LUCAS 6

Ejomishocajji epojjajotii anosoai oepojji sajacananapoa cuaa

(Mt 12.1-8; Mc 2.23-28)

1Majoya aje quijje ejomishocajji sábado epojjajotii Jesosa o shajja-ajjajji poanicuananijje anosoai ani queyiyesamaneijje poquiapoa. Majje poquijeya o shajja-ajjajji poanicuaa queashoe pomajje anosoai oepojji sajacananapoa. Eso' iñajjojamajje ijjiacapoa. 2Beca fariseo dejjacuaa o shajja-ajjajji poanicuaa anosoaiso' ijjiacani bamajje oya huohuiajjacapoa jama ba'a: —¿Apiojji shai miquiaaya anosoai sajaña? Miquianaya ejomishocajji epojja shahuaba'yoajja.—

3Jesosaa ca fariseocuana saja-acapoa jama ba'a: —¿A'a miquianaja epajea'yo esohuicuana etehue jaa ma yahuajonei Davidya, onijje nequicapoa dejjacuaa acapoa queashoenee pomajje? 4David nobiquiapoa Eyacuiñajjija daquiequi aniyasijje. Ma daquiequijo ani pahuicuana eiya Eyacuiñajji quia, Davidya ijjiaca'yapoa. Ma onijje nequica dejjacuana quiapea-aicapoa. Eyacuiñajjija esohui Moisesja tehue ca jama poani ba'a: “Eyacuiñajjija equi-aijo echacochacopoquijji etii poani dejjacuanajanei ma pahui ijjiaca'yojji.” Jamaya Eyacuiñajjija esohui poani. Ma pahui ca Davidja, onijje nequicaja pea-ai ijjiaca'yoajja poa.—

5Majoya fariseo dejjacuana huohuipea-aicapoa Jesosaa jama ba'a: —Ejomishocajji sábado epojjajo, ¿ae pocajji, ae poca-ajja? Eyaya Dejjapojji epohua oya huohuipoquiajetii.—

Jesosaa meshahuama'yo poani dejja meshahuajji pomeeca'yapoa ejomishocajji epojjajotii

(Mt 12.9-14; Mc 3.1-6)

6Majoya aje quijje pea ejomishocajji epojjajo Jesosa judiocuanaja equi-ai ejjachichaquijji aniyasijje nobiquimajje sohuihuohuicapoa cuana. Ma equi-ai ejjachichaquijjijoya aje oe dejja ebañei emejje meshahuama'yo poani aniapoa. 7Moisesja tehuehuohuijji poani dejjacuaa, fariseo dejjacuaa Jesosa bacanequiatiiapoa a'a ohua meshahuama' dejja queapame pomeecaje'yo ejomishocajji sábado epojjajotii ebajji. Jesosaa ejomishocajji epojjajotii ma dejja meshahuajji pomeeca'yajo pea etii poanicuana huohuiquicaje cuaa o napameejji. 8Jesosaja ebatii poa yajja jjashahuabaquime poanicuana, jamajjeya dejja meshahuama'yo epo huohuicapoa jama ba'a: —Nequisohuacue, jiquiacua poecue ojjaña anicacuana cojjaneiyasijje enequijji.—

Jamajjeya ma dejjaa nequisohuamajje Jesosaja esohui jayojja acapoa. 9Majoya Jesosaa Moisesja tehuehuohuijjicuana, fariseocuana pea-ai huohuicapoa jama ba'a: —Eyaya miquiana jjeya huohuiajjaje, ¿yajja poani Eyacuiñajjija esohui Moisesja tehue ejomishocajji epojjajo? ¿A'a pea queapame acajji, a'a oya queanee pomeecajji? ¿A'a acuae dejja queamano jaa jjeya jiquio ejomishocajji epojjajotii jja-ajameequica'yojji, a'a manomeeca'yojji pojja'a?—

10Majo anicacuana bamajje Jesosaa dejja meshahuama'yo epo huohuicapoa jama ba'a: —¡Miquea eme jeaapihuihuicue!— Ohua oja eme jeaapihuihuicajeahuajotii oya meshahuajji ponana'yapoa. 11Jamajjeya fariseo dejjacuana, Moisesja tehuehuohuijjicuana pea-ai queaqueneneenee ponanacapoa Jesosanijje ohua ma dejja jama aca'yajo ejomishocajji epojjajo. Mimimimicapoa cuana ojee yajja oya Jesosa acajji.

Jesosaa 12 dejjacuana babacacapoa ona sohuihuohuiquinequijji epojji

(Mt 10.1-4; Mc 3.13-19)

12Majoya aje pea pojjajo Jesosa oe eyiyojamacoohuasijje jaasohuaquiapoa Eyacuiñajjinijje mimiya. Majotiiya oe meca Jesosa aniapoa Eyacuiñajjinijje mimianiya. 13Jjapojjaquiajo Jesosaa ojjaña o shajja-ajjajji poanicuana iyaacapoa 12 huisome ebabacajji. Ma 12 dejjacuana oja babaca ona sohuihuohuiquinequijji epojji pomeecapoa. 14Mahuisoya babacacapoa ba'a: Simón oya bajjani pea Pedro, Andrés Pedroja dohue, Santiago, Juan, Felipe, Bartolomé pea-ai. 15Pea ba'a: Mateo, Tomás, Santiago Alfeoja bacuaejja pea-ai. Pea Simón babacacapoa pea-ai. Oma' ca Roma dejjacuana botiamanei poa. 16Pea ba'a: Judas Santiagoja bacuaejja. Pea Judas Iscariote bajjani babacacapoa pea-ai. Oya quijje Jesosa iñameesahuajji poaje. Mahuisoya cuana poa Jesosaja babaca dejjacuana ona sohuihuohuiquinequijji epojji.

Jesosaa esohui huohuicapoa queahuisocuana pea meshicuanajo ba'eca

(Mt 4.23-25)

17Majoya aje Jesosa oja babaca dejjacuananijjetii eyiyoiyeaojo nequi jaaoquepishana'yapoa meshiaa-amahuasijje. Cuamaya queahuisoneenee ejjachichaqui anicapoa ma Jesosanijje poaequianicuana, queahueshanee ba'e poecuana pea-ai. Ma meshicuanajo ba'eca poe Jesosa baa mahuiso poa ba'a: queahuisocuana provincia Judea meshijo ba'eca, Jerusalencuiñajjicuana, Tirocuiñajjicuana bae-aisahuamijijje ba'eca, Sidoncuiñajjicuana baesahuamijijje ba'eca pea-ai. 18Mahuisoya Jesosaque ejjachichaqui anicapoa oja esohui shajja-ajjaa, emanocuana Jesosaja jja-ajaquimee'yohua yecapoa pea-ai. Ojjaña ma eshahuamase yamijjicuana Jesosaa eshahuamasecuana huoojeacuayaca'yapoa. 19Jamajojoya aje ojjañacuaa Jesosa yami napasa-acapoa ojjaña ma o napajji poanajecuana ohua queaca'aneetii poaniyajjejojo jja-ajaquimeecaje'yo bamajje.

Jesosaa huohuicapoa ache dejja e'ejojonei queabihui pocajji

(Mt 5.1-12)

20Jesosaa o shajja-ajjajji poanicuana bamajje jama huohuime acapoa ba'a: —E'ejojonei queabihui poani quiana joya jjabaquiani queacamajanee ojaya Eyacuiñajjima' eba'epoquijji aema' jayojja, comacuanaya quijje Eyacuiñajjiya ba'etiitiimeecaje'yo ma ohua ojjaña huoojeacapoquianitii meshi Eyahuasijje.

21—E'ejojonei queabihui poani quiana joya jjeya queashoenee ani, quijje quiana ca queajejjetii poaje'yo.

—E'ejojonei queabihui poani quiana jamatii jjeya queayenojje pani, quijje quiana soaje queabihuinee poani.

22—E'ejojonei queabihui poani quiana joya jjeya peacuaa quiana botiama acani ejo. Oja equijo ani jeacuayaca'yani quiana, mata-acani cuaa, miquianaja bajjani peajja jayojja acani cuaa ejo Dejjapojji epojo. 23Queabihuineenee popoquicue miquiaaya queapamenee ba'epoquinaje sosejje Eyahuasijje ani jjesheñaquije'yojojoya. Ma ecua yahuajonei ojaya etiiquianacuaa acapoquiapoa Eyacuiñajjija esohuihuohuijjipoacuana eshe nequiahuajo jama pea-aiya quiana jjeya queacamajanee acapoquiani cuaa.—

Jesosaa huohuicapoa ache dejja queayenonee pocajji

24Jesosaa huohuipea-aicapoa cuana jama ba'a: —Queayenoneetii capo'yahua quiana ca joya jjeya jiquio meshijo quea-aquianahuiso ba'epoquiani. Quijje miquianaja ejjeshejji pojjeama poaje'yo Eyacuiñajjija quia joya oe po'yoajja oja quia.

25—Queayenoneetii capo'yahua quiana joya jjeya queajejjetii poani. Quijje ca queashoenee poaje'yo.

—Queayenoneetii capo'yahua quiana joya jjeya queabihuinee soamajamajapoquianitii. Quijje queayenojje paneineinequije'yo.

26—Queayenoneetii capo'yahua quiana joya jjeya ojjaña meshijo ba'ecacuaa oja ecuioshajjajo nequiya miquiana bihuiacani. Oya jayojja Eyacuiñajjija esohuihuohuijji nisho poa dejjacuana yahuajonei ecuioshajjajo nequiya bihuiacapoquiapoa cuaa e'ejojonei poso.— Jama huohuimeya acapoa cuana Jesosaa.

Achajja ba'ecapoquijji jiquio mi botiama ajji poanicuananijje huohuipea-aicapoa

(Mt 5.38-48; 7.12)

27Jesosaa huohuitiicapoa cuana jama ba'a: —Miquianaya ecuea esohui shajja-ajjasapoanijo pea esohui miquiana huohuipea-aije ba'a: Mi botiama ajji poanicuana queajea apoquiacue, queapame o ba'emeesahuajji quiapoquiacue pea-ai. 28Minijje queatai mimijjicuana, jamatii oya huohuicue Eyacuiñajjija o queapame pomeejjijo. Mi mata-ajji poanicuanajo mimicue Eyacuiñajjinijje oja o queapame pomeejji. 29Ohua shemo cuiasejjacajje, shemo peajje nahuejjima acue ojaya o shemo pea-ai ecuiasejjajji. Mique daqui-ao jjesheca'yajo, daquieyami quiapea-ai'yocue ohua jjeshepea-aisa-acajo. 30Cua ohua sacaje miquea aquianacuana quiacue ohua huohuiajjacajje. Ohua miquea aquiana jjeshecajo, a'a oya ma aquianajo huohuiajja'yojji. 31E'e, jamajjeya quiaa peacuana queapamenee apoquiacue. Jiquio ecua miquianaya ojo queapamenee jjapomeequisapoani jama pea-aiya acue.

32—Miquiaaya joya mi queajea ajji poanicuana queajea apea-aiañajo, dejja mimishicuana jama pea-aiya ba'yani. ¿Yajjajo esohui queapame acaje mijo? Yajjajopishana. 33Miquiaaya oenei mi ba'emeesahuajji poanicuananei ba'emeesahuañajo pea-ai, dejja mimishicuana jama pea-aiya ba'yani. ¿Yajjajo esohui queapame acaje mijo? Yajjajo pishana. 34Miquiaaya peacuana miquianaja quia aquiana quijje ohua jeahuaca'yajo dojo sosejje jjesheañajo dejja mimishicuana jama pea-aiya ba'yani. ¿Yajjajo esohui queapame acaje mijo? Yajjajopishana. 35Mi botiama ajji poanicuana jamatii queajeanee apoquiacue quiaa. Oya ba'emeesahuapoquiacue queapamenee, miquianaja aquianacuana quiacue jamatii a'a ohuaya jeacahuaje'yo bajjimajotii. Majoya miquiaaya mi queapamenee ba'epoquinaje sosejje Eyahuasijje ani jjesheñaquije, Eyacuiñajji Eyajo queaca'aneetii nequija bacuacuana poaje. Eyacuiñajjiya ona queapame ba'epoquijji quiacapoquiani joya queamimishica'acuana jamatii o shahuaba-ajjanei ba'e. 36Jamajjeya jiquio ecua Eyacuiñajji Echii-aiya dejja mimishicuana queapame acapoquiani, jama pea-aiya apoquiacue cuana.

A'a peacuana niñebajji queamimishi poajo

(Mt 7.1-5)

37—A'a peacuana baneineijji oya queamimishi poani pea huohuijji. Jama poanijo Eyacuiñajjiya miquianaja mimishi ja'anei huohuicaje'yo o cojjaneijo nequiajo. Peacuana queamimishi poani bamajje a'a huohuijji o queanee pomeejji. Jama poajoya Eyacuiñajjiya miquianaja mimishi ja'anei huohuicaje'yo. Peacuanaja mimishi oe pajea'yocue. Jamajojoya Eyacuiñajjiya miquianaja mimishicuana pajeapea-aicaje'yo. 38Miquiaaya peacuana aquiana o queapame ba'epoquijji quiajo Eyacuiñajjiya quiana oya jayojja quiacaje. Ma ecua miquiaa pea quianaje, mahuisotii pojjeama miquiana quiacaje. Ohuaya ca queahuisoneenee quiacaje quiana. Miquiaaya peacuana queahuiso o queapame ba'epoquijji quiañajo oya jayojja Eyacuiñajjiya miquiana queahuiso quiapea-aicaje.— Jama huohuimeya acapoa cuana Jesosaa.

39Majoya Jesosaa pea esohui ebameesahuajjijo huohuicapoa cuana jama ba'a: —¿A'a oe dejja cojjama' nequiya pea onijje cojjama' queapame huidojocame oja emejo? Chojja. Ohua dojocajje beca dejja cojjama' nequi ojeetii oquequije'yo jjaniyasijje. 40Jiquio jama pea-ai ba'a: O shajja-ajjajji poanija o sohuihuohuijji poani dejja sohuihuohuica-ajja. Majoya ohua sohuihuohuijeyocajje oya o sohuihuohuijji poanaje jayojja pea-ai poaje.

41—¿Yajjajo shai miyaya peaja mimishi shahuabacuajiaña, jamatii caca oe miqueanei mimishi shahuabajjima aña? Miya ca jiquio jayojja jama poani ba'a: Peaja ecojjajo enobiqui jaa miyaya shabo che bisonei baña, jamatii miquea ecojjajo acui queaquemonee enobiqui jaa miquea bajjima aña. 42Jamaya pea huohuiaña ba'a: “Epeejji, che miquea ecojjaneijo shabo bisonei jaa eya cajjajeamee'yocue.” Jamatii miquea ecojjajo nobiqui acui queaquemonee jaa miquea bajjimanei poani. Queaquehuanee jama, ¿achajja peaja ecojjajo jaa shabo bisonei cajjajeaje'yo? ¡Miya queapamenee poso jjabaquiani Eyacuiñajjija epeejjinisho jja coma, mimishiama poani poso! Ebionei acui queaquemonee miquea ecojjajo enobiqui jaa cajjajea'yocue. Majoya queaja'a miyaya baje shabo bisonei miquea epeejjija ecojjajo jaa ecajjajea'yojji.— Jama huohuimeya acapoa cuana Jesosaa.

Jesosaa pea esohui ebameesahuajji huohuicapoa acuijjajjajo

(Mt 7.17-20; 12.34-35)

43Jesosaa huohuitiicapoa cuana jama ba'a: —Ojjaña joya acuicuana queapame nequi ojaya ejjajja queapame queabiquia poani o jayojjaya. Ojjaña acuicuana joya peajja nequi ojaya ejjajja pea-ai peajja, ijjiaca-ajja. 44Jamajjeya ojjaña acuicuana bacajji ojaya ejjajjajo. Chama'neinei higojjajja acuishajji acuijo. Chama'neinei uvajjajja jjono acuishajjijo. 45Oya jayojjaya dejjaja, eponaja ejjashahuabaquijjicuana bacajji. A'a oya queaja'a jjashahuabaquipoquiani, a'a queaquehua pojja'a esejaya bacajji achajja oya ba'epoquiani bamajje. Dejja oja ejjashahuabaquijji queaja'aneetii poanijo, oya queapame ba'eje. Dejja, oja ejjashahuabaquijji queaquehuaneetii poanijo, oya queamimishi ba'eje. Oya jayojja mimije cuana jiquio ecua oya jjashahuabaquipoquianitii jamaya.—

Jesosaa huohuitiicapoa esohui ebameesahuajji beca dejjaa equi iyacanajejo

(Mt 7.24-27)

46Jesosaa huohuitiica-aniapoa cuana jama ba'a: —¿Apiojji quiaa eya aña jama ba'a: “Emeshimesenei, e-esemese poani” jamatii ecuea esohui jayojja ba'eajjaa? 47Jjeya eyaya quiana pea esohui ebameesahuajji huohuije. Joya dejja e shajja-ajjajji poani, ecuea esohui jayojja ba'yaniya jiquio jayojja poani ba'a: 48Dejja queasapaja'aa equi iyajji ebionei teocanaje queadoepishana queaca'a equi iyajji. Majoya quijje ena queaquemonee poajo johui queaquemo oquenaje. Benitiitii poeyanaje equi aniyasijje. Oja iya equi queaca'a aninaje, benija jeabichajeajjima poanaje ojaya equi queaca'anee emacojo aninajejojoya. 49Peacuana ca ma dejja jama pojjeama. Comacuaa ecuea esohui shajja-ajjajeacani oya jayojja pea-ai ba'eajjajjejojoya. Jamajjeya oya ma ecua pea dejja queasapaquehuaa equi meshijajijotii huanasohuacuajicanaje jama. Majoya quijje ena queaquemonee poajo, johui queaquemo oquenaje. Majoya benitiitiiya equi meshijajijo ani jeabichajeacanaje. Chama'yotii acanaje.— Jamaya Jesosaa esohui huohuijeyocapoa cuana.

Currently Selected:

LUCAS 6: ESE

Highlight

Copy