MATEO 26

Judío etii poanicuaa Jesosa quecuapanacapoa o manomee'yojji acui ecuiata'apeejo

(Mc 14.1-2; Lc 22.1-2; Jn 11.45-53)

1Majoya aje ma esohui huohuijeyomajje Jesosaa o shajja-ajjajji poanicuana jama acapoa ba'a: 2—Miquianajaya eba cahui becaneijji pea-ai fiesta eshahuaba'yojji ma yahuajonei Eyacuiñajjiya judio etiiquianaja bacuacuana nahuecapoajo poeje'yo. Ma pojjajoya eya Dejjapojji epo judío etii poanicuaa iñameecaje acui ecuiata'apeejo emanomee'yojji— jamaya poa.

3Ma fiesta poechipi'yanijo aje Eyacuiñajjija equi-aijo chacochacopoquiani pea judío etii poanicuana pea-ai Caifasja equi-aineijo jjachichaquiapoa. Oya Caifás Eyacuiñajjija equi-aijo chacochacopoquiani ebionei etii poa. 4Ma equi-aijo aniya Jesosa quecuapanacapoa etii poanicuaa. Ajea esohui siajjejo oya iñameecajji acui ecuiata'apeejo emanomee'yojji miminequiapoa. 5Jama mimime poa cuana oya oopana ba'a: —¡A'a judiocuaa fiesta acajo oya iñameejji! Queahuisocuana quenequenecuajicananachana o iñacaje bamajje.—

Oe eponaa Jesosa sapa shacapoa shiyeshiyeya

(Mc 14.3-9; Jn 12.1-8)

6Majoya aje Jesosa poquiapoa pueblo Betania meshiyasijje. Simonja, ma leprajo jjajeaqui'yoja equiyasijje oya nobiquiñaquiapoa. 7Jesosa ma equijo ani ijjiaijjianijoya oe epona poeapoa meitahuoojo shiyeshiye eshotii mejji. Oja ye shiyeshiye queasosehuisonee poa. Majotii aniya ohuaya Jesosa sapa shacapoa shiyeshiyeya. 8Ohua Jesosa jama shacaje bamajje o shajja-ajjajji poanicuana queaquene mimiapoa eponajo jama ba'a: —¿Apiojji joya queasosehuisonee poani shiyeshiyeya shajeacani coma eponaa? 9E'ejojonei jiquio shiyeshiye queasosehuisonee poanaje. Bejjo sosejje quiacajji poanaje. Aema'cuana asahuacajji poanaje ma bejjojoya.—

10Jesosaa o shajja-ajjajji poanicuana jama mimime poani shajja-ajjacapoa. Jamajjeya ohuaya jama acapoa ba'a: —¿Apiojji quiaa jiquio epona niñebaña? Ohuaya eya queapamenee acanaje. 11Aema'neicuana nequijetii miquianajaya meshijo miquianaja asahuapoquiajji. Eya caca oe miquiananijje jiquio meshijo enequitiipoquijji pojjeama poaje. 12Jiquio eponaa eya yami shacanaje shiyeshiyeya ejo jjashahuabaquimajje. Quijje eya mano'yajo apoa ehuananobiajjijo eya shacanaje shiyeshiyeya. 13E'ejojonei eyaya quiana aña. Cua Eyacuiñajjija esohui queapame huohuicaje meshicuanahuasijje, jiquio eponajo ma ohua e shacanajejo mimipoquijetii cuana cuamayee ba'eca. Oya pajea'yojjimatii acapoquije cuaa.—

Judasya Jesosa iñameesahuacaje bejjo sosejje

(Mc 14.10-11; Lc 22.3-6)

14Jesosaja babaca dejjacuana 12 huisome poa. Oe oja babaca dejja Judas Iscariote bajjani poa. Majoya aje oe pojjajo oya Judas poquiapoa Eyacuiñajjija equi-aijo chacochacopoquiani dejja etii poanicuana baa. 15Ohuaya jama acañaquiapoa etiicuana ba'a: —¿Achehuiso eso'dojjo miquiaaya eya quiaje Jesosa iñameesahuajji sosejje?—

Ohua jama huohuiajjame acajje etiicuaa oya 30 huisome meioshe eso'dojjo quiacapoa. 16Majoya Judas mahuiso eso'dojjo jjeshemajje jjashahuabacooquiapoa acheshono queapame Jesosa iñameesahuajji poaje ojaya.

Jesosaa, oja babaca dejjacuaa pea-ai ojee bobi ijjiacapoa eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo

(Mc 14.12-25; Lc 22.7-23; Jn 13.21-30; 1Co 11.23-26)

17Fiesta eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo poe'yajo judiocuaa pahui shejjeemeejjima ijjiacapoa ebionei fiesta yajji epojjajo. Ma pojjajotiiya aje Jesosaja babaca dejjacuaa Jesosa huohuiajjacapoa o aniyasijje jjanequichipiquimajje jama ba'a: —¿Achacua shai, ajea equijo bobi apoa acajji ojee eseja eijjiajji?—

18Jesosaa saja-acapoa cuana jama ba'a: —Ciudad Jerusalén meshiyasijje poquicue. Eya jiquio huohuiaña dejjaja equiyasijje quiana oe poquicue. Jama huohuime oya añaquicue ba'a: “Ecuana sohuihuohuijji poaniya ecuana jama acanaje ba'a: Eyacuiñajjija babaca epojja poechipiani. Miquea equiyasijje bobi ojee ijjiaje ecue babaca dejjacuananijje eshahuaba'yojji ma yahuajonei Eyacuiñajjiya eseja etiiquianaja bacuacuana nahuecapoajo.” Jama huohuiquime oe añaquicue equimese— jamaya acapoa.

19Majoya aje oja babaca dejjacuaa ma Jesosaa o huohuicanaje esohui huisotiiya ajeyocapoa oya jayojjaya. Jamajjeya bobi apoa acapoa ojee eijjiajji.

20Majoya aje sinepoquianijo Jesosa poeapoa. Oja babaca 12 huisome poanicuananijje Jesosa anioqueapoa mesa nequipejjejo ojee eijjiaijjiajji. 21Ojee ijjiaijjiani Jesosa jama poa ba'a: —E'ejojonei quiana aña, oe miquiaa jiquiojo enijje aniya eya iñameesahuacaje eso'dojjo sosejje quijje equecuamee'yojji.—

22Jesosaa oya esohui jama acajje queayenonee ponanapoa oja babaca dejjacuana. Majoya aje pea huohuiajja, pea huohuiajja acapoquiapoa majo anicaa jama ba'a: —Emeshimesenei, ¿acheya shai miya jama acaje? ¿Eyaya chi?— Jamaya oya acapoquiapoa cuaa.

23Jesosaa jama saja-ame acacuanapoa ba'a: —Joya ecuea platojo oja pahui iyanobiajji poaniya eya iñameesahuacaje. 24Eyacuiñajjija esohui jama poani eya Dejjapojji epo e'ejojonei manomeecaje'yo cuaa. Jiquio e iñameesahuajji poaje dejja caca oe queaneenee poaje'yo ohua e iñameesahuacajejojoya. Jamajjeya, ¿apiojji shai oja naeya oya mejocapoa oya queaneenee epo'yojji?—

25Majo aniya Judasya ma quijje o iñameesahuajji poajeya Jesosa huohuiajjapea-aicapoa jama ba'a: —Esohuihuohuijji, ¿acheya shai jama acaje? ¿Eyaya chi?—

Jesosaa oya saja-acapoa jama ba'a: —E'e, ma ecua miya miminaje jamaya poaje.—

26Jesosaa o shajja-ajjajji poanicuananijje ojee ijjiaijjianiya oe pahui jjeshecapoa. Majoya Eyacuiñajji bihuiamajje ohuaya pahui oja babaca poanicuana quiacapoquiapoa emijisisi pea-ai. Pahui quiajeyomajje Jesosa jama poa ba'a: —Pahui jiquio miquiaaya jjeshenaje ijjiacue, jiquio ecue yami jayojja poani.—

27Majoya Jesosaa caneco iñanequiamajje Eyacuiñajji bihuiacapoa. Oja babaca dejjacuana ishimeecapoquiapoa oya canecojo nequi uvajjajjana'. Oya jama poa ba'a: —Jiquio canecojo nequi uvajjajjana' ishicue quiaa. 28E'e, jiquio canecojo nequi ecuea ena' jayojja poani. Eya manoje'yo. Ecuea ena' cuayameequije queahuisocuanaja oja mimishi cuijea'yojji, chama'yo ajji. Jamaya Eyacuiñajjija esohui eyacua queahuisocuana ojaya'yo epojji ecuea enaa queaca'atii pomeecaje, epajea'yojji pojjeama. 29E'ejojonei eyaya quiana aña. Ecuea uvajjajjana' eishibeca'yojjitii pojjeama poaje jiquio meshijo nequiya. Quijje eyaya uvajjajjana' eyacua miquiananijje ishije o'oya ecue Chii Eyacuiñajjiya ojjañacuana huoojeacapoquianitii meshi Eyahuasijje.—

Jesosaa huohuicapoa Pedrohua oya bajjima nisho acaje

(Mc 14.26-31; Lc 22.31-34; Jn 13.36-38)

30Majo aniya aje Jesosa oja babaca dejjacuananijje Eyacuiñajjija esohui Salmos etehue jaajo sohuicuayamajje poquiapoa cuana eyiyoiyeao Olivos bajjani nequiyasijje. 31Ma eyiyoiyeaojo aniya Jesosaa oja babaca dejjacuana jama huohuime acapoa ba'a: —Miquiaaya jiquio mecajjetii eya jeajeananaje. Equijje eajjitii pojjeama eya quianaja poaje cua e dojocajeyasijje. Eyacuiñajjija esohui yahuajonei tehue jama poani ba'a: “Eyacuiñajjiya ovejajaahuanajji poani quecuacaje'yo. Majoya oja ovejacuana jjajeajajeaquinanaje.” Ma ecua yahuajonei ejo tehuecapoa jama pea-aiya miquianaya poaje. 32Eya emano'yo jaa Eyacuiñajjiya shequimeeca'yajje poquije Galilea meshiyasijje miquianaya cuamaya poquijjimahuajo.—

33Jesosa jama poani shajja-ajjamajje Pedrohua jama acapoa: —Ojjaña peacuana mijo jjashahuabapajeaquiajo eya ca iña mijotii jjashahuabaquipoquije. Minijjetii ca iña nequipoquije.—

34Ohua esohui jama acani shajja-ajjamajje Jesosaa jama huohuime acapoa ba'a: —E'ejojonei eyaya miya huohuiaña. Jiquio mecajjetiiya cachinayahue taaajjimahuajo miyaya eya mique bajjima nisho aje. Tres huisome miyaya esohui jama nisho aje ejo.—

35Pedrohua Jesosa jama amajamajacapoa ba'a: —Chojja de, ecuea miya bajjima nisho eajjitii pojjeama poaje. Eya jamatii minijjetii nequi quecuajeapea-aica'yajje ecuea miya bajjima nisho yajji pojjeama poaje.— Ojjaña oja babacacuaa oya esohuiya a-ajjapea-aicapoa.

Jesosa Getsemaní bajjani meshijo ani mimiapoa oja Chiinijje

(Mc 14.32-42; Lc 22.39-46)

36Majoya aje Jesosa oja babaca dejjacuananijje poquiapoa Getsemaní bajjani meshi shasha queahuiso ebana aniyasijje. Oja babaca dejjacuana jama acapoa ba'a: —Jiquiojotii quiana oe anioquesocue e jocuama poquiajo ecue Chiinijje mimiya.—

37Pedro, beca Zebedeoja bacuaejja pea-ai ca jocuamapishana dojocapoa Jesosaa. Majoya oya poquipishanamajje queayenoneenee poñaquiapoa. Queacojjayenonee poa. 38Ma onijje poquipishananajecuana Jesosaa jama acapoa ba'a: —Eya queayenoneenee jjabaquiani, mano'yani jayojja. Jiquiojotii eya ishoa-anisocue, eshetii oe anichichacue quiana.—

39Majoya Jesosa oenei poquiyeepishanapoa. Oja ecuioshajjajo anioqueñaquimajje bahua jaaoqueapoa meshiyasijje Eyacuiñajjinijje emimijji. Oya queayenonee mimiapoa jama ba'a: —Ecue Chii, miya ejo jama sapomajje a'a eya queaneenee amee'yojji, a'a eya manomee'yojji. Jamatii cua miqueanei ejjashahuabaquijji poani ejo acue, a'a ecueanei ejjashahuabaquijjijo eya nahuejji— jamaya Jesosa mimiapoa oja Chiinijje.

40Jesosa mimimajje huacuaya poe'yapoa oja babacacuana oja jeanana tres aniyasijje. Ohuaya bacaña'yapoa cuana ecahui jaa. Majoya Jesosaa Pedro jama acaña'yapoa ba'a: —Miquiana che oe hora eshe anijjimanei poanaje enijje. 41Eshetii oe quiana anichichacue. Eyacuiñajjinijje oe mimitiitiianicue queamimishi epo poanijje. Miquiaa Eyacuiñajjija echacojji asaneiaña, jamatii miquianaja eyami ca'a-ama oja echacojji eatiitiipoquiajji.—

42Majoya Jesosa poquiyeepishanao'oyapoa oja Chiinijje mimio'oyaa. Jama mimime poa ba'a: —Ecue Chii, miya jama sapomajje, a'a eya queaneenee amee'yojji, jamatii miqueanei ejjashahuabaquijji acue ejo.—

43Jesosaa oja Chiinijje mimio'oyamajje oja babaca dejjacuana oja jeanana ani bacañao'oyapoa ecahui jaa o'oya. Queacojjacahuinee poa cuana. 44Majoya Jesosa poquiyeepishanao'oyapoa oja Chiinijje mimio'oyaa. Oya esohuitiiya oya mimio'oyapoa oja Chiinijje. 45Oja Chiinijje mimijeyomajje Jesosa poeo'oyapoa oja babacacuana aniyasijje. Jama ohuaya acañao'oyapoa cuana ba'a: —¿A'a quiana cahui jaatii jomishoca jaa? Jjeyahuanei eya Dejjapojji epo iñacaje cuaa dejja mimishicuanaja equecuamee'yojji. 46Cua'a, nequisohua'yocue epoqui'yojji. Jjeya dejja joya e iñameesahuajji poaje poeani.—

Jesosa iñaca'acapoa dejjacuaa

(Mc 14.43-50; Lc 22.47-53; Jn 18.2-11)

47Jesosa oja 11 babaca dejjacuananijje mimianijotii, pea oja babaca Judas bajjani, dejja queahuisoneecuananijje poeapoa Jesosa iñaa. Baase'beca mejjicuana, acui mejji pea-ai poeapoa cuana. Ma Jesosa iñaca'aa poecuana Eyacuiñajjija equi-aijo chacochacopoquiani etii poanicuanaja, pea judío etii poanicuanaja pea-ai huoojea poa. 48Judasya o iñameesahuajji poani dejjaa poquijjimahuaa huohuicapoa cuana jama ba'a: —Joya eyaya shemo tojjoje dejja Jesosa iñaca'aneicue. Iñaca'aneimajje oya dojocue.— 49Jamajjeya Judasya Jesosa nequiyasijje jjanequichipiquimajje jama acapoa ba'a: —Esohuihuohuijji, ¿a'a mi yani?— Majoya ohuaya Jesosa shemo tojjocapoa.

50Jesosaa oya jama acapoa ba'a: —Epeejji, cua e miya asa-aña mo acuajicue.—

Majoya dejjacuaa Jesosa nequiyasijje poechipimajje iñaca'ajeacapoa edojojji ejeanobiameequijji.

51Majotiiya Jesosa iñaca'acajo oe oja babaca poani dejjaa Jesosanijje nequiya oja baase'beca jjequihuijjiacuajicapoa. Majoya ohuaya Eyacuiñajjija equi-aijo chacochacopoquiani ebionei etii poanijo chacochacoani dejja ejajajea'yojji nisho a-ajjacapoa Jesosa nahuejo. Oja shajjanei caca jajasejjajeacapoa. 52Ohua oja shajja jajasejjajeacanaje bamajje Jesosaa oya tecueacapoa jama ba'a: —Mique baase'beca oe huacuaya nequiahuosho'yocue ejjocohuasijje. Ojjaña joya baase'becajo jjajajaqui'yanicuana majotii manocaje'yo peaa jajaca'yajje. 53A'a miquea bajjima poani eyaya ecue Chii ehuohuiajjajojjemo ohuaya angelcuana queahuisonee, 12 ejércitos huisome, huoojeacame e nahueya.#26.53 Nota: 12 ejércitos de angelcuana 72.000 huiso pome epoejji o nahueya.* 54Eya jama mimime epojojjemo ma yahuajonei Eyacuiñajjija esohui tehuecapoa cuaa yajja eya acaje'yo oya jayojja ea'yojjitii pojjeama pome.—

55Majoya Jesosaa ma oque poeyanajecuana huohuiajjacapoa jama ba'a: —¿Apiojji acuae quiana poeyanaje eque baase'beca mejji, acui mejji pea-ai e iñaa? ¿A'a jja iña queamase, siipojji? ¡Chojja de! Ojjaña pojjajo eya Eyacuiñajjija equi-aiquiquibojo aniya ja'anei esohui huohuipoquianaje cuana, quehuajje pojjeama. Majo nequiya eya quianaja iñajjima poanaje. 56Jiquio miquiaaya eya jjeya jama aña ma ecua yahuajonei esohuihuohuijji poacuaa tehuecapoa yajja eya quijje acaje'yo. Jjeya oja tehue jayojjaya eya aña quiaa.— Jamaya poa Jesosa. Ma mecajjetiiya aje oja babacacuaa Jesosa oenei nequi jeajeacananapoa dejjamasecuana yajjajo. Majoya cuajicuajiquehuajeananapoa cuana.

Judío etii poanicuana Junta Suprema bajjani jjashahuabaquiapoa yajja amajje Jesosa quecuameeca'yojji

(Mc 14.53-65; Lc 22.54-55,63-71; Jn 18.12-14,19-24)

57Jesosa iñamajje dejjacuaa oya dojocapoa Caifasja equi aniyasijje. Oya Eyacuiñajjija equi-aijo chacochacopoquiani ebionei etii poa. Oja equijoya judío etii poanicuana, pea Moisesja tehuehuohuijji poanicuana pea-ai ejjachichaqui aniapoa. 58Pedrohua Jesosa queahueshapishana dojocaje equijje acapoquiapoa Eyacuiñajjija equi-aijo chacochacopoquiani ebionei etii poanija equiquibohuasijjeyee. Majoya Pedro nobiquimajje aniñaquiapoa oja equiquibojotii Eyacuiñajjija equi-aijaahuanajji soldadocuananijje. Yajja Jesosa acaje cuaa ebajji oya jjaishoaquianiapoa.

59Eyacuiñajjija equi-aijo chacochacopoquiani etii poanicuaa, pea judío etii poanicuaa Junta Suprema bajjani pea-ai ejjachichaqui aniya ba-ajjacapoa ache esohui oja siajjejo oya Jesosa quecuameeca'yojji. 60Queahuisocuana Jesosajo siajje poani o quecuamee'yojjijo shajja-ajjacapoa etiicuaa, jamatii oja mimishi o quecuamee'yojji chama'nei poa. Majoya quijje o siajje ajji poani shajja-ajjajeyocajo beca dejja Jesosa queamimishi poani nisho ajji ehuiyasijje nequipea-aiapoa. Jama jjaniñebaquime poa cuana Jesosajo ba'a: 61—Jiquio jjeya nequi dejja jama poanaje ba'a: “Eyayenei Eyacuiñajjija equi-ai queapame quecuajeabichajea'yomajje tres cahuime huiso poajo iyajeyoje'yo.”—

62Majoya aje Eyacuiñajjija equi-aijo chacochacopoquiani ebionei etii poani dejja nequisohuapoa Jesosa huohuiajjajji. Jama huohuiajjame oya acapoa ba'a: —¿Yajja saja-ame miyaya aje oja esohuijo? ¿Yajja poanijje shai jiquio esohui miya niñebacani cuaa?—

63Jesosa jamatii nequiapoa mimima'nei, jjasaja-aquijjimatii. O jama poani bamajje Eyacuiñajjija equi-aijo chacochacopoquiani ebionei etiiya oya jama huohuime acapoa ba'a: —Eyacuiñajjiya Eyajo eshe nequiya miya bacani. Jamajjeya eyaya miya huohuiaña esohui e'ejojonei acue. Ecuana jjeyanei huohuicue. ¿A'a miya Eyacuiñajjija huoojeanei poani ojjaña nahue'yojji epojji, oja Bacuaejja?—

64Jesosaa oya saja-acapoa jama ba'a: —E'e, joya ecua miya poanaje jamaya eya. Quijje eya Dejjapojji epo Eyacuiñajji queaca'aneetii poanija ebañeimijijje ani'yo baje quiaa. Miquiaaya eya botejjee nequioqueje bapea-aije.—

65Oya jama poani shajja-ajjamajje Eyacuiñajjija equi-aijo chacochacopoquiani ebionei etii poaniya oja daqui-ao oja yamijo ba'e jjequi-isajeacapoa queaqueneneenee pomajje. Jama oya poa queaquenenee ba'a: —Jiquio dejja queatainee mimiani Eyacuiñajjijo. A'a peacuana iyaajji o queamimishinee poani ehuohuijji. Miquiaaya oja esohui queamimishinee oya Eyacuiñajjija Bacua poso jjabaquiani shajja-ajjapea-ainaje. 66¿Yajja oya acajji?—

Majo anicacuaa oya saja-acapoa jama ba'a: —Oya queamimishinee poani, quecuameeca'yojji oya.—

67Majoya aje majo nequicuaa Jesosa cojja cuichojeacapoa. Oya cuianeipea-aicapoa. Peacuaa ca oya shemo cuiasejjajeacapoa oja emeya. 68Oya shemo cuiasejjajeacaquitii Jesosa ecojja bebo acapoa cuaa jama ba'a: —Miya Eyacuiñajjija huoojeanei poani jjabaquimajje, acheya miya cojja cuiasejjajeacani huohuipocue.—

Pedrohua Jesosa bajjima nisho acapoa

(Mc 14.66-72; Lc 22.56-62; Jn 18.15-18,25-27)

69Dejjacuaa Jesosa cuiacaquijotii Pedro equiquibo esecuejotii aniapoa. Majoya aje oe epona peajo chacochacoani Pedro aniyasijje poeapoa o huohui'yohua. Oya jama poa ba'a onijje: —Miya pea-aiya aje Jesosanijje ponequinaje ma provincia Galilea meshijje poe dejjanijjeya o shajja-ajjajji pea-ai epo.—

70Epona jama mimime poajo ona ejjachichaqui anicajo Pedrohua Jesosa oja bajjima nisho acapoa jama ba'a: —Chojja de, ajeo shai miya jama mimime poani, ecuea oya bajjimanei.—

71Pedro poquipishanajo esecue nequiyasijje pea eponaa oya bapea-aicapoa. Ohuaya majo anicacuana huohuipea-aicapoa jama ba'a: —Joya nequi dejja Jesosanijje enequipoqui pea-ai ma Nazaretcuiñajji dejjanijjeya.—

72O jama mimime poajo Pedrohua Jesosa oja bajjima nisho acao'oyapoa. Jama acapoa ba'a: —Eyacuiñajjiya eya bacani e'ejojonei eyaya esohui aña. Ecuea oya bajjimanei.—

73Majoya aje quijjepishana majotii anicacuana Pedro aniyasijje jjanequichipiquiapoa onijje mimiya. Jama mimime poacuana onijje ba'a: —E'ejojonei miya o shajja-ajjajji pea-ai epoya. Miya Galileacuiñajjicuana jama pea-aiya mimime poani, jamajjeya ecuanaja eba miya o shajja-ajjajji epo.—

74Majo anicacuaa jama acajje Pedrohua jama aneicapoa cuana ba'a: —Eyacuiñajjiya eya e'ejojonei queanee capomeecahua eya siajje poanijo, ecuea oya bajjimanei jiquio dejja.— Jama bajjimanei nisho ameya Jesosa acapoa. Pedrohua esohui jama acajeahuajotiiya aje cachinayahue taaapoa. 75Majoya Pedrohua shahuabacuajica'yapoa ma Jesosaa esohui huohuicanaje jama ba'a: “Jiquio mecajje cachinayahue taaajjimahuajo miyaya tres huisome esohui eya bajjima nisho aje.” Jamajjeya Pedro majo ani cuayaqui'yomajje paneineiapoa queayenonee pomajje.

Currently Selected:

MATEO 26: ESE

Highlight

Copy