LUCAS 21

Eahuemano'yoja quia Eyacuiñajjija yajji

(Mc 12.41-44)

1Jesosaa Eyacuiñajjija equi-aiquiquibojo aniya bacapoa dejja quea-aquianahuisoneecuaa bejjo Eyacuiñajjija yajji iyanobiacaje cajoncuanahuasijje. 2Ohuaya bapea-aicapoa oe epona eahuemano'yohua che oepojjineinei, beca eso'dojjo iyanobiacaje cajonhuasijje Eyacuiñajjija yajji. 3Majotii aniya Jesosaa huohuicapoa cuana jama ba'a: —Eyaya e'ejojonei esohui aña. Eyacuiñajjiya jiquio eahuemano'yoja eso'dojjo oja quia queahuisoneenee jayojja bacani. Ma pea quea-aquianahuisocuanaja bejjo oja quia ca Eyacuiñajjiya oepojji jayojja bacani. 4Joya quea-aquianahuisoneecuaa bejjo queahuiso quiacani, jamatii ojaya bejjo esejja pea queahuiso ejaatii. Jiquio eahuemano'yohua ca ojjañatii ojaya bobi jjeshejji nisho eso'dojjo oepojji ani quiajeyocanaje.—

Jesosaa huohuipea-aicapoa Eyacuiñajjija equi-ai quijje quecuajeabichajeacaje'yo cuaa

(Mt 24.1-2; Mc 13.1-2)

5Majo ani becacuana mimimimiapoa Eyacuiñajjija equi-ai queapameneejo ojjaña meicuana queapamenee enequijojo. Onaja quiacuana queasosehuiso Eyacuiñajji bihuiajji majo ani queapamenee poani bapea-aicapoa cuaa. Majoya Jesosaa huohuicapoa cuana jama ba'a: 6—Ojjaña jiquiojo ani Eyacuiñajjija equi-aijo miquiaaya jjeyanei baña huisotii quijje chama'neinei poaje'yo. Ojjaña meicuana quecuajeabichajeajeyocaje'yo cuaa. Chama'neinei che oema'nei mei pea meibiajje eanijji poaje'yo.—

Jesosaa huohuipea-aicapoa yajja poaje quijje oe-ejjenei epojja poechipiajo

(Mt 24.3-28; Mc 13.3-23)

7Majoya Jesosa huohuiajjacapoa cuaa jama ba'a: —Esohuihuohuijji, ¿acheshono shai jama Eyacuiñajjija equi-ai acaje'yo cuaa? ¿Ae shai bacaje cuaa ma epojja poechipiajo?—

8Jesosaa saja-acapoa cuana jama ba'a: —Jjajaahuananeineiquicue quiana oe peacuanaja esohuijo. A'a jjadasiameequijji quiana pea dejjacuanajo. Queahuisocuana poemajje jama quiana anishocañaje ba'a: “Jiquia aje eya Eyacuiñajjija huoojeaneiya miquiana nahue'yojji epojji.” Peacuaa mi ca jama anishocañaje ba'a: “Jjeya epojja oe-ejjenei apoa, poeyanaje.” Ohua esohui jama acajo, a'a oya equijje ajji, ¡a'a onijje po'yojji! 9Miquiaaya shajja-ajjaje queahuisocuana jjaquecuaquicaje'yo onijjejaajjicuananijje, peajaajjicuananijje pea-ai, a'a queamete pojji quiana majoya. Jamaya acapoquije queahuisojaajjicuaa oe-ejjenei epojja poechipijjimahuajo, apoa pojjima' so'o.—

10Jesosaa huohuitiicapoa cuana jama ba'a: —Eyaya oya esohuiya huohuio'oyaña jama ba'a: Oejaajjicuana jjaquecuaquicaje'yo peajaajjicuananijje. Oe meshicuiñajjicuanaja soldadocuananijje pea meshicuiñajjicuanaja soldadocuananijje jjaquecuaquicaje'yo. 11Queahuiso meshiyasijje meshi huehuahuehuaneije. Queahuiso meshiyasijje majo ba'ecacuana bobiyasijje pocaje'yo. Queahuisocuana pea-ai manocaje'yo emanomeejjicuanajo. Eyatahuatahuajo nequiya ma ojjañacuanaja bajjimaneitii poani bacaje cuaa. Queameteneenee pocaje jama bamajje.

12—Ma quijje queacamajaneenee epo'yojji poejjimahuajo miquiana napacaje cuaa. Sa-ajjacaje cuaa miquiana queanee pomeejji. Judiocuanaja equi-ai ejjachichaquijji aniyasijje quiana dojocaje. Cuamaya etii poanicuana cojjaneijo nequimeemajje miquiana jeanobiameecaje. Miquiana nequimeecaje pea-ai Roma emeshimese cojjaneijo miquiana queanee pomeejji ejo jjashahuabaqui'yanijojoya. 13Ma etii poanicuaa miquiana jama acajje ecuea esohui queaja'a huohuije etii poanicuanaja shajja-ajjajji. 14A'a jjeya jjashahuabaquijji so'o ache esohui mi jjanahuequijji etii poanicuanaja cojjaneijo nequiya huohuije. 15Miquiana o cojjaneijo nequijo eyaya miquiana huohuimeesahuaje esohui queaja'anee etii poanicuanaja yajja saja-ame miya yajji. Mimima'yo anije. 16Quijje miquianaja huapa pojjeamaneicuaa, echiimeseya, enaeseya, edohuemesecuaa, epeejjicuaa pea-aiya quiana dejjamasecuana iñameecaje. Beca quiana quecuapea-aicaje'yo cuaa. 17Ojjaña meshijo ba'ecacuaa miquiana botiamanei acaje ejo jjashahuabaqui'yanijojoya. 18Jamatii eyaya ojjaña quiana, ojjaña miquianaja ehuojjaña pea-ai nahuepoquiajetii. 19Jamajjeya oe onaa queacamajanee queanee pomeecajje queaca'atii nequipoquicue ejo. Eyacuiñajjiya e'ejojonei miquiana ba'emeesahuacaje.

20—Soldadocuana queahuisoneenee Jerusalén meshiyasijje poe ojjaña meshimijijje ejjanequiyiyoqui nequica bamajje e'ejojonei miquianaja eba poaje jjeyanei Jerusalencuiñajjicuana quecuajeyocaje'yo cuaa, ojjaña equicuana quecuajeabichajeacaje'yo pea-ai. 21Jamajjeya joya provincia Judeajo anica cacuajicuajipoqui'yahua eyiyocuanahuasijje. Joya ciudad Jerusalenjo ba'eca cacuayananacuajiqui'yahua. Joya Jerusalencuiñajjicuana cua epoqui poanaje, poeca'yoajja oja equiyasijje. 22Ma quijje ba'icuanajo Eyacuiñajjiya ojjañacuana queacamajaneenee pomeecaje'yo oja mimishijo ma ecua yahuajonei Eyacuiñajjija esohuijo tehuecapoa jayojjaya acaje'yo. 23¡Queacamajanee poaje joya oejji ani eponacuanaja, joya tojjojo ba'e bacuajji anicacuanaja pea-ai equehuapoquicuaji'yojji! Ojjaña meshijo ba'ecacuana queacamajaneenee pocaje'yo, queaneenee pomeecaje'yo pea-ai ojjañacuanaja mimishijo. 24Queahuisocuana yacuajeacaje'yo cuaa baase'becaa. Peacuana ca emejeyo dojojeacaje'yo queahuisojaajjicuanaja meshiyasijje ojo echacochacopoqui'yojji. Judío pojjeamacuana Jerusalén meshijotii nequicaje'yo. Eyacuiñajjiya macuana majotii nequimeecaje'yo ma ohua huohuicanaje eshequiaja huisotii.—

Quito, Dejjapojji epo, poeje o'oya quijje jiquio meshiyasijje

(Mt 24.29-35,42-44; Mc 13.24-37)

25Jesosaa huohuitiicapoa cuana jama ba'a: —Ma yahuajo onaja bajjima'neinei poanajeya bacoocaje queahuisocuaa ma pojjajotii yajja poaje'yo eyajo nequi eshequi, ba'i, majametacuana pea-ai. Bae-aijo beni queaquemonee, enashajoai jjaqueyaquije queashajjaquijjonee poequi shajja-ajjacaje cuaa. Jamajojoya ojjañacuana jiquio meshijo ba'eca queameteneenee pocaje'yo. Ojjañajaajjicuana yajja acuae pocajji jjashahuabaquime pocaje jama poaje bamajje. 26Yajja jiquio meshi acaje'yo jjashahuabaquimajje shemanonanaje cuana metejo. Ojjaña eyatahuatahuahuasijjeyee huehuahuehuaje janobajjimanei. 27Majoya ojjaña meshijo ba'ecacuana jjabajeasohuaquije eyahuasijje. Ja'anei bacaje Dejjapojji epo botejjee nequioqueje queaca'aneetiiya jeaja'aja'acaoqueje meshiyasijje. 28Jiquio esohui eya jama huohuiañajo queabihuinee pocue. Majoya jjabajeasohuaquicue eyahuasijje miquiana jjeshe'yojji nequioqueje miquiana nahue'yohua jjeyahuanei.—

29Jesosaa esohui ebameesahuajji higo acuijo huohuipea-aicapoa jama ba'a: —Baneineicue higo acui ebana, ojjaña pea acuicuana pea-ai. 30Oja aacuana shasha'yani eiña'yojji bamajje miquiaaya baña nayaja poechipi'yani. Miquianaja ebatii poani nayaja poeje jamatii peaja huohuijjima. 31Oya jayojja jiquio eya huohuiaña jama poaje bamajje miquianaja eba poaje Eyacuiñajjiya ojjañacuana huoojeacapoquijetii epojja poechipi'yani.

32—Eyaya quiana e'ejojonei huohuiaña. Eyacuiñajjiya jiquio eya huohuiaña esohui huisotii oya jayojjaya ajeyocaje'yo jiquio jjeya judiocuana eshe ba'eca manojeyojeyo'yojjimahuajo. 33Oe pojjajo eyatahuatahua, majametacuana nequijji epo, chama'yotii poaje. Jiquio meshi pea-ai, ojjaña ba'ecacuana nequijji epo, chama'yotii poaje. Ecuea esohui caca oe jiquio eyaya aña anitiitiipoquije'yo. Ojjañatii ecuea esohuicuana ajeyoje'yo.

34—Mique sapadojjo nahueneicue. A'a jjashahuabaquitiitiipoquijji mahuisonei miquianaja eba'ejjijo, jiquio meshijo anica aquianacuanajo. A'a queamimishi ba'ejji, a'a huoojji pea-ai. A'a epojja Jesosa poeo'oyajji miquiana apoa pojjeama nequiya poemeejji. 35A'a ba'ejji jiquio ecua ebiocuiñajjicuana acuichaaa oja jeojji ijjiaca'yani jama. Oya jamatii poaequiequi majo jjashahuabaquijjima ijjiaca'yani. Jamaya epojja e poeo'oyajji quehuajje poecuajije ojjañajaajjicuanaja bajjima. 36Jamajjeya miquiana jjeyanei jamatii ma epojja queacamajaneenee epo'yojji poejjimajo apoa epo'yo ba'ecue. Eyacuiñajjinijje mimitiianicue miquiana queaca'a pojjijo. Queacamajanee epo'yojji poeajo mimicue Eyacuiñajjinijje miquiana nahue'yojji jiquio jjeya eyaya miquiana huohuinaje huisotiijo. Majoya ba'icuana queacamajanee epo'yojji oe poajo miquianaya eya Dejjapojji epoja cojjaneijo nequije enahue'yo— jamaya Jesosa poa.

37Ojjaña pojjajo Jesosaa sohuihuohuicanequiapoa cuana Eyacuiñajjija equi-aiquiquibojo nequiya. Sinecuanei ca oya poquiapoa Olivos bajjani eyiyoiyeao nequiyasijje cahuiya. 38Jamajjeya queahuisocuana mecajjeahuanei Eyacuiñajjija equi-aiquiquibohuasijje poquimajamajapoa Jesosaja esohui shajja-ajjaa.

Currently Selected:

LUCAS 21: ESE

Highlight

Copy