MATEO 19

Jesosaa esohui huohuicapoa ejjahueiquijjijo

(Mc 10.1-12; Lc 16.18)

1Majoya aje Jesosa esohui huohuijeyomajje provincia Galilea meshijo ani poquiapoa provincia Judea meshiyasijje Jordán cuei eshequi jaasohuani ojjemijiyasijje. 2Queahuisocuaa oya cuamaya equijje acapoquiapoa. Ma meshijo nequiya Jesosaa emanocuana jja-ajameequica'yapoa.

3Majo ani beca fariseocuaa Jesosa aniyasijje jjanequichipiquimajje huohuiajjacapoa a'a ohua huohuitaicaje ebajji nisho. Jama huohuiajjame acapoa oya ba'a: —¿A'a Moisesja etehueya huohuicani dejjacuaa oja huanase hueicajji jamatii ani o hueisa-amajje?—

4Jesosaa saja-acapoa cuana jama ba'a: —Eyacuiñajjija esohui etehue jaa miquianaja ea. Jama poani oja esohui etehue jaa ba'a: “Ebionei Eyacuiñajjiya oe dejja, epona pea-ai panacapoa.” 5Eyacuiñajji jama popea-aiapoa yahuajonei ba'a: “Jamajjeya dejjacuaa oja chii, oja nae pea-ai jiñacaje jjahuanaquimajje ehuanasenijjenei eba'epoquijji. Oya oja huanasenijjenei ba'epoquije oe eyami jayojja epojji, beca pojjeama.” 6Jamaya oya ba'epoquije becatii pojjeama, oe eyami jayojja ca ba'epoquije. Jamajjeya dejjacuaa oja huanase hueica-ajja Eyacuiñajjiya esohui yahuajonei huohuicapoajojoya dejja oja huanase oenijje ojee queapame ba'epoquije oe eyami jayojja— jama saja-ameya Jesosaa acapoa.

7Majoya aje Jesosa pea esohui huohuiajjacao'oyapoa cuaa jama ba'a: —Eyacuiñajjija esohui jama poanijo, ¿yajjajo shai Moisés pea esohui tehuemeecapoa jama ba'a?: “Dejjacuaa oja huanase hueisa-amajje papeni ejjahueiquijji ebionei oya quiaca'yojji. Majoya oya apoa jama amajje jiñacaje'yo yahueya.” Jama huohuimeya acapoa Moisesya cuana yahuajonei— jamaya acapoa fariseocuaa.

8Ohua jama acajje Jesosaa jama huohuime acapoa ba'a: —Miquiana Eyacuiñajjija esohuijo shajjama' jayojja poanijojoya Moisés pea esohui tehuemeecapoa ehuanase hueijjijo. Yahuajonei jjeyaneitii pea-ai Eyacuiñajji jama sapo-ajjatii poani. 9E'ejojonei eyaya quiana huohuiaña. Joya oja huanase hueijji poaje dejja jamatii pea dejjaja oya cojjojjima ejjahueaqui ani, coma dejja pea eponajo jjahuanaqui'yomajje oya peacojjojji poani bacani.—

10O jama poani shajja-ajjamajje Jesosa shajja-ajjajji poani dejjacuaa jama acapoa oya ba'a: —Jiquio esohui dejjacuaa oja huanasecuana hueica-ajja shajja-ajjamajje ecuana jjashahuabaquiani queapame pojjeama ejjahuanaquijji.—

11Majoya Jesosaa jama huohuipea-aicapoa cuana ba'a: —Jiquio esohui dejjacuana jjahuanaquiajja epojjijo ojjaña dejjacuanaja yajji pojjeama. Eyacuiñajjiya becacuana jamaya jjashahuabameequicani jamatii enequipoquijji shacuima'tii. 12Enequi dejjacuana iyehuiso jamatii jjahuanaquiajjatii epojji. Becacuanaja tiimajje oja yami queapame pojjeama poani ejjahuanaquijji eponajo. Peacuana ca jjabiñajjajeameequiani peajo, jamajjeya oya ejjahuanaquijjitii pojjeama poaje. Peacuana ca jamatii oenei ba'esapoani Eyacuiñajjijo echacochacopoquijji. Jamaya ma dejjacuana queapame caba'epoquiahua oya jama posapomajje.—

Jesosaa esohui queapame acapoa esho'iquianajo

(Mc 10.13-16; Lc 18.15-17)

13Majoya aje esho'iquiana yecapoa cuaa Jesosa aniyasijje esho'iquianaja sapabiajje oja eme ehuanajji, Eyacuiñajjinijje emimijji o queapame ajjijo. Jamatii Jesosa shajja-ajjajji poani dejjacuaa ma esho'iquiana yejji poanajecuana tecueacapoa oja esho'iquiana yejjima yajji. 14Ohua jama tecueame acaje shajja-ajjamajje Jesosaa o shajja-ajjajji poani dejjacuana jama huohuime acapoa ba'a: —¡Chojja! A'a esho'iquiana yejji poanicuana tecueajji. Ohuaya cayecahua eque. Bacue, ojjaña jiquio ejo ani esho'iquiana jjashahuabaqui'yani jayojja comaya nobiquije'yo Eyacuiñajjiya ojjañacuana huoojeacapoquianitii meshi Eyahuasijje— jamaya poa Jesosa.

15Majotii aniya Jesosaa esho'iquianaja sapabiajje oja eme huanacapoa Eyacuiñajjinijje emimijji ojo. Esho'iquiana jama ajeyomajje Jesosa poqui'yapoa.

Oe dejja quea-aquianahuiso poani miminequiapoa Jesosanijje

(Mc 10.17-31; Lc 18.18-30)

16Majoya aje oe dejja poeapoa Jesosaque. Jama acañapoa ba'a: —Esohuihuohuijji, ¿ae queapame ecuea che acajji Eyahuasijje eba'etiitiipoqui'yojji?—

17Jesosaa oya saja-acapoa jama ba'a: —¿Apiojji shai miyaya eya huohuiajjaña ajeo mi queapame pojjijo? Eyacuiñajji oenei nequi queapameneetii popoquiani. Miya Eyahuasijje ba'etiitii'yosapomajje ojjaña Eyacuiñajjija esohui Moisesja tehuecuana jayojja e'ejojonei ba'epoquicuetii.—

18Ma dejjaa Jesosa huohuiajjacapoa jama ba'a: —¿Ache oja esohuicuanajo shai eya jjashajja-ajjaquipoquije?— Jesosaa oya saja-acapoa jama ba'a: —Miquea ojjaña Eyacuiñajjija esohui Moisesja tehuecuana eba: A'a pea dejja quecua'yojji. A'a pea eponanijje jaajji mique huanase pojjeamanijje. A'a siipojji. A'a peacuana siajje ajji oya queamimishi poani. 19Mique chii, mique nae pea-ai queapamenee apoquiacue, oja esohuijo oe jjashajja-ajjaquicue.

Joya minijje ba'ecacuana queajeanee apoquiacue jiquio ecua miyanei queajeanee jjanahuebaquiani jama pea-aiya peacuana apoquiacue.— Jamaya Jesosaa acapoa.

20Majoya aje ma dejjaa Jesosa saja-acapoa jama ba'a: —E'e ojjaña jiquio miya huohuinaje huisotii esohui jayojjaya eya ba'epoquiani esho'yahuatii. ¿Ache pea esohui shai ecuea ajjima' poani so'o?—

21Jesosaa oya huohuipea-aicapoa jama ba'a: —Miya e'ejojonei queapamenee mimishiamanei jjabameequisapomajje Eyahuasijje eba'etiitii'yojji jamaya acue ba'a: Poqui'yosocue miquea equiyasijje ojjaña miquea aquianacuana peacuana quia'yohua bejjo sosejje. Majoya aema'cuana mique bejjo quiajeyo'yocue o asahuajji. Jama poajoya Eyacuiñajjiya mi queabihui ponequi'yojji queahuiso quiacaje quijje Eyahuasijje nequi'yajo. Jamajjeya ojjaña miquea aquianacuana quiajeyo'yomajje poecue eque enijje po'yohua.—

22Jesosaa jama huohuime acajje ma dejja queacojjayenonee ponanapoa quea-aquianahuisonee poanijjejojo.

23Majoya Jesosaa o shajja-ajjajji poanicuana huohuicapoa jama ba'a: —¡Queacamajanee poani dejjacuana quea-aquianahuisonee poanija epoqui'yojji Eyacuiñajjiya ojjañacuana huoojeacapoquianitii meshi Eyahuasijje! 24Bacue, camello ehuone queaquemonee. Queacamajanee agujaquiihuejjajje camelloja ejjayejjequijji. Jama pea-aiya queacamajaneenee poaje dejja quea-aquianahuisoja epoqui'yojji Eyacuiñajjiya ojjañacuana huoojeacapoquianitii meshi Eyahuasijje.—

25Jesosa jama poani shajja-ajjamajje o shajja-ajjajji poanicuana oja esohuijo jjabaneineiquiapoa. Jamajje Jesosa huohuiajjacapoa cuaa jama ba'a: —Jamajojjemo, ¿ache dejja shai Eyahuasijje poqui'yome?—

26Jesosaa o shajja-ajjajji poanicuana cojja baneimajje jama acapoa ba'a: —Dejjacuana oyaneitii nequi ejjanahuequi'yojji pojjeamatii Eyahuasijje epoqui'yojji. Eyacuiñajjija caca oe oya nahueca'yojji; chama'neinei ojaya queacamaja eajji.—

27Majotii nequiya Pedrohua Jesosa jama acapoa ba'a: —Ecuaaya caca oe ojjaña ecuanaja aquianacuana, echacojjicuana poanaje jeana'yonaje minijje epo'yojji. Jamajjeya, ¿ae shai ecuana Eyacuiñajjiya quiacaje esosejje?—

28Pedro jama mimime poani shajja-ajjamajje Jesosaa huohuicapoa cuana jama ba'a: —E'ejojonei eyaya quiana esohui huohuiaña. Meshi pea eyacua aca'yajo eya Dejjapojji epo queaca'aneetii queasajajanee anioqueje equii-anijji queajijineejo Eyahuasijje ojjañacuana huoojeapoquiajjitii epojji. Ma pojjajotii quijje miquianaya pea-ai enijjetii queaca'a anioqueje Israelcuiñajjicuana huoojeapoquiajji epojji. Ma Jacobja 12 huisome bacuaejjaja osecuacuana huoojeapoquiajji epojji nequije quiana. 29Jamajjeya ojjaña joya oja meshi, oja equi, oja chii, oja nae, oja bacuacuana, oja jjo'i, oja dohue pea-ai jiñajji poani enijje epo'yojji, queahuisonee 100 huisome Eyacuiñajjija quia o queabihui ponequi'yojji ohuaya jjeshecaje. Eba'etiitiipoqui'yojji ohuaya jjeshepea-aicaje. 30Becacuana joya ca'a-ama jjeya bacani cuaa, oe-ejjenei nequi jayojja, comacuanaya ma pojjajo Eyacuiñajjiya ebionei nequimeecaje. Peacuana ca queaca'anee jjabaquiani ehuijo nequi jjeya ma pojjajo quijje Eyacuiñajjiya macuanaya oe-ejjenei nequimeecaje.—

Currently Selected:

MATEO 19: ESE

Highlight

Copy