MATEO 17

Jesosa queacojjajijinee poa, jjahuapacuajiquiapoa

(Mc 9.2-13; Lc 9.28-36)

1Majoya aje quijje seis cahuime huiso jjayejjequiajo Jesosaa eyiyo quea-ao nequiyasijje dojosohuaquicapoa Pedro, Santiago, Juan pea-ai onijjetii ejeojjijje. Peacuana ca poquijjima poa onijje. 2Ma eyiyo quea-aojo nequi Jesosa pea cojja ponanapoa oja babaca poani oja dojosohuaqui, trescuana ojee o cojjaneijo nequijo. Oya queacojjajijinee poa eshequi queajijinee nequiani jama. Oja daqui quea-oshesiyoja'anee poa epojja jama. 3Jesosa majo nequi mimije ma yahuajonei Eyacuiñajjija esohuihuohuijji poa Moisesnijje, Eliasnijje pea-ai bacapoa cuaa. 4Majoya Pedrohua Jesosa jama acapoa ba'a: —Emeshimesenei, queapame eseya jiquiojo ani. Miya sapoanijo ecuaa tres equisisicuana jjeya huanasohuaje. Oe miquea epojji, pea ca Moisesja, pea ca Elías anijji ecuaa jjeya huanasohuaje.—

5Pedro onijje mimianijotii bo quea-oshesiyonee nequioqueñapoa. Majoya queyacañapoa cuana bohua. Ohuaya shajja-ajjacapoa botejjee nequi mimije jama ba'a: —Jiquio ecue Bacuaejja queajeaneenee poani, ecue babaca. Jamajjeya oya shajja-ajjaneicue.—

6Eyacuiñajji mimiani shajja-ajjamajje oja babaca dejjacuana ecuioshajjajo nequinanapoa, hui jaaoquenanapoa pea-ai meteneimajje. 7Jesosa oque jjanequichipiquiapoa. Ohuaya jama huohuime acapoa cuana emeya napamajje ba'a: —Nequisohua'yocue. ¡A'a queamete pojji!—

8Jjabajeasohuaqui'yomajje Jesosa oenei nequi bacapoa cuaa. Chama'nei pea onijje nequi bacapoa. 9Majoya jaaoquequi'yaniya eyiyojje Jesosaa acapoa cuana jama ba'a: —Jiquio jjeya miquiaa banaje, ¡a'a oe peacuana huohuiñaqui'yojji! Eya, Dejjapojji epo, Eyacuiñajjiya shequimeeca'yajo quiana oe majoya huohuipo'yocue.—

10Oja babaca dejjacuaa Jesosa huohuiajjacapoa jama ba'a: —¿Yajjajje shai Moisesja tehuehuohuijji poanicuaa esohui huohuicani Elías ebionei poeje?—

11Jesosaa saja-acapoa cuana jama ba'a: —E'ejojonei Eyacuiñajjija esohui jama poani. Ebionei Elías poeje. Ohuaya ojjañacuana apoa epojji Eyacuiñajjija huoojea ishoajji esohui huohuicañaje. 12Eyaya quiana huohuiaña Elías epoe. Oya poeyanaje bajjima poanaje cuanaja, pea poso oya acanaje cuaa. Jamajjeya cua oya queaneenee amee'yosa-acanaje huisotii oya queanee ameeca'yonaje cuaa. Oya jayojja pea-aiya eya Dejjapojji epo queaneenee ameecaje'yo cuaa.—

13Jesosa jama mimime poani shajja-ajjamajje oja babaca dejjacuana queaja'a jjashahuabaquiapoa Jesosa Juan ona iñajeanobiajji poanaje dejjajo mimiani, Elías dejjaneijo pojjeama mimiani jjabaquiapoa.

Jesosaa oe dejjasho'i eshahuamase yamima' pomeeca'yapoa

(Mc 9.14-29; Lc 9.37-43)

14Majoya aje quijjepishana Jesosa ona ejjachichaqui anicahuasijje poeo'oyajo oe dejja Jesosaque jjanequichipiquiapoa. O nequi cojjaneijo oja ecuioshajjajo nequioqueñapoa Jesosa huohuiajjaneijji. Jama acapoa ba'a: 15—Emeshimesenei, ecue bacuaejja queapame pomee'yocue. Oya niñepoquiani queahuiso. Niñeya oya jeacani cuaqui jijiquiyasijje, enahuasijje pea-ai. Queaneenee oya pomeecani. 16Eyaya oya dojoajjanaje mi shajja-ajjajji poani dejjacuanaja o sapaniñema' pomee'yohua nisho. Ojaya oya sapa niñema'yo pomee'yojjima poanaje— jamaya poa oya.

17Majoya Jesosaa jama acapoa cuana ba'a: —Miquianaya jiquio jjeya eshe ba'ecacuana queamimishica'a poani. Miquianaya ejo jjashahuabaqui'yoajjatii ba'epoquiani. ¿Ache ba'i huiso shai eya jiquio meshijo miquiananijje nequije so'o? Eya miquiananijje enequitiitiijji pojjeama.— Majoya Jesosaa ma dejja jama acapoa ba'a: —Jiquiacua jjeyahuanei mique bacuaejja jjequicue eque.—

18Majoya Jesosaa eshahuamase esho'ija yamijo nequi tecueacapoa. Ohua eshahuamase jama acajje cuayananaqui'yapoa oja esohuijo. O cuayananaqui'yojeahuajotii dejjasho'i queapame ponana'yapoa sapa niñema'yo.

19Majo anicacuana poqui'yajo Jesosaja babaca dejjacuaa oya huohuiajjacapoa onijjenei ani'yomajje jama ba'a: —¿Yajjajje shai ecuana eshahuamase oja yamijo nequi huoojeacuaya'yoajja poanaje?—

20-21Jesosaa jama saja-ame acacuanapoa ba'a: —Miquiaaya oepojjinei ejo jjashahuabaquianiyajjejojoya oya mihuoojeacuaya'yonaje. Eyaya quiana e'ejojonei huohuiaña miquianaya e'ejojonei ejo jjashahuabaqui'yanijo jamatii oepojjinei jiquio ecua mostaza so'bisonei quemoajjaya poani jayojja Eyacuiñajjiya quiana shajja-ajjacaje. Jama jjashahuabaqui'yome pomajje miquianaya jama pome ba'a: “Jiquio nequi eyiyo queahuesha canequiqui'yahua pea ejjocohuasijje.” Oya nequiquije'yo miquianaja esohuijo miquiana jama e'ejojonei jjashahuabaqui'yome poanijo. Miquianaya queaca'anee poaje ojjañacuana ajji. Ojjaña cua queacamajanee eajji miquianajaya camaja-ama acajji poaje.—

Jesosaa huohuicao'oyapoa cuana quijje o mano'yojjijo

(Mc 9.30-32; Lc 9.43-45)

22Jesosaa o shajja-ajjajji poanicuananijje poaequiequiya provincia Galilea meshijje jama acapoa cuana ba'a: —Dejja cuaa eya Dejjapojji epo iñameecaje. 23Majoya eya quecuameecaje'yo cuaa. Jamatii tres cahuime huiso eya emano'yo jaa Eyacuiñajjiya eya shequimeecaje'yo— jamaya poa Jesosa. Ohua esohui jama huohuime acajje o shajja-ajjajji poanicuana queayenonee ponanapoa.

Eyacuiñajjija equi-ai queapametii eanipoquijji bejjo jjeshecapoquiapoa cuaa

24Majoya aje quijjepishana Jesosaa o shajja-ajjajji poanicuaa pea-ai Capernaúm meshi bacañaquiajo Eyacuiñajjija equi-ai Jerusalén meshijo ani jaahuanajji dejjacuana bejjo jjeshejji poani poquiapoa Pedro baa. Oya huohuiajjacañaquiapoa cuaa jama ba'a: —¿A'a mi sohuihuohuijji poani dejjaa sosequiacani Eyacuiñajjija equi-ai queapame eanipoquijjijo?—

25Pedrohua saja-acapoa cuana jama ba'a: —E'e, ohuaya sosequiacani.—

Majoya Pedro equiyasijje nobiquiapoa Jesosanijje majo mimiya. Jesosa ca ebionei onijje jama mimime poa ba'a: —¿Yajja miya jjashahuabaquiani Simón Pedro? ¿Ache dejjacuana shai emeshimese etii poaniya sosequiameecapoquiani oja meshijo eanijji sosejje? ¿A'a jiquio oja meshijotii ba'ecacuana oja epeejji poaniya sosequiameecani? ¿A'a peajaajjicuana ma queahueshanee poe ba'e'yohua sosequiameecani? ¿Ache dejjacuaa sosequiacani?—

26Pedrohua jama saja-ame acapoa oya ba'a: —Ojjaña joya peajaajji poanicuaa ma queahuesha poe ba'e'yohuacuaa sosequiacapoquije, comaaya.—

Jesosa jama popea-aiapoa ba'a: —Jamaya ameecapoquijji cuana, ojjaña joya oja meshineijotii ba'ecacuaa esosequiaca poanijje. 27Oya jayojja eya Eyacuiñajjija Bacuaejja poaniya oja equi-ai queapame anipoquijji ecuea sosequiaca-ajja. Jamatiiya eyaya sosequiapoquiaje oya queaquene epo poanijje enijje. Jamajjeya jjeyahuanei poquicue baeyasijje linea jeaa enahuasijje. Cua ebionei ba'eñaje nahuoo jjequicuayacue. Oja nabajo nequi oe eso'dojjo baje. Coma eso'dojjoya queasosehuiso ecuea poaje, miquea pea-ai esosequiajji. Jamajjeya coma eso'dojjo dojocue, sosequiacue cuana— jamaya poa.

Currently Selected:

MATEO 17: ESE

Highlight

Copy