LUCAS 24

Jesosa emano'yo jaa shequi'yapoa

(Mt 28.1-10; Mc 16.1-8; Jn 20.1-10)

1Majoya aje ejomishocajji epojja jjayejjequiajo domingo epojja jjapojjaquianijo mecajjeahuanei eponacuana meijjani jaahuasijje poquio'oyapoa oja apoa'ya shiyeshiye mejji. 2Ma eponacuaa meijjani jaahuasijje poquimajje mei queaquemo enaba cuiaca'ajji'ya enequiashiña'yo nequi bacañaquiapoa. 3Majoya eponacuaa meijjanidojjohuasijje nobiquimajje Emeshimesenei Jesosaja eyami chama' bacañaquiapoa. 4Jesosaja eyami chama' bamajje eponacuana queayenonee ponanapoa. Yajja Jesosa po'yonaje poso jjashahuabaquiapoa. Majotii beca dejja jayojja queadaquioshesiyoja'anee opejjejo nequi bajeacapoa eponacuaa. 5Eponacuana queametenee ecuioshajjajo anioquecuajimajje bahua jaaoqueapoa meshiyasijje. Ma beca dejja jayojjaa jama acapoa oya ba'a: —¿Apiojji shai dejja eshe nequi'yo sa-ajja'yaña emano'yocuana huananobiajji meijjaniyasijje? 6Chama' jjeya oya jiquiojo. ¡Oya ca shequi'yonaje! Shahuaba'yocue ma ohua provincia Galilea meshijo nequiya quiana huohuicanaje esohui jama ba'a: 7“Judío etii poanicuaa eya Dejjapojji epo dejjamimishicuana iñameecaje. Majoya dejjamimishicuaa eya acui ecuiata'apeejo me cacajeacaje emano'yojji. Jamatii tres cahuime huiso pomajje eya shequije'yo” jama huohuiajjameya quiana acanaje Jesosa mano'yojjimahua nequiya— jama huohuimeya acapoa ma beca dejja jayojjaa.

8Ohua jama acajje eponacuaa Jesosaja esohui shahuabaca'yapoa ma o huohuicanaje esohuiya. 9Majoya aje eponacuaa meijjanijo ani poqui'yomajje ojjaña ma o beca dejja jayojjaa Jesosajo esohui huohuicanaje huisotii Jesosaja babaca ona sohuihuohuiquinequijji poani 11 huisome dejjacuana, pea Jesosaja epeejjicuana pea-ai huohuicañaqui'yapoa. 10Eponacuana ma esohui huohuiñaqui'yojji poacuana ma bajjani poa ba'a: María Magdalena, Juana, María Santiagoja nae, pea eponacuana pea-ai. 11Jesosaja babaca dejjacuaa ca ma eponacuanaja esohui e'ejojonei pojjeama poso acapoa. Eponacuana jamatii bajjimajo queaquehuanee mimiani poso acapoa cuaa.

12Majoya aje Pedro nequisohuamajje cuajicuajipoquiapoa meijjani baa. Meijjani bañaquimajje yeeajjacapoa eyiyedojjohuasijje Jesosaja eyami chama'. Oenei daquiosheainei Jesosa bebojji'ya ani bacañaquiapoa, maneiya. Majoya Pedro equiyasijje poe'yomajje jjabaneineitiiquinequiapoa yajja shai Jesosa po'yonajejo.

Jesosa jjaja'aqui'yapoa beca o shajja-ajjajji poanaje dejjajo

(Mc 16.12-13)

13Ma pojjajotiiya aje beca dejja Jesosa shajja-ajjajji poanaje ejeojjijje poquiapoa pueblo Emaús meshiyasijje. Emaús Jerusalén meshi iyehueshanei aniapoa 11 kilómetros hueshame. 14Ma beca dejja ejeojjijje poquije mimimimipoquiapoa ma Jesosa aca'yonaje huisotiijo. 15O mimimimipoquianijotii Jesosa jjanequichipiquiapoa onijje ejeojjijje epoquipea-aijji. 16Ma beca Jesosa shajja-ajjajji poanajeya Jesosa bacapoa, jamatii oya pea dejja poso acapoa. 17Majotii nequiya aje Jesosaa oya huohuiajjacapoa jama ba'a: —¿Ajeo miquiana mimimimipoquinaje ejeojjijje?—

Majoya aje ma beca dejja queacojjayenonee nequiñaquiapoa so'o. 18Oe majo nequi dejja Cleofás bajjaniya Jesosa huohuiajjacapoa jama ba'a: —¿A'a che miya oenei Jerusalén meshijo aninajeja bajjima yajja acanaje cuaa jomajo jiquio epojjacuanajo?—

19Jamajjeya Jesosaa huohuiajjacapoa jama ba'a: —¿Yajja acanaje cuaa?—

Saja-acapoa jama ba'a: —Jesosa Nazaretcuiñajji dejja, Eyacuiñajjija esohuihuohuijji queaca'aneetii nequinaje. Ohuaya dejjaja ajjima'neineicuana acapoquinaje. Queasohuipojaneeya huohuicapoquinaje ojjañaja cojjaneijo nequiya. Queahuisocuaa, Eyacuiñajji pea-aiya queabihuiya oya bacapoquinaje. 20Jamatii Eyacuiñajjija equi-aijo chacochacopoquiani etii poanicuaa, pea eseja etii poanicuaa pea-ai oya iñameecanaje Roma etii poanija a'a oya queamimishinee poani ebajji. Majoya Roma etii poanicuaa oya acui ecuiata'apeejo me cacajeameecanaje o mano'yojji. 21Ecuaaya esenijje judiocuana romano dejjamasecuanajo Jesosaa nahuecaje'yo poso anaje. Jamatii oya yahuajopishana mano'yonaje, tres cahuime huiso oya emano'yo jaa jjeya. 22Eponacuana jiquio pojjajo mecajjeahuanei meijjani jaahuasijje poquinaje Jesosa yami ehuananobia ba'yohua nisho. Poe'yomajje ecuana jjajjasohuaquimeecanaje. 23Ojaya pa Jesosaja eyami ba'yojjimatii poanaje, jamajjeya oya equiyasijje poecuaji'yonaje. Beca ángel pa jjaja'aquinaje oque. Ma angelya eponacuana huohuicanaje Jesosa shequi'yonaje, oya jjeya eshe nequi'yo. 24Majoya quijjepishana pea ecuananijje nequicuana poquipea-ainaje meijjani jaahuasijje. Oya jayojja bacañaquinaje ma ecua eponacuaa huohuicanaje jama jayojjaya. Jesosa emano'yo jaa ba'yojjimatii pea-ai poanaje cuanaja.— Jamaya Jesosa huohuicapoa.

25Majoya aje Jesosaa oya huohuicapoa jama ba'a: —Miquiana queasapaca'a jayojja poani. Eyacuiñajjija esohuihuohuijjicuanaja tehuecuanajo queaja'a jjashahuabacuajiquiajja quiana. 26¿A'a acuae miquianaja bajjima Quito Eyacuiñajjija huoojea ojjaña nahue'yojji epojji queaneenee manoca'yojji poanaje? Majoya Eyacuiñajjiya oya queaca'aneetii, queasajajanee nequimeecaje'yo.—

27Majoya Jesosaa oya huohuineicapoquiapoa ebionei Moisesja tehuecuanajo, ojjaña ma pea Eyacuiñajjija esohuihuohuijji poacuanaja tehuecuanajo pea-ai. Ohuaya huohuicapoa ma esohui etehuecuana Eyacuiñajjija huoojea ojjaña nahue'yojji epojjijo tehuecapoa cuaa.

28Majoya aje pueblo Emaús meshi bañaquimajje ma beca Jesosa shajja-ajjajji poanaje dejja majotiiya aniñaquiapoa. Jesosa ca oenei ejeojjijje epoquijji nisho po-ajjapoa. 29Jamajjeya Jesosa shajja-ajjajji poanaje beca dejjaa oya jama acapoa ba'a: —Ecuananijjetii anicue jjeya, sinenaje coma. Jjeya queamisi popoquiani.—

Jamajjeya Jesosa oja equiyasijje nobiquiapoa onijje ecahuichichajji. 30Majotiiya Jesosaa onijje mesapejjejo eanioque aniya pahui iñacapoa. Eyacuiñajjinijje mimimajje pahui mijicapoa onijje ani dejja quiajji. 31Jesosaa jama acaje bamajje ma beca dejjaa e'ejojonei Jesosa eshe majo ani queaja'a bananaca'yapoa. Majoya Jesosa jjachamananaquiapoa. 32Ma beca dejja ojee mimimimiapoa jama ba'a: —Jesosaa eseya Eyacuiñajjija esohui etehue queaja'anee ejeojjijje huohuicajebenajejo eseya queabihuineenee poanaje.—

33Jamajjeya ma beca dejja ma mecajjetii poquio'oyapoa ejeojjijje Jerusalén meshiyasijje. Cuamaya 11 huisome Jesosaja babaca dejjacuana, pea o shajja-ajjajji poanajecuana pea-ai ojee ejjachichaqui ani bacañaquiapoa. 34Majo anicacuaa oya huohuicajjequiapoa jama ba'a: —E'ejojonei Jesosa shequi'yonaje. Oya jjanequija'aqui'yonaje Simonjo.—

35Jamajjeya ma beca Jesosa bapea-ai'yojji poanaje dejjaa huohuipea-aicapoa cuana ojjaña ma Jesosaa ejeojjijje esohui huohuicapoquinaje huisotiiya. Huohuipea-aicapoa cuana achajja oya e'ejojonei Jesosanei poani baca'yonaje Jesosaa onijje mesapejjejo aniya pahui mijicanajejo.

Jesosa jjanequija'aqui'yapoa o shajja-ajjajji poanaje dejjacuanajo

(Mt 28.16-20; Mc 16.14-18; Jn 20.19-23)

36Majotii ona mimimimianijo Jesosa ejjachichaqui anicayiyesamaneijo jjanequija'aqui'yapoa. Jama acapoa cuana ba'a: —Queaquijijjijajinee pocue quiana.—

37Ojjaña majotii anicacuana jjajjasohuaneineiquiapoa ojo, oya Jesosa dojjoshahua poso acacuaapoa. 38Jamajjeya Jesosaa huohuicapoa cuana jama ba'a: —¿Ajeo acuae quiana queameteneenee poani? ¿Apiojji acuae eyanei pojjeama poso aña quiaa? 39Baneineicue ecuea eme o miji pea-ai, ecuea ejeojji o miji pea-ai. Jiquia aje eya Jesosaneiya poani. Eya napacue miquianaja emeya, eya baneicue. Edojjoshahua caca yamima', sama' pea-ai. Miquiaaya eya baña edojjoshahuanei pojjeama. Eya ca iña yamijji, sajji miquiana jayojja.—

40Jama huohuime amajjeya Jesosa jjamebameequi'yapoa, jjajeojjibameequi'yapoa. 41Majo anicacuana Jesosa baneineimajje queabihuinee po-ajjacapoa, jamatii jjashahuabaneiqui'yojjima oya Jesosa e'ejojonei eshequi'yo nequijo. Jamajjeya Jesosaa huohuiajjacapoa cuana jama ba'a: —¿A'a acue che bobi yani ecue ijjiajji?—

42-43Majoya oya nahuoo edahua quiacajo Jesosaa ijjiacapoa ojjaña majo anicaja cojjaneijo aniya. 44Majoya ohuaya huohuicapoa cuana jama ba'a: —Eya queaneenee manomeeca'yonaje cuaa ma ecua eyaya miquiana huohuinaje mano'yojjimahua nequiya, jamaya. Oya jayojja eya aca'yonaje cuaa ma ecua Eyacuiñajjiya Moisés, pea oja sohuihuohuijji poa dejjacuana, peacuana Salmos bajjani tehuejji poacuana pea-ai tehuemeecapoquiapoa jama. Ma esohuicuana ejo ajeyocanaje cuaa.—

45Esohui jama huohuimajje Jesosaa majo anicacuana Eyacuiñajjija esohui ojo queaja'a bameeca'yapoa. 46Majoya Jesosaa huohuitiicapoa cuana jama ba'a: —Eyacuiñajjija esohui tehuecapoa cuaa ejo jama ba'a: “Quito, Eyacuiñajjija huoojea ojjaña nahue'yojji poani manomeecaje'yo cuaa. Majoya oya tres cahuime huiso emano'yo jaa shequije'yo. 47Majoya Quitoja bajjanijo queahuisocuana poquicaje ojjaña meshiyasijje majo ba'ecacuana sohuihuohuiya ona pea jjashahuabaqui'yome epojji oja mimishijo. Eyacuiñajjija oja mimishicuana cuijea'yojjijo ebionei sohuihuohuicaje cuaa Jerusalencuiñajjicuana.” Jama tehuemeya acapoa Eyacuiñajjija esohuihuohuijji poacuaa. 48Jjeya miquiaaya ojjañajaajjicuana huohuiquicue ojjaña ma miquiaaya banaje huisotii, ojjaña ma miquiaaya shajja-ajjanaje huisotii esohui pea-ai. 49Eyaya quiana Eyacuiñajjija Edojjoshahuapame quiaje jiquio ecua ecue Chiiya huohuicapoa jamaya. Jamajjeya jiquiojotii Jerusalén meshijo anisocue Edojjoshahuapame poeje ishoa-anijji. Edojjoshahuapame Eyajje nequioqueje miquianaque nequinobiquiya miquiana queaca'a nequimeesahuapoquiajji epojji.—

Eyacuiñajjiya Jesosa dojosohuaquica'yapoa Eyahuasijje

(Mc 16.19-20)

50Majoya aje Jesosaa ma ejjachichaqui anicacuana Jerusalén meshijo ani dojocapoa pueblo Betania meshiyasijje. Majotii ani Jesosa eme jeasohuamajje Eyacuiñajjinijje mimiapoa ojaya epeejjicuana majo anica oja queapame epomeejjijo. 51Onijje mimianitii Eyacuiñajjiya Jesosa dojosohuaquica'yapoa Eyahuasijje. 52Majo ejjachichaqui anicacuaa ecuioshajjajo nequiya Jesosa bihuiacapoa. Majoya queabihuinee poquio'oyapoa Jerusalén meshiyasijje huacuaya. 53Eyacuiñajjija equi-aiquiquibo nequiya Eyacuiñajji bihuiacapoquiapoa cuaa.

Currently Selected:

LUCAS 24: ESE

Highlight

Copy