MATEO 15

Etiiquianaja esohuicuana

(Mc 7.1-23)

1Majoya aje beca fariseo dejjacuana, pea Moisesja tehuehuohuijji poanicuana pea-ai poeapoa Jesosaque Jerusalén meshijo nequi poe. Jama huohuiajjame acañapoa cuaa Jesosa ba'a: 2—¿Yajjajje shai mi shajja-ajjajji poanicuana eseja etiiquianaja esohuicuanajo jjashajja-ajjaquiajja? Bobi ijjiajjimahuajo oja eme shacua-ajja, eseja etiiquianaja esohui jama po-ajja oya.—

3Jesosaa saja-acapoa cuana jama ba'a: —Miquianaya pea-ai, ¿yajjajje shai Eyacuiñajjija esohui etehuejo jjashajja-ajjaquiajja poani miquianaja etiiquianaja esohuinei eshahuabapoquiajji? 4Eyacuiñajjija esohui jama poani pea-ai ba'a: “Mique chii, mique nae pea-ai queapame apoquiacuetii. Oja esohuijo jjashajja-ajjaquipoquicue. Joya oja chiinijje, oja naenijje esohui queatai ajji poanicuana ca manomeeca'yojji oja mimishijo” jamaya poani ojaya Esohui. 5-6Miquiaaya caca huohuitaiaña cuana dejjaa oja chii, oja nae pea-ai jama acajji ba'a: “Ecue chii, jjeya ecuea miya eba'emeesahuajji pojjeama ecuea aquianacuana Eyacuiñajji quiajji eyaya huohuinaje, jamajjeya ecuea chama' mi quiajji.” Ojjaña joya jama mimime poanicuanaja oja chii, oja nae pea-ai eba'emeesahuajji pojjeama poaje miquianaja huohuijo jamatii Eyacuiñajjija esohui etehue jama poani oya queapame apoquiacue. Jamaya miquiaaya huohuitaiaña cuana. Jamajjeya quiaa Eyacuiñajjija esohui etehue cajaa aña miquianaja etiiquianaja esohuineitii eshahuabapoquiajji. 7Eyacuiñajjija epeejjinisho ca quiana ca oe poani. Yahuajonei esohuihuohuijji Isaías dejjaa esohui tehuecapoa yajja Eyacuiñajji poani miquianajo. Jama tehueme acapoa ba'a miquianajo:

8“Jiquio meshicuiñajjicuaa oja enabaa eya bihuiacani

jamatii ojaya esohuiquipajje eya cajaa acani,

quea-ehueshatii jayojja nequipoquiani.

9Jamatiiya ohuaya eya bihuiacani e'ejojonei pojjeama poaniya.

Jiquio ohua huohuicani esohuicuana ecuea esohui anishocani jamatii ojayaneitii ejjashahuabaquijji poani.

Jamaya quiaa huohuitaiaña.”

Jama tehuemeya Isaiasya acapoa yajja Eyacuiñajji poani miquianajo.—

10Majo aniya Jesosaa dejjacuana iyaacapoa esohui huohuijji. Jama huohuime acapoa ba'a: —Shajja-ajjaneineicue quiaa jiquio eya huohuije esohui. 11Joya ojjaña dejjacuanaja enabajje nobiquiani bobicuana cua ohua ijjiacani majo pojjeama Eyacuiñajjiya oya queamimishi poani bacani. Joya ojjaña dejjaja enabajje cuayaquiani esohui queataicuana caca oe queamimishi. Ma esohuicuanajoya Eyacuiñajjiya oya bacani queamimishi poani— jamaya poa.

12Majoya o shajja-ajjajji poanicuana jjanequichipiquiapoa Jesosa aniyasijje o huohuiya. Jama huohuime acapoa ba'a: —Jesosa, fariseocuana miquea esohuijo queaquene poani jjeya minijje.—

13Jamajjeya Jesosaa fariseocuanajo huohuicapoa cuana jama ba'a: —Bacue, ojjaña joya acuicuana ecue Chiija Eyajo anija bana pojjeama nequiani joya ecua fariseocuana jama pea-aiya. Ohuaya coma dejjacuana sajja jjequichiyojeameecaje'yo. 14Jamajjeya, ¡a'a fariseo dejjacuanajo queamete pojji! Oya joya ecua dejja cojjama' pea onijje cojjama' dojojji poani ojee oquejeaje'yo onijjetii jjaniyasijje jama pea-aiya poani oya— jamaya Jesosaa huohuicapoa cuana.

15Majoya aje Pedrohua Jesosa jama acapoa ba'a: —Ecuana queaja'a esohui huohuicue yajja poanijje maya esohui ajeo Eyacuiñajjiya dejja queamimishi poani bacaje.—

16Jesosaa saja-acapoa cuana jama ba'a: —¿A'a quianaja ma esohui queaquehuatii poani ma ecua peacuanaja jayojja pea-ai? 17Ojjaña cua dejjacuaa ijjiacani bobi enabajje oja see-aijo ba'eje. Majoya quijje cuayaqui'yani o seeajo. 18Ojjaña joya dejjaja ejjashahuabaquijji queamimishi enabajje cuayaquiani ca ojayanei esapadojjojo nequi cuayaquiani. Majoya oya queamimishi poani Eyacuiñajjiya bacani. 19Jamajjeya dejja, epona pea-ai oja sapadojjojje oya ebionei queamimishi jjashahuabaquiani. Majjeya oya queamimishi pocooani pea quecua'yojji epojji, epona ahuema' ani quehuacojjojji epojji, peaja huanasenijje ejaajji, peaja aquianacuana esiijji, pea siajje ajji epojji, pea mata-ajji epojji pea-ai. 20Jama jjashahuabaquime poajo dejjacuana, eponacuana pea-ai queamimishi poani Eyacuiñajjiya bacani. Eseja etiiquianaja esohui eme shacuajjima añajo pojjeama dejja, epona pea-ai mimishijji poani bacani Eyacuiñajjiya.—

Oe epona judío pojjeama jjashahuabaqui'yapoa Jesosajo

(Mc 7.24-30)

21Majoya aje Jesosa poquiapoa provincia Tiro provincia Sidón meshi ojeechipinei jaahuasijje. 22Ma meshijo Jesosa anijoya aje oe Canaancuiñajji epona jjanequichipiquiñapoa Jesosa aniyasijje. Oya taaañapoa jama ba'a: —Emeshimesenei, Davidja osecua, queayeno ejo jjashahuabaquicue e queapame a'yojjijo. Ecue bacuase eshahuamase yamijji ani, queaneenee pomeecani oya— jamaya poa.

23Jesosaja ca oya saja-ajjimanei poa onijje emimijji. Jamajjeya o shajja-ajjajji poanicuana Jesosa aniyasijje jjanequichipiquimajje onijje mimineiapoa jama ba'a: —Ma ani epona huohuiquicue o poqui'yojjijo. Oya ecuana nequiquiijje janobajjimanei taaajebeani oya esohuiya.—

24Jamajjeya Jesosaa jama acapoa epona ba'a: —Eyacuiñajjiya eya huoojeacanaje Israelcuiñajjicuana oopanahuasijje o asahuaa o huohuiya. Israelcuiñajjicuana jiquio ecua ovejacuana ecuaquisho'yo nequiani jama pea-ai poani. Mahuisocuanajoya eya poeyanaje.—

25Ma epona ca oja ecuioshajjajo nequioqueñaquiapoa Jesosa nequi cojjaneijo onijje emimijji. Oya jama poa ba'a: —Emeshimesenei, che mo asahuacue.—

26Jesosaa ma epona saja-acapoa jama ba'a: —Bacue, queapame pojjeama ebacuaja pahui ejjeshe'yojji iñahuehuacuana quia'yojji.—#15.26 Nota: Israelcuiñajjicuana jjabaquicapoa ebacuanei jama, peajaajjicuana ca ohuaya bacapoa iñahuehua jayojja, peajja.

27Majoya epona jama poa ba'a: —E'e Emeshimesenei, jamaya e'ejojonei aca-ajja. Jamatii iñahuehuacuaa bobishaa ijjiacapoqui'yani equimeseja mesajo ani oquequi.—

28Majoya Jesosaa epona saja-acapoa jama ba'a: —Epona, miya e'ejojonei jjashahuabaneiqui'yani ejo. Cua miya saneiaña eyaya aje mique bacuasejo— jamaya acapoa. Jamajjeya manei eshequi nequijotiiya aje oja bacuase shahuamase yamima' ponana'yapoa, quea-aja po'yapoa oya.

Jesosaa emanocuana jaa queahuiso jja-ajameequica'yapoa

29Jesosa majo aniya poquiapoa Galilea baesahuahuasijje. Majoya oya eyiyohuasijje jaasohuaquimajje aniñaquiapoa. 30Majotii o anijoya aje queahuisocuana oque jjachichaquicapoa. Emanocuana queahuiso yepea-aicapoa cuaa Jesosaque. Jeo'yoajjacuana, cojjama'cuana, mimiajjacuana, meshahuama'yo poanicuana, pea pea manome poanicuana pea-ai yecapoa cuaa Jesosa anichipineiyasijje. Ohuaya Jesosaa ojjañatii jja-ajameequica'yapoa ma emanocuana jaaca huisotii onaja ye. 31Jesosaa pea pea manome poanicuana jja-ajameequicaje'yo bamajje oya queaca'anee poanijo jjabaneineiquicapoa cuana. Ohuaya mimi'yoajjacuana mimimeecaje'yo bacapoa. Meshahuama'yo jjamejeapihuimeequicaje'yo bacapoa. Jeo'yoajja jeomeecaje'yo bacapoa. Cojjama'cuana jjacojjaja'ameequicaje'yo bacapoa cuaa pea-ai. Jamajojoya aje queahuisocuaa Israelcuiñajjija Eyacuiñajji bihuiacapoa.

Jesosaa 4.000 dejjacuana bobiacapoa oepojji pahuijo, nahuoojo pea-ai

(Mc 8.1-10)

32Majo aniya Jesosaa o shajja-ajjajji poanicuana iyaacapoa onijje emimijji. Jama mimime poa ba'a: —Eya queayeno jjashahuabaquiani jiquio anicacuanajo. Oya tres cahuime huiso jiquiojotii anica enijje, jjeya bobima' anica oja bobi ijjiajeyo epo. Eya jiquio anica jamatii bobima' ijiiaijjiajjima huoojeasapo'yoajja. Jiquio anicacuana ejeojjijje poquicaje'yo queamanonee pochana, jaabichaquije pojja'a bobimajo.—

33Jesosa shajja-ajjajji poanicuaa saja-acapoa jama ba'a: —¡De! Jiquiojo chama'nei bobi ejjeshejji queahuisoneecuana bobiajji, jiquio meshi se-ejjama'neinei.—

34Jesosaa o shajja-ajjajji poanicuana huohuiajjacapoa jama ba'a: —¿Achehuiso pahui acue oe miquianajaya che ani?— Saja-acapoa cuaa jama ba'a: —Siete huisomenei che pahui yani, oepojjinei nahuoosisi pea-ai ejaa.—

35Majoya Jesosaa ojjaña majo anicacuana huohuicapoa eanioquejji meshiyasijje. 36Jesosaa pahui siete huisome jjeshemajje nahuoosisi pea-ai Eyacuiñajji bihuiacapoa. Majoya pahuicuana mijimajje Jesosaa o shajja-ajjajji poanicuana pahui quiacapoa oja ma ejjachichaqui anicacuana quiajji. Jamajjeya o shajja-ajjajji poanicuaa pahui quiacapoquiapoa cuana oja ijjiajji. 37Ojjaña majo anicacuaa pahui, nahuoo pea-ai ijjiacapoa, jejjecapoa cuana. Majoya o shajja-ajjajji poanicuaa onaja ijjiajeyojjima ani chichaca'yapoa. Siete eshaja-aijo cuatajeameecapoa cuaa majo anicacuanaja ijjiajeyojjima ani bobiya. 38Ma Jesosaa bobiacapoa 4.000 huisome dejjacuana esico poa. Eponacuana, esho'iquiana pea-ai ca sicojjima poa. 39Majoya Jesosaa huoojeaca'yapoa cuana oja equiyasijje poqui'yohua. Ojjañacuana poqui'yajo Jesosa bishe'aiyasijje anisohuaqui'yapoa besapoqui'yohua o shajja-ajjajji poanicuananijjetii. Oya besapoqui'yapoa provincia Magadán meshiyasijje.

Currently Selected:

MATEO 15: ESE

Highlight

Copy