiajjaa. 6Jama huohuiajjaneime oya acañapoa ba'a: —Emeshimesenei, ecue tiimee dejjasho'i ecuea equijo jaa queamanonee. Oya jjeya anisohua-ajja, jeoajja, queamanonee jaa.—

7Ohua jama acajje Jesosaa saja-acapoa ba'a: —Ee, eya cuamaya poquije o jja-ajameequi'yohua.—

8Majotii nequiya romano dejja capitán poaniya oya apea-aicapoa jama ba'a: —Emeshimesenei, miya queapameneenee, eya ca iña queapame pojjeama mi jjequinobiajjequijji ecuea equiyasijje. Jamajjeya jjeyahuanei miyaya jiquiojotii nequiya esohui acue o jja-ajameequi'yojji. Majoya oya quea-aja poaje'yo. 9Ecuea etii enequi, jamajjeya eyaya ojaya esohui jayojja aña. Oya jayojja eyaya pea-ai soldadocuana huoojeapoquiaña. Eya esohui o poquijjijo huohuiajje, oya poquiani. Eya esohui pea o poejjijo huohuiajje, oya poeani. Ejo chacochacopoquiani dejja ejjeshe eya chacocue ajje oya chacochacoani queapame jiquio ecua eyaya huohuiaña jamaya. Oya jayojjaya miya esohui queapame ajo ecue tiimee jja-ajaquije'yo.— Jamaya capitanya Jesosa acapoa.

10Jesosa romano dejja capitanja esohui shajja-ajjamajje jjabaneineiquiapoa ojo. Majoya Jesosaa ma onijjetii poquianicuana bamajje jama acapoa ba'a: —Eyaya quiana e'ejojonei esohui aña. Jiquio romano dejja e'ejojonei jjashahuabaqui'yani ejo joya ecua eyaya baña judiocuana jama pojjeama, oepojji jjashahuabaquiani. 11Eyaya pea esohui jama aña pea-ai ba'a: Queahuisonee judío pojjeamacuana poecaje eshequi jaasohuanimijijje, eshequi oquequianimijijje pea-ai. Ma queahuisocuanaya poquicaje'yo Eyacuiñajjiya ojjaña huoojeacapoquianitii meshi Eyahuasijje. Quijje majotii ani'yo fiesta acajo, queabihuinee ojee ijjiaijjiacaje cuana Abrahamnijje, Isaacnijje, Jacobnijje pea-ai. 12Judiocuana Eyacuiñajjija babaca ojaya epo'yojjinisho poanajecuana caca oe Eyacuiñajjiya jeajeameecaje'yo quea-aapotiiyasijje. Majo anica'yoya queayenonee potiitiipoquije'yo. Paneineianije'yo. Ese' ijjiayaica'yoanije pea-ai cuaa queaneeneejo— jamaya poa Jesosa.

13Majoya Jesosaa romano capitán poani dejja huohuicapoa jama ba'a: —Jjeyanei poqui'yocue miquea equiyasijje. Jiquio ecua miya e'ejojonei ejo jjashahuabaqui'yani jama eyaya oya jja-ajaquimeeje'yo— jamaya Jesosa poa. Ma o mimiapoa eshequi nequijotiiya ma capitanja tiimee quea-aja ponana'yapoa.

Jesosaa Pedroja eanomese huoecameeca'yapoa

(Mc 1.29-31; Lc 4.38-39)

14Majoya aje Jesosa poquiapoa Pedroja equiyasijje. Majo aniya Pedroja eanomese queaquiyonee camajo jaa bacañaquiapoa. 15Jesosaa oja me iñacajeahuatii oya huoecanana'yapoa, quiyohua yejjecananapoa. Majoya aje Pedroja anohua nequisohuanana'yomajje ma oque o baa poecuana bobiacapoa.

Jesosaa queahuisocuana emano jaaca jja-ajameequica'yapoa

(Mc 1.32-34; Lc 4.40-41)

16Ma pojjajotii eshequi oquequianijo queahuisocuaa shahuamase yamijji poanicuana yecapoa Jesosaque. Ohuaya oja esohuijotiiya eshahuamasecuana huoojeacuayajeaca'yapoa oja yamijo nequi. Ojjaña ma onaja ye emano jaaca ohuaya jja-ajameequica'yapoa pea-ai. 17Jamaya Jesosaa emano jaacacuana jja-ajameequica'yapoa ma ecua yahuajonei esohuihuohuijji poa Isaías bajjaniya tehuecapoa jamaya. Ohuaya esohui tehuecapoa Eyacuiñajjija huoojeajo jama ba'a: “Ohuaya ese queanee pojjicuana huaquiameecanaje, ese manomeejjicuana pea-ai chama'yo acanaje.”

Jesosanijje epo'yojji nisho queahuisocuana po-ajjacapoa

(Lc 9.57-62)

18Majotii Jesosa anijoya queahuisoneecuana jjachichaquicanequiapoa. Jamajjeya ohuaya o shajja-ajjajji poanicuana huohuicapoa bae ojjemijiyasijje ebesapoquijji bishe'aijo. 19Majoya oe dejja Moisesja tehuehuohuijji poani poechipiapoa Jesosaque onijje mimiya. Jama mimime poa onijje ba'a: —Emeshimesenei, eya minijjetii nequipoquisapoani cua mi poquije meshicuanahuasijje ojeetii minijje epo'yojji.—

20Jesosaa oya saja-acapoa jama ba'a: —Bacue, ebiocuiñajji samaoja jjani o jaajji ejaa. Cuichojjicuanaja pea-ai eja yani. Jiquio eya Dejjapojji epoja caca oe ecuea chama' equi e jomishocapoquijji.—

21Majoya aje Jesosaa pea dejja huohuicapoa jama ba'a: —Enijjetii po'yocue.—

Ohuaya Jesosa saja-acapoa jama ba'a: —Emeshimesenei, eya ebionei ecue chii mojeaa capoquisahua.—

22Jesosaa oya jama acapoa ba'a: —Chojja, jjeyaneitii oe enijje po'yocue. Joya emano'yo jayojja poanicuaa comaaya emano'yocuana camojeaquicahua.—

Jesosaa benitiitii, enashajoai pea-ai nequioquemeequicapoa

(Mc 4.35-41; Lc 8.22-25)

23Majoya aje Jesosa bishe'aiyasijje nequisohuaquiapoa o shajja-ajjajji poanicuananijje besapoquiya. 24Jesosa, o shajja-ajjajji poanicuana pea-ai bishe'aijo bae enabiajje besapoquianijo beni queaquemonee poecuajiapoa. Enashajo queaquemohua bishe'ai nanejeacabesapoquiapoa cuanaja. Jesosa ca ecahui jaapoa bishe'aijotii. 25Majoya oya ecahui jaatii bamajje o shajja-ajjajji poanicuaa oya ishe'acapoa ehuohuijji. Jama huohuime acapoa cuaa janobajjimanei queameteneeya ba'a: —Emeshimesenei, ecuana nahuecue. ¡Coya aje pajjaja se jaanobiqui'ya!—

26Ohuaya saja-acapoa cuana jama ba'a: —¿Yajjajje acuae quiana queametenee poani? Miquianaya beshahuanei ejo jjashahuabaneiquiajja miquiana nahuejjijo.—

Jamajjeya Jesosaa beni queaquemonee, enashajo pea-ai huohuicapoa o nequioquequijji. O jama mimime pojeahuajo beni queaquemonee, enashajoai pea-ai nequioquenanaquiapoa, bae nashajoma'yo ponanapoa. 27O shajja-ajjajji poanicuana Jesosaa beni queaquemonee, enashajoai jama acaje bamajje jjabaneineiquiapoa ojo. Mimimimiapoa cuana oopana jama ba'a: —¿Ae dejja shai jiquio queasohuipojanee? Beni queaquemonee, enashajoaicuana jjashajja-ajjaquiani oja esohuijo, nequioquenanaquinaje.—

Jesosaa beca dejja Gadara meshijo nequi shahuamase yamima'yo pomeecapoa

(Mc 5.1-20; Lc 8.26-39)

28Majoya aje Jesosa baejje besapoquimajje ojjemiji meshi Gadara bajjaniyasijje nequisohuaquiñaquiapoa o shajja-ajjajji poanicuananijjetii. Ma meshijo aniya beca dejja eshahuamase yamijji cuayananapoa emano'yo jaaca meijjanidojjojo ani Jesosaque. Ma beca dejja queamaseneenee poa, jamajjeya ma meshijo ejeojji jaajo peacuana jjayejjequiajjanei poa quea-oyajjaneejjejojo. 29Majotii nequi ma beca dejja eshahuamase yamijji taaanequiapoa janobajjimanei jama ba'a: —¡A'a ecuana nequiyasijje poejji Eyacuiñajjija Bacuaejja! ¿Ae mi poaje ecuananijje? ¿A'a jjeya ecuana queanee pomeeje'yo jamatii ecuana queanee po'yojji epojja poejjimahuajo?— jama taaameya poa.

30Ma meshichipineijo pea-aitiiya aje cuichicuana queahuiso ijjiaijjianequiapoa. 31Eshahuamasecuaa Jesosa huohuiajjacapoa jama ba'a: —Ecuana jiquio dejjaja eyamijo nequi huoojeacuayajea'yosa-amajje, majo nequica cuichicuanaja eyamiyasijje enobiquijji ecuana huoojeacuaya'yocue.—

32Jesosaa saja-acapoa jama ba'a: —E'e cuayaqui'yocue.— Jesosaa eshahuamasecuana dejjaja yamijo nequi huoojeacuayajeaca'yajje cuichicuanaja eyamiyasijje nobiquinanapoa. Majoya cuichicuana cuajicuajijaaoquequinanacapoa ecueihue quea-ao nequi baeyasijje. Ojjañatii hui'ijeaca'yapoa.

33Majoya cuichijaahuanajji poanicuana ojjaña onijje ba'ecacuanaja cuichicuana hui'ijeaca'yonaje bamajje poquicuajiapoa ma meshijo ba'ecacuana huohuiya. Oja pueblohuasijje bañaquimajje huohuicañaquiapoa cuana Jesosaa ojjaña oja cuichicuana hui'ijeameeca'yonaje, ma beca dejja eshahuamase yamima'yo pomeecanaje pea-ai huohuicañaquiapoa. 34Jamajjeya ojjaña ma meshijo ba'ecacuana poquicapoa Jesosa baa. Oya bañaquimajje ma meshicuiñajjicuaa Jesosa huohuiajjaneicapoa oya oja meshijo nequi epoqui'yojji.

Currently Selected:

MATEO 8: ESE

Highlight

Copy