MATEO 21

Jesosa poquio'oyapoa Jerusalén meshiyasijje

(Mc 11.1-11; Lc 19.28-40; Jn 12.12-19)

1Majoya aje quijje Jesosa Jerusalén meshi iyehueshanei nequi oya pueblo Betfagé meshijo nequiñaquiapoa. Oya eyiyoiyeao Olivos bajjani nequiquibopejjeneijo nequiñaquiapoa. Majo aniya Jesosaa beca o shajja-ajjajji poani dejja jama huohuime acapoa huoojeajjimahua ba'a: 2—Poquicue so'o jiquio ese ani cojjaneijo ani meshiyasijje. Majo nequiya oe mapichi epona enaa jeyo nequi bañaquije oja bacuayahuesho'inijje nequi. Ma mapichisho'i epona pichomajje yecue jiquiacua bacuañatii. 3Majo anicacuaa jama acajje ba'a: “¿Apiojji acuaeya mapichi pichonaje?” Ohua jama acajje jama acue quiaa ba'a: “Emeshimeseneiya oya sacani. Quijjepishana aje jeahuaje'yo.” Jamaya oe acue cuana.—

4Jamaya Jesosaa huohuicapoa ma ecua yahuajonei Eyacuiñajjija sohuihuohuijji poa dejjaa tehuecapoa jayojja yajja quijje Eyacuiñajjija huoojea poaje. Jama tehueme acapoa yahuajonei ba'a:

5“Huohuiquicue Sión meshijo ba'ecacuana jama ba'a:

Bacue, miquianajaya emeshimesenei poeje.

Oyanei queaca'a poani jjabaquiajja.

Jamajjeya oya mapichisho'ija edaasajo eanisohuaqui ani poeje.

Mapichi aquiana dojojji poanija bacuaja edaasabiajje eanisohuaqui ani oya poeje” jamaya tehuecapoa.

6Majoya aje ma beca dejja Jesosa shajja-ajjajji poani poquiapoa. Ma Jesosaa o huohuicanaje huisotii esohui jayojjaya acapoa. 7Mapichi oja bacuayahuesho'iñatii yecapoa. Oja daqui-ao mapichisho'ija daasabiajje iyacapoa o quii-anijji. Majoya Jesosa anisohuaquiapoa mapichisho'ija daasabiajje ani epoquijji. 8Ma meshijo queahuisoneecuana jjachichaquicapoa Jesosajo. Cua Jesosa poquijejje oja huosho ba'e daqui-ao huanacapoa cuaa ejeojjijo o queapame bihuiajjequijji. Peacuaa ca jememeiña jayojja jajasejjacapoa ejeojjijo ehuanajji pea-ai. 9Queahuisoneecuana poquicapoa Jesosanijjetii. Ma ehuinei poquicapoacuana, ma o quiijje poquicapoacuana pea-ai oya esohui taaacapoquiapoa janobajjimanei jama ba'a: —Jiquio emeshimese Davidja osecua poeyanaje ejjabihuiaqui. Oya eseja Emeshimeseneija huoojea, Eyacuiñajjiya oya queapamenee ca-acahua. ¡Eyacuiñajji Eyajo nequi ejjabihuiaqui!—

10Majoya aje Jesosaa Jerusalén meshi bacañaquiajo ojjaña majo ba'ecacuana cuajicuajicajebeapoa o baa. Majotii ba'ecacuana jama mimime pocapoa oopana ba'a: —¿Ache dejja shai jjeya jiquio eseque poeyanaje?—

11Jama saja-ame acapoa cuaa ba'a: —Oya Eyacuiñajjija esohuihuohuijji poani Jesosa bajjani. Oya Nazaretcuiñajji provincia Galilea meshijo nequi dejja.—

Jesosaa dejjacuana ehuone quiapoequi enaa jehui'yojji huoojeacuayajeacapoa oja Chiija equi-aiquiquibojo nequica

(Mc 11.15-19; Lc 19.45-48; Jn 2.13-22)

12Majoya aje Jesosaa Eyacuiñajjija equi-aiquiquibohuasijje nobiquimajje majo anica ehuone quiapoequi, aquiana jjeshepoequi pea-ai huoojeacuayajeacapoa esecueyasijje. Pea bejjo sosejje jjeshejji poanicuanaja bejjojaajji mesacuana Jesosaa jeapajjajeacapoa. Oya jayojja huia' quiajji poanicuanaja equii-anijji jeapajjajeacapoa. 13Jesosaa jama tecueame acacuanapoa ba'a: —Eyacuiñajjija esohui jama poani: “Jiquio equi-ai ecuea enijje emimipoquijji ani.” Miquiaaya caca oe siipojjicuana anijji anaje.—

14Quijjepishana Jesosa Eyacuiñajjija equi-aiquiquibojo anijotii aje cojjama'cuana, quibojjishacuana pea-ai o aniyasijje jjanequichipiquiapoa. Jamajojoya aje ohuaya jjacojjaja'ameequica'yapoa cuana, jeomeeca'yapoa cuana pea-ai. 15Eyacuiñajjija equi-aijo chacochacopoquiani etiicuana, Moisesja tehuehuohuijji poanicuana pea-ai ohua dejjaja ajjima'neineicuana acaje bacapoa. Esho'iquiana Eyacuiñajjija equi-aiquiquibojo taaaqui shajja-ajjapea-aicapoa. Jama taaame poa esho'iquiana ba'a: —Oya ejjabihuiaqui emeshimese Davidja osecua.— Jama poequi shajja-ajjamajje etiicuana queaquene poa ma esho'iquianaja esohuijoya.

16Majoya aje etiicuaa Jesosa jama acapoa ba'a: —¿A'a miyaya shajja-ajjaña jiquio anicacuana taaani esohui mi bihuiajjijo? Miya jama aca-ajja cuanaja.—

Jesosaa saja-acapoa cuana ba'a: —E'e, shajja-ajjaña. A'a miquianajaya ajjima' so'o Eyacuiñajjija esohui etehue jiquio jjeya acani cuaa. Jama etehue jaa ba'a:

“Eyacuiñajji, miyaya esho'iquiana,

joya ebacuasho'i tojjojo ba'eca pea-ai

mi bihuiajji epojji pomeeaña.”—

17Majo nequiya Jesosaa judío etii poanicuana jiñacapoa. Oya Jerusalén meshijo ani poquiapoa Betania meshiyasijje majotii cahuichichaa.

Jesosaa acui higo jjajjama'tii nequi o yaa'yojjijo huohuicapoa

(Mc 11.12-14,20-26)

18Majoya aje Jesosa pea pojjajo mecajjeahuanei huacuaya Jerusalén meshiyasijje poquio'oyani queashoenee poani jjabaquiapoa. 19Ohuaya poquijeya oe acui higo bajjani ejeojjisahuajo nequi bacañaquiapoa. Majoya ohuaya acui nequiyasijje jjanequichipiquimajje bacapoa jjajjama'nei, iña oopana nequi. Jamajjeya Jesosaa acui higo jama acapoa ba'a: —Miya ejjajjao'oyajji pojjeamatii nequije'yo.— Ohua esohui jama acajeahuajotii acui higo nequi yaanana'yapoa.

20Oya yaacuajinanaje'yo bamajje o shajja-ajjajji poanicuana jjabaneineiquiapoa Jesosajo. Majotii nequiya Jesosa huohuiajjaneicapoa cuaa jama ba'a: —¿Yajjajje shai joya acui higo nequi mi ojo mimijeahuajo yaananacuaji'yonaje?—

21Jesosaa saja-acapoa cuana jama ba'a: —Eyaya e'ejojonei quiana esohui huohuiaña. Miquianaya e'ejojonei ejo jjashahuabaneiqui'yani jjabaquimajje beca jjashahuabaquime ejo po-ajjanei pomajje jiquio ecua eyaya acui higo nequi a'yonaje jama pea-aiya miquiaaya aje. Mahuisotii pojjeama quiaa aje. Miquiaaya jiquio nequi eyiyo jama ajje ba'a: “Jocuama nequiqui'yocue bae-ai enaojjohuasijje” miquiaa jama ajje oya cuamaya nequiquije'yo. 22Jamajjeya ojjaña cua miquianaya mimianijo Eyacuiñajjinijje e'ejojonei ojo ejjashahuabaqui'yo nequi ohuaya cua miquiaa saña huisotii quiacaje— jamaya poa.

Jesosa Eyacuiñajjija huoojea poa, oyaneitii pojjeama poe

(Mc 11.27-33; Lc 20.1-8)

23Majoya aje Jesosa Eyacuiñajjija equi-aiquiquibohuasijje nobiquio'oyapoa. Ohua majotii esohui huohuicaquijo Eyacuiñajjija equi-aijo chacochacopoquiani etii poanicuana, pea judío etii poanicuana pea-ai o aniyasijje jjanequichipiquiapoa. Jama huohuiajjame acapoa cuaa Jesosa ba'a: —¿Ajea esohuijo acuae mi poeyanaje jiquiacua ecuanaque ona sohuihuohuiya, jiquio ehuone quiapoequicuana huoojeacuayajeaa pea-ai? ¿Ajea huoojea acuae mi?—

24-25Etiicuaa jama acajje Jesosaa jama huohuime acapoa ba'a: —Eyaya miquiana ebionei esohui huohuiajjaje so'o. ¿Aya shai Juan huoojeacanaje ona iñajeanobiaa enaojjohuasijje: a'a Eyacuiñajjiya, a'a dejjacuaa? Miquiaaya eya queaja'a saja-ajo, eyaya pea-ai miquiana huohuije ajea esohuijo eyaya ehuone quiapoequicuana huoojeacuayajeanaje.—

Majoya etii poanicuana onijje etiicuananijje oopana mimimimiapoa jama ba'a: —Eseyaya jama saja-ame oya ajo ba'a: “Eyacuiñajjiya oya Juan huoojeacanaje.” Jama saja-ame ajo ohuaya eseya jama acaje ba'a: “Jamajjeya, ¿yajjajo shai miquiaaya oja esohui mishajja-ajjanaje?” 26Eseyaya jama saja-ame oya ajo ba'a: “Juan Eyacuiñajjija huoojea pojjeama, oya ca dejjacuanaja huoojea poanaje” jama saja-ame ajo, queahuisocuana quenequeneje esenijje oya Juan Eyacuiñajjija huoojea poanaje queahuisocuaa bacanajejojoya.— 27Majoya etiicuaa ojee onijje etiicuananijje mimimimimajje Jesosa jama acapoa ba'a: —Ecuanaja bajjima ajea huoojea poanaje Juan ona iñajeanobiajji enaojjohuasijje.—

Jamajjeya Jesosaa etiicuana saja-acapoa jama ba'a: —Miquianajaya bajjimajo ecuea ehuohuijji pojjeama pea-ai poaje ajea esohuijo eya poeyanaje ona sohuihuohuiya, jiquio ehuone quiapoequicuana Eyacuiñajjija equi-aiquiquibojo ani huoojeacuayajeaa pea-ai.—

Jesosaa huohuicapoa cuana esohui ebameesahuajji ebacuaejja becajo

28Majotii nequiya Jesosaa etii poanicuana huohuitiicapoa jama ba'a: —Jiquio esohui shajja-ajjaneicue eyaya quiana huohuije. Oe dejja bacuaejja beca poanaje. Ohuaya oe oja bacuaejja huohuicanaje jama ba'a: “Jjeya jiquio pojjajo poquicue cha, ecue uvajjajja que chacohua.” 29Oja bacuaejjaa oja chii saja-acanaje jama ba'a: “Chojja de, cajaa, eya poquisapo-ajja.” Majoya oya quijje pea jjashahuabaquime pomajje poquinaje cuamaya chacohua. 30Majoya quijje oja chiiya pea oja bacuaejja oya esohuiya huohuicanaje o poquipea-aijjijo chacohua. Ma pea oja bacuaejjaa oya jama anishocanaje ba'a: “Ee ecue chii, eya cuamaya poquipea-aije chacohua.” Jamatii oya poquijjimatii poanaje.— 31Majoya Jesosaa esohui jama huohuijeyomajje huohuiajjacapoa cuana jama ba'a: —¿Ache oja bacuaejja beca oja chiija esohuijo e'ejojonei jjashajja-ajjaquinaje?—

Saja-acapoa cuaa oya jama ba'a: —Ma ebionei ohua huohuicoocanaje ebacuaejja, maya.—

Majoya Jesosaa huohuipea-aicapoa cuana jama ba'a: —Eyaya quiana e'ejojonei esohui aña. Eponacuana joya jjacojjomeequiani bejjo sosejje, joya bejjo chichapoquiajji poanicuana Roma emeshimeseja yajji miquianaja ejjocojo poquicaje'yo Eyacuiñajjiya ojjañacuana huoojeacapoquianitii meshi Eyahuasijje. 32Juan ona iñajeanobiajji poanaje dejja ebionei poeyanaje miquiana sohuihuohuiya Eyacuiñajjija esohuijo miquiana queaja'a eba'epoquijji nisho. Jamatii miquianaya oja esohui shajja-ajjasapo-ajjatii poanaje. Roma emeshimeseja yajji bejjo chichapoquiajji poanicuana, eponacuana joya jjacojjomeequiani bejjo sosejje pea-aiya ca oja esohuijo e'ejojonei jjashahuabaqui'yonaje. Jiquio queamimishica'a ba'epoquianicuana pea jjashahuabaquime po'yani bamajje miquianaya jamatii ba'epoquinaje oja esohuijo jjashahuabaqui'yosapo-ajjatii nequi— jamaya acapoa.

Esohui ebameesahuajji que chacojji poani dejja queamasecuanajo huohuipea-aicapoa

(Mc 12.1-12; Lc 20.9-19)

33Majoya aje Jesosaa pea esohui ebameesahuajjijo huohuipea-aicapoa cuana jama ba'a: —Shajja-ajjaneicue quiaa jiquio esohui. Oe dejjaa equemeseya oe oja quejo uvajjono banameecanaje. Majoya ohuaya oja que peeimeecanaje uvajjajja anijji meiya. Ohuaya mei queaquemo quecuapejjameecanaje uvajjajja quishipashajji ena' nequijji. Majoya oja uvajjajja meshijaahuanajji mei iya-aoaomeecanaje eyajo nequija siipojjicuana poeje ebajji. Majoya quijjepishana ohuaya oja meshi uvajjajja anijji dejjacuana majotii echacochacojji bacanaje. Ma oja uvajjono que chacojji dejjacuana huohuinanamajje ache echacojji ojaya acajji oya poquinaje queahuesha pea meshiyasijje. 34Majoya quijje uvajjajjacuana oja banamee jahuajo equemeseya pea ojo chacochacoanicuana huoojeacanaje cuamaya oja meshi uvajjajja aniyasijje oja sejja'yo ma ojaya yajji huisotii jjequi'yohua. 35Majoya aje oja que chacojji po-ani dejjacuaa equemeseja huoojeacuana oja sejja jjequi'yohua nisho poeajo iñaca'ajeacajjequinaje. Oe cuianeineicanaje. Pea ca quecuajeaca'yonaje. Pea ca meiya jajahuejjajeaca'yonaje. 36Majoya aje quijje equemeseya pea ojo chacochacoanicuana huoojeapea-aicanaje cuamaya. Jamatii oja que chacojji po-anicuaa oya jayojja acajjequio'oyanaje. Cuianeineicajjequinaje oja huoojeacuana.

37Majoya aje quijjenei equemeseya oja bacuaejjanei huoojeapea-aicanaje oja que chacojji poanicuana baa. Equemese jjashahuabaquinaje jama ba'a: “Ecue bacuaejjanei poeje bamajje ca oya queapame acajjequije cuaa” jamaya eacaje posoya acapoa. 38Majoya oja bacuaejjanei poeje bamajje oja que chacojji po-anicuana ojee mimimiminaje jama ba'a: “Bacue, jiquio poeje dejjaa ojjaña jiquio meshi mesenacaje'yo, ojayatii acaje'yo. Jamajjeya oya jjeyahuanei ejjacuiajeaqui'yo. Majoya jiquio meshi esejayatii poaje'yo.” 39Jamajjeya oya poeajo iñaca'ajeacajjequinaje cuaa. Majoya oya uvajjajja quejo ani queahueshapishana dojomajje cuiahuejjajeaca'yonaje cuaa.—

40Jesosaa esohui mahuiso huohuijeyomajje huohuiajjacapoa cuana jama ba'a: —Equemeseya oja queyasijje poquimajje, ¿yajja jjashahuabaquiani quiana ohuaya oja que chacojji po-anicuana acañaquije?—

41Judío etii poanicuaa jama saja-ame acapoa oya ba'a: —Ohuaya ma queamimishinee oja que chacojji po-anicuana cuiahuejjajeacuajimeecaje'yo ojo queayeno jjashahuabaquijjimaneiya. Majoya equemeseya pea dejjacuana oja que chacojji epojji bacaje'yo. Uvajjajja jahuajo oque ejeaquijjijo oja sejja'yo huohuipea-aicaje macuanaya— jamaya acapoa cuaa.

42Majoya Jesosaa huohuipea-aicapoa cuana jama ba'a: —¿A'a quianaja ajjima' so'o Eyacuiñajjija esohui etehue jaa? Jama poani ba'a:

“Jiquio mei-ai equi-ai peeijji ebionei enequiasohua cajaa acanaje cuaa.

Jamatiiya Eyacuiñajjiya onaja cajaa'ya oya mei-aiya ebionei equi peeijji nequiasohuaca'yonaje.

Eseya baña jama queapamenee”

jamaya yahuajonei etehue jaa ojaya esohui. 43Jamajjeya eyaya quiana queaja'a huohuiaña. Yahuajonei Eyacuiñajji jjashahuabaquiapoa miquianaya oja meshiyasijje, ma ohua ojjañacuana huoojeacapoquianitiiyasijje miquianaya cuama epoqui'yojjijo. Jjeya ca quiana ca oe cuamaya epoqui'yojji pojjeama o sapo-ajja poanijjejojoya. Jamajjeya Eyacuiñajjiya ca peacuana jjeya baca'yani cuama epoqui'yojji joya oja esohuijo jjashajja-ajjaneiquipoquijecuanaya. Jamaya Eyacuiñajji sapoani. 44Dejja joya mei-ai aniyasijje oqueje jjacuiasejjajeaquije'yo mei-aijo. Ma dejja o anibiajje oqueajo mei-aiya jajapashajeacaje'yo— jamaya huohuicapoa.

45Eyacuiñajjija equi-aijo chacochacopoquiani etiicuana, fariseo dejjacuana pea-ai Jesosaa esohui jama huohuime acani shajja-ajjamajje jjabaquiapoa cuana Jesosa ojo mimiani. Jamajjeya queaquenenee poa onijje. 46Jesosa ejeanobiameejjijo jjashahuabaquiapoa. Jamatii Jesosa e'ejojonei Eyacuiñajjija esohuihuohuijji poani queahuisocuaa acajjequiani bamajje etii poanicuaa Jesosa mi-iñameecapoa ona queahuiso ejjachichaqui anica yajjajo.

Currently Selected:

MATEO 21: ESE

Highlight

Copy